Veveheaga 15

Ati Hake e Magafaoa ne Fakalilifu e Atua

1-3. Ko e ha kua nakai maeke e falu ke fakamitaki e tau lekua ne kua fa mahani ke he fakamauaga mo e tuaga he matua, ka ko e ha kua maeke e Tohi Tapu ke lagomatai?

LIGA kua taute a koe ke ta e kaina ma hau ni. Ne fakatau e koe e vala kelekele. Kua onoono ki mua mo e fakamakai, ne kitia e koe e hau a fale fou ke he tau mata he manamanatuaga hau. Ka e kua ka nakai fai kanavaakau a koe po ke tau lotomatala ta fale? Kua fakagoagoa ulu ha e tau laliaga hau!

² Tokologa e tau hoa tokoua ne kamata e fakamauaga mo e manamanatuaga ke he magafaoa fiafia, ka e kua nakai fai kanavaakau po ke tau lotomatala ne kua lata ke ati hake ai. He mole fakatote laia e aho fakamauaga, ne tupu e tau aga kelea. Kua eke ai e latau mo e taufetoko mo puhala he tau aho takitaha. He magaaho ne fanau mai e tau tama, ne moua he matua tane mo e matua fifine fou kua nakai fai lotomatala a laua ke eke mo tau mamatua tuga ni ke he fakamauaga.

³ Ka e, kua fiafia ai, ha kua maeke e Tohi Tapu ke lagomatai. Ko e tau matapatu fakaakoaga i ai kua tuga e tau kanavaakau ne maeke ia koe ke ati hake e fiafia fakamagafaoa. (Tau Fakatai 24:3) Kia o mai a tautolu ke kitia e puhala.

TAU KANAVAAKAU KE ATI HAKE E FIAFIA HE FAKAMAUAGA

4. Ko e ha kua amaamanaki atu ai ke he tau lekua he fakamauaga, mo e ko e heigoa e tau fakatufono kua foaki mai i loto he Tohi Tapu?

⁴ Pete ni he tuga ke tatai mitaki e hoa tokoua ne mau, kua kehekehe a laua ke he talagaaga he loto manamanatuaga, tau moui he vaha tama, mo e feakiaga fakamagafaoa. Ti ko e mena ia, kua amaamanaki ai ke he falu a lekua ka mole e fakamauaga. To fehagai atu fefe ke he tau mena ia? Moli, ka ta he tau tagata talaga fale e fale, ne kumikumi atu a lautolu ke he fakatokaaga ki ai. Ko e tau takitakiaga anei ke mumuitua ki ai. Kua foaki he Tohi Tapu e tau fakatonutonuaga he Atua ke ati hake e fiafia fakamagafaoa. Kia o mai a tautolu he mogonei ke kumikumi ke he falu he tau mena nei.

5. Pehi fefe he Tohi Tapu e aoga he mahani fakamoli i loto he fakamauaga?

⁵ Mahani Fakamoli. Ne pehe a Iesu: “Ko ia kua fakalataha he Atua, aua neke vevehe he taha tagata.”a (Mataio 19:6) Kua tohi he aposetolo ko Paulo: “Kia eke e mutolu ke mitaki he fai hoana e tau tagata oti kana, mo e mohega foki kua nakai fakakelea; ka e fakahala he Atua e tau tagata feuaki mo e faivao.” (Heperu 13:4) Kua lata ai he tau tagata he fakamauaga ke logona hifo e kotofaaga ki a Iehova ke fakatumau ke tua fakamoli ke he ha lautolu a tau hoa.​—Kenese 39:​7-9.

