“Fakamolemole La Poki e Ata ha Maua?”
He oti e aho ke uaaki he fonoaga faahimotu, ko Josué, ko e matakainaga he Peteli i Mesikō, ne fano kitekite he taone ko Querétaro. Ko e tau tagata o kitekite mai i Kolomopia ko Javier mo Maru, ne ole ki a Josué ke poki e ata ha laua. Ha kua tauteute mitaki a ia mo e tau kapitiga Fakamoli haana ti tau e tau laupepa pine ha lautolu, ne hūhū e hoa ki a lautolu ko e o mai kia a lautolu he taha kautūaga he tau fakaakoaga po ke taha toloaga pauaki. Fakamaama e Josué ne fakalataha atu a lautolu ke he fonoaga he Tau Fakamoli a Iehova ti uiina e hoa ke fakalataha atu ke he fakaholoaga he Aho Tapu.
Ne logona hifo he hoa kua fuafua kelea lahi a laua ke fakalataha atu ha kua nakai fai tapulu mitaki a laua ke lata mo e fonoaga pihia. Ka e, ne age e Josué e higoa mo e numera telefoni haana he la ofisa ne gahua ai a ia.
Ne ofo a Josué he fā e mahina he mole ne matutaki atu a Javier. Ne o atu e hoa ke he fonoaga ti manako mogonei ke aahi atu e Tau Fakamoli a Iehova ki a laua i Mexico City, ko e matakavi ne nonofo ai a laua he magaaho na. Nakai leva ti kamata e fakaako Tohi Tapu mo Javier mo Maru, ti kamata agataha a laua ke o atu he tau feleveiaaga. Hogofulu e mahina he mole, ne eke a laua mo tau tagata fakailoa. Pete ni kua hiki e hoa ki Toronto, i Kanatā, ne matutaki a laua ke holo ki mua fakaagaaga ti papatiso.
Magaaho fakamui, ne moua e Josué e tohi mai ia Javier ne fakamaama e mena ne omoomoi a ia ke talia e kupu mooli. “Ato o atu he fonoaga, ne tutala au mo e hoana haaku ke he manako ha maua ma e takitakiaga fakaagaaga. Magaaho ne kitia e maua e lilifu he tau tauteuteaga ha mutolu, ne manatu a maua kua liga o mai a mutolu he taha fonoaga uho lahi. He fonoaga, ne nava a maua ke he puhala fakaalofa he uta a maua ke he tau nofoa ha maua, ke he lagomatai ne foaki ke muitua ke he Tohi Tapu, mo e tau mahani ha lautolu ne ha ha i ai. Ne nakai ko e lekua lahi e puhala tauteute ha maua ko e tau tagata o kitekite.”
Kua mooli ha ia he tau kupu he patuiki pulotu ko Solomona ma ha Josué! Tohi e Solomona: “Kia gana e koe hāu a tau fua saito ke he magaaho pogipogi, ti aua neke okioki ai hāu a lima ke he afiafi; he nakai iloa po ke mena fe ke monuina, po ke mena nai, po ke mena na, po ke fakatau mitaki ai e na mena ua ia.” (Fakama. 11:6) Maeke nakai a koe ke gana e tau tega he fakaaoga e tau tuaga ke tala age ke he falu hagaao ke he fonoaga po ke lauga ke he toloaga he mogo i mua? Liga fakaaoga e Iehova a koe ke futia mai a lautolu kua fia kai mo e fia inu ke he takitakiaga fakaagaaga, ke tuga a Javier mo Maru.—Isaia 55:1.
[Fakatino he lau 32]
Hema ke he matau: Alejandro Voeguelin, Maru Pineda, Alejandro Pineda, Javier Pineda, mo Josué Ramírez he la i Mesikō