Tokiofa e Tau Koloa Uho Mai he Vahā Fakamua ha Tautolu

KUA moua he tau tagata ha Iehova e tufaaga fakaagaaga lahi mahaki. Ko e fakamauaga ofoofogia he tau tufaaga ia ka moua mai he tau pepa ti pihia mo e tau ata, tau tohi, tau tala he tau tagata, mo e tau koloa tuai ne matutaki ke he tapuakiaga ha tautolu, gahua fakamatala ha tautolu, mo e fakamauaga tuai ha tautolu. Ka ko e heigoa e aoga ke fakamau ai e tau koloa pihia mo e kumikumi ke he vahā kua mole ha tautolu? Ko e tau ulu magafaoa ha Isaraela i tuai kua lata ke tala age ke he tau fanau ha lautolu e tau fakatufono mo e tau gahua homo ue atu ha Iehova ke maeke ia lautolu ke “tua [mauokafua] ai ni a lautolu ke he Atua.”—Sala. 78:7.

Kua leva tigahau e kumikumi ke he tau vala tala i tuai ke he gahuahuaaga he finagalo ha Iehova. He lali e tau tagata totoko ke taofi e gahua he faituga i Ierusalema, tuga anei, ko e kumikumi pauaki ke he tau fakamauaga he tau koloa po ke tau vala tala tuai i Median ko e taone lahi ha Akemeta ne fakakite e tohi ne fakatoka mai he Patuiki ko Kuresa ne poaki e gahua talaga ia. (Esera 6:1-4, 12) Ati liu ai e faituga talaga fakatatau ke he finagalo he Atua. Ko e vala tala i tuai ne fakaaoga foki he tagata tohia he Evagelia ko Luka, ne “kumi fakamakutu [fakatonu] e tau mena oti kana, tali mai ni he kamataaga.”—Luka 1:1-4.

Kua fiafia lahi mooli e Kau Fakatufono ke he fakamauaga fakateokarasi i tuai ha tautolu. He talahau e lata ke fakamau, tohia, mo e matutaki atu e tau tufaaga fakaagaaga ha tautolu, taha mai he Kau Fakatufono ne pehē, “Ke iloa e mena kua o atu a tautolu ki ai, lata ia tautolu ke iloa e mena ne o mai ai a tautolu.” Ko e mena ia, ne nakaila leva ia e fakatū e Faahi Tohiaga Fakamauaga Tuai he matapatu he lalolagi i Brooklyn, New York, ti haia i lalo he takitakiaga he Komiti Tohia Tohi.

HA TAUTOLU A “TAU ATA MAGAFAOA” MO E “TAU KOLOA TOKIOFA”

He mole e tau vahā, ti laulahi ia tautolu ne liga manatu na lauka ni he toka fakalahi e tau fakamauaga fakamagafaoa. He Faahi Tohiaga Fakamauaga Tuai, kua fitā e gahua lahi he kamata ke fakamau mo e tohia ha tautolu a tufaaga lahi mo e hane tupu ki mua. Ko e tau ata ne toka fakamitaki he Tau Tokaaga Tuai ka eke mo vala he “tau ata magafaoa” ha tautolu. Ko e ha tautolu a tau tohi he kamataaga, tau tala ofoofogia he tau tagata fakamua, mo e tau okoaga aoga lahi ne ha ha i ai foki he tau koloa uho ne tuku he Tau Tokaaga Tuai. Ko e tau mena tuga e “tau koloa tokiofa” kua fakamaama ki a tautolu hagaao ke he tufaaga fakateokarasi ha tautolu mo e lagomatai a tautolu ke onoono atu ki mua mo e mauokafua ke he vahā anoiha he magafaoa fakaagaaga ha tautolu.

Kua uiina e mautolu a koe ke onoono ke he vala foou “Mai he Tau Koloa Tuai” puhala he Faahi Tohiaga Fakamauaga Tuai. To haia ai he falu magaaho he fufuta fakaako he Ko e Kolo Toko. Ma e fakatai, he fufuta ka hau, kua amanaki a mautolu ke fakakite ai e tau fakatino ne talaga ke tali aki e tau hūhū nei: Ko e heigoa e Dawn Mobile? Ko hai ne fakaaoga ai? Magaaho fe ne fakaaoga ai, ti ko e heigoa e kakano ne fakaaoga ai?

