Ko e Tupe Kia e Punaaga he Fiafia Mooli?

KO SONIA ne fanau ai i Sepania. He vahā tote, ne fano a ia he tau feleveiaaga he Tau Fakamoli a Iehova mo e matua fifine haana. Ka ko e magaaho ne lahi hake a ia, ne fano a ia ki London, i Igilani, ti kamata agataha ke gahua he faahi fakatupe (bond broker).

Ne fiafia lahi a Sonia ke he gahua haana. Kua loga e tupe haana ne moua mo e leveki he tau tanakiaga tupe he tau tagata kumi lagomatai ki a ia. Kua fulufuluola lahi ti kua kautū a ia. Ne gahua tumau a Sonia ke 18 e tulā he aho, ti ko e falu pō ne ua po ke tolu ni e tulā ne mohe a ia. Ko e gahua ko e moui haana. Ati hiki fakaofo ai e tau mena oti haana. Ne lauia a Sonia he gagao stroke—liga fua mai he puhala moui tupetupe lahi haana. Ko e 30 laia e tau he moui haana.

Ne mate e taha faahi tino ha Sonia, ti nakai iloa tonu he tau ekekafo to liu nakai a ia ke vagahau foki. Ne fenoga fakamafiti atu e matua fifine haana ki Igilani ke leveki a ia. He kamata a Sonia ke liu fanofano, ne tala age e matua fifine haana ki a ia, “Fano fai au ke he tau feleveiaaga he fakapotopotoaga, ti lata a koe ke hau foki he nakai maeke au ke toka tokotaha a koe.” Ne talia e Sonia ke fano. Ko e heigoa e fua?

“Ko e tau mena oti ne logona e au kua mooli. Ko e homo ha ia,” he manatu e Sonia. “Ne fiafia au ke talia e fakaako Tohi Tapu mo e taha he tokologa ne feleveia mo au he fano fakamua ke he Fale he Kautu. Ko e tau kapitiga fakamua haaku ne nakai liu ahiahi mai ki a au, ka ko e tau kapitiga foou haaku kua mafanatia mo e loto fakaalofa.”

Ne maeke fakahaga a Sonia ke liu vagahau, ti holo ki mua foki e tuaga fakaagaaga haana. Nakaila taha ia e tau, ne papatiso a ia. Tokologa e kapitiga foou haana ne gahua mau he fekafekauaga Kerisiano, ti kitia e ia e fiafia mooli ha lautolu. ‘Manako au ke pihia foki,’ he manatu e Sonia. ‘Manako au ke foaki katoatoa e tau mena oti ki a Iehova ko e Atua!’ Mogonei, kua fekafekau mau a Sonia.

Ko e heigoa ne fakaako e Sonia mai he mena ne tupu ki a ia? “Pete he loga e tupe ne moua e au, ko e tau tupetupe mo e nakai haohao mitaki he gahua ne fakaatukehe mo e nakai fakafiafia aki au. Ne maeke ia au ke mailoga ko e mena ne mua atu e aoga he moui ko e fakafetuiaga mitaki mo e haaku a Matua he lagi, ko Iehova. Kua fiafia mooli au mogonei.”

“Ko e loto lahi ke he tau tupe, ko [e] vaka haia he tau mena kelea oti kana,” he tohi he aposetolo ko Paulo. “Ko e falu foki kua manako lahi ki ai, ti hehe ai a lautolu mai he tua, kua hoka e lautolu a lautolu ti ati ni ke he tau mena matematekelea loga.” (1 Timoteo 6:10) Ne fakamooli e Sonia e tau kupu nei.