6. Maeke fefe he mahani fakamoli ke lagomatai ke fakahao e fakamauaga?

⁶ Kua foaki he mahani fakamoli ke he fakamauaga e tuaga lilifu mo e haohao mitaki. Kua iloa he hoa mahani fakamoli ko e, pete ni ko e heigoa ka tupu, to felagomataiaki a laua. (Fakamatalaaga 4:​9-12) Kua kehe mai ha ia ia lautolu ne tiaki e fakamauaga ha lautolu he magaaho ka kamata ke fai lekua! Ko e tau tagata pihia kua mafiti a lautolu ke talahau kua ‘fifili e tagata hepe,’ mo e kua ‘nakai tuai fakaalofa e taha ke he taha,’ ti ko e hoa fou e tali. Ka e nakai fakaata he mena nei e magaaho ma e tau hoa ia ke tupu e loto manamanatuaga. Ka e, kua uta e lautolu pihia ne nakai mahani fakamoli e tau lekua ia ni ke he hoa fou. Kaeke kua ha ha he tagata e fale homo ka e kua tutulu ai e alofale, kua moli ni to lali a ia ke taute ai. Nakai ni hiki atu a ia ke he taha fale foki. Tuga a ia, ke hiki e hoa ko e nakai ko e hala a ia ke fakamitaki aki e tau lekua ne kua fakatupu ai e totokoaga he fakamauaga. Kaeke ke mafuta mai e tau lekua, ua lali ke fakaoti e fakamauaga, ka e gahua fakamakamaka ke fakahao ai. Kua taute he mahani fakamoli pihia e kaufakalatahaaga mo mena kua mua atu e lata ke puipui, fakatumau, mo e ke fakahelehele.

7. Ko e ha kua fa uka ai e matutakiaga ma e tau tagata mau, ka e maeke fefe he tui “e tagata fou” ke lagomatai?

⁷ Matutakiaga. “Kua ulu e tau mena ne manamanatu ki ai kaeke kua nakai fai pulega,” he talahau he fakatai he Tohi Tapu. (Tau Fakatai 15:22) Ka e, kua uka ai e matutakiaga ma e falu a hoa he fakamauaga. Ko e ha kua pihia ai e mena ne tupu? Ha kua kehekehe e tau puhala matutakiaga he tau tagata. Ko e hanei e moli ne fa takitaki atu ke he nakai maama mitaki mo e fakagoagoa. Liga kua lafi atu e feakiaga fakamagafaoa ke he mena nei. Ke fakatai ki ai, kua liga feaki hake e falu he kaina kua taufetoko e tau mamatua. Ti he mogonei ko e tau tagata lalahi kua mau, liga to nakai iloa e lautolu ke vagahau ke he ha lautolu a hoa ke he puhala totonu mo e fakaalofa. Ka e pete ni ai, kua nakai lata e kaina hau ke malolo hifo ke eke mo ‘fale puke ai he taufetoko.’ (Tau Fakatai 17:1) Kua pehi mai he Tohi Tapu ke tui e “tagata fou,” mo e kua nakai fakaata e fakafiu oti mo e vale, miha, mo e kupu kelea.​—Efeso 4:​22-24, 31.

8. Ko e heigoa ka lagomatai ka nakai fetaliaaki a koe mo e hau a hoa?

⁸ Ko e heigoa hau ka taute he magaaho ka nakai fetaliaaki? Kaeke ke hohopo mai e tau ita, kua lata ia koe ke muitua ke he fakatonuaga he Tau Fakatai 17:14: “Ko e mena ia kia tiaki a e taufetoko ka e nakaila tupu ai e latau.” E, liga to taofi e koe e fakatutalaaga ato hoko ke he mogo fakamui, he magaaho ka manounou hifo tokoua a koe mo e hau a hoa. (Fakamatalaaga 3:​1, 7) Ke he ha mena ni, ki a lali ke “alumaki ke fanogonogo, kia fakatuai ke vagahau atu, kia fakatuai ke he ita.” (Iakopo 1:19) Ko e foliaga hau ke fakamaulu e tuaga, nakai ke mua he taufetoko. (Kenese 13:​8, 9) Kia fifili e tau kupu mo e aga he vagahau ke fakamanounou hifo a koe mo e hau a hoa. (Tau Fakatai 12:18; 15:​1, 4; 29:11) Ka e ke he tau mena oti, aua neke fakatumau ke he tuaga ita, ka e ke kumi lagomatai he matutaki atu mo e Atua he liogi fakatokolalo tokoua.​—Efeso 4:​26, 27; 6:18.

