‘Maeke Fēfē La Au ke Fakamatala?’
Ke he lalolagi katoa, haia mo tautolu e tau fakafifitakiaga ofoofogia he tau matakainaga taane mo e tau fifine ne fakamooli tumau ke taute e gahua fakamatala pete ni kua fakafehagai mo e tau matematekelea he malolō tino. Onoono la ke he fakafifitakiaga ha Dalia, ne nofo i Vilnius, ko e taone lahi ha Lithuania.
Ko Dalia ko e matakainaga fifine kua 30 tumā e tau tau moui. Tali mai he mogo ne fanau ai, ne matematekelea a ia he gagao cerebral apoplexy. Kua tamate he gagao ia e tau faahi tino haana mo e lauia kelea ai e puhala vagahau. Ko e fakahikuaga ko e magafaoa ni ne maeke ke maama mitaki a ia. Ne nofo a Dalia mo e matua fifine haana ko Galina ne leveki a ia. Pete ni kua puke e moui ha Dalia he tau matematekelea mo e fakaatukehe, ka e fakatumau ni e mitaki ke he haana onoonoaga. Maeke fēfē e mena ia?
Ne fakamaama e Galina: “He 1999, ko e kasini haaku ko Apolonija ne hau ke ahiahi mai ki a maua. Ne mailoga e maua ko Apolonija, ko ia ko e taha he Tau Fakamoli a Iehova, ne iloa mitaki e ia e Tohi Tapu haana ti kamata a Dalia ke hūhū age ki a ia e tau hūhū loga. Nakai leva ti kamata e fakaako Tohi Tapu mo Dalia. He falu magaaho ne nofo au mo laua he fakaakoaga, ke lagomatai ke fakahokohoko e tau vagahau ha Dalia. Kua mailoga e au ko e tau mena oti haana ne fakaako kua aoga mooli ki a ia. Nakai leva ti ole foki au ke fakaako Tohi Tapu.”
He kamata a Dalia ke maama e kupu mooli he Tohi Tapu, taha e hūhū ne fakatauhele lahi ki a ia. Fakahiku, ne vagahau a ia mo e hūhū ki a Apolonija: “Maeke fēfē e tagata tuga au—ne mate e tau faahi tino—ke maeke ke fakamatala?” (Mata. 28:19, 20) Ne fakamafana fakatotoka a Apolonija ki a Dalia: “Ua matakutaku. To lagomatai e Iehova a koe.” Ti lagomatai mooli e Iehova.
Ti fakamatala fēfē mogoia a Dalia? Ke he tau puhala kehekehe. Ne lagomatai he tau matakainaga fifine Kerisiano a ia ke tauteute e tau tohi fakalataha mo e ogo he Tohi Tapu. Fakamua, ne fakakite e Dalia e tau manatu haana ke he tau matakainaga fifine. Ti taute e lautolu e tohi ne fakamau ai e tau manatu haana. Ne fakamatala foki a Dalia he fakafano e tau fekau tohitohi he telefoni utafano haana. Ti ka mitaki e matagi, ne uta he tau matakainaga he fakapotopotoaga a ia ki fafo ke tutala ke he tau tagata ka feleveia he tau paaka mo e he puhalatū.
Kua fakatumau a Dalia mo e matua fifine haana ke holo ki mua fakaagaaga. Ne tukulele e tau momoui ha laua tokoua ki a Iehova ti papatiso ia Novema 2004. Ia Sepetema 2008, ne fakatū e matakau vagahau Polani i Vilnius. Ha kua manako e matakau ke tokologa e tau tagata fakailoa he Kautu, ne fakalataha atu a Dalia mo e matua fifine ki ai. Pehē a Dalia: “Falu mahina ne tupetupe au ka nakaila fakalataha ke he gahua he fonua. Ka e mole atu e liogi ki a Iehova hagaao ke he mena ia, nakai leva ti fai matakainaga ne ole mai ki a au ke fakatau gahua ke he fekafekauaga.” Fēfē e logonaaga he matakainaga fifine fakahelehele ha tautolu ko Dalia hagaao ke he tuaga haana? Ne talahau e ia: “Kua tamate he gagao e tau faahi tino haaku, ka e nakai tamate e manamanatuaga haaku. Kua to lahi e fiafia haaku he maeke ke tutala ke he falu hagaao ki a Iehova!”