Manatu Nakai e Koe?
Kua totou fakamitaki nakai e koe e tau fufuta foou he Ko e Kolo Toko? Lali la mogoia ke kitia ko e maeke nakai a koe ke tali e tau hūhū i lalo:
Moua kia e Samisoni e malolō ha ko e tau lau ulu haana?
Ne nakai ko e tau lau ulu hokoia ha Samisoni ne moua e ia e malolō. Ko e tau lau ulu haana ne hukui e fakafetuiaga uho haana ne moua e ia ko e Naseri mo e Atua. Ne lekua e fakafetuiaga ia he magaaho ne hifi puga e Talila e tau lau ulu haana.—4/15, lau 9.
Ka fakatatai mo e atefua ha tautolu, ko e heigoa e tau mena tolu kua lauia lahi e loto ha tautolu?
(1) Fagaiaga. Ke tuga ni e lata e atefua ha tautolu ke moua e tau mena kai huhua mitaki, kua lata foki a tautolu ke moua e tau mena kai mitaki fakaagaaga. (2) Faofao. Ko e fakalataha fakamakutu ke he gahua he fonua ka fakatumau e loto ha tautolu ke he tuaga mitaki. (3) Takatakaiaga. Maeke ia tautolu ke fakatote hifo e fakatupetupe he feoaki mo e tau matakainaga ne kua fakaalofa mooli ki a tautolu.—4/15, lau 16.
Ko e ha e tagata lauga he mauku kua nakai lata ke fakahagaao e Salamo 116:15 ke he tagata mate?
Kua pehē e kupu: “Ko e mena lahi ni ke he manatu a Iehova ka mate hana tau tagata tapu.” Kakano e mena nei kua fioia he Atua ko e mamate oti he tau tagata fakamooli haana kua lahi mahaki ke he haana manatu ke fakaatā ke pihia. To nakai fakaatā e Ia e matakau he tau fekafekau haana ke utakehe mai he lalolagi.—5/15, lau 22.
Ko hai e tau tagata foafoa?
Ato hoko ke he 1931, ko e talahauaga “tau tagata foafoa” kua hagaao ki a lautolu kua fakahigoa mogonei ko e tau paionia.—5/15, lau 31.
Ko hai ne ha ha i ai ke he “tau kautu oti ia” ne totoku he Tanielu 2:44?
Kua hagaao e mena nei ke he tau kautu, po ke tau fakatufono, ne fakakite he tau vala kehekehe he tupua lapatoa ne fakamaama e Tanielu.—6/15, lau 17.
Magaaho fe ne eke e Pule he Lalolagi ko Igilani-Amerika mo pule ke fituaki he lalolagi he perofetaaga he Tohi Tapu?
Ko e kaufakalataha he tau pule he lalolagi ne fakatū he magaaho ne gahua tokoua a Peritania mo e tau Faahi Kaufakalataha he puhala aoga he Felakutaki I he Lalolagi.—6/15, lau 19.
Ko e heigoa e tau mena tutupu ka takitaki fakahako ki Amaketo?
To fakapuloa he tau motu e fakailoaaga aoga “Kua mafola, kua nakai haofia.” (1 Tesa. 5:3) To totoko e tau fakatufono ke he lotu fakavai. (Fakakite. 17:15-18) To ha ha ai e kelipopoaga he tau tagata tapuaki mooli. Ti hoko ai e fakaotiaga.—7/1, lau 9.