Tau Hūhū he Tau Tagata Totou
Ne tala age a Iesu ke he tau tagata fanogonogo haana: “Kia katoatoa ha mutolu a mahani mitaki, ke tuga ha mutolu a Matua ha ha he lagi kua katoatoa hana mahani mitaki.” Maeke fēfē he tau tagata he vahā nei ke ‘mitaki katoatoa’?—Mata. 5:48.
Ko e matapatu ke he tali he hūhū nei kua fakavē ke he maamaaga he puhala ne fakaaoga he Tohi Tapu e tau kupu ‘mitaki katoatoa.’ Ti nakai ‘mitaki katoatoa’ e tau mena oti ne fakamaama he Tohi Tapu ke he puhala kua mua atu e katoatoa. Ka e mooli, ko Iehova kua moua e mitaki katoatoa lahi pihia. Kua fakalatalata ni e mitaki katoatoa he tau tagata po ke tau mena. Ko e tau kupu Heperu mo e Heleni he Tohi Tapu ne fakaliliu ‘mitaki katoatoa’ ne fa kakano “katoatoa,” “tuaga motua,” po ke “nakai fai kelea” ne hagaao ke he tau tuaga ne fakatoka he tau pule. Ke he vagahau fakaaoga tumau, kua fa fakalatalata ni e fakaaoga he kupu ia. Ko e talahauaga “afua mitaki lahi” e taha fakataiaga.
Ne tufugatia a Atamu mo Eva ke he puhala ne katoatoa e mitaki he tau mahani, fakaagaaga, mo e fakatino. Kua mitaki katoatoa a laua hagaao ke he tuaga ne fakatoka he Tufuga ha laua. Ha kua liuliu, ne nakai hokotia a laua ke he tuaga nei ti galo e mitaki katoatoa ma ha laua mo e tau hologa ha laua. Ti ko e hala a Atamu, ati hoko e nakai mitaki katoatoa mo e mate ke he tau tagata.—Roma 5:12.
Ka e, he talahau fakamaaliali e Iesu he Lauga he Mouga, kua maeke agaia e tau tagata nakai mitaki katoatoa ke mitaki katoatoa ke he puhala fakalatalata. He lauga ia, ne fakatoka e ia e tau tuaga ma e fakaalofa mitaki katoatoa. Ko e fakaalofa anei ne fakakite he Atua ke he tau tagata. Ne pehē a Iesu: “Kia fakaalofa atu a mutolu kia lautolu kua fai fi kia mutolu, . . . kia liogi foki a mutolu ma lautolu ne tukumale mai mo e favale mai kia mutolu; kia eke ai a mutolu mo fanau he Matua ha mutolu ha he lagi, ha kua fakahake ne ia hana la kia lautolu kua mahani kelea katoa mo lautolu kua mahani mitaki, kua fakato hifo foki e ia e uha kia lautolu kua tututonu katoa mo lautolu kua nakai tututonu.” (Mata. 5:44, 45) He lahi e fakaalofa kua fakakite, to muitua e tau tutaki ha Iesu ke he fifitaki mitaki katoatoa he Atua.
He vahā nei, eketaha e Tau Fakamoli a Iehova he lalolagi katoa ke fakatumau e tuaga tokoluga pihia he fakaalofa ke he falu. Manako a lautolu ke lagomatai e tau tagata oti he tau feakiaga, tau lanu, mo e tau lotu kehekehe ke moua e iloilo tonu he kupu mooli he Tohi Tapu. He 236 e motu, kua molea e 7,000,000 fakaako Tohi Tapu mogonei kua taute he Tau Fakamoli mo e tau tagata fiafia.
“Kaeke foki ke fakaalofa atu a mutolu kia lautolu ne fakaalofa mai kia mutolu, ko heigoa kia e palepale kua moua e mutolu?” he hūhū e Iesu. “Ka e nakai kia eke he tau telona e mena foki ia? Kaeke ke fakaalofa a mutolu ke he tau matakainaga ha mutolu hoko lautolu, ko heigoa kia e mena uho kua eke e mutolu? ka e nakai kia eke pihia he tau telona.” (Mata. 5:46, 47) Nakai fili tagata e tau Kerisiano mooli ki a lautolu ne moua e tau fakaakoaga pauaki po ke tau feakiaga fakamotu; po ke fakaalofa atu ni a lautolu ke he tau tagata ka liuaki e fakaalofa. Ka e lagomatai e lautolu e tau tagata nonofogati mo e gagao, ko lautolu ne ikiiki mo e fuakau. He tau puhala ia, maeke e tau Kerisiano ke fifitaki e fakaalofa ha Iehova ti hokotia ke he mitaki katoatoa ke he puhala fakalatalata.
To maeke nakai ia tautolu ke moua e mitaki katoatoa ne galo ia Atamu? E, he tua ke he poa lukutoto ha Iesu, to maeke e tau tagata omaoma ke hokotia ke he tuaga mitaki katoatoa he magaaho he Pule Meleniamu he Keriso, ka ‘moumou he Tama he Atua e tau gahua he Tiapolo.’—1 Ioa. 3:8.