He Puhalatū mo e Tau Tagata Fenoga

“AI MAEKE au ke fano he taha gutuhala ke he taha gutuhala!” Tokologa e tau tagata fakaako Tohi Tapu ne logona hifo pihia hagaao ke he onoonoaga ke fakamatala ke he tau tagata kehe! Ka ko e totokoaga nei ne talahau he tagata lauga iloilo mo e faiaoga he Tohi Tapu ne fakahigoa ko e tagata fenoga.

Tokologa e tagata totou he Zion’s Watch Tower ne toka e tau fale tapu ha lautolu kua manako lahi ke lafi mo lautolu ne fia inu ke he kupu mooli he Tohi Tapu. Ne tomatoma he mekasini e tau tagata totou ke kumi e falu kua tua pihia mo e fakapotopoto tumau ke fakaako e Tohi Tapu. He kamataaga he kavi ke he 1894, ko e Watch Tower Society ne fakafano atu e tau hukui faifano ke feleveia mo e tau matakau kua ole ke ahiahi atu. He mogo fakamui ne fakahigoa ai ko e tau tagata fenoga, ko e tau tagata iloilo mo e gahua malolō anei ne fifili ha kua mahani molū, pulotu faka-Tohi Tapu, mo e mahifi ke he puhala vagahau mo e fakaako atu, mo e fakatātā e loto fakamooli ke he lukutoto. Fa mahani e ahiahi ke taha po ke ua e aho lavelave. Tokologa e tau Tagata Fakaako Tohi Tapu ne kamata fakamua e gahua ha lautolu ke he fonua he tufatufa e tau laupepa fakailoa ke lata mo e lauga he tagata fenoga. He mole e lauga haana ke he aoga he afiafi, ko Hugo Rieme ne eke fakamui mo taha he Kau Fakatufono, ne tali e tau hūhū faka-Tohi Tapu ke mole e tuloto pō. Lolelole ka e fiafia, ne fakailoa e ia kua “fulufuluola” e feleveiaaga.

He talahau he The Watchtower ko e mena kua “mua atu e mitaki” he tau ahiahi he tagata fenoga ko e atihake he “tau matakainaga he tua” ha ko e tau feleveiaaga ke he tau kaina he tau tagata ne tua. Ko e tau Tagata Fakaako Tohi Tapu he tau matakavi kua agaagai ai ne o mai ke he tau lauga mo e tau fakaholoaga hūhū mo e tali. Ti hoko foki e magaaho ma e fakamokoi faka-Kerisiano. Ko e tama fifine ko Maude Abbott ne fina atu ke he lauga he mogo pogipogi, mole ia ne nonofo viko a lautolu he laulau loa i fafo. “Manui ha ia he tau mena kai—ko e vala puaka, moa falai, tau falaoa kehekehe, pai, mo e keke! Ne kai e tau tagata oti ke he mena ne fahia a lautolu ki ai, ti kavi ke he matahola ua ne fakapotopoto a mautolu ke fanogonogo ke he taha lauga foki.” Ka e talahau e ia, “He mogoia ne fia momohe oti e tau tagata.” Ko Benjamin Barton, ko e tagata fenoga ne leva e gahua ne pehē, ‘Ka kai oti e au e tau mena kai gako ne mai ki a au, liga kua leva tuai e oti e gahua fenoga haaku.’ Ko e tohi mai he matapatu i Brooklyn ne fakatonu ke he tau matakainaga fifine manatu mitaki kua lata ke foaki ke he tagata fenoga e “tau kai mukamuka he tau aho oti” mo e “ua fakatauhele e mohe.”

Ne iloilo lahi e tau tagata fenoga he fakaako atu mo e fakaaoga e tau fakafonua, tau fakatai, po ke ha mena ne tata mai ke fakaalaala e vala tala ha lautolu. Ko e tau lauga ha R. H. Barber “ne magihogiho fakaagaaga tumau.” Ko W. J. Thorn ne tuga e matua taane ne vagahau “tuga e tupuna he tau vahā i tuai.” Taha aho he fakaholo e Model A Ford, ko Shield Toutjian ne hea mafiti, “Tū!” Ne hopo a ia ki fafo he motokā, tau e falu fiti vao, ti foaki ke he tau kapitiga haana e fakaakoaga he mogo ia ni ke he tufugatia ha Iehova.

