Tumau ke he Puhala Moui ne Mua Ue Atu!
“Ko e mena ka momoui a tautolu, kua momoui ni ha ko [Iehova].”—ROMA 14:8.
1. Ko e heigoa ne fakaako e Iesu hagaao ke he puhala moui ne mua ue atu?
MANAKO a Iehova ke olioli e tautolu e puhala moui ne mua ue atu. Maeke e tau tagata ke momoui he tau puhala kehekehe, ka e taha ni e puhala ne mua ue atu. Nakai fai mena mitaki foki ke taute he tau momoui ha tautolu ka kia fakatatau ke he Kupu he Atua mo e fakaako mai he haana Tama, ko Iesu Keriso. Ne fakaako e Iesu e tau tutaki haana ke tapuaki ke he Atua mo e agaaga mo e fakamooli, ti poaki e ia ki a lautolu ke taute tutaki. (Mata. 28:19, 20; Ioane 4:24) He momoui fakatatai ke he tau fakaakoaga a Iesu, kua fakafiafia e tautolu a Iehova mo e olioli e monuina Haana.
2. Tali atu fēfē e tokologa ke he fekau he Kautu he senetenari fakamua, ti ko e heigoa e kakano ke ha ha ai ke he ‘Puhala Nai’?
2 Ka eke a lautolu “ne kotofa ke he moui tukulagi” mo tau tagata kua tua mo e papatiso ai, ha ha ia tautolu e tau kakano aoga ke tala age ki a lautolu, “O mai ke he puhala moui ne mua ue atu!” (Gahua 13:48) He senetenari fakamua he Vahā Nei ha tautolu, totou afe e tau tagata mai he tau motu kehekehe ne talia e kupu mooli ti fakakite ke he tau tagata e fakamooliaga he tua ha lautolu ke he Atua he papatiso. (Gahua 2:41) Ne ha ha ai e tau tutaki fakamua ia ke he ‘Puhala Nai.’ (Gahua 9:2; 19:23) Latatonu e puhala nei ha ko lautolu ne eke mo tau tutaki he Keriso ne muitua ke he puhala moui ne fakamatapatu ke he tua ki a Iesu Keriso mo e muitua ke he fifitakiaga haana.—1 Pete. 2:21.
3. Ko e ha ne papatiso e tau tagata a Iehova, ti tokofiha ne tanumia he hogofulu tau kua mole?
3 Ko e gahua taute tutaki ne mafiti lahi he tau aho fakamui nai ti kua taute he mogonei ke molea e 230 e motu. He hogofulu tau kua mole, ne molea e 2,700,000 tagata ne taute e fifiliaga ke fekafekau ki a Iehova mo e papatiso he fakakite e tukuleleaga ki a ia. Ko e evalesi a ia ne molea e 5,000 tagata he tau faahi tapu takitaha! Ko e fifiliaga ke papatiso ne fakavē ke he fakaalofa ma e Atua, iloilo ke he tau Tohiaga Tapu, mo e tua ke he mena kua fakaako e lautolu. Ko e papatisoaga ko e lakaaga he tau momoui ha tautolu, ha kua fakamailoga e kamataaga he fakafetuiaga tata mo Iehova. Ko e fakakiteaga foki he mauokafua to lagomatai e ia a tautolu ke fekafekau fakamooli ki a ia, tuga ni he lagomatai e ia haana tau fekafekau i tuai ke ō he haana puhala.—Isaia 30:21.
Ko e Ha ne Papatiso?
4, 5. Talahau falu he tau monuina mo e tau aoga he papatiso.
4 Liga kua fitā he uta e koe e iloilo he Atua, ti taute e tau hikiaga he moui haau, ti ko e tagata fakailoa nakaila papatiso mogonei. Kua fakamalolō lahi e tupu ki mua pihia. Ka kua taute nakai e koe e tukuleleaga ke he Atua he liogi, ti kua amaamanaki nakai a koe ke papatiso? Mai he fakaako haau ke he Tohi Tapu, liga iloa e koe mogonei kua lata e moui haau ke hagaaki ke fakaheke a Iehova, nakai he fakafiafia ni a koe po ke tutuli he tau koloa fakatino. (Totou Salamo 148:11-13; Luka 12:15) Ti, ko e heigoa falu he tau monuina mo e tau aoga he papatiso?
