Tau Hūhū he Tau Tagata Totou
Magaaho fe ne eke e Pule he Lalolagi ko Igilani-Amerika mo pule ke fituaki he lalolagi he perofetaaga he Tohi Tapu?
▪ Ko e tupua lapatoa lahi mahaki ne kitia he Patuiki ko Nepukanesa ne nakai hukui oti he tau pule he lalolagi. (Tani. 2:31-45) Kua fakakite ai lima ni ne pule mai he vahā a Tanielu ti ha ha ai e aoga lahi he fehagai mo e tau tagata he Atua.
Ko e talahauaga ha Tanielu he tupua lapatoa ko e manatu ko e Pule he Lalolagi ko Igilani-Amerika to tū hake ka e nakai kautū ki a Roma. He tupua, kua kitia e Tanielu e lapatoa he tau hui ne hifo ke he tau tauuluhui mo e ke he tau matahui. (He tau tauuluhui mo e tau matahui, ko e lapatoa ne fiofio aki e kelekele.)a Ko e talahauaga ia kua fakakite ko e Pule he Lalolagi ko Igilani-Amerika ka hake mai he tau hui lapatoa. Kua fakakite he fakamauaga tala e hakotika he vala tala ia. Ko Peritania, ko e vala he Pule Atu Motu Roma, ne kamata ke tū hake ke he tuaga talahaua he matahiku he atu tau 1700. Fakamui, ko e tau Faahi Kaufakalataha ha Amerika ne eke mo motu mahuiga. Pete ia, ko e pule he lalolagi ke fituaki he perofetaaga he Tohi Tapu ne nakaila fakatū ia. Ha ko e ha? Nakaila gahua tokoua a Peritania mo e tau Faahi Kaufakalataha he puhala mua atu. Ne tupu e mena nei he Felakutaki I he Lalolagi.
He magaaho ia, “ko e fanau haia he kautu” ne gahuahua lahi he tau Faahi Kaufakalataha, ko e ha lautolu a matapatu he lalolagi ne tū i Brooklyn, New York. (Mata. 13:36-43) Ko e tau tagata he vahega fakauku ne gahuahua he fakamatala he tau motu ne pule he Pule Atu Motu Peritania. He Felakutaki I he Lalolagi, ko e tau pule Peritania mo Amerika ne fakatū e pipiaga uho he tau atu ke he tau fī fakapolitika. Ne tupu lahi foki ai e fakahakehake fakamotu ne fakatū he felakutaki, fakakite e faitaua ki a lautolu ne fai vala he tega he “fifine” he Atua, pā e tau tohi ne taute e lautolu mo e tuku a lautolu ne takitaki ke he fale puipui ha ko e gahua fakamatala.—Fakakite. 12:17.
Mai he onoonoaga he perofetaaga he Tohi Tapu, ko e pule he lalolagi ke fituaki ne nakai fakatū he matahiku he atu tau 1700 he kamata fakamua a Peritania ke tū hake ke he tuaga talahaua. Ka e, kua moua e tuaga ia he kamataaga he aho he Iki.b
[Tau Matahui Tala]
a Ko e kelekele ne fiofio mo e lapatoa ne hukui e tau valavala i loto he fakatokaaga he Pule he Lalolagi ko Igilani-Amerika ne tuga e lapatoa. Fai magaaho he mole, ko e kelekele nei kua taute ai ke uka ma e malolō ia ke maō tuga ne manako ki ai.
b Ko e fakamaamaaga nei ne fakafoou e vala tala ne fakatutala he tohi Daniel’s Prophecy he lau 57, paratafa 24 mo e tau fakatino he tau fakafonua he lau 56 mo e 139.
[Fakatino he lau 19]
Valu e matakainaga mai he matapatu la he Watchtower ne uta ke he fale puipui ia Iuni 1918