9. Ko e ha kua pehe ai kua kamata e matutakiaga mai he loto?

⁹ Kua pehe e fakatai he Tohi Tapu: “Ko e loto he tagata iloilo, kua iloilo ai hana gutu; kua lafilafi ai foki e iloilo ke he hana tau laugutu.” (Tau Fakatai 16:23) Kua moli ai, he mogoia, ko e kei ke he kautuaga he matutakiaga kua ha ha he loto, nakai he gutu. Ko e heigoa e aga hau ke he hau a hoa? Kua fakamafana mai e Tohi Tapu ke he tau Kerisiano ke fakakite e “feofanaki.” (1 Peteru 3:8) Maeke nakai a koe ke taute e mena nei ka fakaatukehe ai e hau a hoa he fakamauaga? Ka pihia, to maeke ai ia koe ke iloa ai e puhala ke taliaki.​—Isaia 50:4.

10, 11. Maeke fefe he tane ke fakagahuahua e fakatonutonuaga ia 1 Peteru 3:7?

¹⁰ Fakalilifu. Kua tala age ke he tau tane Kerisiano ke nonofo mo e ha lautolu a tau hoana “mo e iloilo, kia fakalilifu ke he hoana, ha ko e kapiniu a ia kua mua he lolelole kia koe.” (1 Peteru 3:7) Ko e fakalilifu ke he hoana he taha kua putoia ai e mailogaaga he hana a aoga. Ko e tane ne nonofo mo e hana hoana “mo e iloilo” kua muatua e onoonoaga ke he hana tau logonaaga, loto malolo, loto matala, mo e tuaga lilifu. Kua lata foki ia ia ke manako ke ako ko e fefe e onoonoaga ha Iehova ke he tau fifine mo e manako ke taute atu ki a lautolu.

¹¹ I loto he fale hau, kia o mai a tautolu ke pehe kua ha ha ia koe e lupo kua lahi e aoga, kua mua atu e aleale. Nakai kia fakaeneene lahi a koe ka fakaaoga ai? Moli, kua fakaaoga e Peteru e talahauaga “kapiniu kua mua e lolelole” ke he manatu tatai ia ni, ti kua lata he mena nei ke omoi e tane Kerisiano ke fakakite e levekiaga totonu ma e hana a hoana fakahelehele.

12. Maeke fefe he hoana ke fakakite ko e hokulo e fakalilifu hana ke he hana a tane?

¹² Ka e ko e heigoa e fakatonuaga ne foaki he Tohi Tapu ke he hoana? Kua tohi e Paulo: “Ko e fifine kia fakalilifu a ia ke he hana tane.” (Efeso 5:33) Tuga ni e hoana ne manako ke logona hifo kua fakalilifu ki a ia mo e kua ofania mo e fakahelehele he hana a hoa, kua manako foki e tane ke logona hifo kua fakalilifu e hana a hoana ki a ia. Ko e hoana fakalilifu kua nakai tala noa e tau hepehepe he hana a tane, pete ko e Kerisiano e tane po ke nakai. To nakai uta kehe e ia e tuaga lilifu he tane he totoku kelea mo e tala fakateaga ki a ia ke he mena galo po ke ke he tau tagata.​—1 Timoteo 3:11; 5:13.

13. Maeke fefe e tau manatu ke talahau ke he aga kua mafola?

¹³ Kua nakai pehe e mena nei kua nakai maeke e hoana ke talahau hana tau manatu. Kaeke kua fai mena ne fakatupetupe aki a ia, kua maeke ia ia ke vagahau mo e lilifu hagaao ki ai. (Kenese 21:​9-12) Ko e talahau e manatu ke he hana tane kua liga ke tuga e liti e fua polo ki a ia. Kua maeke he hoana ke liti age fakaeneene ke mukamuka he tane ke hapo ai, po ke maeke ia ia ke liti ai mo e malolo lahi ke fakapakia aki e tane. Kua lahi ha e mitaki ka kalo tokoua e tau hoa mai he fetoloaki e tau tukumale ka e, kua lata, ke vagahau ke he aga kua totonu mo e molulu!​—Mataio 7:12; Kolose 4:6; 1 Peteru 3:​3, 4.