5 Ha ko e Kerisiano tukulele, to fai kakano lahi mahaki e moui haau. To fiafia a koe ha kua taute e koe e finagalo faka-Atua. (Roma 12:1, 2) To fakatupu he agaaga tapu a Iehova ia koe e tau mahani Atua tuga e mafola mo e tua. (Kala. 5:22, 23) To tali he Atua e tau liogi haau mo e fakamonuina e tau laliaga haau ke felauaki e moui haau mo e Kupu haana. To fiafia e gahua he fonua haau, mo e moui ai ke he puhala ne talia he Atua ka fakamalolō e amaamanakiaga haau he moui tukulagi. Lafi ki ai, to fakakite he tukuleleaga mo e papatisoaga kua manako mooli a koe ke eke mo taha he Tau Fakamoli a Iehova.—Isaia 43:10-12.
6. Ko e heigoa ne fakailoa he papatisoaga ha tautolu?
6 He tukulele a tautolu ke he Atua mo e papatiso, nukua fakailoa e tautolu kua eke a tautolu mo tau tagata a Iehova. “Ha kua nakai moui taha ia tautolu ha ko ia ni, ti nakai mate foki e taha ha ko ia ni,” he tohi he aposetolo ko Paulo, “ha ko e mena ka momoui a tautolu, kua momoui ni ha ko [Iehova], ka mamate a tautolu kua mamate ni ha ko [Iehova]; haia ni, po ke momoui, po ke mamate a tautolu, ko e tau tagata [a Iehova] a tautolu.” (Roma 14:7, 8) Kua fakalilifu he Atua a tautolu he foaki ki a tautolu e fifiliaga atāina. He fifili fakamalolō a tautolu ke tutuli e puhala nei he moui ha kua fakaalofa a tautolu ke he Atua, ne fakafiafia e tautolu e loto haana. (Fakatai 27:11) Ko e papatisoaga ha tautolu ko e fakamailoga he ha tautolu a tukuleleaga ke he Atua mo e talahau ke he tau tagata ko Iehova e Pule ha tautolu. Kua fakakite ai kua tutū a tautolu ke he faahi haana he matakupu he pule katoatoa he lagi mo e lalolagi katoa. (Gahua 5:29, 32) Fakahiku ai, ko Iehova he faahi ha tautolu. (Totou Salamo 118:6.) Kua hafagi foki he papatisoaga e puhala ma tautolu ke moua e tau monuina fakaagaaga loga lahi atu he mogonei mo e vahā anoiha.
Monuina he Fakalataha mo e Tau Matakainaga Fakaalofa
7-9. (a) Ko e heigoa e fakamalolōaga ne age e Iesu ki a lautolu ne toka hifo e tau mena oti mo e mumui ki a ia? (e) Fakamooli fēfē e maveheaga a Iesu ne fakamau ia Mareko 10:29, 30?
7 Ne pehē e aposetolo ko Peteru ki a Iesu: “Kitiala, kua toka e mautolu e tau mena oti, ka e mumui atu kia koe; ko [e] heigoa e mena ke moua ai e mautolu?” (Mata. 19:27) Manako a Peteru ke iloa e mena ne fakatoka mai he vahā anoiha ma haana mo e falu tutaki a Iesu. Ke foaki katoatoa a lautolu ke he gahua fakamatala he Kautu, ne taute e lautolu e tau foakiaga aoga lahi. (Mata. 4:18-22) Ko e heigoa e fakamalolōaga ne age e Iesu ki a lautolu?
8 Hagaao ke he tala taha ia ha Mareko, ne fakakite e Iesu to eke e tau tutaki haana mo vala he tau matakainaga fakaagaaga. Pehē a ia: “Ko e tagata ke toka e fale, po ke tau matakainaga, po ke tau mahakitaga, po ke matua tane, po ke matua fifine, po ke hoana, po ke fanau, po ke fonua, ha ko au ni mo e vagahau mitaki, To moua e ia takiteau ke he mouiaga nai, ko e tau fale, mo e tau matakainaga, mo e tau mahakitaga, mo e tau matua fifine, mo e tau fanau, mo e tau fonua, katoa foki mo e favale mai, ka ko e moui he fahi atu ke moua ai e moui tukulagi.” (Mare. 10:29, 30) Ko e tau Kerisiano he senetenari fakamua, tuga a Litia, Akula, Pisila, mo Kaio, ne ha ha ai fakalataha mo lautolu ne foaki e ‘tau fale’ mo e eke mo ‘tau matakainaga, po ke tau mahakitaga, po ke tau matua fifine’ ke he tau matakainaga talitonu, tuga ne mavehe e Iesu.—Gahua 16:14, 15; 18:2-4; 3 Ioa. 1, 5-8.
