Taute e Fakamauaga Hau ke Fakalataha Tumau

“Ko ia kua fakalataha he Atua, aua neke vevehe he taha tagata.”​—MATAIO 19:6.

1. Ko e heigoa e matapatu ma e kautu he fakamauaga he tau Kerisiano moli he vaha nei?

LOGA e tau afe he tau tagata a Iehova he vaha nei kua olioli lahi e fakamakonaaga mo e fakaukaaga he tau fakamauaga. Ko e kautu he holofaaga pihia, ko e mena ia, kua uka lahi ke pehe ko e pakia. Ko e tau fakamauaga Kerisiano kua holo mitaki he magaaho ka fakalataha e tau hoa tokoua ke (1) fakalilifu e kitekiteaga he Atua ke he fakamauaga mo e (2) fakamakamaka ke momoui ke he tau matapatu fakaako he hana a Kupu. Ka mole ia, ko ia ni ko e Atua ne kamata e fakatokaaga he fakamauaga. Ko ia ni ko e Taha ‘kua fakahigoa mai ai e tau faoa oti kana he lalolagi.’ (Efeso 3:14, 15) Ha kua iloa e Iehova ko e heigoa e puhala ka taute ke moua he fakamauaga e kautu, kua aoga ni ki a tautolu ke mumui ke he hana tau takitakiaga.​—Isaia 48:17.

2. Ko e heigoa e fakahikuaga ka kaumahala ke fakaaoga e tau poakiaga he Tohi Tapu ke he fakamauaga?

² Ka ko e taha fahi, ko e kaumahala ke fakaaoga e tau matapatu fakaako he Tohi Tapu kua maeke ke fua mai e loto momoko he fakamauaga. Kua talitonu e falu he tau pulotu he pehe kua tokologa ke hoko ke he ua e mena ke toluaki ia lautolu kua mau he vaha nei he Tau Fahi Kau Fakalataha to hoko ni ke vevehe. Ke hoko foki ke he tau Kerisiano kua nakai hao he tau tupetupe mo e tau fakaatukehe “ko e tau aho fakamui to hohoko mai ai e tau aho uka.” (2 Timoteo 3:1) Ko e tau fakaatukehe fakatupe mo e tau pehia he tau gahuaaga kua maeke ke uta kehe aki e mitaki he ha fakamauaga. Ko e fahi he tau Kerisiano kua ita konakuiti foki ha ko e kaumahala he ha lautolu a tau hoa ke fakaaoga e tau matapatu fakaako he Tohi Tapu. “Kua fakaalofa ni au ki a Iehova,” he talahau he taha hoana Kerisiano, “ka ko e fakamauaga haku kua lahi e vihi ke he 20 e tau tau. Kua fulukovi lahi e tane haku mo e nakai manako ke taute ha hikiaga. Kua logona e au e makototia.” Loga mai he gahoa e tau tane mo e tau hoana Kerisiano ne talahau e tau manatu fakauaua pihia foki. Ko e heigoa ne hepe? Mo e ko e heigoa ke puipui aki e fakamauaga mai he tafea atu ke he fekehekeheaki momoko po ke faitaua hehe ia?

Ko e Tumauaga he Fakamauaga

3, 4. (a) Ko e heigoa e tuaga he Atua ma e fakamauaga? (e) Ko e ha e tumau he fakamauaga ne tonu ai mo e aoga?

³ Pihia foki ke he tau tutuaga mitaki lahi, ko e fakamauaga ko e fakalatahaaga he tau tagata takitokotaha nakai mitaki katoatoa. (Teutaronome 32:5) Ko e mena haia he aposetolo ko Paulo ne pehe ai “ka e moua a lautolu kua pihia [mau] he matematekelea ke he tino.” (1 Korinito 7:28) Ko e falu he tau tutuaga malolo lahi kua hoko foki ke he mavehevehe po ke tau vevehe. (Mataio 19:9; 1 Korinito 7:12-15) Ke he laulahi he tau mena tutupu, ko e mena ia, ne fakaaoga ai he tau Kerisiano e fakatonuaga ha Paulo: “Aua neke fano kehe e hoana mo e hana tane . . . , aua foki neke mavehe e tane mo e hana hoana ni.” (1 Korinito 7:10, 11) Moli, ko e fakamauaga kua lata ni ke eke mo pipi he tumauaga, ha kua fakailoa e Iesu Keriso: “Ko ia kua fakalataha he Atua, aua neke vevehe he taha tagata.”​—Mataio 19:6.