14. Ko e heigoa hau ka taute ka tote e fiafia ne fakakite he hau a hoa ke he fakagahuahuaaga he tau matapatu fakaakoaga i loto he fakamauaga?

¹⁴ Tuga kua kitia ai e tautolu, kua maeke he tau matapatu fakaakoaga he Tohi Tapu ke lagomatai a koe ke ati hake e fiafia he fakamauaga. Ka e kua, ka tote e fiafia ne fakakite he hau a hoa ke he mena ne talahau he Tohi Tapu? Kua lahi agaia e mena ka moua kaeke ke fakagahuahua e koe e iloilo he Atua ke he hau a matagahua. Kua tohi e Peteru: “Ko e tau fifine, kia omaoma ke he tau tane ha mutolu ni, kaeke foki kua faliuliu ke he kupu, kia moua a lautolu he mahani mitaki he tau hoana ha lautolu, ka e nakai vagahau, Ka kitekite age a lautolu kia mutolu kua nonofo fakatekiteki mo e matakutaku.” (1 Peteru 3:​1, 2) Kua moli, kua tatai e lauia ke he tane ne kua nakai talia he hoana e Tohi Tapu. Pete ni ko e heigoa kua fifili he hau a hoa ke taute, kia toka e tau matapatu fakaakoaga he Tohi Tapu ke taute a koe mo hoa kua mua e mitaki. Ko e iloilo ke he Atua ka taute foki a koe mo matua kua mua e mitaki.

FEAKI HAKE E FANAU HAGAAO KE HE ILOILO KE HE ATUA

15. Maeke fefe e tau puhala kelea ne feaki hake he falu magaaho ke fakaholo atu, ka e maeke fefe e puhala nei ke hiki?

¹⁵ Ke fai hehele mo e hamala kua nakai taute e taha mo tagata kamuta loto matala. Ke tuga foki, ke fanau e tau tama kua nakai taute taha mo matua loto matala. Kua iloa po ke nakai iloa, kua fa mahani e tau mamatua ke feaki hake ha laua a fanau ke he puhala ne kua feaki hake a laua. Ha kua pihia, ko e tau puhala kelea ne feaki hake e fanau kua fakaholo atu he falu magaaho mai he taha atu hau ke he taha. Kua pehe e fakatai Heperu i tuai: “Kua kai he tau matua tane e tau fua vine mui, ka e maniania ai e tau nifo he fanau.” Ka e, kua fakakite mai he tau Tohiaga Tapu kua nakai lata e tagata ke muitua ke he puhala ne fakatu he hana tau mamatua. Kua maeke ia ia ke fifili e puhala kehe, ko e taha ne fakaohooho he tau fakatufono ha Iehova.​—Esekielu 18:​2, 14, 17.

16. Ko e ha kua aoga ai ke foaki ma e hau a magafaoa, mo e kua putoia e mena nei ke he heigoa?

¹⁶ Kua amaamanaki a Iehova ke he tau mamatua Kerisiano ke foaki ke he ha lautolu a fanau e takitakiaga mo e leveki mitaki. Kua tohi e Paulo: “Kaeke kua nakai leveki e taha hana faoa, ti au atu kia lautolu kua nonofo mo ia kua fakatikai e ia e tua, kua mua foki hana kelea kia ia kua faliuliu.” (1 Timoteo 5:8) Ko e tau kupu malolo ha ia! Ke fakamoli hau a matagahua mo tagata foaki, ne kua putoia ai ke he levekiaga he hau a fanau ke he fahi tino, fakaagaga, mo e tau manako he logonaaga, ko e monuina mo e matagahua a ia he tagata mahani Atua. Kua foaki he Tohi Tapu e tau matapatu fakaakoaga kua maeke ke lagomatai e tau mamatua ke ati hake e tuaga fiafia ma e ha lautolu a fanau. Kia onoono atu ke he falu mena nei.

