Moua e Au e Kakano Lahi he Moui

Ne talahau e Gaspar Martínez

Falu puhala, ko e tala haaku ke he tama taane mativa mai he maaga tua ne monuina he taone. Ka e to kitia e mutolu, ko e monuina kua moua e au ne nakai ko e mena ne amanaki mooli au ki ai.

KUA tupu hake au he maaga tua ne takalekale he atu tau 1930 he matakavi i Rioja he faahi tokelau i Sepania. He hogofulu e tau he moui, ne lata ni au ke oti mo e aoga, ka e he mogoia kua fitā au he iloa ke totou mo e tohitohi. Fakalataha mo e lafu haaku ne tokoono, ne maeke au he tau aho oti ke leveki mamoe po ke gahua he tau vala fonua nakai lalahi ha mautolu.

Ha kua mativa ai, ne manamanatu lahi a mautolu ke he tau koloa fakatino. Ne mahekeheke a mautolu ki a lautolu ne muhu koloa lahi atu ia mautolu. Pete ia, ne talahau he pisopo ko e ha mautolu a “maaga ne mua atu e mahani fakalotu i lalo hifo he levekiaga haana.” Ka e nakai mailoga e ia he mogoia, to tokologa ka toka e tau fakaakoaga faka-Katolika.

Ko e Kumi ke he Taha Mena ne Mua e Mitaki

Ne mau au mo Mercedes, ko e tama fifine he maaga taha ia. Nakai leva, ne taha e tama taane tote ha maua ke leveki. He 1957 ne hiki atu a maua ke he taone ne tata mai ko Logroño, ti fakahiku ne hiki mai oti e magafaoa haaku. Nakai leva ti mailoga e au ha ko e nakai fai fakaakoaga ma e gahua, kua gahoa e gahua ke moua e au e totogi lahi. Ne manamanatu au ko e moua mai la i fe e takitakiaga. Ne kamata au ke kumikumi ke he fale toka tohi he matakavi ia, pete ni he nakai iloa mooli e au ko e heigoa ka kumi.

Fakamui, ne logona e au ne kua foaki he polokalama letiō e fakaako Tohi Tapu ne taute ke he puhala he meli (mail). Nakai leva he oti e taute e au, ne matutaki mai falu Akoako Porotesano ki a au. He mole e lagaua e fina atu haaku ke he tau matakavi ne tapu a lautolu, ne maeke ia au ke kitia e taufetoko he tau tagata mahuiga he matakau. Ne nakai liu atu au he manatu na liga tatai ni e tau lotu oti.

Mokulu e Tau Hinafi he Tau Mata Haaku

He 1964, ne hau e fuata taane ne higoa ko Eugenio ke he kaina ha mautolu. Ko ia ko e taha he Tau Fakamoli a Iehova, ko e lotu ne nakaila logona ia e au. Ka kua fiafia lahi au ke tutala hagaao ke he Tohi Tapu. Ne manatu au na iloa mitaki e au e tau Tohiaga Tapu. Ne tali e au a ia he fakaaoga e tau kupu Tohi Tapu gahoa ne iloa e au he fakaakoaga haaku he puhala he meli. Pete he lali au ke lalago e falu fakaakoaga Porotesano, ka e he loto haaku ne nakai talitonu mooli au ki ai.

He mole e ua e fakatutalaaga loloa, maeke ia au ke talahau ne fakaaoga e Eugenio e Kupu he Atua tuga e tagata makaka. Ne ofoofogia au ke kitia e puhala ne kumi e ia e tau kupu Tohi Tapu mo e fakamaama e kakano, pete he mahomo hake e fakaakoaga haaku ke he haana. Ne fakakite e Eugenio ki a au mai he Tohi Tapu kua nonofo a tautolu he tau aho fakamui mo e to nakai leva ti tamai he Kautu he Atua e lalolagi parataiso. Ne ofogia au.—Sala. 37:11, 29; Isaia 9:6, 7; Mata. 6:9, 10.