⁴ Ke he ha tagata ne logona e makototia he nakai feofanaki po ke nakai fakaalofa e fakamauaga, ko e tuaga a Iehova kua liga vale mo e nakai fai kakano. Ka e nakai pihia. Ko e tumau he pipi he fakamauaga kua omoi aki e mahani Atua he faoa tokoua ke fehagaaoaki mo e kumi ke fakamafola ha laua a tau mena vihi, ka e nakai ke fakatepetepe fakahanoa ke liliu tua mai he ha laua a tau kotofaaga ka kamata ke lekua. Taha e tagata ne faihoana kua molea e 20 e tau tau ne tuku pehe: “Kua nakai maeke ia koe ke hola kehe mai he tau magaaho lekua. To nakai maeke ia mua ke fiafia tumau e taha ke he taha he tau magaaho oti. Ko e magaaho haia ka aoga lahi ai e fakatutalaaga.” Moli, ko e hoana mo e tane Kerisiano na logona e maveheaga pauaki ke he Atua ko Iehova, ko e Kamataaga he fakamauaga.​—Fakatatai Fakamatalaaga 5:4.

Ulu Pule mo e Omaoma

5. Ko e heigoa e falu fakatonuaga ha Paulo ma e tau tane mo e tau hoana?

⁵ Kaeke ke mafuta hake e tau mena vihi, ko e mena ia, kua hoko tuai ke he magaaho ke kumi, nakai ko e puhala ke hola kehe, ka ko e puhala mitaki ke fakaaoga e fakatonuaga he Kupu he Atua. Ke fakatai, manamanatu la ke he tau kupu nei ha Paulo, ne moua mai he Efeso 5:22-25, 28, 29: “Ko mutolu na, ko e tau fifine kia takitokotaha mo e omaoma ke he tau tane ha mutolu tuga e omaoma ke he Iki. Ha ko e tane, ko e ulu he hoana haia, tuga a Keriso, ko e ulu he ekalesia haia, ko ia foki ko e fakamoui he tino. Hanai, tuga e ekalesia kua omaoma kia Keriso, kia pihia foki e tau fifine ke he tau tane ha lautolu ke he tau mena oti. Ko mutolu, ko e tau tane, kia fakaalofa a mutolu ke he tau hoana ha mutolu, tuga e fakaalofa a Keriso ke he ekalesia, mo e foaki mai e ia a ia ke eke mo hukui māna. Kua lata pihia foki ke he tau tane ke fakaalofa age ke he tau hoana ha lautolu, tuga e tau tino ha lautolu. Ko ia kua fakaalofa ke he hana hoana, kua fakaalofa a ia kia ia ni. Ha kua nakai fakai taha ke fakavihia hana a tino, ka kua fagai mo e leveki ai e ia, pihia foki e Iki mo e ekalesia.”

6. Fakakehe fefe e tau tane Kerisiano mai he tau tagata tane he lalolagi?

⁶ Ko e tau tagata tane ne fakahehe tumau e lautolu ha lautolu a pule fakatane mo e pule lahi ke he tau hoana ha lautolu. (Kenese 3:16) Ko e mena ia, ne poaki e Paulo ke he tau tane Kerisiano ke kehe mai he tau tagata tane he lalolagi, ke tuga a Keriso, ke nakai vale ke tautaofi e tau mena oti ne fakagahuahua he tau hoana ha lautolu. Ko e moli ni, ko e tagata ko Iesu Keriso ne nakai mahani vale po ke pule taha. Ne tauteute ni e ia hana tau tutaki mo e fakalilifu mo e mahani lilifu, pehe: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo.”​—Mataio 11:28, 29.

7. Maeke fefe he tagata tane ke tuku e lilifu ke he hana hoana kaeke ke gahua a ia (hoana) ke he gahua fakalalolagi?

⁷ Ko e tane Kerisiano kua lata ke uta e lilifu ke he hana hoana ha ko e kapiniu lolelole. (1 Peteru 3:7) Ke fakatai, kaeke kua gahua a ia ke he gahua fakalalolagi. Kua lata ke manamanatu a ia ke he mena nei, mo e kua lata ke lagomatai fakalahi mo e manamanatu fakalahi. Taha e matapatu kakano ne fa talia ai he tau fifine e tau vevehe ko e tiaki he tau tane ha lautolu e tau fanau po ke kaina. Ti, kua lata he tane Kerisiano ke kumi ke lagomatai atu ki a ia he kaina ke he tau puhala mitaki ne aoga ke he magafaoa katoa.