Ko e uka he gahua he tagata fenoga ne fehagai mo e tau paleko loga, mua atu ki a lautolu kua motua fakahaga. Ka e, ma e falu, ko e kamatamata ne mua ko e hikiaga he onoonoaga ke he gahua ha lautolu. Kua amanaki ki a lautolu mogonei ke takitaki e gahua fakamatala he taha fale ke he taha fale. Ia Mati 15, 1924, ko e Watch Tower ne talahau ko e “taha he tau poakiaga ne mua” he tau Kerisiano mooli “ke fakamatala atu e kautu. Ko e kakano anei ne fakafano atu e tau tagata fenoga.”

Falu tagata fenoga ne nakai fiafia ke he hikiaga, ha kua toka e lautolu e gahua faifano, falu ia lautolu ne ita ti fakatū e lotu ma ha lautolu ni. Ko Robie D. Adkins ne manatu e taha tagata fenoga ko e tagata lauga mitaki lahi mahaki ne tauui atu: “Iloa ni au ke fakamatala mai i mua. Ai maeke au ke fano he taha gutuhala ke he taha gutuhala!” Ne manatu he Matakainaga Adkins: “Ne liu au kitia a ia he 1924 he fonoaga faahimotu i Columbus i Ohio. Ko e tagata ne mua atu e nakai fiafia a ia i ai, ne tū tokotaha i lalo he akau tote kua mata momoko he vahāloto he tau matakainaga loto fiafia tokoafe. Nakai liu au kitia a ia. Ne toka e ia e fakatokatokaaga he mogo fakamui.” Ke he taha faahi, “tokologa e matakainaga fiafia ne fakatemole he taatu e tau tohi ke he tau motokā ha lautolu,” ne makai mooli ke fakamatala he taha fale ke he taha fale.—Gahua 20:20, 21.

Tokologa he tau tagata fenoga ne liga hopoate tuga ne tau tagata kua fakamahani e lautolu, ne tuku e tau loto ha lautolu ke he gahua. Hagaao ke he gahua fakamatala he taha fale ke he taha fale, ko e tagata fenoga vagahau Sihamani ko Maxwell G. Friend (Freschel) ne tohi, “Ko e vala nei he gahua fenoga ne lafi ke he tau monuina he ahiahi.” Ko e tagata fenoga ko John A. Bohnet ne hokotaki kua talia fiafia he tau matakainaga ke matapatu ke he fakamatala he Kautu. He talahau e ia, ko e laulahi ia lautolu ne “velagia he fakamakutu ke tutū i mua he tauaga.”

He tau tau loga, kua eke e tau matakainaga taane faifano tua fakamooli mo omoomoiaga mitaki. “Ko e uho mo e aoga he tau tagata fenoga ne mauokafua, pihia ni he kitia foki e au he vahā tote,” he ui e Norman Larson ko e Fakamoli kua leva. “Lahi e mena ne taute e lautolu ke fakahakohako au ke he puhala tonu.” Hoko mai ke he aho nei, ko e tau leveki faifano aga foaki noa mo e mahani fakamooli pihia kua lagomatai e tau matakainaga talitonu ke pehē, “Maeke a mautolu ke ō he taha gutuhala ke he taha gutuhala!”

[Blurb he lau 32]

Ko e aho fiafia a ia he mogo ne hoko mai e tagata fenoga!

[Fakatino he lau 31]

Fenoga ha Benjamin Barton he 1905 ne 170 e kavi ne ahiahi

[Fakatino he lau 32]

Ko Walter J. Thorn ko e tagata fenoga ne iloa mafanatia ko Pappy ha ko e aga matua taane haana, tuga e Keriso

[Fakatino he lau 32]

Ko J. A. Browne ne fakafano ki Jamaica ko e tagata fenoga he kavi ke he 1902 ke fakamalolō mo e fakamafana e tau matakau ikiiki ne 14

[Fakatino he lau 32]

Ko e gahua fenoga ne atihake e tua, fakamalolō e fakalatahaaga Kerisiano, mo e fakatata e tau matakainaga ke he fakatokatokaaga