Ne talia fiafia e au e fakaako Tohi Tapu. Kua teitei foou e tau mena oti ne fakaako e au, ti kua lauia lahi ai e loto haaku. Kua ha ha i mua haaku e tau amaamanakiaga foou, ko e mena ne foaki mai e kakano aoga lahi he moui. Kua oti tuai e kumikumi haaku. Ko e tau laliaga haaku ke fakaholo ki mua e tuaga he moui kua liga nakai aoga, mo e taufetului haaku ke fahia ke he tau lekua he kumi gahua kua eke mo tau mena fakateaga. To kaumahala foki e gagao mo e mate.—Isaia 33:24; 35:5, 6; Fakakite. 21:4.

Ne kamata agataha au ke tala age ke he tau magafaoa e tau mena haaku ne iloa, he fakamaama fakamakai ki a lautolu kua mavehe e Atua ke tamai e lalolagi parataiso ka momoui tukulagi ai e tau tagata tua fakamooli.

Talia he Magafaoa Haaku e Kupu Mooli he Tohi Tapu

Nakai leva, ne kavi ke he toko hogofulumaua a mautolu ne fifili ke feleveia he pale laā he tau Aho Tapu oti he kaina he agikolo haaku ke fakatutala e tau maveheaga he Tohi Tapu. Ne taute ai e mautolu ua ke he tolu e tulā he tau faahi tapu oti. He kitia e Eugenio kua tokologa lahi e magafaoa haaku ne fiafia ke he Tohi Tapu, ne fakatoka e ia ke igatia e magafaoa mo e magaaho fakaako.

Ne fai magafaoa foki au i Durango, ko e taone tote ne kavi ke 120 e kilomita he mamao, ne nakai nofo ai ha Fakamoli. Ti tolu e mahina he mole, ne fakaaoga e au ua e aho okioki ke ahiahi atu ki a lautolu ke fakamaama e tua moua foou haaku. He magaaho ia, kavi ke he tokohogofulu a mautolu ne fakapotopoto he tau afiafi oti, ti tutala au ki a lautolu ato mole e tuloto pō. Ne fiafia a lautolu oti ke fanogonogo. He hoko e ahiahi kū haaku ke he fakaotiaga, ne toka hifo e au falu Tohi Tapu mo e tau tohi faka-Tohi Tapu. Magaaho fakamui, ne matutaki tumau a mautolu.

He magaaho ne hohoko atu e Tau Fakamoli ki Durango—ne nakaila fai tagata ne fakamatala fakamua i ai—toko 18 e tagata ne moua e lautolu hane fakatali fiafia ke fakaako Tohi Tapu. Ne fiafia e Tau Fakamoli ke fakatoka ke igatia e magafaoa mo e fakaako Tohi Tapu.

Ato hoko e mogoia, ne nakaila manako a Mercedes ke he kupu mooli, kakano ni ha ko e matakutaku tagata ka e nakai ko e uka ke talia e tau fakaakoaga he Tohi Tapu. Ne pā e gahua he Tau Fakamoli a Iehova he magahala ia i Sepania, ti manatu a ia to fakaoti he tau pule e tau tama tokoua ha maua mai he aoga mo e to onoono hifo e tau tagata ki a mautolu oti. Ka ko e magaaho ne kitia e ia kua talia oti he magafaoa e kupu mooli he Tohi Tapu, ne manako foki a ia ke fakaako.

He ua e tau, toko 40 e tagata he magafaoa haaku ne eke mo Tau Fakamoli ti kua papatiso he fakamailoga e tukuleleaga ha lautolu ke fekafekau ke he Atua. E, ne fakalataha e magafaoa haaku ke he foliaga mo e amaamanakiaga haaku he moui. Logona hifo e au kua moua e au taha mena kua aoga lahi mooli. Ne loga lahi e tau monuina fakaagaaga ne moua e mautolu.

Holo ki Mua e Monuina he Moui he Motua Fakahaga Au

Ke he 20 e tau i mua, ne hagaaki au ke feaki e fanau taane tokoua ha maua mo e lagomatai e fakapotopotoaga he matakavi. He magaaho ne hiki au mo Mercedes ki Logroño, ne kavi ni ke 20 e Fakamoli he taone ia, ne kau ke 100,000 e tagata ne nonofo ai. Nakai leva, ne loga e matagahua ne moua e au i loto he fakapotopotoaga.