8. Ko e heigoa e maveheaga ke he omaoma ma e tau hoana Kerisiano?

⁸ Kaeke ke taute mo e fakalilifu ko e mena ia ke mukamuka lahi he tau hoana Kerisiano ke omaoma ke he tau tane ha lautolu. Nakai kakano pehe e mena nei ke fakatupa fakakelea. Kua poaki he Atua ko e hoana kua eke mo, nakai ko e tupa, ka ko e “lagomatai” (“hoa,” matahui tala), kua fakamailoga aki taha mena ne lata tonu ma e tagata tane. (Kenese 2:18) He Malaki 2:14 (NW), ko e hoana ne talahau ia ko e “hoa” he tagata tane. Tuga a ia, ko e tau hoana he vaha he Tohi Tapu ne olioli lahi ke moua e ataina mo e tokanoa. Hagaao ke he “fifine mahani mitaki,” kua pehe e Tohi Tapu: “Kua tua kia ia e loto he hana tane.” Moli, ne falanaki moli ki a ia ke he tau vahega mena tuga e leveki ke he tau mena oti he kaina, pule ke he fakatau he tau mena kai, fakatokatoka mo e fakamau e tau mena kehekehe he kaina, mo e leveki e tama pisinisi tote.​—Fakatai 31:10-31.

9. (a) Fakakite fefe he tau fifine matakutaku Atua he vaha he Tohi Tapu e mahani omaoma moli? (e) Ko e heigoa ne lagomatai aki e hoana Kerisiano he vaha nei ke tumau e mahani omaoma?

⁹ Ka e taha e mena, ko e hoana matakutaku Atua ne mailoga e pule he hana tane. Ke fakatai, ko Sara ne “fanogonogo a ia kia Aperahamo, ne totoku e ia a ia ko e Iki,” nakai ke he puhala lilifu fa mahani, ka ko e ata fakamoli he hana a mahani omaoma. (1 Peteru 3:6; Kenese 18:12) Ne talia fiafia foki e ia ke toka hana kaina hagahaga mitaki he maaga ko Uro ke maeke ke nofo he tau fale ie mo e hana tane. (Heperu 11:8, 9) Ka ko e mahani omaoma nakai kakano pehe ke nakai maeke e hoana ke uta e kavega ia kaeke kua lata. Ko e magaaho ne kaumahala ai a Mose ke omaoma ke he fakatufono he Atua ke he peritomeaga, ko e hana hoana, ko Sipora, ne puipui e matematekelea he taute e fifiliaga kua lata. (Esoto 4:24-26) Kua mua atu e lauiaaga ke he fakafiafia he tagata nakai mitaki katoatoa. Kua lata e tau hoana ke “omaoma ke he tau tane ha lautolu tuga e omaoma ke he Iki.” (Efeso 5:22) Kaeke ke manamanatu e hoana Kerisiano ke he tau mena he hana fakafetuiaga mo e Atua, to lagomatai he tau mena nei a ia ke ua onoono ke he tau hepehepe ikiiki mo e tau mena nakai aoga he hana tane, ti pihia ni kua lata he tane ke taute ka fakafehagai mo ia.

Matutakiaga​—Totomoui he Fakamauaga

10. Aoga fefe e matutakiaga ke he fakamauaga?

¹⁰ Ko e magaaho ne huhu atu ai ko e heigoa e taha ni e kakano lahi mahaki ne fa mavehevehe ai e hoana mo e tane, ne tali he loea vevehe hoana: “Ko e nakai fakamalolo ke tutala fakamoli e taha ke he taha, ke fefakakiteaki ha laua tau fatuakiloto mo e taute e taha ke he taha ko e ha laua a kapitiga uho.” E, ko e matutakiaga ko e totomoui he fakamauaga malolo. Tuga he talahau he Tohi Tapu, “kua ulu e tau mena ne manamanatu ki ai kaeke kua nakai fai pulega.” (Fakatai 15:22) Kua lata e tau tane mo e tau hoana ke eke mo ‘tau kapitiga pulega,’ ke olioli ke he fakafetuiaga mafana mo e fetataaki. (Fakatai 2:17, NW) Ka e pete ia, tokologa e tau tane mo e tau hoana ne taufetului ka hoko ke he magaaho he matutakiaga, mo e ko e mena ia ne fa fakaputu ai e vihiatia a to hoko ke pa mai e vale kelea lahi. Po ke liga fufu hala tua noa he tau hoa ne mau e mahani mitaki, mo e fakamamao e logonaaga ha laua mai he taha.

