Ne Fakaalofa a Ia ke he Tau Tagata

1, 2. Fakakite fēfē e Iesu e fakaalofa hokulo haana ma e tau tagata?

KO E Tama uluaki he Atua ko e fakataiaga mua ue atu he iloilo ofoofogia ha Iehova ti ko e “iki gahua iloilo,” (NW) he haana Matua. Manamanatu la ke he fiafia mo e fakaaue ha Iesu ke he Matua haana he ‘fakamau e lagi’ mo e ‘kotofa ai e tau fakaveaga he lalolagi.’ Ka ko e tau mena oti ne tufuga he haana a Matua, ne “fiafia [a Iesu] ke he fanau he tau tagata.” (Tau Fakatai 8:22-31) Ē, ne ofania e ia e tau tagata tali mai he kamataaga.

² He magaaho fakamui, ne fakakite e Iesu haana mahani fakamooli mo e fakaalofa ke he Matua haana ti ha ha ia ia e fakaalofa hokulo ma e tau tagata oti he toka fakamakai e lagi ka e hifo mai ke he lalolagi ke eke mo tagata. Taute fiafia e Iesu e mena nei ke maeke a ia ke foaki e moui haana “mo lukutoto ke hukui aki e tau tagata tokologa.” (Mataio 20:28; Filipi 2:5-8) He nofo a Iesu he lalolagi, ne foaki he Atua ki a ia e malolō ke taute e tau mana. Fakakite he tau mana nei e lahi he fiafia ha Iesu ke he tau tagata ti ko e heigoa e tau mena homo ue atu ka nakai leva ti taute e ia ma e tau tagata.

3. Ko e heigoa ka fakatutala a tautolu he vala tala nei?

³ He ha ha ai ke he lalolagi, ne fakamatala e Iesu e “vagahau mitaki he kautu he Atua.” (Luka 4:43) Iloa e ia to fakatapu he Kautu nei e higoa he Matua haana mo e to fakamafola tumau ai e tau lekua he tau tagata. He fakamatala a Iesu, ne loga e mana ne taute e ia. Ne fakakite he tau mana nei e manamanatu lahi haana ma e tau tagata oti. Ko e ha kua aoga e mena ia ma tautolu? Ha ko e mena ne taute e ia ne foaki ki a tautolu e amaamanakiaga mo e mauokafua ma e vahā anoiha. Ti fakatutala la tautolu ke he fā e mana ha Iesu.

“HA HA I AI FOKI E MANA HE IKI KE FAKAMALOLO”

4. Ko e heigoa ne tupu he mogo ne feleveia a Iesu mo e tagata ne lepela?

⁴ He fekafekauaga ha Iesu, ne fano a ia ke he matakavi ne higoa ko Kalilaia. He taha he tau maaga i ai, ne feleveia a ia mo e tagata ne gagao kelea he lepela. (Mareko 1:39, 40) Ne gagao lahi e tagata ti fakamaama ai he ekekafo ko Luka “kua oti hana tino he lepela.” (Luka 5:12) Pehē e Tohi Tapu ko e mogo ne kitia he tagata gagao a Iesu, ne “fakaveli fakafohifo ai a ia, mo e olelalo mai kia ia, kua pehe mai, Ko e Iki na e, ka finagalo a koe ki ai, ti maeke ni ia koe ke fakamea au.” Iloa he tagata kua ha ha ia Iesu e malolō ke fakamaulu a ia, ka kua lata a ia ke iloa na manako nakai a Iesu ke fakamaulu a ia. Ko e ha? Ha kua mahani e tagata ke he tau Farasaio, ne onoono hifo ke he tau tagata ne lepela. Ka ko e heigoa ha Iesu ne manamanatu? To taute fēfē e ia e tagata nei ne kafo lahi mahaki e tino? Ko e heigoa haau ka taute?

5. Ko e ha ne manako a Iesu ke fakamaulu e lepela?

⁵ Ne nakai hea fakatutū e tagata gagao “Kua kelea, Kua kelea,” tuga ne poaki he Fakatufono faka-Mose. (Levitika 13:43-46) Ka e nakai ita a Iesu. Kua manamanatu a ia ke he tagata ti manako ke lagomatai a ia. Nakai iloa tonu e tautolu e mena ne manamanatu a Iesu ki ai, ka e iloa e tautolu e logonaaga haana. Ne momoko lahi a ia ke he tagata ti taute e ia e mana. Ne aamo e ia e tagata, ko e mena nakai la fai tagata ne taute e mena ia. He mauokafua mo e fakaalofa hofihofi noa, ne pehē a Iesu: “Na loto au ki ai, kia mea a koe.” Ati ‘maulu ai e lepela ia ia.’ (Luka 5:13) Maaliali ai, ne foaki e Iehova ki a Iesu e malolō ke taute e mana lahi nei mo e fakakite e lahi he fakaalofa haana ke he tau tagata.​—Luka 5:17.

