Fakamolū he Mahani Totonu e Loto Kona

KO E fifine fuakau ne ai fiafia pauaki he o atu a George mo Manon, ko e Tau Fakamoli tokoua i Netelani, ke ta atu e tala mitaki he Kautu. Ne iloa e laua kua mamate tokoua e tau taane ti pihia mo e tama taane haana ti kua matematekelea lahi a ia mai he gagao gugu. Pete he totoka a ia he fakatutalaaga, ne nakai aga kapitiga mooli a ia.

Ka e pulega a George ki a Manon ke liliu a laua mo e uta e keu ma e fifine ha kua tuga kua lahi e matimati mo e loto kona haana. He o atu a laua, ko e tagata he kaina, ko Rie, ne ofo lahi mahaki. Ka e nakai latatonu e magaaho ma haana, ti taute ai e maveheaga ke lata mo e taha aho kehe. He liliu a George mo Manon he magaaho ne fakatoka, ne nakai fai tagata ne tali e gutuhala. Pete kua lali a laua he tau magaaho kehekehe, ne nakai moua agaia e laua a ia. Ne kamata foki a laua ke manamanatu kua fakaheu e ia a laua.

Taha e aho, ti moua e George a Rie i kaina. Ne fakamolemole a ia ha kua nakai fakamooli e maveheaga ti fakamaama ko e hau laia a ia he fale gagao. “Ka e nakai iloa e mua e mena ne taute e au he momole a mua,” he ui e ia. “Ne kamata au ke totou e Tohi Tapu!” Ti fakahoko ai e fakatutalaaga mitaki, ti kamata e fakaako Tohi Tapu.

He fakaako e Rie e Tohi Tapu, ne hiki e moui haana mai he tagata loto kona ke he fifine totonu mo e fiafia. Pete he nofo fale, ne kamata agataha a ia ke tutala ke he tua foou haana ke he ha tagata ne ahiahi atu ki a ia. Ne nakai fakaatā tumau he malolō tino haana a ia ke fano he tau feleveiaaga fakapotopotoaga, ka e fiafia a ia he ahiahi atu e tau matakainaga. He aho ne tū e 82 e tau he moui haana, ne fina atu a ia ke he toloaga takaiaga ti papatiso he fakamailoga e fakatapuaga haana ke he Atua.

Fai mahina he mole e mate haana, ne moua ai e poeme ne tohi e ia. I loto, ne fakamaama e ia e matematekelea haana he matimati he vahā fuakau mo e peehi e aoga he mahani totonu. “He totou e poeme ia ne lauia mooli au,” he ui e Manon, “ti fiafia lahi au kua lagomatai e Iehova a maua ke fakakite e mahani totonu ki a ia.”

E, ko e fakafifitakiaga ni ha Iehova kua fakalagalaga a maua ke fakakite e fakaalofa mo e mahani totonu pihia. (Efeso 5:1, 2) Ko e fekafekauaga ha tautolu to fua mitaki ha kua “fakakite e [t]autolu a [t]autolu ke he tau mena oti ko e tau fekafekau he Atua . . . ke he mahani totonu.”—2 Kori. 6:4, 6.