11. Maeke fefe e matutakiaga he tane mo e hoana ke fakatolomaki ki mua?

¹¹ Ko e taha vala he mena vihi ko e tau tane mo e tau fifine kua fekehekeheaki tumau e tau faga matutakiaga. Ko e laulahi he tau fifine kua hagahaga mitaki ke fakatutala ke he tau logonaaga, ka ko e tau tagata tane fa tutala ni ke he tau mena ne tutupu. Ko e tau fifine kua hagahaga lahi ke fakakite e maama moli mo e age e lagomataiaga mai he loto, ka ko e tau tagata tane fa lali ke kumi mo e foaki e tau tali. Ka e tumau agaia ni, ko e gahuahuaaga kua lata tonu ma e matutakiaga mitaki kua moua kaeke ke lali fakalahi e tau hoa tokoua ke “alumaki ke fanogonogo, kia fakatuai ke vagahau atu, kia fakatuai ke he ita.” (Iakopo 1:19) Kia feonoaki mo e fanogonogo fakamitaki. Kia futiaki mai he taha e taha ke he tau huhu fai kakano. (Fakatatai 1 Samuela 1:8; Fakatai 20:5.) Ke lali ke foaki e tali mafiti he magaaho ka fakakite ai he hoa hau e mena vihi, ka kia fanogonogo fakamitaki a koe mo e gahua ke fakatonu e lekua. Mo e liogi fakatokolalo tokoua, mo e kumi e takitakiaga faka-Atua.​—Salamo 65:2; Roma 12:12.

12. Maeke fefe he tau hoa Kerisiano ke fakatau e magaaho he taha ma e taha?

¹² He falu a magaaho ko e tau tupetupe mo e tau fakaatukehe he moui kua tuku ke he tau hoa he fakamauaga e magaaho tote maka po ke malolo ke tutala fakamitaki. Ka e taha e mena, kaeke ke taofi he tau Kerisiano ha laua a fakamauaga ke lilifu mo e puipui mai he fakakelea, kua lata ni a laua ke fetataaki tumau e taha ke he taha. Kua lata a laua ke leveki ha laua a fakalataha ke eke mo taha mena uho, aoga ue atu, mo e kua lata ke fakatau mai e magaaho ma e mena ia mo e ma e taha ke he taha. (Fakatatai Kolose 4:5.) Ke he falu a magaaho ko e tali ke kumi e magaaho ke tutala mo e fakamalolo liga mukamuka lahi he tamate e tivi. Ko e nonofo ke inu e kapiniu ti po ke kofe kua maeke ke lagomatai aki e tau hoa he fakamauaga ke matutaki tumau e tau manamanatuaga. He tau mena tutupu pihia kua maeke ia laua ke “tutala tokoua” ke he tau lekua kehekehe he magafaoa. (Fakatai 13:10, NW) Mo e ko e pulotu ha a ia ke fakalaulahi e aga ke fakatutala kehe tau mena fakalavelave ikiiki mo e tau mena ne nakai maama to eke a lautolu mo punaaga lalahi he tau mena fakaatukehe!​—Fakatatai Mataio 5:23, 24; Efeso 4:26.

13. (a) Ko e heigoa e fakafifitakiaga ne fakatoka e Iesu ke he tokanoaaga mo e mahani fakamoli? (e) Ko e heigoa e falu a puhala ne maeke he tau hoa he fakamauaga ke o mai fakatata a laua ko e taha ke he taha?