6. Ko e heigoa e mena ofoofogia hagaao ke he tau mana ne taute e Iesu, ti ko e heigoa ne fakakite ai?

⁶ Ko e malolō he Atua, ne maeke ia Iesu ke taute loga e mana ofoofogia. Nakai ni ko lautolu ne lepela ne fakamaulu e ia. Fakamaulu foki e Iesu e tau tagata tokologa ne kehekehe e tau gagao. Talahau he Tohi Tapu ki a tautolu kua ofomate e tau tagata he “kitia e lautolu e tau kuhukuhu kua vagahau mai, kua katoatoa e tau kunekune, kua o e tau kulikuli, kua ala foki e tau matapouli.” (Mataio 15:31) Ka fakamaulu e Iesu taha tagata, nakai lata a ia ke fakaaoga e tau vala he tino he tagata malolō. Nakai, na ha ha ia Iesu e malolō ke fakamaulu e tau vala he tino ne gagao. Ti mafiti e fakamaulu e ia e tau tagata, ko lautolu foki ne mamao mai ia ia he falu magaaho. (Ioane 4:46-54) Ko e heigoa ne fakakite he tau fakataiaga ofoofogia nei? Ko e ha tautolu a Patuiki ko Iesu Keriso ne ha ha ai e malolō mo e manako ke utakehe tukulagi e tau gagao oti kana. He iloa e tautolu e puhala ne taute e Iesu e tau tagata, kua foaki ki a tautolu e mauokafua “to fakaalofa a ia kia ia kua lolelole, mo ia kua nofogati” he lalolagi foou. (Salamo 72:13) Ha kua manako lahi a Iesu, to fakamaulu e ia a lautolu oti kua matematekelea.

“ATI MATIKE A, UTA HAU A MOHEGA, TI FANO A KOE”

7, 8. Fakamaama e mena ne tupu ato feleveia a Iesu mo e tagata gagao i Petesa.

⁷ Fai mahina gahoa he mole e fakamaulu e Iesu e lepela, ne fano a ia i Kalilaia ki Iutaia ti matutaki ke fakamatala e tala mitaki ke he Kautu he Atua. Liga totou afe e tagata ne kua logona e fekau ha Iesu ti lauia ai ha ko e fakaalofa haana ma lautolu. Manako mooli a Iesu ke fakamafana a lautolu ne nonofogati mo lautolu ne loto malipilipi ti foaki ke he tau tagata nei e amaamanakiaga.​—Isaia 61:1, 2; Luka 4:18-21.

⁸ He mahina Nisana, ne fano a Iesu ki Ierusalema ke fakamanatu e Paseka. Ne lavelave e maaga ha kua o mai e tau tagata ke lata mo e faiagahau pauaki. Ke he faahi tokelau he faituga e vai ne talahaua ko Petesa, ne feleveia ai e Iesu e tagata kulikuli.

9, 10. (a) Ko e ha ne ō e tau tagata ke he vai ko Petesa? (e) Ko e heigoa ne taute e Iesu he vai, ti ko e heigoa ne fakaako he mena nei ki a tautolu? (Kikite fakatino he kamataaga.)

⁹ Na o atu e moto tagata he tau tagata gagao ki Petesa. Ko e ha? He manatu a lautolu to fakamaulu fakamana e tagata gagao ka uku hifo he vai he mogo ka lukeluke ai. Manamanatu la ke he nakai iloa tonu ha kua tokologa e tagata fakaagitau, fakaatukehe, mo e matematekelea ne manako ke fakamaulu. Na mitaki katoatoa a Iesu ti nakai lata a ia ke fakamaulu, ka ko e eke ha a ia i ai? Ko e fakaalofa haana ma e tau tagata ne omoomoi a ia ke fano ki ai. Ti feleveia e Iesu i ai e tagata ne leva atu e gagao ke he nofo ha Iesu he lalolagi.​—Totou Ioane 5:5-9.

