Talitonu Nakai a Koe ke he Tau Mana Ne Fakamau he Tohi Tapu?

KAEKE ke tala atu e tala ofoofogia ki a koe, to lauia nakai e falanaki haana ne talahau e tala ke maeke a koe ke talitonu ki ai po ke nakai? Ko e falanakiaga ia kua nakai ni putoia e puhala ne talahau he tagata e tala ka e lauia foki e tuaga talahau mena mooli haana. Kaeke kua talahau tumau e ia ki a koe e tau tala mooli he tau tau loga kua mole mo e nakai lagataha e fakavai pauaki ki a koe, to fai kakano mitaki a koe ke talitonu e tau mena haana kua tala atu ki a koe mogonei.

Kua pihia foki e tau mana ne fakamau i loto he Tohi Tapu. Nakai fai ia tautolu ne momoui he magahala ia ne tutupu ai. Ka e maeke ia tautolu ke iloa kua mooli e tala he Tohi Tapu​—kaeke ke mooli ai. Fēfē? Hanei e falu mena ka lafi ke he falanakiaga he tau tala Tohi Tapu ke he tau mana:

Loga e tau mana ne taute ke he tau toloaga ­tagata. He falu magaaho, kua kitia ai he totou afe po ke miliona he tau tagata kitekite. (Esoto 14:21-31; 19:16-19) Ne nakai taute fufū ai, ke ua kitia he tau tagata.

Ne mukamuka e tau mana. Kua nakai fai koloa fakaaoga pauaki po ke tau fakatātāaga fuluola, ti nakai fai molī taute lagatau. He tau mana loga ne fakamau he Tohi Tapu, ne tutupu ai ha ko e tau tuaga fakaofo mo e tau olelalo he tau tagata. (Mareko 5:25-29; Luka 7:11-16) He tau tuaga ia ko e tau mena ne tutupu ne nakai fakatoka e ia ne taute e mana.

Ko e logonaaga ha lautolu ne taute e tau mana kua nakai ke moua e matalahi, lilifu, mo e tau monuina ma lautolu ni. Ka ke fakaheke e Atua. (Ioane 11:1-4, 15, 40) Ka lali a lautolu ke moua e monuina mai he tau malolō mana ia ne fakahala ai.​—2 Tau Patuiki 5:15, 16, 20, 25-27; Gahua 8:18-23.

Ko e tau mana kehekehe ne fakamau he Tohi Tapu ne fakakite ai nakai ko e tau gahua he tau tagata. Tuga anei, ne milino e tahi mo e matagi, faliu uaina e vai, mao e uha mo e liu to ai, fakamaulu e tau tagata gagao, mo e fakaala e tau mata ha lautolu ne matapouli. Ko e tau mana oti ia mo e loga atu foki kua fakakite e taha malolō mua ue atu ne maeke ke gahuahua ke he tau mena oti kana ne omoomoi foki e tau mana ia.​—1 Tau Patuiki 17:1-7; 18:41-45; Mataio 8:24-27; Luka 17:11-19; Ioane 2:1-11; 9:1-7.

Ko e tau tagata totoko ne kitia e tau mana ne nakai fakauaua na tutupu mooli ai. Mogo ne fakaliu tu mai e Iesu e kapitiga haana ko Lasalo, ne nakai hūhū toko e tau fī fakalotu ha Iesu ko e mena mate a Lasalo. Maeke fēfē ia lautolu? Kua fā tuai e aho he tanu a Lasalo. (Ioane 11:45-48; 12:9-11) He totou senetenari foki he mole e mate ha Iesu, ne matutaki e tau tagata tohia he Talmud faka-Iutaia ke talia na ha ha ia Iesu e tau malolō fakamana. Ne hūhū toko ni a lautolu ke he punaaga he tau malolō ia. Pihia foki, he mogo ne tamai e tau tutaki ha Iesu ki mua he hopoaga faka-Iutaia, ne nakai hūhū age ki a laua “Taute nakai e mua e mana?” Ka kua hūhū ki a laua: “Ko e heigoa e mana, ko e higoa foki ha hai, ne eke ai e mua e mena nai?”​—Gahua 4:1-13.

Ti kua talitonu nakai a koe ke he mena ne talahau he Tohi Tapu ki a tautolu hagaao ke he tau mana? Mai he tau mena kua fakatutala a tautolu ki ai, kua maaliali ai e falanakiaga he tau tala Tohi Tapu ke he tau mana. Kua loga foki e kakano ke talitonu e tau tala Tohi Tapu nei. Ma e fakatai, ka talahau he Tohi Tapu e taha mena ne tupu, kua fa fakakite mai ki a tautolu e magaaho, matakavi, mo e tau higoa he tau tagata ne putoia ai. Kua ofoofogia foki e tau tagata totoko ke he Tohi Tapu ha ko e hakotika he tau vala tala fakamatafeiga he fakamauaga tuai i loto he Tohi Tapu. Ne totou teau e tau perofetaaga he Tohi Tapu kua fakamooli ai, hokotia ke he tau vala tala ikiiki lalahi. Lafi ki ai, kua loga lahi e tau tomatomaaga ke taute e tau fakafetuiaga he tau tagata ke fiafia​—ko e tau tomatomaaga kua lagomatai e tau tagata he tau atu tau kehekehe mo e he tau tutuaga kehekehe. Ke lata mo e tau fakafetuiaga he tau tagata, ko e tomatomaaga i loto he Tohi Tapu kua pihia foki ni.

Ka nakaila mauokafua lahi a koe ke he Tohi Tapu, kia fakaaoga taha magaaho ke kumikumi fakamatafeiga ki ai? Ka iloa lahi ai e koe, to lahi foki e falanaki haau ki ai. (Ioane 17:17) To mailoga e koe na maeke ia koe ke falanaki ke he tau mena ne tala atu hagaao ke he tau mana ne tutupu kua mole. Ka talitonu a koe ke he tau tala ia, to mitaki e fakavēaga haau ke falanaki ke he tau talahauaga he Tohi Tapu ke he tau mena ka tutupu he vahā tata i mua.

[Fakatino he lau 7]

Nakai hūhū toko he tau tagata totoko ha Iesu ko e mena mate a Lasalo