Kitia e Higoa he Pahua
ST. MORITZ. Mahani nakai mo e higoa ia? Liga pihia, ha ko e matakavi okioki talahaua he lalolagi i Engadine Valley ha Suisalani. Ka ko St. Moritz ko e taha naia he matakavi kua leva e futiaki e tau tagata ke he pahua ofoofogia nei he vahāloto he tau tapunu sinō he tau Mouga he matapotu he faahi toga ki uta ha Suisalani ne tata ki Italia. Ti ha ha i ai foki e Swiss National Park, ko e matakavi fulufuluola pauaki mo e kehekehe lahi he tau akau mo e tau manu ne fakaheke ha tautolu a Tufuga Homo Ue Atu, ko Iehova. (Sala. 148:7-10) Ti pihia foki ke he tau koloa tuai ne toe, ne liu taha ke he lotouho he senetenari ke 17 aki.
Liga kitia he mata haau e tau talagaaga matakehe he tau fale loga he pahua nei. Nakai uka ke kitia e higoa he Atua ne tohi i mua he fale, tuga i luga he gutuhala lahi. He mole atu e tau senetenari, ko e aga fakamotu ke fakamanaia e tau kaupā i fafo he tau fale aki e tau matatohi, he vali, talatalai e simeni ne pili aki, po ke he hihika e tau maka. Kitia e koe hinei e fakatino he fale he maaga i Bever. Ko e fakaliliuaga he tau matatohi: “He tau 1715. Ko Iehova ko e kamataaga, ti ko Iehova ko e fakahikuaga. Ko e tau mena oti ha he Atua, ti noa ka nakai fai ia.” E, ko e fakamailoga tuai ne fakaaoga lagaua e higoa he Atua.
Maeke foki ia koe ke kitia e tau matatohi tuai lahi he maaga ko Madulain. Pehē e fakamailoga nei: “Salamo 127. Kaeke ke nakai ati hake e Iehova e fale, ti gahua teao a lautolu ne talaga malolō ai. Lucius Rumedius. He tau 1654.”
Ko e ha ne fai fakatātāaga pihia ke he tau tagata ke he higoa faka-Atua he pahua nei? He magahala he Fakafoouaga, ne lolomi e Tohi Tapu ke he vagahau Romansh, ne fakavē ke he vagahau Latini ne fakaaoga i Engadine. Ti ko e tohi fakamua a ia ne fakaliliu ke he vagahau ia. Fakalagalaga ha ko e tau mena ne totou e lautolu he Kupu he Atua, tokologa e tagata he matakavi ne tohi he tau kaupā i fafo he tau kaina e tau higoa ni ha lautolu pihia foki e tau kupu tohi mai he Tohi Tapu ne putoia e higoa he Atua.
E, hoko mai ke he vahā nei, kua fakailoa agaia he tau matatohi nei e higoa ha Iehova mo e fakaheke ki a ia, he loga e tau senetenari he mole e tohia fakamua ke he tau fale. Ko e tau tagata ahiahi mo e tau tagata ne nonofo ai he pahua nei kua atāina ke o atu ke fakaako hagaao ke he Atua homo ue atu, ko Iehova, he ahiahi atu ke he taha fale ne fakamau ai e higoa haana—ko e Fale he Kautu he Tau Fakamoli a Iehova i Bever.
[Fakatino Credit Line he lau 7]
© Stähli Rolf A/age fotostock