Laulahi Fakahaga e Tapuakiaga Moli i Europa Uta
1 Ko e tau tagata fakamatala fakamakai he Kautu e tau Kerisiano he senetenari fakamua. Ne olioli a lautolu he ‘fakatokologa he taha aho ke he taha aho.’ (Gahua 16:5) Ko e fakamatala malolo ha lautolu ne hokotia e tapuakiaga moli ki Asia, Aferika, mo Europa, fua mai ai e heleheleaga olatia he tau tagata talitonu.
2 He vaha fakahiku nei, kua matutaki e tapuakiaga moli ke laulahi fakahaga, mua atu ke he tau motu i Europa Uta. He tau motu ne puipui kaka a tautolu ki lalo hifo he tau fakatufono ato hoko ke he mataulu he atu tau 1990, kua moua e tautolu mogonei e malikiti kehe lahi. Kua fakakite he 1999 Yearbook ko e ua e motu ia, ko Rusia mo Ukaraine, ne igatia hokotaki ke molea e 100,000 he tau tagata fakailoa ne fakalataha ke he fekafekauaga he tau tagata. He tau matakavi 15 he Kautaha Soviete tuai, tali mai he 1991 molea e 220,000 e tagata ne tukulele ki a Iehova mo e fita e papatiso! Ko e tupuaga mafiti nei ne kua lata tonu ai ke talaga loga e tau Fale he Kautu mo e tau Fale Toloaga fou ti pihia foki ke fakalahi atu e numera he tau fale he la.
3 He falu motu kehe ko e vala he Society Kingdom Hall Fund hane fakaaoga mogonei ke foaki fakakaitalofa ke he tau fakapotopotoaga he tau motu ne lata lahi mahaki ke moua falu Fale he Kautu ka e tote lahi e tupe moua mo e tau lekua fakatupe. He vahaloto ia Mati 1996 mo Oketopa 1998, ne talia he Sosaiete e tau ole fakakaitalofa ke he 359 e Fale he Kautu mai he tau la ofisa ke leveki aki 11 e motu i Europa Uta. Ko e tau tupe fakakaitalofa ne fakaaoga ke fakatau aki e vala fonua mo e tau koloa mo ta aki e tau Fale he Kautu fou mo e ke leveki aki e tau fakapotopotoaga he liu fakafou e tau fale. Ko e tau fakatino ne fakakite mai he na e kua foaki ki a tautolu e manatu he puhala he tau mena foaki ke he Society Kingdom Hall Fund he Tau Fahi Kaufakalataha mo e he falu motu ne aoga ai e tau matakainaga ha tautolu i Europa Uta.
4 He 1998, ne moua e Pulagaria 12 e pasene he malikiti, ti fiafia lahi e tau matakainaga he magaaho ne fakaulu ai e Fale he Kautu fakamua ha lautolu ia Aperila he tau ia. Ne olioli e Koroatia 4 e pasene he malikiti, ti he mogonei hane talaga atu foki he tau matakainaga e loga he tau Fale he Kautu ke fakalaulahi aki e tapuakiaga moli. I Hugari 80 e Fale he Kautu, ne fakaaoga ai he 144 e fakapotopotoaga. Kakano he mena nei ko e 235 e fakapotopotoaga he motu ia, 61 e pasene ne ha ha ai e fale he tapuakiaga. I Maketonia ko e fakaholoaga talaga he Fale he Kautu ne mau katoa ai ua e fale fou, mo e loga agaia hane talaga. He vaha mafana he 1999, ko e Fale he Kautu fakapiki ua ne mau katoa ai he taone lahi i Skopje. Ko e fale nei kua maeke ke fakaaoga kavi ke he ono e fakapotopotoaga.
5 He tau kua mole i Rusia, he fakaavelesi, ko e molea e 260 e tagata ne papatiso he tau fahitapu takitaha! He muitua e fifitakiaga ne fakaaoga he falu motu, kua fakatokatoka he la Rusia he mogonei 12 e Regional Building Committees he matakavi lahi ha lautolu, ke lagomatai e tau fakaholoaga talaga he Fale he Kautu he vaha i mua. He fahi tokelau a St. Petersburg, kua teitei mau tuai e talagaaga he Fale Toloaga fakamua he motu ia, ne 1,600 e nofoa. To putoia ai foki he fale, lima e Fale he Kautu ne igatia ai mo e 200 e nofoa. Ke lata mo e tau manako fakaagaga he tau matakainaga ha tautolu mo e loga he tau tagata fiafia i Ukaraine, 84 e Fale he Kautu ne mau katoa ai mo e 80 hane ta agaia.
6 Nakai kia olioli e tau loto ha tautolu ha ko e malikiti nei i Europa Uta? Ko fe ni e nonofoaga ha tautolu, ko e fakalaulahiaga he tapuakiaga moli kua fakamanatu ki a tautolu kua nakai fili e Atua mo e hana fakauka ko e puhala he fakamouiaga ma e “moto tagata tokologa.” (Fakakite. 7:9; 2 Pete. 3:9) Ko e fakamonuina ha tautolu haia ke fai vala tote he foaki atu ke he tupuaga fakaagaga he falu, pihia foki ke he tau motu mamao! Kua fakamafana mai he Fakatai 28:27 “ko ia kua ta age e tau mena ke he tagata nofogati, to nakai nofogati a ia.” Ko e mautali ha tautolu ke lagomatai totogi e fakamoleaga nei he talagaaga kua fua mai he “fakatatai” he tau koloa tino, he fakamalolo e tau tagata oti ke moua e fiafia he foaki mo e olioli kua fua mai he kitia hane laulahi fakahaga e tapuakiaga moli he lalolagi katoa.—2 Kori. 8:14, 15; Gahua 20:35.
[Fakatino he lau 3]
Săcele, Romania
[Fakatino he lau 3]
Maardu, Esetonia
[Fakatino he lau 3]
Sevnica, Solovenia
[Fakatino he lau 3]
Tiszavasvári, Hugari
[Fakatino he lau 4]
Jūrmala, Latevia
[Fakatino he lau 4]
Taurage, Lifuania
[Fakatino he lau 4]
Tallinn, Esetonia
[Fakatino he lau 5]
Prievidza, Solovakia
[Fakatino he lau 5]
Mátészalka, Hugari
[Fakatino he lau 5]
Belgrade, Iukosalavia
[Fakatino he lau 6]
Ruma, Iukosalavia
[Fakatino he lau 6]
Vranov nad Topl’ou, Solovakia
[Fakatino he lau 6]
Tornakalns, Latevia