Kia Lotomatala—Kumi e “Iloilo”
Fakatatai e moui ke he fenoga. Ka ko e pulotu he tagata ne fa mooli ke fakakaupā e aoga he lagomatai e tau tagata ke utauta e moui ke he puhala kua kautū. Tokologa ne tukia moumou he tahi loka he moui. (Sala. 107:23, 27) Ko e ha kua latatonu e metafoa ia?
He vahā i tuai, ko e fano fenoga he tahi ne paleko ti kua lata ke iloa e puhala. Ko e puhala fa fakaako he tau kauvaka kua leva, liga ko e tagata fakatila vaka. (Gahua 27:9-11) Loga e fakatino i tuai ne fakamaama e aoga he matagahua he tagata fakatila vaka ne fakatino a ia kua lahi atu ke he falu. Ke o atu ke he moana lahi, ne fakaako he tau tagata heke toga hagaao ke he tau fetū, tau matagi, mo e falu puhala foki. Kua fakamaama he Tohi Tapu e falu kauvaka kua “iloilo.”—Eseki. 27:8.
Ko e fakatila he tau lekua he moui he vahā nei kua tuga e uka he fano tahi he vahā i tuai. Ko e heigoa ka lagomatai a tautolu?
MAEKE FĒFĒ A TAUTOLU KE MOUA E “ILOILO”?
He tokaloto e metafoa he moui tuga e fenoga, manamanatu ke he tala mooli nei he Tohi Tapu: “Kia fanogonogo ai e tagata iloilo, kia tolomaki atu hana iloilo; ko ia ne pulotu foki ke moua ai e ia e iloilo ke pule ai.” (Fakatai 1:5, 6) Ko e kupu Heperu ne kakano “iloilo” ka fakamaama e tau gahua he takitaki kauvaka he toga i tuai. Kua hagaao ke he lotomatala ke takitaki mo e fakahakohako he fakailoilo.
Pete he lata mo e laliaga, maeke a tautolu ke moua e “iloilo” mo e fakaako ke “fakatila” fakahako he tahi he moui. Tuga he fakakite he Tau Fakatai, fakaatā e tautolu e “iloilo,” “pulotu,” mo e maama ke gahuahua auloa. (Fakatai 1:2-6; 2:1-9) Ti nakai lata ia tautolu ke fakaheu e kumi e takitakiaga faka-Atua, ha ko e mena iloa he tau tagata mahani kelea e puhala ke uta ke he fakaotiaga nakai fakafili tonu.—Fakatai 12:5.
Ti kua aoga ke eke a tautolu mo tau tagata fakaako fakamakutu he Kupu he Atua. He fakaakoaga pihia, maeke a tautolu ke fakaaoga e tau vala tala uho hagaao ki a Iehova mo ia ne fakaata lahi mahaki a Ia, ko Iesu Keriso. (Ioane 14:9) Lahi e fakatonuaga pulotu kua moua e tautolu he tau feleveiaaga Kerisiano. Lafi ki ai, maeke a tautolu ke fakaako mai he tau vala tala he falu, putoia e tau mamatua ha tautolu.—Fakatai 23:22.
AMAAMANAKI MO E FAKATOKATOKA
Kua aoga pauaki e “iloilo” ka lauia a tautolu he tau vai hagahaga kelea, ke he vagahau fakatai. Ko e tau fakauaua hagaao ke he tau mahani ke taute aki e tau tuaga uka ka fakanonaia a tautolu, ko e fua kelea lahi mahaki ka moua ai.—Iako. 1:5, 6.
Fuluola ai, ko e kupu “iloilo” kua fakaaoga foki ke he manatu ke felakutaki. Totou e tautolu: “Ko e tau pulega mitaki ke eke ai hāu a tau; ko e tau pule tokologa foki ke hao mitaki ai.”—Fakatai 20:18; 24:6.