Tuga e fakamanatuaga he tau ata magafaoa, ko e tau fakaputuaga he Tau Tokaaga Tuai ne lahi foki e talahauaga hagaao ki a tautolu mo e ha tautolu a tau tupuna fakaagaaga—hagaao ke he tua mo e loto malolō ha lautolu ne mumua ia tautolu, hagaao ke he tau mena ne olioli mo e paleko he fekafekau ke he ha tautolu a Matua fakahele he lagi, mo e hagaao ke he takitakiaga he Atua mo e lalagoaga tumau he tau tagata haana. (Teu. 33:27) Kua mauokafua a mautolu to fakamonuina e Iehova e tau laliaga hololoa ha tautolu ke fakamau e tau fakamauaga fakaagaaga i tuai ha tautolu ke maeke ia tautolu ke kaufakalataha fakalahi mo e fakamalolō ke taute haana finagalo.

[Puha/Fakatino he lau 31]

Onoono Fakatata Fakalahi

Magaaho ne tauteute e tau pepa faka-Kerisiano, tau DVD, mo e falu koloa ne fakavē ke he Tohi Tapu, ko e ha tautolu a tau tagata tohia, tau tagata ta fakatino, tau tagata kumikumi, mo e falu foki ne fakaaoga e tau koloa tuai. Ko e Tau Tohiaga Fakamauaga Tuai mogoia kua fakaeneene fakalahi mo e tau lakaaga aoga ke fakaputuputu mo e fakamau fakamitaki aki e loga he tau koloa tuai tuga ne tamai he tau la ofisa, tau faahi gahua he Peteli, tau fakapotopotoaga, tau tagata takitaha, mo e tau matakau fakalalolagi. Manamanatu ke he fakatōtōaga he gahua nei:

Mouaaga mo e Filifilia: Ko e tau koloa matakehe kua matutaki ke lafi mai ke he fakaputuaga he Tau Tokaaga Tuai. Loga he tau mena nei ne foaki totonu po ke ole mai he tau tagata he tau magafaoa ne leva lahi mahaki e fekafekau tua fakamooli ki a Iehova. He filifilia mo e fakatatai e tau mena nei kua lagomatai ke fakalahi e maamaaga ha tautolu ke he ha tautolu a fakamauaga tuai mo lautolu ne hao mai i ai.

Fakavahega: Ko e fakaputuaga he tau koloa he Tohiaga he Tau Tokaaga Tuai kua totou afe ai, falu kua molea e taha e senetenari he tuai. Ne kehekehe ai e tau talagaaga, lalahi, mo e puhala ne fakatokatoka ti kua lata ni ke fakavahega fakamitaki ke fakaaoga he tau vahā i mua.

Fakafoou mo e Fakamau: Ko e tau tohi mo e tau koloa tuai ne kua malona ne liu taute mo e leveki ai he fakaaoga e tau puhala pulotu ke fakafoou ai. Ko e tau tohiaga, tau ata, tau vala tala, tau kifaga, mo e tau tapakiaga ne tuku ai fakakomopiuta. Maeke ai mogoia ke kitekite ke he puhala he tau matini ka e nakai totō e tau tohiaga tuai po ke falu koloa ne uho he fakamauaga tuai.

Tokaaga mo e Tamaiaga: Ko e tau koloa tuai ne toka fakapapahi mo e fakamau ai neke galo mo e puipui he malona he molī mo e pahahū. Kua fakatū ai e database ke lagomatai e kumikumiaga mo e tamaiaga he tau koloa uho nei mai he vahā fakamua ha tautolu.

[Tau Fakatino he lau 32]

1. Lau he fakatino “Photo-Drama of Creation.” 2. Fakamauaga ke moua e tau tohi. 3. Motokā fakailoa. 4. Kili he Watch Tower ha Aperila 15, 1912. 5. Fakailoaaga ha J. F. Rutherford ke tuku he fale puipui. 6. Maikorofoni WBBR. 7. Lapakofe. 8. Tau kato fafao tohi. 9. Tau vala tala fakatagata. 10. Ualesi ki a J. F. Rutherford.