9 Ko e mena ne talahau e Iesu kua lahi mahaki e fakamooliaga he magaaho nei. Ko e ‘tau fonua’ ne toka hifo he tau tutaki haana kua hagaao ke he tau momoui ne foaki makai he tokologa, putoia e tau misionare, tau tagata he magafaoa Peteli, tau fekafekau he lalolagi katoa, mo e falu foki, ke maeke ke fakalaulahi e tau mena he Kautu he tau motu kehekehe. Tokologa e tau matakainaga ne toka hifo e tau kaina ke fakamukamuka e tau momoui ha lautolu, ti foaki mai ki a tautolu e olioli ke logona e tau fua mitaki ha lautolu ne fakakite e puhala kua leveki e Iehova a lautolu mo e puhala kua fiafia a lautolu ke he ha lautolu a fekafekauaga ki a Ia. (Gahua 20:35) Lafi ki ai, ko e tau fekafekau papatiso oti a Iehova kua maeke ke olioli e monuina he ‘kumikumi fakamua e kautu mo e Atua mo e hana tututonu’ ko e vala he tau matakainaga Kerisiano he lalolagi katoa.—Mata. 6:33.
Haohao Mitaki “ke he Mena Galo”
10, 11. Ko e heigoa e “mena galo ha i ai e Mua ue atu,” ti maeke fēfē ke ha ha ai a tautolu?
10 Kua fua mai he tukuleleaga mo e papatisoaga e taha monuina lahi foki—ko e monuina he nonofo “ke he mena galo ha i ai e Mua ue atu.” (Totou Salamo 91:1.) Ko e huaga fakatai anei he haohao mitaki mo e nakai haofia—ko e tuaga he puipuiaga fakaagaaga. Ko e “mena galo” ha kua nakai iloa he tau tagata ne temotemoai e onoonoaga fakaagaaga mo e nakai falanaki ke he Atua. He moui fakatatau mo e tukuleleaga ha tautolu mo e mauokafua katoatoa ki a Iehova, kua tuga e pehē a tautolu ki a ia: “Ko e haku a kolo, mo e haku a taue; ko e haku a Atua kua falanaki au kia ia.” (Sala. 91:2) Kua eke a Iehova ko e Atua mo huaga haohao mitaki ke nonofo ai a tautolu. (Sala. 91:9) Fai nofoaga haohao mitaki foki nakai ke tatai mo e mena ia?
11 Ke ha ha ai “ke he mena galo” ha Iehova ka pehē foki kua fakamonuina a tautolu aki e kotofaaga he feaki e fakafetuiaga tata mo ia. Kamata e mena nei aki e tukuleleaga mo e papatisoaga. Mole ia, kua matutaki atu a tautolu ke atihake ha tautolu a fakafetuiaga mo e Atua he fakatata ki a ia he puhala fakaako ke he Tohi Tapu, liogi mai he loto, mo e omaoma katoatoa. (Iako. 4:8) Nakai fai ne tata lahi atu ki a Iehova ka ko Iesu ni, ne nakai maueue e mauokafua haana ke he Tufuga. (Ioane 8:29) Ko e mena ia, kia nakai fakauaua e tautolu a Iehova po ke haana manako mo e iloaaga ke lagomatai a tautolu ke fakamooli e omonuo he tukuleleaga ha tautolu. (Fakama. 5:4) Ko e tau foakiaga fakaagaaga ne taute he Atua ma e tau tagata haana ko e fakamooliaga katoatoa kua ofania mooli e ia a tautolu mo e manako ke kautū a tautolu he fekafekau ki a ia.
Tokiofa e Parataiso Fakaagaaga ha Tautolu
12, 13. (a) Ko e heigoa e parataiso fakaagaaga? (e) Maeke fēfē a tautolu ke lagomatai a lautolu ne foou?
12 Kua hafagi foki he tukuleleaga mo e papatisoaga ki a tautolu e puhala ke nonofo he parataiso fakaagaaga ne monuina. Ko e takatakaiaga fakaagaaga homo ue atu he fakalataha mo e tau matakainaga talitonu, mo lautolu ne mafola mo Iehova ko e Atua pihia mo e falu. (Sala. 29:11; Isaia 54:13) Nakai fai mena he lalolagi ke fakatatai mooli mo e parataiso fakaagaaga ha tautolu. Kua kitia lahi e mena nei he tau fonoaga he tau atu motu ne fakapotopoto auloa e tokologa he tau matakainaga ha tautolu mai he tau motu, tau vagahau, mo e tau matakau fakamotu ke he takatakaiaga mafola, kaufakalataha, mo e fakaalofa fakamatakainaga.
