Fakatata Atu ke he Atua
“Kitekite a Iehova ke he Loto”
MAEKE e tau foliga ke fakahehē. Nakai fakakite tumau he tino e tau fatuakiloto galo he tagata. Mahani e tau tagata ke fakafili mai he foliga he tino he tagata. Fakaaue ai, kua nakai ni ono a Iehova ko e Atua ke he foliga he tino. Kua fakakite fakamahino e mena nei he tau kupu ne fakamau ia 1 Samuela 16:1-12.
Manamanatu ke he mena ne tupu. Amanaki fai a Iehova ke fakauku e patuiki foou ke lata mo e motu ha Isaraela. Tala age e Atua ke he perofeta ko Samuela: “Kua fakafano atu e au a koe kia Iese ko e tagata Petelehema, ha kua kitia e au ke he hana tau tama tane, taha ke eke e au mo patuiki.” (Kupu 1) Nakai tala age e Iehova e higoa ka e pehē to fifili mai a ia he tau tama taane a Iese. He gutu atu a Samuela ki Petelehema, liga manamanatu a ia, ‘To iloa fēfē e au ko e tama taane fe ha Iese kua fifili e Iehova?’
He hoko ki Petelehema, ne fakatoka e Samuela ke kai fakaaue mo Iese mo e tau tama taane haana. Magaaho ne hū atu a Eliapo, ko e tama uluaki, ne mailoga agataha e Samuela e foliga haana. Ne manamanatu a Samuela ko e tokoluga ha Eliapo kua latatonu mo patuiki ti pehē hifo ki a ia ni: “Ko e moli ni, ha ha i mua a Iehova a ia ke fakauku ai e ia.”—Kupu 6.
Ka e nakai pihia e kitiaaga ha Iehova. Pehē a ia ki a Samuela: “Aua neke kitekite a koe ke he hana tino, po ke tokoluga he hana tino ha kua tiaki e au a ia.” (Kupu 7) Ne nakai onoono a Iehova ke he tokoluga po ke fulufuluola ha Eliapo. Ne ono loa atu a Iehova mai he foliga he tino ke kumi he fulufuluola mooli.
Ne fakamaama e Iehova ki a Samuela: “Ha ko e mena nakai kitekite a Iehova tuga ne kitekite e tagata, ha kua kitekite e tagata ke he tino, ka e kitekite a Iehova ke he loto.” (Kupu 7) E, ko e loto—ko e tagata i loto, ko e punaaga he tau manatu, tau aga, mo e tau logonaaga haana—ko e tau mena haia ne aoga ki a Iehova. ‘Ko e kamatamata he tau loto’ ne tiaki a Eliapo—ti pihia mo e tau tama taane tokoono ne toe ha Iese ne fakamua ia Samuela.—Tau Fakatai 17:3.
Toe taha e tama taane fakamui ha Iese ko Tavita, “kua leveki e ia e tau mamoe.” (Kupu 11) Ti tamai ai a Tavita he fonua ki a Samuela. Kua tala age a Iehova ki a Samuela: “Matike ā ti fakauku ā e koe a ia; ha ko ia hanā.” (Kupu 12) Mooli ai, ko Tavita “ne [fuata tote] ti mitaki hana mata, mo e mitaki ni hana tino.” Ka ko e loto haana ne lata mooli mo e finagalo he Atua.—1 Samuela 13:14.
He lalolagi ne onoono lahi mahaki ke he fulufuluola he tino, moua e tautolu e mafanatia he iloa kua nakai omoomoi a Iehova ko e Atua ha ko e foliga he tino. Nakai aoga ki a Ia e tokoluga haau po ke kitia he falu kua fulufuluola po ke pulapulaola a koe. Ko e loto haau kua aoga lahi ki a Iehova. Ko e iloa kia he tau mena ia kua omoomoi a koe ke manako ke feaki e tau mahani ka taute a koe ke fulufuluola ke he fofoga he Atua?