¹⁰ Ne hūhū a Iesu ke he tagata kaeke kua manako a ia ke liu ke fano foki. Manamanatu la ke he momoko he tagata he tala age a ia ki a Iesu kua manako a ia ke fakamaulu ka e nakai maeke, ha kua nakai fai tagata ke lagomatai hifo a ia ke he vai. Tala age mogoia a Iesu ke he tagata ke taute taha mena ne nakai la pihia ia. Tala age a ia ke he tagata ke matike mo e uta e mohega, ti fano. Ati uta he tagata e mohega haana ti kamata ke fano! Ko e mana nei ko e fakamooliaga homo ue atu he mena ka taute e Iesu he lalolagi foou. Ne fakakite foki he naia e fakaalofa hokulo ha Iesu ma e tau tagata. Kumi e ia a lautolu ne lata ke lagomatai. Lata he fakafifitakiaga ha Iesu ke fakamafana a tautolu ke matutaki ke kumi e tau tagata he fonua ha tautolu ne fakaatukehe ha ko e tau mena kelea ne tutupu he lalolagi nei.

“KO HAI NE FAKAPIKI MAI KE HE HAKU TAU TAPULU?”

11. Fakakite fēfē he Mareko 5:25-34 na fakaalofa a Iesu ke he tau tagata gagao?

¹¹ Totou Mareko 5:25-34. Ne 12 e tau he matematekelea e taha fifine ha ko e gagao fakamā. Ne lauia e tau faahi oti he moui haana he gagao, ti putoia e tapuakiaga haana. Tokologa e ekekafo ne fano a ia ki ai ti lahi e tupe haana ne mole ke moua e fakamauluaga, ka e holo ni ki mua e kelea haana. Taha aho ne taute he fifine taha puhala kehe ke maulu ai, mo e fina atu a ia he toloaga tagata ti piki ke he tapulu ha Iesu. (Levitika 15:19, 25) He mailoga e Iesu kua fano kehe e malolō i loto haana, ne hūhū a ia ko hai ne piki atu ki a ia. Nukua “matakutaku mo e vivivivi” e fifine, ne “fakaveli ki mua hana, ti tala age fakatonu kia ia e tau mena oti.” Iloa e Iesu ko Iehova ne fakamaulu e fifine, ti tala age totonu a ia: “Haku tama fifine na e, kua moui a koe he hau a tua; ti fano a, mo e monuina, kia malolo a koe he hau a kafo mamahi.”

12. (a) Mai he mena ne fakaako e tautolu, to fēfē e fakamaamaaga haau ki a Iesu? (e) Ko e heigoa e fakafifitakiaga ne fakatoka e Iesu ma tautolu?

¹² Kua fakamafana mooli e tau loto ha tautolu ke kitia e puhala fakaalofa ha Iesu ma e tau tagata, mua atu ki a lautolu ne gagao. Kehe mamao e mena nei mai ia Satani ne lali ke omoomoi a tautolu kua nakai aoga a tautolu ti nakai fai tagata ne fakaalofa ki a tautolu. Ka ko e tau mana ha Iesu ne fakamooli kua manamanatu mooli a ia ki a tautolu mo e tau lekua ha tautolu. Maeke ia tautolu ke loto fakaaue mooli kua moua e tautolu e Patuiki fakaalofa mo e Ekepoa ne Mua! (Heperu 4:15) Liga uka ia tautolu ke maama e tau logonaaga he tagata ne kua leva e gagao, mua atu ka nakai gagao a tautolu. Ka e manamanatu ki a Iesu. Ne fakaalofa hofihofi a ia ma e tau tagata gagao pete ne nakai gagao a ia. Kia eketaha a tautolu ke muitua e fakafifitakiaga fakaalofa haana.​—1 Peteru 3:8.

“KUA TAGI A IESU”

13. Ko e heigoa ne fakakite he liu tu mai ha Lasalo hagaao ki a Iesu?

¹³ Ne hokulo e logonaaga ha Iesu ha ko e mamahi he falu. Ma e fakatai, he mate e kapitiga ha Iesu ko Lasalo, ne “mamahi ai hana finagalo” mo e “fakaatukehe” he kitia e ia e mamahi he magafaoa mo e tau kapitiga ha Lasalo. (Totou Ioane 11:33-36.) Pete he iloa e Iesu na to fakaliu tu mai e ia a Lasalo, ne tagi a ia. Nakai matakutaku a ia ke kitia he falu e tau logonaaga haana. Ne fakaalofa lahi mahaki a Iesu ki a Lasalo mo e magafaoa haana ti fakaaoga e ia e malolō he Atua ke liuaki mai a Lasalo ke he moui!​—Ioane 11:43, 44.

