Kautūaga i Kiliata ke 126 Aki
Puhala ke Eke mo Misionare Kua Kautū
KUA fakapotopoto e toloaga fiafia ke he Watchtower Educational Center i Patterson, New York, ma e magaaho uho lahi. Ko e Aho Faiumu, Mati 14, 2009, e aho kautūaga ma e vahega 126 aki he Aoga Tohi Tapu a Kiliata he Kolo Toko. Ko lautolu ne kautū mai ai kua amanaki ke fakafano atu ke he 22 e motu ke fakamatala e tala mitaki he Kautu he Atua.—Mataio 24:14.
Ko e oti laia e fakaakoaga hokulo ne lima e mahina he fakaako e Tohi Tapu nukua talaga ke lagomatai a lautolu ke eke mo tau misionare Kerisiano kua kautū. Ko e aho he kautūaga ne foaki ki a lautolu he vahega e magaaho fakahiku ke fanogonogo ke he fakatonuaga pulotu he puhala ke kautū ki ai.
Kamata e Aoga Kiliata ke fakaako e tau misionare he 1943, he manatu e Anthony Morris, ko e matakainaga he Kau Fakatufono he Tau Fakamoli a Iehova, ne eke mo tagata nofoa he fakaholoaga. Tali mai ai, kua lahi e matagahua ne taute ma e gahua fakamatala he lalolagi katoa.
Pete ne onoono hifo e tau tohikupu mo e tau Farasaio ke he tau aposetolo a Iesu ko e ‘tau tagata nakai ako mo e tau tagata goagoa,’ ne talahau he tagata lauga, ko lautolu ne totoko kua lata ke mailoga e vagahau fakatonu atu he tau aposetolo ne fua mai he fakalataha mo Iesu. (Gahua 4:13) Ko e fakamahani he tau tagata fakaako ati maeke ia lautolu ke vagahau fakatonu.
“Aua Neke Onoono ke he Tau Fofoga” e matakupu ne tutala fakalaulahi ki ai a Robert Ciranko, ko e tagata lagomatai ke he Komiti Tohia Tohi he Kau Fakatufono. Ne tala age e ia to nakai leva ti feleveia e tau tagata fakaako mo e tau tagata he tau aga mo e tau mahani fakamotu ne kehekehe lahi. Ka ko e fakamatala ki a lautolu to nakai fai lekua kaeke ke moua he tagata fakaako e aga a Iehova. Ko e tau kupu he fakaliliuaga ia Gahua 10:34, “Ne nakai onoono e Atua ke he tau fofoga,” kakano, kua nakai fakamahomo hake e ia e fofoga he taha ke he taha. “Nakai fakamailoga tagata e Atua.” (Gahua 10:35) “He moua e aga he Atua mo e onoono ke he tau tagata oti he kotofaaga ha mutolu kua maeke ke talia he Atua, to kautū mooli a mutolu ko e tau misionare haana,” he talahau e Matakainaga ko Ciranko.
“Ha Ha ia Mutolu e Tau Mena Oti ke Kautu Ai”
“Ne onoono e falu ke he kamela kua teteki,” he talahau e Samuel Herd, ko e matakainaga he Kau Fakatufono, “ka kua aoga lahi mahaki ai ke he moui he tutakale.” Kua ha ha i ai foki he tau misionare e tau mena ke kautū he tau fonua ne kotofa a lautolu ki ai. Lima e mena ka lagomatai a lautolu.
1. Fakaalofa ki a Iehova. (Mataio 22:37, 38) Kua fitā he fakakite he tau tagata fakaako e fifiliaga ha lautolu ke fekafekau ki a Iehova.
2. Iloilo ne toka he Kupu he Atua. Kua tanaki he kamela e tau mena kai ke he gako he hoe he tua haana. Ti kua fai mena kai tumau a ia ke kai mo e falanaki ai ke he tanakiaga kai ia he tau mogo fakalutukia. Pihia foki e tau misionare, kua nakai lata ke falanaki katoatoa hokoia ke he vala tala ne fakaako he Aoga Kiliata ka e lata ke fakamalolō fakaagaaga tumau a lautolu.
