Tau Hūhū he Tau Tagata Totou

Maeke nakai e Kerisiano ne onoono tumau ke he tau fakatino telefua ke kelea lahi ti hokotia a ia ke tuku kehe mai he fakapotopotoaga Kerisiano?

▪ E, liga maeke. Kua peehi he mena ia e kakano uho ke fakaheu fakamalolō e tau ata telefua oti kana—tau mena ne tohi mo e tau fakatino—i loto he tau mekasini, tau kifaga, mo e tau vitiō, mo e Internet.

Kua haia e tau ata telefua he tau matakavi oti he lalolagi. Kua taute he Internet e tau ata telefua ke mukamuka lahi ke moua ti kua malikiti e numera ha lautolu kua lauia he lekua kelea muitui nei. Ko e falu, ikiiki mo e momotua, ne kitia fakahaupō e tau faahi Web telefua. Ko e falu ne hafagi pauaki ni e tau faahi ia, he nakai maimainā ha kua maeke ia lautolu ke totou mo e kitekite fufū e tau ata telefua—i kaina po ke he ofisa. Ko e ha e tau Kerisiano kua lata ke manamanatu fakahokulo ke he mena nei?

Moua e tautolu e matapatu kakano he hatakiaga ha Iesu: “Ka kikite atu taha ke he fifine kia manako ki ai, kua faivao tuai a ia ke he hana loto.” (Mata. 5:28) Mooli, ko e tau fakafetuiaga pauaki he mahani fakataane mo e fifine ne latatonu ai mo e ko e punaaga he fiafia he vahaloto he hoa mau. (Fakatai 5:15-19; 1 Kori. 7:2-5) Nakai ko e hagaaki a ia he tau ata telefua. Ka ko e fakakite he feuaki velagia ne fakalagalaga e tau manatu kelea muitui ne hataki e Iesu ki ai. Maaliali ai, ko e totou mo e kitekite ke he tau ata telefua ko e totoko pauaki ke he takitakiaga faka-Atua: “Hanai, kia tamate e mutolu ha mutolu a tau fahi tino ha he lalolagi, ko e feuaki, ko e mahani kelea, ko e manako kelea, ko e foli kelea, mo e mahekeheke, ko e hufeilo ke he tupua haia.”—Kolo. 3:5.

Ka e kua ka lagataha po ke lagaua e kitekite e Kerisiano ke he tau ata telefua? Ko e lekua haana kua liga ke tuga e tuaga hagahaga kelea ne lagataha e tupu ke he salamo ko Asafo: “Ka ko au nai, fetamakina kua tupetupe haku tau hui; toe tote ni ti heke haku tau hui.” Maeke fēfē e Kerisiano ke meā e loto mo e mafola mo e Atua kaeke kua onoono a ia ke he tau fakatino telefua he tau taane po ke tau fifine telefua po ke hoa kua taute e mahani feuaki? Ne nakai mafola foki e loto ha Asafo: “Kua fahi ni au ke he aho oti; kua akonaki au ke he tau magaaho pogipogi oti.”—Sala. 73:2, 14.

Ko e Kerisiano ne lauia he kelea ia kua lata ke ala hake mo e fehagai mo e lata haana ke moua e lagomatai fakaagaaga. Ko e lagomatai ia kua moua mai i loto he fakapotopotoaga: “Kaeke ke moua he tagata he taha holifono ko mutolu kua mahani fakalata ke he Agaga, kia liuaki mai e mutolu a ia kua pihia mo e loto he mahani molu [“mo e mataala tumau ki a mutolu ni,” NW].” (Kala. 6:1) Liga taha po ke ua e motua Kerisiano ka foaki ki a ia e lagomatai kua lata mo ia, putoia e ‘fakamoui e tagata gagao ke he tau liogi kua eke mo e tua, kaeke foki kua hala a ia, to fakamagalo ai.’ (Iako. 5:13-15) Ko lautolu ne kumi lagomatai ke utakehe e ilaila he tau ata telefua kua kitia ko e fakatata lahi ke he Atua kua mitaki ma lautolu, tuga ni a Asafo.—Sala. 73:28.