¹³ Ne talahau he taha tagata tane: “Kua uka lahi ki a au, he falu a magaaho, ke vagahau moli mai he haku a loto mo e tala age moli ke he [hoana haku] e mena tonu he puhala ne logona hifo e au.” Ko e fakakite ni he tagata a ia, mogoia, ko e kei aoga lahi ke fakatupu aki e fetataaki. Mailoga la e puhala ne fakatokanoa mo e fakamoli ha Iesu mo lautolu ne amaamanaki he hana vahega kitofaihoana. Ne pehe a ia: “Nakai tuai totoku atu e au a mutolu ko e tau fekafekau, ha ko e mena nakai iloa he fekafekau e tau mena kua eke he hana iki; ka e totoku atu e au a mutolu ko e tau kapitiga; ha kua fakailoa atu e au kia mutolu e tau mena oti ne fanogonogo ai au ke he haku a Matua.” (Ioane 15:15) Ti onoono ke he tokoua hau ke eke mo kapitiga. Falanaki ke he hoa hau mo e hau a manamanatuaga. Kia fakamalolo ke taute fakamukamuka mo e fakamoli ke “mitaki hāu a fakaalofa.” (Lologo a Solomona 1:2) Ko e tokanoa he matutakiaga he falu a magaaho kua tuga e uka, ka e ka tuku atu tokoua he tau hoa he fakamauaga e fakamalolo kua lata, to lahi e mena ka moua mai he tauteaga he ha laua a fakamauaga ke fakalataha tumau.

Tauteuteaga he Nakai Fetataiaki

14, 15. Maeke fefe e taufetoko ke tiaki?

¹⁴ Ko e nakai fetataiaki moli to mafuta hake moli mai he taha magaaho mo e taha magaaho. Ka ko e hau a kaina kua nakai lata ke moua mai ai e ‘fale kua puke ke he taufetoko.’ (Fakatai 17:1) Kia fakaeneene ke aua neke fakatutala ke he tau mena tetotonu ke logona he tau fanau, mo e fakakite e manamanatuaga mitaki ke he tau manatu he hoa hau. Ko e magaaho ne talahau ai e Rahela hana loto tupetupe ha ko e hana tuaga tufua mo e ole ki a Iakopo ke age ki a ia e tau fanau, ne tali vale atu a ia: “Ko au kia ke hukui aki e Atua, ko ia ni kua nakai foaki kia koe ha tama?” (Kenese 30:1, 2) Kaeke ke mafutafuta hake e tau mena uka he kaina, kia tau ke he mena vihi, ka e ua tau ke he tagata. Ke he magaaho ka fakatutala tokoua ni, tiaki e “vagahau mo e nakai manamanatu” po ke nakai lata ke fakatauhele e taha ke he taha.​—Fakatai 12:18, NW.

¹⁵ Moli, liga malolo e tau manatu hau hagaao ke he matakupu he hau a kitiaaga, ka e maeke agaia ni ke talahau mo e nakai “fakafiu oti mo e vale, mo e ita, mo e miha, mo e kupu kelea.” (Efeso 4:31) “Fakatutala e tau mena vihi ha mua he leo ne fa mahani ki ai,” he talahau he taha tane. “Kaeke ke hake e leo he taha ki luga, taofi e tutala. Ka e liliu mai ki ai ka fai magaaho ku ka mole. Ti liu ke kamata foki.” Kua mai he Fakatai 17:14 e poakiaga mitaki: “Kia tiaki a e taufetoko ka e nakaila tupu ai e latau.” Lali ke liu tutala e tau lekua he magaaho ka totoka tokoua ai a mua.

Nonofo mo e Tua Fakamoli ke he Taha ke he Taha

16. Ko e ha e faivao ne hagahaga kelea lahi mahaki ai?

¹⁶ Kua pehe mai e Heperu 13:4: “Kia eke e mutolu ke mitaki he fai hoana e tau tagata oti kana, mo e mohega foki kua nakai fakakelea; ka e fakahala he Atua e tau tagata feuaki mo e faivao.” Ko e faivao ko e hala a ia ke he Atua. Kua maeke foki ke moumou e fakamauaga. (Kenese 39:9) Kua tohi he taha fifine fakatonutonu fakamauaga: “Ko e magaaho ne iloa ai, kua lauia e magafaoa katoa he faivao tuga e afa to kai maka, kua lipilipi e tau kaina, lulululu e falanakiaga mo e fakatokoluga ni he tagata kia ia ni, fakamatematekelea e tau fanau ikiiki.” Ko e fatu po ke tau gagao ne uta fano he mahani fakatane mo e fifine ka fua mai ai foki.

