Ko e Maveheaga Aoga Lahi

KUA fai maveheaga aoga lahi au. To fakamaama atu e au e mena ne takitaki au, ko e matua fifine Sepania, ke taute e maveheaga ia.

Ne nakai fai mafola mo e kaufakalataha e kaina he tau matua haaku. Ne momoko lahi e magafaoa ha mautolu he mate e tugaane fakahiku haaku he pakia he fā e tau tau he moui. Lafi ki ai, ne eke e tau mahani kelea he matua taane haaku ke uka e matua fifine haaku ke moua e fiafia he fakamauaga. Pete ni e uka ia, ne nakai mataofi a ia he feaki e tau mahani mitaki ke he tugaane lahi haaku mo au.

Fai magaaho, ti faihoana e tugaane haaku mo e faitaane foki au. Nakai leva, ti iloa kua moua e matua fifine haaku he kenesā, ne fakahiku ti mate a ia. Ka e ato mate, ne foaki e ia e koloa uho ma mautolu.

Ne taha mai he tau kapitiga haana ne tutala ki a ia hagaao ke he amaamanakiaga he Tohi Tapu ke he liu tu mai, ti talia he matua fifine haaku e foakiaga ke fakaako e Tohi Tapu. He vala fakahiku he moui haana, ko e fekau he amaamanakiaga i loto he Tohi Tapu ne kua moua ai e ia e kakano he moui mo e lagomatai a ia ke fiafia.

He magaaho ne kitia e mautolu e lauiaaga mitaki he fekau he Tohi Tapu ia ia, ne kamata e tugaane haaku mo au ke fakaako e Kupu he Atua. Ne papatiso au ko e taha he Tau Fakamoli a Iehova he taha e mahina ato fanau e tama ke uaaki haaku, ko e tama fifine fulufuluola ne fakahigoa e maua ko Lucía.

Ne aoga lahi ki a au e aho ne papatiso au. Taha kakano kua eke au mo tagata ha Iehova mogonei, he tukulele atu au ke fekafekau tukulagi ki a ia. Taha kakano ha kua maeke au ke talaage e tua haaku ke he tama taane mo e tama fifine fakahelehele haaku.

Ka kua nakai leva ti lekua e kakano ia ke uaaki he fiafia haaku. He magaaho ne fā e tau tau moui ha Lucía ne kamata a ia ke mamahi lahi mahaki e manava. He mole e tau kumikumiaga loga, ne fakamaama he tagata hulu (radiologist) kua taha e tuma ne lahi tuga e fua moli ne fakapiki ke he ate haana. Ne fakamaama he ekekafo kua moua a Lucía he neuroblastoma, ko e tuma kenesā ne mafiti e tupu. Ati kamata e taufetului ha Lucía mo e kenesā ke he fitu e tau, putoia e lagaloga e nofo he fale gagao.

Ko e Aga Foaki Noa

He tau tau uka nei, ne fa fakamalagaki e Lucía e manamanatuaga haku he tau kukukuku mo e tau figita mafanatia mai haana. Ko e puhala ne fehagai a ia ke he gagao ne kua nava ki ai e tau tagata gahua he fale gagao. Ne makai tumau a ia ke kaufakalataha mo e tau nosi, lagomatai a lautolu ke tufa iokati (yogurt), inu fua lakau, mo e falu mena foki ke he tau fanau ne nonofo he fale gagao he tau poko tata mai. Ne age foki he tau nosi taha e peleue tea ma Lucía mo e matahigoa ke fakamailoga aki a ia ko e “hagai he nosi.”

“Ne aamotia e loto haaku ha ko Lucía,” he manatu he taha tagata gahua he fale gagao. “Ko ia ko e tama fifine makaukau, tama manamanatu, mo e fiafia a ia ke vali fakatino. Ne aga fiafia mo e motua, ti lahi mahaki e motua he manamanatuaga haana.”

Ne moua e Lucía e malolō mo e lagotatai mai he Kupu he Atua. (Hepe. 4:12) Ne mauokafua a ia ka hoko ke he lalolagi foou, to “nakai tuai fai mate, po ke fakatutuku, po ke tagi, ti nakai tuai fai matematekelea,” tuga he mavehe mai he Kupu he Atua. (Fakakite. 21:4) He fiafia ke he falu, ne fakaaoga e ia e tau magaaho oti haana ke talahau e fekau he Tohi Tapu. Ko e amaamanakiaga mauokafua ha Lucía ke he liu tu mai ne lagomatai a ia ke fakatumau e loto manamanatu mitaki haana mo e fiafia pete he temotemoai e liga ke maulu e gagao haana. (Isaia 25:8) Ne tumau e mahani ia haana ato hoko ke he aho ne mate a ia he kenesā.

