Tala Tuai 5: Maria e Matua Fifine he Atua

Ko e heigoa e kamataaga he tala tuai?

“Ne lahi e fakalilifu ke he matua fifine he Atua he magaaho . . . ne tokologa e tagata pouliuli ne tafe atu ke he lotu. . . . Ko e ha lautolu a taofiaga fakamooli mo e fakalotu [lautolu ne pouliuli ne liliuina ke he faka-Kerisiano] ne fitā he fakatū ke he loga lahi e tau tau ne mai he vahega fakalotu he ‘matua fifine ne mua’ he atua fifine mo e ‘taopou he Atua.’ ”—The New Encyclopædia Britannica (1988), Volume 16, lau 326 mo e 327.

Ko e heigoa ne talahau he Tohi Tapu?

“Ko e fatu ne fai a koe, ti fanau e koe e tama tane, ti fakahigoa e koe a ia, ko Iesu. To homo a ia, to talahaua a ia ko e Tama hana ne Mua ue atu. . . . Ko e mena ia ke talahaua ai e tama tapu, ko e Tama he Atua.”—Fakalilifa ha mautolu; Luka 1:31-35.

Kua fakakite fakamaali he kupu ia he Tohiaga Tapu ko Maria ko e matua fifine he “Tama he Atua,” nakai he Atua. Maeke kia ia Maria ke lakilaki he manava haana a Ia ka kua ‘nakai maeke he tau lagi’? (1 Tau Patuiki 8:27) Nakai talahau pihia a Maria. Ko e fakaakoaga he Atua Tolu Taha ne fakatupu e fakagogoa hagaao ke he tuaga a Maria. He fakahigoa a ia ko e Theotokos (ko e kupu Heleni kakano “ko ia ne fanau e Atua”), po ke “Matua Fifine he Atua,” ko e Tūfono a Efeso he 431 V.N., ne fakatū e tapuaki ki a Maria. Ko e taone ha Efeso ne fakahoko e fonoaga nei he lotu ne kua leva lahi he eke mo lotouho he tapuaki tupua he fakamanatu e atua fifine fanau loga ko Tiana.

Ati loga ai e vala kehekehe he tapuakiaga ke he tupua ko Tiana ne “to hifo mai ia Tia,” tuga e tau fakapapahiaga ne kaputia ai e tapuaki ki a Maria. (Gahua 19:35) Ko e taha aga foki ne holofa atu ke he fakaakoaga Kerisiano ko e fakaaoga he tapuakiaga e tau fakatai ki a Maria mo e falu.

Fakatatai e tau kupu Tohi Tapu nei: Mataio 13:53-56; Mareko 3:31-35; Luka 11:27, 28