13 Ko e parataiso fakaagaaga kua olioli e tautolu kua kehekehe lahi mo e tau tuaga fakalialia he lalolagi he magaaho nei. (Totou Isaia 65:13, 14.) He fakapuloa e fekau he Kautu, kua ha ha ia tautolu e kotofaaga ke uiina e falu ke o atu ke he parataiso fakaagaaga. Ko e monuina foki ke lagomatai a lautolu ne fakalataha foou mai ke he fakapotopotoaga mo e to aoga mai he fakamahani ke he gahua he fonua. He takitaki he tau motua, liga fakamonuina a tautolu aki e kotofaaga he lagomatai e falu ne foou, tuga he taute e Akula mo Pisila he “fakamatala fakatonu atu e puhala he Atua” ki a Apolo.—Gahua 18:24-26.
Fakatumau ke Fakaako Mai ia Iesu
14, 15. Ko e heigoa e tau kakano aoga ka fakatumau ke fakaako mai ia Iesu?
14 Ha ha ia tautolu e tau kakano aoga ke fakatumau ke fakaako mai ia Iesu. Ato moui tino tagata a Iesu, ne loga lahi mahaki e tau tau ne gahua a ia mo e haana Matua. (Fakatai 8:22, 30) Ne iloa e ia e puhala mitaki lahi mahaki he moui ne matapatu ke he fekafekau ke he Atua mo e talahau atu e kupu mooli. (Ioane 18:37) Maaliali ki a Iesu ko e falu puhala foki he moui ko e lotokai mo e onoonoaga kū. Ne iloa e ia to kamatamata mamahi lahi a ia ti tamate. (Mata. 20:18, 19; Hepe. 4:15) Ha ko e Fakafifitaki ha tautolu, ne fakaako e ia a tautolu ke he puhala ke eke mo tau tagata mahani fakamooli tumau.
15 Nakai leva e papatiso a Iesu, ne kamatamata e Satani a ia ke tiaki e puhala moui ne mua ue atu—ka e nakai kautū. (Mata. 4:1-11) Kua fakaako he mena nei a tautolu pete ne tau mena ne taute e Satani, maeke ia tautolu ke tumau e mahani fakamooli. Kua liga hagaaki a ia ki a lautolu ne amaamanaki ke papatiso ti pihia mo lautolu ne papatiso foou. (1 Pete. 5:8) Liga moua mai e totokoaga he tau tagata he magafaoa ne manamanatu mitaki ka e nakai iloa katoatoa ai. Ka ko e tau kamatamata pihia ne foaki ki a tautolu e tau magaaho ke fakakite e tau mahani mitaki faka-Kerisiano, tuga e fakalilifu mo e fakalotomatala ka tali e tautolu e tau hūhū mo e fakamatala atu. (1 Pete. 3:15) Ko e tau mena nei mogoia ne tutupu kua lauia mitaki ki a lautolu ne fanogonogo ki a tautolu.—1 Timo. 4:16.
Pipiki Mau ke he Puhala Mua Ue Atu he Moui!
16, 17. (a) Ko e heigoa e tau poakiaga aoga ne tolu ma e moui kua moua ia Teutaronome 30:19, 20? (e) Lalago fēfē e Iesu, Ioane, mo Paulo e mena ne tohi e Mose?
16 Kavi ke he 1,500 tau ato hau a Iesu ke he lalolagi, ne tomatoma e Mose e tau Isaraela ke fifili e puhala moui ne mua ue atu he magaaho ia. Ne pehē a ia: “Kua ui age au ke he aho nai ke he lagi mo e lalolagi ke talahau atu kia mutolu, kua tuku atu e au ki mua ha mutolu e moui mo e mate, ko e monuina mo e malaia; ko e hanai, kia fifili la e moui, kia moui ai a koe katoa mo e hau a fanau. Kia fakaalofa atu a koe kia Iehova hau a Atua, mo e fanogonogo ke he hana leo, mo e pipiki atu a koe kia ia.” (Teu. 30:19, 20) Ne nakai tua fakamooli e tau Isaraela ke he Atua, ka e nakai hiki e tolu e poakiaga aoga he moui ne talahau e Mose. Ne liu ai fatiaki e Iesu mo e falu foki.