Ka ko e magaaho ne 56 e tau tau haaku he moui, ne pā fakalutukia he kamupanī haaku e fale gahua ne gahua ai au, ti ai fai gahua au. Na ha ha tumau ia au e manako ke fekafekau mau, ti fakaaoga e au e tau tuaga foou nei ke eke mo paionia. Ne nakai lahi e tupe fuakau haaku ne moua, ti nakai mukamuka ke moui he tupe ia. Ne gahua fakameā a Mercedes ke moua aki foki e maua e tupe. Ati maeke a maua ke leveki e magafaoa mo e moua e tau mena kua lata. Kua paionia agaia au, ti paionia fakakū a Mercedes he falu magaaho, mo e fiafia lahi mahaki ke he gahua fakamatala.

He tau tau gahoa kua mole, ne age tumau e Mercedes e tau mekasini ke he fifine fuata ne higoa ko Merche, ne fakaako ai ke he Tohi Tapu he vahā tama. Ne fiafia a Merche he totou e tau tohi ha tautolu, ti mailoga e Mercedes kua loto fakaaue agaia a Merche ke he kupu mooli he Tohi Tapu. Fakahiku, ne talia e Merche e fakaako Tohi Tapu ti kamata ke holo mitaki atu ki mua. Ka ko e taane haana ko Vicente, ne lahi e inu kava ti nakai mau e gahua. Fakahiku ai, ne nakai leveki fakatupe e ia a Merche; ko e fakaaoga hehē haana he kava kua fakahagahaga kelea e fakamauaga ha laua.

Ne tala age e hoana haaku ki a Merche ke tutala a Vicente ki a au, ati taute pihia e ia. Mole e ahiahi atu lagaloga, ne talia e ia e fakaako Tohi Tapu. Ne kamata a Vicente ke hiki, ti fai aho ne nakai inu kava a ia. Ati katoa e faahi tapu po ke molea ai he nakai inu kava a ia. Fakahiku ai, ne tiaki katoatoa e ia e inu kava. Ne kitia mitaki e holo ki mua he tuaga mo e foliga haana, ti fakalataha e magafaoa haana. Ko e magafaoa katoa haana, putoia e hoana mo e tama fifine haana, ne lalago fakalahi e fakapotopotoaga tote he Canary Islands ne nonofo ai a lautolu mogonei.

Liu Onoono ke he Moui Fai Kakano Lahi

Pete kua mamate e falu he magafaoa haaku mogonei ne iloa e tau fakaakoaga he Tohi Tapu he tau tau kua mole, kua matutaki e magafaoa ha mautolu ke tupu, ti kua fakamonuina lahi he Atua a mautolu. (Fakatai 10:22) Ko e fiafia ha ia ke kitia kua teitei matutaki oti a lautolu ne kamata fakaako e Tohi Tapu he 40 e tau tau kua mole—fakalataha mo e tau tama mo e tau mokopuna ha lautolu—ke fekafekau tua fakamooli ki a Iehova!

Kua tokologa e magafaoa tino haaku mogonei kua eke mo Tau Fakamoli, tokologa ia lautolu ko e tau motua, tau fekafekau lagomatai, mo e tau paionia. Ko e tama taane uluaki haaku mo e hoana haana hane gahua he la ofisa he Tau Fakamoli a Iehova i Madrid, i Sepania. He eke au mo Fakamoli, ne kavi ke he 3,000 ia mautolu i Sepania. Mogonei kua molea e 100,000. Ne fiafia lahi mahaki au ke fekafekau mau, ti loto fakaaue lahi au ke he Atua ma e moui homo ue atu he fekafekauaga haana. Pete he tote e fakaakoaga, kua maeke au ke eke mo leveki takaiaga falu magaaho.

He falu tau gahoa kua mole, ne iloa e au ko e maaga ne tupu hake ai au kua teitei oti e tau tagata he ō kehe mai ai. Fakahiku ne fakaohooho he mativa e tau tagata oti ke tiaki e tau fonua mo e tau kaina ha lautolu he kumi e moui mitaki. Fiafia ai, kua tokologa lahi a lautolu ia ne hiki—putoia ai au—ne moua e tau koloa uho fakaagaaga. Ne ako e mautolu kua fai kakano mooli e moui ti ko e fekafekau ki a Iehova kua tamai e olioli ne mua atu.

[Fakatino he lau 32]

Teitei haia oti e magafaoa he Matakainaga ko Martínez he kupu mooli