Tuga e tagata fakatokatoka he felakutaki, kua mitaki ke amaamanaki a tautolu ke kitia e tau hagahaga kelea ke he tau tuaga fakaagaaga ha tautolu. (Fakatai 22:3) Ma e fakatai, liga kua fifili a koe ke talia e gahua foou po ke holo hake he gahua. Liga manamanatu mafiti a koe ke he totogi, fano mo e liu mai he gahua, mo e falu vala tala foki. Pete ia, ha ha i ai e tau manatu ke tokaloto: To maeke kia e vahega gahua ke tatai mo e tau matapatu fakaakoaga he Tohi Tapu? Maeke fēfē e tau gahua ne hikihiki e tau tulā gahua ke lauia e tau matagahua Kerisiano haaku?—Luka 14:28-30.
Ko Loretta ko e taha he Tau Fakamoli a Iehova ne mitaki e gahua he kamupanī taute mena kai. He hiki e kamupanī ke he taha matakavi, ne age ki a Loretta e tuaga uho he matakavi foou: “Ko e magaaho naia ma e moui katoa,” he tala age he tau takitaki ki a ia. “Kua fitā e iloa e mautolu na fai Fale he Kautu i ai.” Ka e manako a Loretta ke fakamukamuka e moui haana ke fekafekau katoatoa ke he Tufuga. Ne kitia e ia ko e gahua foou to nakai lahi e magaaho haana ma e tau matagahua Kerisiano. Ti tuku e ia e tohi haana ke oti e gahua, pete he tala age e takitaki ko ia ni e tagata gahua ne manako lahi a ia ke mau e gahua. Ko Loretta mogonei ko e paionia tumau kavi ke he 20 e tau, ne talitonu ko e tau fua mitaki kua moua mai ne matutaki fakahako ke he pulega “iloilo” haana, ē, he fakatatau mo e fakatonuaga ne moua he Kupu he Atua. Ne fakamalolō e fakafetuiaga haana mo Iehova ti ha ha i ai e lilifu he lagomatai e tokologa ke talia e kupu mooli he Tohi Tapu.
Kua lata mooli e “iloilo” i loto he magafaoa. Ko e feaki tama ko e gahua loa, ti ko e tau fifiliaga ne taute ke he faahi fakaagaaga po ke fakatino ne lauia e vahā anoiha he tau tagata oti he magafaoa. (Fakatai 22:6) Ma e fakatai, ko e tau matua Kerisiano ne liga hūhū ki a lautolu ni: ‘He ha mautolu a tau tutalaaga mo e fifitakiaga, kua fakaako nakai e mautolu e tau tama ha mautolu ke he tau mahani fakaagaaga ka lagomatai a lautolu ke fahia fakamitaki mo e moui fuata? Lagomatai kia he puhala moui ha mautolu a lautolu ke maama e puhala fakalatalata ke he moui mukamuka mo e hagaaki ke he fekafekauaga Kerisiano ha lautolu?’—1 Timo. 6:6-10, 18, 19.
Ko e kautūaga mooli kua nakai fifili he tau koloa po ke tau foliaga he tau matakau kua fa tutuli e lautolu he lalolagi. Maama he Patuiki ko Solomona e mena nei. Ne omoomoi a ia ke tohi: “To monuina a lautolu kua matakutaku ke he Atua, ko lautolu kua matakutaku ki mua hana.” (Fakama. 8:12) Kua fakamooli he mena ia e pulotu he tutuli e “iloilo” ne fakavē ki ai ti lagotatai mo e Kupu he Atua.—2 Timo. 3:16, 17.
[Fakatino he lau 30]
Ke fakamaama e matagahua ha lautolu, ko e tau tagata fakatila ne fa mua atu ke he tau kauvaka
[Credit Line]
Su concessione del Ministero per i Beni e le Attività Culturali. Kua nakai fakagofua ke liu taute po ke lolomi e fakatino nei ke he ha puhala po ke he tau puhala oti.