3. Fakaalofa ke he tau tagata. (Mataio 22:39) Kua ha ha he tau tagata fakaako e fakaalofa hofihofi noa ke he tau tagata.
4. Ko e aga fakamakai. (Salamo 110:3) Ka tote e malolō he misionare, to fakatupu lahi ai e Iehova e malolō ki ai.—Isaia 40:29.
5. Malolō he vahā fuata. Tuga ni e kamela ne fakaheke e tagata ke he taha faahi he tutakale, kua maeke he misionare ke “lukuluku” e matakainaga Kerisiano ne taufetului fakaagaaga. Ti kua lata ai ke lahi e malolō, ka kua ha ha he tau misionare e malolō he vahā fuata.
Falu Vala he Fakaholoaga
Ko e tau fua sikati e falu he tau mena mitaki ne fakafano e Iakopo mo mena fakaalofa ke he patuiki Aikupito, he talahau e Michael Burnett, ko e faiaoga Kiliata. (Kenese 43:11) Ha ha i loto he tau fua sikati e huhua lahi mahaki. Kua gau he tau tagata fakaako e tau fua sikati fakaagaaga loga ke he magahala he aoga ha lautolu. Ha ha i ai foki ke he tau fakaakoaga kua lata ia lautolu ke uta mo lautolu, ko e aoga he mahani fakalatalata ke he tau foakiaga a Iehova mo e fakaako ke fiafia ke he takatakaiaga foou ha lautolu.
Ko Mark Noumair, ko e faiaoga Kiliata foki, ne fakamaama ko e Kupu he Atua kua tuga “ko e mena [po ke, kato] ka moua ai e iloilo.” (Iopu 28:18) Kua lata ia tautolu ke hafagi e kato nei mo e fakaaoga ai e tau koloa i loto. Ka nakai tatai e matagahua misionare mo e mena ne amanaki ki ai e tau tagata fakaako, maeke ia lautolu ke manamanatu ke he aposetolo ko Paulo. Ne fakafano he tau tutaki a Iesu a Paulo ke he taone haana ke hiva e tau. He nakai fakamaama ko e ‘kapiniu kua fifili’ kua lata a ia ke gahua he taha matakavi kehe, ne gahua malolō a Paulo he matakavi kua ha ha ai a ia. (Gahua 9:15, 28-30) Ko e fakalilifu ke he tau fifiliaga ha Iehova kua liga paleko. Ko e taha ne taute pihia ko Ionatana. He mailoga ko Tavita ko e patuiki fifili a Iehova, ne fiafia a Ionatana ke lalago a Tavita.
He vala “Vagahau e Tau Fekafekau he Atua mo e Fakamalolō,” ne liu fakatātā he tau tagata fakaako e tau mena ne moua e lautolu he gahua fakamatala ke he aoga ha lautolu. Tokologa ia lautolu ne kamata e tau fakaako Tohi Tapu. Ko e fakataitaiaga ne mui mai, “Tauteute he Fakatokatokaaga a Iehova,” ne fakakite he tau hūhū tala ke he tokotolu e misionare kua leva. Igatia a lautolu mo e fakamaama e puhala ne fakamahani a lautolu ke kaufakalataha mo e fakatokatokaaga he Atua.
“Eke mo Misionare Fiafia”
Ko Gerrit Lösch, ko e taha matakainaga he Kau Fakatufono ne taute e vala pauaki he fakaholoaga, “Eke mo Misionare Fiafia.” Loga e matafeua ne mailoga ki ai kua “fuluola” ne nakai tamai e fiafia mooli, he talahau e ia. (Tau Fakatai 14:13; Fakamatalaaga 2:10, 11) Kua moua mai e fiafia tukulagi he taute e finagalo he Atua, pete he nakai mukamuka tumau e mena nei. Ko e gahua uka e aoga Kiliata ka e lahi e makona ne moua mai.