17. Ko e heigoa kua lata ai kaeke ke ha ha he fanau hau e matafakatufono he Atua ke he ha lautolu a tau loto?

¹⁷ Fakatoka e fakafifitakiaga mitaki. Kua poaki atu ke he tau mamatua Isaraela: “Kia fakaako atu mau ia [tau kupu he Atua] ke he hau a fanau, mo e vagahau ki ai, ka nofo a koe ke he hau a fale, ti pihia foki ka fano a koe ke he puhala, ti pihia foki ka takoto a koe, ti pihia foki ka matike ai a koe.” Kua lata he tau mamatua ke fakaako e tau fakatufono he Atua ke he ha lautolu a fanau. Ka e ko e tomatomaaga nei kua talahau fakamua mai he fakamauaga: “Kia ha i ai foki ke he hau a loto e tau kupu nai kua poaki atu ai e au kia koe ke he aho nai.” (Teutaronome 6:​6, 7) E, kua nakai maeke e tau mamatua ke foaki e tau mena ne nakai ha ha ia lautolu. Kua lata e tau matafakatufono he Atua ke fakamau fakamua ke he hau a loto ni ka manako a koe ke fakamau ai ke he tau loto he hau a fanau.​—Tau Fakatai 20:7; fakatatai Luka 6:40.

18. He fakakite e fakaalofa, kua fakatoka fefe he tau mamatua e fakafifitakiaga mua atu?

¹⁸ Foaki e fakamoliaga he hau a fakaalofa. He papatisoaga ha Iesu, ne talahau e Iehova: “Ko e haku a Tama fakahele a koe, kua fiafia ni au kia koe.” (Luka 3:22) Kua fakailoa ai e Iehova e hana a Tama, mo e talahau noa e fiafia ki a ia mo e tuku age e fakamoliaga he Hana a fakaalofa. Ne talahau a Iesu he magaaho fakamui ke he hana Matua: “Ko e mena fakaalofa mai a koe kia au, ka e nakala fakave e lalolagi.” (Ioane 17:24) Ha ko e tau mamatua mahani Atua, kua lata mogoia, ke foaki ke he hau a fanau e tau talahauaga he puhala vagahau mo e tau fakakiteaga fakatino he hau a fakaalofa ma lautolu​—mo e taute tumau e mena nei. Kia manatu tumau “kua ati hake e fakaalofa.”​—1 Korinito 8:1, NW.

19, 20. Ko e heigoa kua putoia ke he akonakiaga tonu he fanau, mo e maeke fefe e tau mamatua ke moua e aoga mai he fakafifitakiaga ha Iehova?

¹⁹ Akonakiaga. Kua pehi he Tohi Tapu e aoga he akonakiaga fakaalofa. (Tau Fakatai 1:8) Ko e tau mamatua ne tiaki ha lautolu a matagahua ke takitaki ha lautolu a fanau he mogonei ko e mena to eke moli ni ke fehagai mo e tau fua he loto malipilipi a anoiha. Ka e, kua hataki foki e tau mamatua neke to muatua ke he taha fahi. “Ko mutolu e tau matua tane,” he tohi e Paulo, “aua neke fakalagalaga e tau fanau ha mutolu, neke fakalolelole e tau loto ha lautolu.” (Kolose 3:21) Kua lata e tau mamatua ke aua molea e fakahakohakoaga ke he ha lautolu a fanau po ke hoha tumau ha ko e ha lautolu a tau kaumahala mo e totoku kelea ha lautolu a tau laliaga.

²⁰ Ko e Atua ko Iehova, ha tautolu a Matua he lagi, kua fakatokatoka e fakafifitakiaga ke he foakiaga he akonakiaga. Ko e mena nakai to muatua e fakahakohakoaga hana. “To akonaki fakalata e au a koe,” he tala age he Atua ke he hana tau tagata. (Ieremia 46:28) Kua lata e tau mamatua ke fifitaki a Iehova ke he puhala nei. Ko e akonakiaga ne kua molea e fakalatalataaga po ke kua molea e finagalo he fakahakohako mo e fakaakoaga ko e mena lafi ki luga a ia.

