Manatu Nakai e Koe?

Kua totou fakamitaki nakai e koe e tau fufuta foou he Ko e Kolo Toko? Lali la mogoia ke kitia ko e maeke nakai a koe ke tali e tau hūhū i lalo:

Ke he puhala fe kua eke a Solomona mo fifitakiaga hataki?

Ne fakamonuina he Atua mo e fakaaoga e Patuiki ko Solomona. Ka ko e magahala ne pule ai a ia, ne tafia kehe mai a Solomona he fakatonuaga faka-Atua. Ne faihoana a ia ke he tama fifine pouliuli ha Farao, ti loga e tau hoana haana, mo e fakaatā e ia e tau fifine pouliuli ke takitaki fakahaga a ia ke he tapuakiaga fakavai. Kua lata a tautolu ke kalo kehe he feaki fakahaga e tau aga po ke tau hihiga hehē. (Teu. 7:1-4; 17:17; 1 Patu. 11:4-8)—12/15, lau 10-12.

Lata kia ke tiaki e koe e fakamauaga nakai fiafia?

Kua nakai fakamalolō he Kupu he Atua e mavehevehe ko e puhala ke fakamafola e tau lekua he fakamauaga. Ka e, he tau tuaga uka lahi to lata e Kerisiano ke fifili kua lata tonu ke mavehevehe po ke nakai.—1/1, lau 10.

Fakatata fēfē e matua taane ke he tama taane haana?

Putoia e tama taane ke he tau gahua he aho. Ma e fakatai, ka taute e tau gahua, ole ki a ia ke lagomatai. Kua liga fai magaaho ato oti e gahua; ka e to pipi malolō e fakafetuiaga ha laua, mo e to fakaako he matua taane e tama taane haana ke he tau puhala gahua mitaki. Lafi ki ai, fakaatā e magaaho ke fefeua tokoua. He tau magaaho fefeua, maeke he matua taane ke fakakite e mokoina ke he tama taane haana he tau kupu mo e he tau gahua.—1/1, lau 19.

Ko e heigoa ha lautolu ne ikiiki kua lata ke fakaako hagaao ke he Atua mai he mena ne tupu ki a Eutuko?

Taha e mena, ko Iehova kua maeke ke liuaki mai a lautolu ne mamate ke he moui, putoia ai a lautolu ne ikiiki. Maama e Iehova mo e ofania e ia a lautolu ne ikiiki, ē, mua atu foki ke he tau matua ha lautolu. He haia a Iesu he lalolagi, ne fakakite e ia e mahani he Matua haana he uta a lautolu ne ikiiki ke he tau lima haana ti fakamonuina a lautolu.—1/1, lau 22-23.

Ko e ha kua lata ia tautolu ke fifili fakamitaki e tau kapitiga?

Ko e tau kapitiga ha tautolu kua malolō e fakaohooho ke he tau aga ne tupu he tau loto ha tautolu. Ti, ko e fifiliaga he tau kapitiga ha tautolu ka fakaohooho a tautolu ke eke mo tau tagata pihia. Tuga e tagata tohia Tohi Tapu ko Tavita, kua manako a tautolu ke fifili fakapulotu e tau kapitiga ka lagomatai a tautolu ke fakatumau e mahani hakohako ko e fekafekau he Atua.—1/1, lau 24.

Ko e heigoa kua fakakite tali mai he senetenari fakamua, na ha ha i ai tumau e falu Kerisiano fakauku mooli he lalolagi?

I loto he fakataiaga ha Iesu hagaao ke he “tau saito” mo e “tau titania,” “ko e tau saito mitaki,” kua kakano “ko e fanau haia he kautu.” (Mata. 13:24-30, 38) To tutupu fakalataha e tau titania mo e tau saito ato hoko ke he heleheleaga. Ti kua nakai maeke ia tautolu ke talahau fakatonu ko hai a lautolu he matakau he tau saito, kua fai tumau ke hoko ke he vahā ha tautolu.—1/15, lau 7.

Maeke fēfē ia tautolu ke kautū ke he hihiga ke mahekeheke?

Ko e tau lakaaga kua maeke ke lagomatai a tautolu hanei: Eketaha ke feaki e fakaalofa mo e fakaalofa hofihofi fakamatakainaga, lafi mo e tau tagata mahani Atua, eketaha ke taute e mahani mitaki, he ‘fiafia fakalataha mo lautolu kua fiafia.’ (Roma 12:15)—2/15, lau 16-17.

Ka foaki e fakatonuaga, ko e heigoa e tau matapatu fakaakoaga kua lata ke tokaloto e tautolu?

Manamanatu ke he tuaga mooli ne putoia ai. Kalo kehe he tali mafiti. Fakagahua fakatokolalo e Kupu he Atua. Ka fai, fakaaoga e fata tohi fakateokarasi. Kalo kehe he taute e tau fifiliaga ma e falu.—3/15, lau 7-9.