17 Fakamua, ‘kia fakaalofa a tautolu ki a Iehova ko e Atua.’ Kua fakakite e tautolu e fakaalofa ha tautolu ke he Atua he fakatatau ke he tau puhala tututonu haana. (Mata. 22:37) Uaaki, ‘lata ia tautolu ke fanogonogo ke he leo a Iehova’ he fakaako e Kupu he Atua mo e omaoma ke he tau poaki haana. (1 Ioa. 5:3) Kua lata e mena nei mogoia ke fakalataha tumau a tautolu ke he tau feleveiaaga Kerisiano, ko e matakavi ne fakatutala ke he Tohi Tapu. (Hepe. 10:23-25) Toluaki, ‘kua lata ia tautolu ke pipiki ki a Iehova.’ Pete ne tau mena ne fehagai mo tautolu, kia fakagahua tumau e tautolu e tua ke he Atua mo e mumui ke he Tama haana.—2 Kori. 4:16-18.
18. (a) Fakamaama fēfē he The Watch Tower e kupu mooli he 1914? (e) Kua lata ke fēfē e logonaaga ha tautolu hagaao ke he maama he kupu mooli mogonei?
18 Ko e monuina ha ia ke momoui fakatatau ke he kupu mooli he Tohi Tapu! He 1914, ko e talahauaga aoga nei ne fakailoa he The Watch Tower: “Nakai kia ko e tau tagata monuina mo e fiafia a tautolu? Nakai kia fakamooli ha tautolu a Atua? Ka iloa he ha tagata e mena kua mitaki, fakaatā a ia ke uta ai. Ka fai ia mutolu ne moua taha mena kua mitaki, amanaki a mautolu to tala mai e mutolu ki a mautolu. Nakai fai mena mitaki po ke teitei hafa e mitaki ke tatai mo e mena ne moua e tautolu he Kupu he Atua. . . . Nakai fai vagahau po ke tohiaga ke fakamaama e mafola, olioli mo e monuina ne tamai he iloa mitaki e Atua mooli ke he tau loto mo e tau momoui ha tautolu. Ko e Tala ke he Pulotu, Fakafili Tonu, Malolō, mo e Fakaalofa he Atua ne fakamakona katoatoa e tau manako lahi he tau ulu mo e tau loto ha tautolu. Nakai kumi atu foki a mautolu. Nakai fai mena foki ke manako lahi ki ai ka ko e Tala homo ue atu ne maaliali lahi ke he tau manamanatuaga ha mautolu.” (The Watch Tower, Tesemo 15, 1914, lau 377-378) Ko e fakaaue ha tautolu ma e maama fakaagaaga mo e kupu mooli kua nakai hiki. Mooli, kua ha ha ia tautolu mogonei e kakano lahi mahaki ke olioli a tautolu he ‘o ke he maama a Iehova.’—Isaia 2:5; Sala. 43:3; Fakatai 4:18.
19. Ko e ha kua lata ia lautolu ne hokotia ke he papatiso ke taute e lakaaga mo e nakai fakamule?
19 Ka manako a koe ke ‘fano he maama a Iehova’ ka e nakaila ko e Kerisiano tukulele mo e papatiso, ua fakamule. Taute e tau mena oti kua lata ke fakatatau mo e tau poakiaga he Tohi Tapu ma e papatisoaga—ko e puhala homo ue atu ke fakakite e fakaaue ke he mena ne taute he Atua mo e Keriso ma tautolu. Foaki ki a Iehova haau a koloa uho lahi—ko e moui haau. Fakakite kua foli a koe ke taute e finagalo he Atua he mui ke he Tama haana. (2 Kori. 5:14, 15) Nakai fakauaua, ko e puhala moui ne mua ue atu a ia!
To Tali Fefe a Koe?
• Ko e heigoa ne fakamailoga he papatisoaga ha tautolu?
• Ko e heigoa e tau monuina ne fua mai he tukuleleaga ke he Atua mo e papatisoaga?
• Ko e ha kua aoga lahi ke fakaako mai ia Iesu?
• Ko e heigoa ka lagomatai a tautolu ke pipiki ke he puhala moui ne mua ue atu?
[Fakatino he lau 25]
Fakakite he papatisoaga haau kua fifili e koe e puhala moui ne mua ue atu
[Tau Fakatino he lau 26]
Haohao mitaki nakai a koe “ke he mena galo”?