Ko e Ha ne Papatiso e Tau Kerisiano?

Ko e vala tala nei kua fakalagā e tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau hūhū nei mo koe.

1. Ko e heigoa e kakano he papatiso faka-Kerisiano?

Ko e papatisoaga ko e ole ma e fakafetuiaga mitaki mo e Atua. Ti ko e Kerisiano kua lata ke papatiso nakai he mogo ne tama mukemuke ka e mogo ne lahi a ia ke iloa e Atua ti eke mo tutaki ha Iesu. (Gahua 8:12; 1 Peteru 3:21) Kua eke a tautolu mo tutaki a Iesu ka iloa mo e taute e tautolu e tau mena ne poaki e ia.—Totou Mataio 28:19, 20.

He vahā he tau aposetolo ha Iesu, tokologa e tagata ne nakai fakamule ke fakaako hagaao ke he Atua mo Iesu. Ma e fakatai, he iloa ai he taha tagata kua hafagi he mate a Iesu e puhala ke he fakamouiaga, ne eke agataha a ia mo tutaki. He vahā nei, tokologa e tagata fakamooli ne fifili ke eke mo tau tutaki ha Iesu.—Totou Gahua 8:26-31, 35-38.

2. Ko e ha ne papatiso a Iesu?

Kavi ke he 30 e tau ha Iesu he moui he mogo ne fakatomo hifo e Ioane ko e Papatiso a ia ke he vai he Vailele i Ioritana. Ko e papatiso ha Iesu ne fakakite e fifiliaga haana ke taute e finagalo he Atua. (Heperu 10:7) Putoia he mena nei e foaki he moui haana mo poa ma e tau agahala he tau tagata. Pete foki ato hifo mai a ia he lagi ke moui he lalolagi, ne fakaalofa mo e omaoma tumau a Iesu ke he haana a Matua ko Iehova.—Totou Mareko 1:9-11; Ioane 8:29; 17:5.

3. Ko e ha kua lata e Kerisiano ke papatiso?

Ko e tuaga ha tautolu kua kehe mai he ha Iesu—kua fanau a tautolu ko e tau tagata agahala. Ka ko e mate poa ha Iesu kua maeke ia tautolu ke moua e fakafetuiaga mitaki mo e Atua. (Roma 5:10, 12; 12:1, 2) Kua maeke mooli ia tautolu ke eke ma haana ko e tagata he magafaoa haana. (2 Korinito 6:18) Maeke fēfē a tautolu ke moua e lilifu ia? He liogi fakatagata kua tukulele a tautolu ki a Iehova, he omonuo ke taute e finagalo haana ke he moui katoa ha tautolu. Mole e taute e tukuleleaga ia, kua fakamailoga ai e tautolu he papatiso.—Totou Mataio 16:24; 1 Peteru 4:2.

4. Maeke fēfē a koe ke mautauteute ma e papatiso?

Fakaako he Tau Fakamoli a Iehova e Tohi Tapu mo e ha tagata kua manako ke fakatata ke he Atua. He fakaako e Tohi Tapu mo e fano he tau feleveiaaga Kerisiano to fakamalolō e fakaalofa haau ma e Atua mo e tua haau ki a ia. To lagomatai ai foki a koe ke feaki e tau aga mo e tau mahani mitaki. He feaki e fakaalofa, tua, mo e falu mahani Atua foki ka lagomatai a koe ke moui fakatatau ke he omonuo haau ke fekafekau tukulagi ki a Iehova.—Totou Ioane 17:3; Heperu 10:24, 25.

Ma e falu vala tala foki, kikite e veveheaga 18 he tohi nei, Ko e Heigoa ne Fakaako Moli he Tohi Tapu? ne taute fakailoa he Tau Fakamoli a Iehova.