Loga e mena ne lafi ke taute e tau Kerisiano mooli ke fiafia. Ne tapuaki a lautolu ke he Atua monuina, po ke fiafia. (Salamo 33:12; 1 Timoteo 1:11) Ne nonofo a lautolu he parataiso fakaagaaga, ti mavehe mai he Tohi Tapu to nakai leva to parataiso mooli e lalolagi. Kua moua e lautolu e amaamanakiaga he moui—ke fekafekau ki a Iehova mo e fakaheke a ia. Lafi ki ai, kua ofania e Iehova mo Iesu a lautolu.
“To eke a koe mo misionare fiafia,” he lafi he tagata lauga, “ka iloa e koe e mahani fakalatalata.” He ofania e falu mo e ofania mai a lautolu ko e taha fua ia he fiafia. Ti ufiufi e tau hehē he falu ka e ua fakapuloa. Taute e mitaki ke he falu, lagomatai a lautolu ne lolelole, fetutalaaki ke he tau mena mitaki ne moua. (Salamo 41:1, 2; Gahua 20:35) Kua moua mai e fiafia he fakaaoga e moui ke gahua fakamatala.—Luka 11:28.
“Ti fano ko e misionare fiafia,” he fakaoti aki e Matakainaga Lösch, “he ha ha ai e fiafia latalata ka e hagaaki ke fakaheke ha tautolu a Atua fiafia, ko Iehova, mo e matutaki ke fakafiafia atu foki e tokologa.”
He mole e fakailoa he tau fakaalofa mai he tau motu kehe, ne age e Anthony Morris ke he tau tagata fakaako e tau tipiloma ha lautolu. Mole ia, ko e hukui he vahega ke 126 aki ne totou e tohi hagaaki ke he Kau Fakatufono. Ne fakakite he tau tagata fakaako i loto e manako fakaaue ha lautolu he ō he Aoga Kiliata.
He haana a fakaotiaga, ne talahau he tagata nofoa ko e “tau fatia mo e tau hokohoko” ne tutaki fakalataha e tino ke he tau puhala mo e tau fakatokaaga he “fekafekau fakamoli mo e loto matala” kua fakaaoga ke foaki ke he tau tagata a Iehova e tau huhua mitaki mo e takitakiaga. (Kolose 2:18, 19; Mataio 24:45) Ka kaufakalataha katoatoa e tau tagata ne paase i Kiliata mo e tau hukui fakauku he Atua to kautū a lautolu he taute e feua ha lautolu.—2 Timoteo 4:5.
[Puha he lau 23]
TAU NUMERA HE VAHEGA
Numera he tau motu ne fakalataha: 6
Numera he tau motu ne kotofa ki ai: 22
Katoa he numera he tau tagata fakaako: 56
Numera he tau hoa mau: 28
Evalesi he tau tau moui: 32.8
Evalesi he tau tau i loto he kupu mooli: 17.9
Evalesi he tau tau he fekafekauaga mau:13.5
TAU KOTOFAAGA HE VAHEGA
Kua kotofa e tau tagata ne paase ki Aferika Toga, Ukanata, Faso, Honotura, Kamerono, Kana, Kenia, Koseta Rikā, Kuatemala, Liperia, Matakasa, Mosamipiki, Nikarakua, Panamā, Parakuai, Penini, Perū, Polivia, Pukina Pulagaia, Togo, Romania, mo Siera Leone.
[Fakatino he lau 24]
Vahega ke 126 Aki kua Kautū he Aoga Tohi Tapu a Kiliata he Kolo Toko
Mai he laini i mua ki tua, mo e tau higoa kua mai he faahi hema ke he faahi matau he tau laini takitaha.
(1) Kirchhoff, K.; Nichols, C.; Guzman, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzman, J.; Jones, W.; Kambach, J. (8) Glover, A.; Ferreira, G.; Mason, E.; For te, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.