Ko e Tohi Mai he Repapiliki a Tominika
“Nakaila Logona e Au ha Fakaalofa Pihia”
KUA taute fakamua laia e Niurka e lauga faka-Tohi Tapu he fakapotopotoaga ha mautolu he faahi tapu nei. Ne tauteute e ia he fakamau hifo ke he tau matatohi Paraile (Braille) e tau mena ka talahau e ia, ti ako manatu ai. Ko au mo ia ne ha i mua he toloaga, hane fakataitai e vala tala hagaao ke he tagata ne manako ke fakaako e kupu mooli he Tohi Tapu. Ne logona mitaki e ia e leo haaku ke he tau fanogonogo teliga haana he puhala he maikorofoni. Magaaho ne oti ai a maua, ne taogo e patipati he toloaga ati logona mooli e ia a lautolu. Ko e mamali haana ne fakaata e fiafia lahi mo e mauokafua. Ne fiafia foki au. Ko e palepale mitaki ha ia he gahua misionare!
Ne manatu e au e magaaho fakamua ne feleveia au mo Niurka. Kua ua e tau he mole. He hafa e tulā he fakaholo ke he tau puhalatū efu, ne malika e au a ia. Hane nofo a ia he kaupā he kaina haana—ne talaga aki e tau akau mo e tau poloka ne taute mai he efuefu mo e tuafale apa ne hī. Kua hohā mo e namupaku ai he tau koti, tau lapiti, mo e tau kulī. Ne nofo fakatalofe a Niurka mo e tukutuku hifo e ulu, ko e fakatino he tagata matimati mo e fakaagitau. Kua mata motua a ia ke he 34 e tau tau moui haana.
Ne pōpō fakaeneene e au e tukeua haana, ti ono hake a ia ki a maua mo e tau mata ne nakai maeke ke kitia tali mai he 11 e tau kua mole. He fakatutū ke he teliga haana, ne tala age e au ko hai au mo e hoa fakamatala haaku. Fakamui, ne iloa e maua na moua a Niurka he gagao Marfan syndrome, ko e gagao magafaoa ne fakatupu e matematekelea lahi ki a ia. Ne kelea lahi foki e gagao suka ha Niurka ti lata ni ke fakakia ke fuafua tumau e suka he toto haana ne fa tokoluga.
He tuku e au e Tohi Tapu he tau lima haana, ne mailoga ai e ia ti pehē na fiafia lahi a ia ke totou e tau Tohiaga Tapu ato pouli e tau mata haana. Ka e maeke fēfē ia au ke fakaako ke he tagata nei ne matimati, lolelole, mo e ukiuki ke he tau kupu mooli ne fakahauhau he Kupu he Atua? Ha ko e mena na iloa e ia e tau alafapete, ne kamata au ke tuku he tau lima haana e tau matatohi palasetiki. Nakai leva ne mailoga ai e ia. Ti, he amoamo mai e tau lima haaku he vagahau matalima au, ne ako e ia ke fakamatutaki e tau matatohi takitaha ke he tau matatohi he Vagahau Matalima Faka-Amerika (American Sign Language). Ne ako fakahaga foki e ia falu a vagahau matalima. Ha kua kamata laia au ke ako e vagahau ia, ne loga e matahola he tauteute ma e tau fakaakoaga takitaha. Pete ia, kua lahi e makutu ha maua mo Niurka, ti mafiti a maua ke iloa e vagahau matalima.
Ne mua atu e holo ki mua ha Niurka he magaaho ne foaki noa he taha matakau lagomatai e tau fanogonogo teliga ke lagomatai a ia. Pete he nakai foou, ka kua lahi mahaki e lagomatai. He molea e tau hogofulu tau he nakai kitia mo e he nakai tutala, ne ha ha a ia he lalolagi haana ni. Ka e fakaalaala he agaaga a Iehova e manamanatuaga mo e loto haana he fakapuke aki e iloilo, amaamanakiaga, mo e fakaalofa. Nakai leva, mo e lagomatai he tokotoko, ne fano viko a Niurka he tuutakaina haana, he fakamatala e kupu mooli he Tohi Tapu ke he falu.
Ne taute e Niurka e fakaakoaga Tohi Tapu mo e anitī haana mo e ua e kasini. Ne makutu a ia he tauteute tuai, ti ako manatu e tau vala tala takitaha ka fakaako. Ne totou he tagata fakaako haana e paratafa, ti totou e Niurka e hūhū mai he tohi Paraile haana. Ne talahau he hoa e tau tali ki a Niurka he vagahau ki loto he teliga haana po ke he vagahau matalima ka e amoamo e Niurka e tau matalima he hoa haana.
Ne lagomatai mo e fakamalolō he fakapotopotoaga katoa a Niurka. Ne kehekehe e tau matakainaga Kerisiano haana ne lagomatai a ia ke uta ke he tau feleveiaaga mo e tau toloaga. Ko e falu ne fakatauō mo ia ke he fonua. Talamai foou mai a Niurka ki a au: “Nakaila logona e au ha fakaalofa pihia.” Kua amanaki a ia ke papatiso he fonoaga faahimotu ha tautolu ka hau.
He kekeu atu a maua ke he hala ne nofo ai a Niurka, ne kitia e maua a ia hane nofo he kaupā ne laā mo e ulu haana ki luga ti mamali haana fofoga. Ne hūhū age au ko e ha a ia ne mamali ai? Ne pehē a ia: “Kua manamanatu au ke he vahā anoiha magaaho ka eke e lalolagi mo parataiso. Ti fakatino e au kua fitā au i ai.”
[Fakatino he lau 25]
Ko Niurka mo e falu tagata he fakapotopotoaga ha mautolu i mua he Fale he Kautu
[Fakatino he lau 25]
Ne fakamatala e Niurka e tau mena ne ako e ia mo e falu