21. Maeke fefe he tau mamatua ke fifili ko e hufia mitaki nakai ha laua a akonakiaga?

²¹ Maeke fefe e tau mamatua ke fifili ko e hufia mitaki nakai e ha lautolu a akonakiaga? Liga to huhu a lautolu ki a lautolu ni, ‘Ko e heigoa ne moua mai he akonakiaga haku?’ Kua lata ai ke fakaako. Kua lata he hau a tama ke maama ko e ha kua taute ai e akonakiaga. Kua lata foki e tau mamatua ke manamanatu atu hagaao ke he magaaho ka oti ai ha lautolu a fakahakohako. Moli, to teitei ke ita oti e fanau he mogo fakamua ke he akonakiaga. (Heperu 12:11) Ka e kua nakai lata e akonakiaga ke taute e tama ke matakutaku po ke logona ko e tiaki po ke toka a ia mo e manamanatuaga ko e kelea pauaki a ia. Ato fakahako e ia hana tau tagata, ne pehe a Iehova: “Aua neke matakutaku a koe . . . nakai toka e au a koe.” (Ieremia 46:28) E, kua lata e fakahakohakoaga ke fakahoko ke he puhala ke logona hifo he hau a tama kua ha ha a koe mo ia ko e tau mamatua fakaalofa mo e falanaki ki ai.

KIA MOUA E “ILOILO KE PULE AI”

22, 23. Maeke fefe ia koe ke moua e takitakiaga hako ne lata ke ati hake e fiafia fakamagafaoa?

²² Kua lata ia tautolu ke oue tulou kua foaki mai e Iehova e tau kanavaakau ne manako a tautolu ki ai ke ati hake e fiafia fakamagafaoa. Ka e ke moua e tau kanavaakau kua nakai koenaia. Kua lata ia tautolu ke tauteute ke fakaaoga fakamitaki e tau mena ia. Ke fakatai ki ai, to liga moua he tagata ta fale e tau aga kelea ke he puhala ne fakaaoga e ia hana tau kanavaakau. To liga fakaaoga ni e ia e falu he tau mena ia ke he puhala hepe. Ki kelekekele he tau tuaga nei, ko e hana tau puhala kua tuga lahi ke fua mai e tau mena nakai aoga. Tuga a ia, kua liga mataala a koe he mogonei ke he tau aga nakai mitaki ne kua totolo ki loto he hau a magafaoa. Ko e falu kua liga e to lahi e hokulo mo e uka ke hiki. Ka e, ki a mumuitua atu ke he tomatomaaga he Tohi Tapu: “Kia fanogonogo ai e tagata iloilo, kia tolomaki atu hana iloilo; ko ia ne pulotu foki ke moua ai e ia e iloilo ke pule ai.”​—Tau Fakatai 1:5.

²³ Kua maeke ia koe ke moua e lotomatala hako he fakatumau ke uta ke he loto e iloilo ke he Atua. Kia mataala ke he tau matapatu fakaakoaga he Tohi Tapu ne kua lauia ke he moui fakamagafaoa, mo e taute e tau hikihikiaga ne kua lata. Kia onoono atu ke he tau Kerisiano ne fakatoka e tau fakafifitakiaga mitaki ha ko e tau hoa he fakamauaga mo e tau mamatua. Tutala ki a lautolu. Ke he tau mena oti, kia uta hau a tau manamanatuaga ke he Atua ke he liogi. (Salamo 55:22; Filipi 4:​6, 7) To lagomatai e ia a koe ke olioli ke he moui fiafia fakamagafaoa ne fakalilifu a ia.

[Tau Matahui Tala]

KAMATAMATA E ILOILO HAU

Maeke fefe e mahani fakamoli, matutakiaga, mo e fakalilifu ke lagomatai ke he fiafia he fakamauaga?

Ke he tau puhala fe he tau mamatua ka fakamoli ke he ha lautolu a fanau ha lautolu a fakaalofa?

Ko e heigoa e tau mena kua putoia he akonakiaga kua tonu?

[He Lau Katoa he fakatino he lau 147]