17. Maeke fefe e falanaki ke he mahani faivao ke tiaki po ke uta kehe?

¹⁷ Ko e falu tagata kua fakaauatu e falanaki ke he mahani faivao ha kua fakahufia e kitiaaga popo he lalolagi ke he mahani fakatane mo e fifine tuga ne ata mai he tau tohi, he televisoni, mo e he tau kifaga. (Kalatia 6:8) Kua pehe e tau tagata kumikumi, mogoia, ha kua fa mahani e faivao ke moua e tau fua nakai mai ni he manako ke he mahani fakatane mo e fifine ka e mai he manako ke kitia mo e fakamoli ko e mata fulufuluola agaia ni e taha po ke mai he manako ke logona e manako loto atu. (Fakatatai Fakatai 7:18.) Ko e heigoa ni e kakano, kua lata e Kerisiano ke tiaki e tau mahani paiki. Tutala fakamoli hau a tau manatu mo e hau a hoa. Kaeke kua lata, kia kumi lagomatai mai he tau motua he fakapotopotoaga. Ke taute pihia to liga puipui fakamitaki mai ai he to atu ke he hala. Pihia atu foki, kua lata e tau Kerisiano ke fakaeneene ka fakafehagai mo e tau tagata tino kehekehe. Ko e totoko ke he tau matapatu fakaako he Tohiaga Tapu ke mau mo e taha tagata ka ke ono mo e manako loto ke he taha. (Iopu 31:1; Mataio 5:28) Ko e tau Kerisiano kua lata ke fakaeneene pauaki ke he fakatupu e fakalataha he tau logonaaga mo e tau hoa gahua. Kia taofi e tau fakafetuiaga kapitiga pihia ka e ke he puhala fakapisinisi ni.

18. Ko e heigoa ne fa toka tumau he vaka he tau mena vihi he mahani fakatane mo e fifine he fakamauaga, mo e maeke fefe e mena nei ke fifili fakamitaki?

¹⁸ Ko e puipuiaga ne mua atu e lahi ko e mafanatia mo e tokanoa e fakafetuiaga mo e hoa he taha. Tokologa e tau tagata kumikumi ne talahau ko e tau mena vihi he mahani fakatane mo e fifine he fakamauaga kua fa lavea ke tupu mai he fahi tino ne mahani ai ka e mahani tumau ke tupu mai he kelea e matutakiaga. Ko e tau mena vihi ne fakalataha mo e tau laini nei kua fa tupu lavea kaeke ke fakatokanoa e tau matutakiaga mo e tuku e kakano he fakamauaga ke eke mo fakakiteaga he fakaalofa, ka e nakai ko e matagahua kotofa.a Ki lalo hifo he tau tutuaga mitaki pihia, kua maeke he tau fakafetuiaga mafanatia pihia ke lagomatai ke fakamalolo aki e pipi he fakamauaga.​—1 Korinito 7:2-5; 10:24.

19. Ko e heigoa e ‘pipi ke maopoopo ai,’ mo e ko e heigoa e mitaki ka moua mai i ai ma e fakamauaga?

¹⁹ Ko e fakaalofa “ko e pipi haia ke maopoopo ai” i loto he fakapotopotoaga Kerisiano. Ke fakagahuahua e fakaalofa, maeke he faoa tokoua ne mau mo e mahani Atua ke ‘fefakaukaaki mo e fefakamagaloaki e taha ke he taha.’ (Kolose 3:13, 14) Ko e poakiaga he fakaalofa kua kumi e levekiaga mitaki he falu. (1 Korinito 13:4-8) Kia fakagahuahua e fakaalofa pihia. To lagomatai ai a koe ke fakamalolo hau a pipi he fakamauaga. Kia fakaaoga e tau poakiaga he Tohi Tapu ke he moui he hau a fakamauaga. Kaeke ke taute e koe e mena ia, ko e fakamauaga hau to fakamoli ia ke eke mo fakalatahaaga tumau mo e to tamai e fakaheke mo e lilifu ke he Atua ko Iehova.

[Tau Matahui Tala]

To Tali Fefe e Koe?

◻ Ko e ha kua lata e fakamauaga ke eke mo pipi he tumauaga?

◻ Ko e heigoa e kitiaaga faka-Tohi Tapu ke he ulu pule mo e omaoma?

◻ Maeke fefe he faoa tokoua ne mau ke fakatolomaki ki mua e matutakiaga?

◻ Maeke fefe he tau hoa tokoua ke tauteute e tau mena ne nakai fetataiaki ke he mahani Kerisiano?

◻ Ko e heigoa ka lagomatai ke fakamalolo aki e pipi he fakamauaga?

[Fakatino he lau 10]

Kaeke kua lata hana hoana ke gahua he gahua fakalalolagi, to nakai fakaata he tane Kerisiano a ia ke fakamamafa lahi