Tala Tuai 4: Atua Tolu Taha e Atua

Ko e heigoa e kamataaga he tala tuai?

“Liga lagā mai e manatu ko e taofiaga Atua Tolu Taha ko e kumikumiaga fakahiku ne moua ke he matahiku he senetenari ke 4 aki. Mooli e mena nei ka manamanatu ki ai . . . Ko e fakatokaaga he ‘taha e Atua i loto he tolu e Tagata’ ne nakai malolō e fakavēaga, ti nakai gahuahua katoatoa ke he moui Kerisiano mo e tuaga he tua, ato hoko ke he matahiku he senetenari ke 4 aki.”—New Catholic Encyclopedia (1967), Volume 14, lau 299.

“Ne fakapotopoto auloa e Tūfono ha Nicaea ia Me 20, 325 [V.N.]. He takitaki ni e Constantine, kua taki fakamalolō e tau tutalaaga, ti fakatū e ia e matapulega . . . ko e fakatokaaga uho lahi he fakakite e fakafetuiaga he Keriso mo e Atua he taofiaga ne fakatoka mai he tūfono, ‘he taha e tino mo e Matua.’ . . . He fakalilifu ke he pule atu motu, tokoua ne pisopo ne nakai saini e taofiaga, pete kua tokologa ia lautolu ne nakai felauaki mo e taofiaga ia.”—Encyclopædia Britannica (1970), Volume 6, lau 386.

Ko e heigoa ne talahau he Tohi Tapu?

“Kua puke a [Setefano] ke he Agaga Tapu, kua mataono ke he lagi, kua kitia atu e lilifu he Atua, mo Iesu ha ne tu ke he fahi matau he Atua; ti pehe mai a ia, Kitiala, kua kitia e au e lagi kua maihi mai, mo e Tama he tagata ha ne tu ke he fahi matau he Atua.”—Gahua 7:55, 56.

Ko e heigoa ne fakamaama he fakakiteaga nei? He puke ke he malolō gahuahua he Atua, ne kitia e Setefano a Iesu ne “tu ke he fahi matau he Atua.” Maaliali ai mogoia, ne nakaila eke a Iesu mo Atua he mole e liu tu mai haana ke he lagi ka kua eke a ia mo mena fakaagaaga ne kehe. Nakai talahau ha mena hagaao ke he tagata ke tolu aki ne ha ha he faahi he Atua he tala nei. Pete he lali ke kumi e tau kupu he Tohiaga Tapu ke lalago e taofiaga ke he Atua Tolu Taha, ko e patele ko Marie-Émile Boismard i Tominika ne tohia he tohi haana À l’aube du christianisme—La naissance des dogmes (At the Dawn of Christianity—The Birth of Dogmas): “Ko e talahauaga kua tolu e tagata i loto he taha e Atua . . . ne nakai haia i loto he Maveheaga Foou.”

Ko e taofiaga ne omoomoi e Constantine ne foli ke fakagata aki e feveheveheaki he Lotu he senetenari ke fāaki. Ka kua lagā mai foki e taha matakupu: Ko Maria kia ko e fifine ne fanau a Iesu, ko e “Matua Fifine he Atua”?

Fakatatai e tau kupu Tohi Tapu nei: Mataio 26:39; Ioane 14:28; 1 Korinito 15:27, 28; Kolose 1:15, 16