Talia Oti Nakai he Atua e Tau Puhala Tapuaki?
Tau tali fa mahani:
▪ “Kua takitaki atu e tau lotu oti ke he Atua.”
▪ “Ai tupetupe ke he mena ne talitonu a koe ki ai kaeke kua fakamooli a koe.”
Ko e heigoa ne talahau e Iesu?
▪ “Kia huhū atu a mutolu ke he gutuhala pukilu; ha ko e mena pulahi e gutuhala, ti laulahi foki e hala ke pu atu ke he malaia, kua tokologa foki a lautolu kua huhū atu ki ai. Ko e mena pukilu e gutuhala, ti lautote foki e hala ke pu atu ke he moui, kua tokogaogao foki a lautolu ke moua.” (Mataio 7:13, 14) Nakai talitonu a Iesu kua takitaki atu e tau lotu oti ke he Atua.
▪ “Tokologa ke pehe mai kia au ke he aho ia, Ko e Iki na e, ko e Iki na e, nakai kia ko e mena perofeta age a mautolu ke he hau a higoa, ko e hau a higoa foki ne vega ai e mautolu ki fafo e tau temoni, ko e hau a higoa foki ne eke ai e mautolu e tau mana loga. Ati tala age ai e au kia lautolu, nakai iloa ni e au a mutolu, kia o kehe a a mutolu ia au, ko mutolu ne eke e tau mahani kelea.” (Mataio 7:22, 23) Nakai talia e Iesu a lautolu oti ne pehē kua mumui ki a ia.
TOKOLOGA e tagata ō lotu ne tokiofa e tau taofiaga mo e tau aga tuai ha lautolu ni. Ka ko e heigoa ka tupu kaeke kua nakai lautatai e tau fakaakoaga nei mo e mena ne moua he Kupu he Atua, ko e Tohi Tapu? Ne fakakite e Iesu e hagahaga kelea he muitua ke he tau puhala tuai he tagata he magaaho ne pehē a ia ke he tau takitaki lotu he vahā haana: “Kua fakahui e mutolu e poaki he Atua ke he tau kupu toka tuai ha mutolu.” Ne holo atu a ia mogoia ke fatiaki e tau kupu nei he Atua: “[Kua] fakaheke mai kia au ke he tau laugutu ha lautolu; ka ko e tau loto ha lautolu, kua fakamamao a ia ia au. Kua tapuaki noa mai a lautolu kia au he fakaako e lautolu e tau poaki he tau tagata.”—Mataio 15:1-9; Isaia 29:13.
Kua aoga foki e tau mahani, nakai ni ko e tau taofiaga. Kua talahau he Tohi Tapu hagaao ke he falu ne pehē kua tapuaki ke he Atua: “Kua talahau e lautolu kua iloa e lautolu e Atua, ka kua fakatikai e lautolu a ia ke he tau gahua ha lautolu.” (Tito 1:16) Kua talahau e Tohi Tapu hagaao ki a lautolu ne momoui he vahā ha tautolu: “To manako lahi ke he tau mena ke fiafia ki ai, ka e manako tote ke he Atua. To ha i ai ia lautolu e gati he mahani Atua, ka kua tiaki e lautolu e malolo ne toka ai; kia kalo kehe a koe mo e tau tagata pihia.”—2 Timoteo 3:4, 5.
Kua latatonu ke fakamooli, ka e fai mena foki kua lata. Ko e ha? Ha kua maeke e tagata ke fakamooli ke he mena hepe. Ti kua aoga lahi e iloilo tonu ke he Atua. (Roma 10:2, 3) He moua e iloilo tonu nei ti gahua fakatatau ke he mena ne talahau he Tohi Tapu ka maeke ia tautolu ke fakafiafia e Atua. (Mataio 7:21) Mooli ai, kua putoia ke he lotu hako e fatuakiloto hako, taofiaga hako, mo e gahua hako. Ti ko e kakano he gahua hako ke taute e finagalo he Atua he tau aho takitaha!—1 Ioane 2:17.
Ka manako a koe ke iloa lahi ke he mena ne talahau he Tohi Tapu ki a tautolu hagaao ke he Atua, matutaki ke he Tau Fakamoli a Iehova ma e fakaako Tohi Tapu he kaina ne nakai fai totogi.
[Blurb he lau 9]
Kua putoia ke he lotu hako e fatuakiloto hako, taofiaga hako, mo e gahua hako