Ka e pehē e aposetolo ko Paulo ko e falu ne agahala ne nakai fakatokihala “ke he mahani kelea, mo e feuaki, mo e matahavala, ne eke e lautolu.”a (2 Kori. 12:21) Ko e kupu Heleni ne fakaliliu “mahani kelea,” ne tohi he Porofesa ko Marvin R. Vincent kua ha ha e “kakano he kiva ha ko e fakalialia.” Ko e mena vihiatia mooli ha ko e falu ata telefua kua mua atu e kelea ke he tau fakatino telefua po ke tagata taane mo e fifine ne taute e mahani feuaki. Kua fai ata telefua ne fakalialia mo e fakateteki ne putoia e mahani fakasotoma (mahani feuaki he vahāloto he taane mo e taane mo e fifine mo e fifine), mahani fakataane mo e fifine auloa, momohe mo e manu, tau ata telefua he tau fanau ikiiki, fakapilo pulenoa he kege, ekefakakelea he tau fifine, peehi e mahani feuaki, po ke fakakikiveka kelea muitui. Ko e falu he vahā ha Paulo ne “pouligia ha lautolu a tau loto manamanatu” kua “nakai tuai logona e lautolu ha mena [ti] kua tuku e lautolu a lautolu ke he matahavala ke eke e tau mena kelea oti kana, mo e manako lahi ki ai.”—Efeso 4:18, 19.

Ne totoku foki e Paulo e “mahani kelea” he Kalatia 5:19. Ko e pulotu Peritania ne pehē kua “liga [kakano] pauaki e mena nei ke he tau manako feuaki velagia kelea oti kana.” Ko e Kerisiano fēfē ka fakatikai ko e tau vahega ata telefua ne fakateteki mo e kelea muitui he mahani fakataane mo e fifine ne totoku i luga ko e “tau manako feuaki velagia kelea oti kana” mo e kua fakalialia? Ne fakaoti e Paulo he Kalatia 5:19-21 ko “lautolu kua eke” e tau mahani kelea pihia to “nakai eke ma lautolu e kautu he Atua.” Ko e mena ia, ka fai tagata kua feaki e aga ke kitekite tumau e tau ata telefua he mahani fakataane mo e fifine ne fakateteki mo e fakalialia, liga kua leva tuai, ti nakai mahalo ke fakatokihala mo e mafuluhi mai, kua nakai lata a ia ke fakatumau ke he fakapotopotoaga Kerisiano. Kua lata ni a ia ke tuku ki tua ke maeke ke puipui e meā mo e agaaga he fakapotopotoaga.—1 Kori. 5:5, 11.

Kua mitaki ke iloa ko e falu ne kaumahala he onoono ke he tau mena kelea muitui he tau ata telefua, kua o atu ai ke he tau motua mo e moua e lagomatai fakaagaaga kua lata ke maeke ke taute e tau hikiaga lalahi. Ne ole a Iesu ke he tau Kerisiano i Sarataisa i tuai: “Fakamau e tau mena kua toe ko e mamate ha ne fai; . . . kia manatu a koe ke he tau mena ne moua ai e koe, mo e fanogonogo a koe ki ai, kia taofi foki e koe ki ai, mo e tokihala. Kaeke foki ke nakai mataala a koe, . . . ti nakai iloa foki e koe po ke magaaho fe ke fina atu ai au kia koe.” (Fakakite. 3:2, 3) Na maeke ke fakatokihala mo e ke hamu mai he afi.—Iuta 22, 23.

Ka ko e mitaki ha ia ma tautolu takitokotaha ke mauokafua mooli ke nakai fakatata ke he tuaga hagahagakelea ia. E, kua lata ia tautolu ke mauokafua katoatoa ke kalo kehe mai he tau ata telefua oti kana!

[Matahui Tala]

[Blurb he lau 30]

Ko e Kerisiano ne putoia he kelea kua lata ke ala hake mo e fehagai ke he manako haana ke moua e lagomatai fakaagaaga