Ko e aho haia ne taute e au e maveheaga aoga lahi. Ne nakai maeke a Lucía ke hafagi e tau mata haana. Ne toto he matua taane taha lima haana ka e toto e au taha lima. “Ua tupetupe, to nakai toka e au a koe,” he fanafana age au. “Fafagu fakatekiteki. Ka ala hake a koe [he liu tu mai], to logona e koe e malolō. To nakai liu a koe ke mamahi he matematekelea, to ha ha tumau au mo koe.”

To fakamooli au mogonei ke he maveheaga ia. Ne iloa e au to nakai mukamuka e magahala fakatali. Ka e iloa foki e au kaeke ke falanaki fakauka ai ki a Iehova mo e fakatumau e mahani fakamooli haaku ki a ia, to ha ha i ai au ka liu tu mai a ia.

Ko e Maveheaga ha Lucía

Ko e fakafifitakiaga ha Lucía he fakauka, pihia mo e lalagoaga homo atu he fakapotopotoaga, ne lauia lahi mahaki ke he taane haaku, ne nakai tua fakalataha mo au. He aho ne mate a Lucía, ne tala mai a ia ki a au kua lata a ia ke filifilia e tau manatu haana. Fai faahi tapu gahoa he mole, ne ole a ia ke he motua he fakapotopotoaga ma e fakaakoaga Tohi Tapu. Ne nakai leva ti kamata agataha e taane haaku ke fina atu he tau feleveiaaga. Mo e lagomataiaga ha Iehova ne oti e ula haana, ko e taha mena ne nakai maeke ia ia ke taute he magaaho fakamua.

Ko e maanu ne logona e au he mate a Lucía ne kua nakaila galo katoatoa, ka kua fiafia lahi au ke he maveheaga ne toka hifo e Lucía. Kua fefakamafanaaki e maua a maua he iloa e amaamanaki homo ue atu he liu tu mai, pihia foki he manamanatu ke he magaaho ka liu a maua ke kitia a Lucía—haana tau mata fiafia mo e tau kauvehe ne vili ka mamali.

Ne lauia lahi e taha katofia ha ko e matematekelea he tama fifine haaku. He pogipogi he taha Aho Faiumu he tō e uha, ko e fifine ne fano e tama taane he aoga ia ne fano a Lucía ki ai ne hau ke he kaina ha maua. Ne kua mate foki taha tama taane haana ne 11 e tau tau moui he magaaho ia ke he gagao taha ia ni. He iloa e ia e mena ne tupu ki a Lucía, ne kumi e ia e kaina ha maua ti hau ke aahi mai a maua. Ne fia iloa a ia ko e fēfē au he fehagai mo e mate ha Lucía ti kua pulega ke fakatū e maua e taha matakau ke foaki lagomatai ke fakamafanatia e falu matua fifine he tau tuaga pihia.

Ne fakamaama e au kua fitā he moua e au e mafanatia mooli i loto he taha he tau maveheaga he Tohi Tapu, ko e maveheaga kua mua ue atu ke he ha maveheaga ka foaki he tagata. Ne ofo e mata haana he totou age e au ki ai e tau kupu ha Iesu ne fakamau he Ioane 5:28, 29. Ne talia e ia e fakaakoaga Tohi Tapu ti nakai leva kua logona hifo agataha e “monuina foki mai he Atua kua mua ue atu ke he tau mena oti kua manamanatu ki ai.” (Filipi 4:7) He fakaako tokoua a maua ke he Tohi Tapu, ne lagaloga e fakamaoki mo e manamanatu ko maua he lalolagi foou, kua fakafeleveia e tau fakahelehele ha maua he liu tu mai.

E, kua toka hifo he moui kū ha Lucía e maveheaga tukulagi. Kua lagomatai he tua haana ke pipi fakalataha e magafaoa ha mautolu he fekafekau ke he Atua, ti kua fakalahi foki e fakamakamaka haaku ke tu mauokafua ke he tua. Nakai fakauaua, kua ha ha ia lautolu oti ne kua galo e tau fakahelehele ka liga liliu tu mai e maveheaga aoga lahi.

[Fakatino he lau 20]

Ko e parataiso ne vali e Lucía