Talaga Fale he Kautu he Lalolagi Katoa he Falu Motu Europa
1 Ke he tau hogofulu tau ne mole laia ko e gahua he Tau Fakamoli a Iehova ke he loga he tau motu Europa, putoia foki a Europa Uta, kua fakakaupa lahi. Loga he tau tutuaga, kua kaka lahi mahaki e tau fakakaupaaga. Kua uka ke taute ataina e tau feleveiaaga, mo e teitei ke nakai maeke ke fakaaoga e Fale he Kautu. Pete ia, he tau tau ne mole laia, “kua eke e Iehova e tau mena lalahi ma tautolu; kua fiafia ai a tautolu.”—Sala. 126:3.
2 Kamata he 1983, ko e lili kaka lahi ke he Tau Fakamoli a Iehova ne kamata agataha ke molu hifo. Hoko ke he 1989, ko Polani mo Hugari ne talia ke mailoga matafakatufono e Tau Fakamoli a Iehova. He 1991, ne talia ke tohia matafakatufono e Tau Fakamoli a Iehova i Rusia. Tali mai he magaaho ia, kua tupu olaola e gahua i Rusia mo e ke he tau matakau pule fakamua he Kautaha Soviete. Vahaloto ia Mati 1996 mo Oketopa 1998, ne talia he Kau Fakatufono 359 e ole tupe ma e Fale he Kautu mai he tau la ofisa ne leveki ke he 11 e motu Europa.
3 He kitekite a koe ke he tau fakatino he uho nei, manamanatu ke he tau mena lalahi mo e homo ue atu ne taute e Iehova ma e hana tau tagata. (Sala. 136:4) Kia fiafia he iloa kua fakaaoga fakamitaki e tau mena fakaalofa he fakamatakainaga he lalolagi katoa, he fakakite e mena ne talahau e Iesu, ne fakamau ia Ioane 13:35: “Ko e mena ia ke iloa ai he tau tagata oti kana, koe haku a tau tutaki a mutolu, ka feofanaki a mutolu.”
4 Lafi ke he tau motu Europa ne aoga mai he fakaholoaga lagomatai ke talaga e tau Fale he Kautu he tau motu ne nakai loga e koloa ko Romania, ne 36 e Fale he Kautu ne talaga tali mai ia Iulai 2000. He taha e puhala talaga ne fakaaoga ma e laulahi he ha lautolu a tau Fale he Kautu, ne 61 ne talaga i Ukaraine he tau 2001, mo e 76 foki he 2002. Mai he lagomataiaga he tau tupe foaki fakaalofa ke he gahua he Kautu, totou teau e tau Fale he Kautu ne kua talaga i Koroatia, Maketonia, Moldova, Pulukaria, Rusia, mo Serepia mo Montenegro.
5 Kua nakai mukamuka ke talaga e tau Fale he Kautu he falu motu, ti lahi e malolo kua fakaaoga ato maeke ke kamata e talagaaga. Lagaloga ne lahi e magaaho ne mole ke he tau fakatokaaga ia. Pihia foki, ko e totogi ke talaga e Fale he Kautu ke he fahi ia ha Europa kua mahomo atu e tau uka ke fakatatai ke he loga he tau fahi i Aferika po ko Amerika Toga. Pete ia, ha kua tupu lahi e numera ha lautolu ne tapuaki ki a Iehova, totou teau agaia e tau Fale he Kautu ne lata ke talaga he tau motu Europa ne nakai loga e koloa!
6 Ko e fulufuluola ha ia ke kitia e mafiti pihia he malikiti he gahua talaga nei he tau Fale he Kautu! Kua foaki e fakamatala mitaki ke he tau tuuta kaina he matakavi ne talaga ai, tuga ne fakakite he tau iloaaga loga. Ke he falu matakavi, ne nava e tau fakatufono he motu ke he agaga fakamakai ne fakakite he muitua ke he tau fakatokatokaaga tafale he motu.
7 Ne lautonu e perofetaaga ha Isaia hagaao ke he malikiti he tapuakiaga moli he magahala nei. Puhala mai he perofeta ne talahau tuai he Atua: “Ko au ko Iehova to fakaave au ke eke ke he hana ni a aho.” (Isaia 60:22) Moli, ko e tau hogofulu tau kua mole ne kua fakamoli ai e magaaho he Atua ma e malikiti i Europa Uta. Kia matutaki a Iehova ke liligi mai hana tau monuina ke he tau laliaga ha tautolu ke fakaave e talagaaga he tau Fale he Kautu ke he loga he tau motu he foaki atu foki e tautolu e lagomatai fakatupe ke he gahua he Kautu! To fua mai he mena nei e loga atu foki he tau Fale he Kautu ka lafi ke he tau motu ne nakai loga e koloa. To lafi ke he tupu he tapuakiaga mea ke he loga he tau fahi i Europa mo e lahi atu e fakamatala ka foaki ke hoko ke he ‘tau fahi oti he lalolagi.’—Gahua 13:47.
[Tau Fakatino he lau 3]
Ko e Fale he Kautu Moscow, Rusia
[Tau Fakatino he lau 4-6]
Tau Fale he Kautu Fou i Europa Uta
Strumica, Maketonia
Daruvar, Koroatia
Bitola, Maketonia
Sokal, Fahimotu Lviv, Ukaraine
Sofia, Pulukaria
Krasnooktyabrskiy, Matakavi Maykop, Rusia
Bački Petrovac, Serepia mo Montenegro
Plovdiv, Pulukaria
Tlumach, Fahimotu Ivano-Frankivsk, Ukaraine
Rava-Ruska, Fahimotu Lviv, Ukaraine
Stara Pazova, Serepia mo Montenegro
Zenica, Posinia mo Hesekovina
Sokal, Fahimotu Lviv, Ukaraine
Zhydachiv, Fahimotu Lviv, Ukaraine