14, 15. (a) Ko e heigoa ne fakakite kua manako a Iehova ke utakehe e matematekelea he tau tagata? (e) Ko e heigoa kua fakaako e tautolu mai he talahauaga “tau tuagamau fakamanatu”?

¹⁴ Ne fakamaama he Tohi Tapu kua eke ni a Iesu mo fakatai mooli ke he Matua haana ko Iehova. (Heperu 1:3) Ti fakakite he tau mana ha Iesu kua manako foki a Iehova ke utakehe e gagao, mamahi, mo e mate. Nakai leva to liuaki mai e Iehova mo Iesu e tau tagata tokologa foki ke he moui. Pehē a Iesu to “hoko ke he aho ke logona ai ke he hana leo a lautolu katoa ha he [“tau tuagamau fakamanatu,” NW]” ka fakaliu tu mai.​—Ioane 5:28, 29.

¹⁵ Fakaaoga e Iesu e talahauaga “tau tuagamau fakamanatu,” ne fakakite kua putoia e manamanatuaga he Atua. Ko e Atua Malolō Ue Atu, ko e Tufuga he lagi mo e lalolagi katoatoa kua maeke ke manatu e tau vala oti he ha tautolu a tau fakahele kua mamate, putoia e tau mahani ha lautolu. (Isaia 40:26) Nakai ni maeke a Iehova ke manatu a lautolu ka e manako a ia ke manatu a lautolu. Ko e tau liu tu mai he Tohi Tapu ko e tau fakataiaga homo ue atu he mena ka tupu he lalolagi foou.

MENA KUA FAKAAKO E TAUTOLU MAI HE TAU MANA HA IESU

16. Ko e heigoa e magaaho ka moua he tau fekafekau tokologa he Atua?

¹⁶ Ka tumau e mahani fakamooli ha tautolu, to maeke ia tautolu ke aoga mai he taha he tau mana mua ue atu, ko e hao mai he matematekelea lahi! Nakai leva he mole a Amaketo, to kitia foki e tautolu e tau mana loga. He magaaho ia, to moua he tau tagata oti kana e malolō tino mitaki katoatoa. (Isaia 33:24; 35:5, 6; Fakakiteaga 21:4) Manamanatu la he kitekite e tau tagata ne utakehe ha lautolu a tau tioata, tau tokotoko, tau nofoa fakataveli, mo e tau matini lagomatai ke fanogonogo. Iloa e Iehova ko lautolu oti kua hao mai i Amaketo to lata ke malolō mo e hakahakau e tau tino, ha ko e mena to loga e gahua ha lautolu ke taute. Ko lautolu haia ka taute ha tautolu a palaneta fulufuluola ko e Lalolagi ke eke mo parataiso he lalolagi katoa.​—Salamo 115:16.

17, 18. (a) Ko e ha ne taute e Iesu e tau mana? (e) Ko e ha kua lata ia koe ke taute e tau mena oti ke maeke ke hokotia ke he lalolagi foou he Atua?

¹⁷ Kua mafanatia e “moto tagata tokologa” he vahā nei ka totou hagaao ke he puhala ne fakamaulu e Iesu a lautolu ne gagao. (Fakakiteaga 7:9) Kua atihake he tau mana ia e amaamanakiaga homo ue atu ha tautolu he maulu katoatoa he vahā anoiha. Fakakite foki he tau mana ia e lahi he fakaalofa he Tama uluaki he Atua ke he tau tagata oti kana. (Ioane 10:11; 15:12, 13) Ko e fakaalofa hofihofi lahi ha Iesu ko e fakakiteaga he fakaalofa hokulo ha Iehova ke he tau fekafekau takitaha oti haana.​—Ioane 5:19.

¹⁸ Kua puke e lalolagi he vahā nei he mamahi, matematekelea, mo e mate. (Roma 8:22) Ko e kakano haia ne lata a tautolu mo e lalolagi foou he Atua. To moua he tau tagata oti i ai e malolō tino mitaki katoatoa ne mavehe he Atua. Foaki mai he Malaki 4:2 ki a tautolu e amaamanakiaga to “hopohopo [a tautolu] tuga ne tau punua povi,” he fiafia mo e hakahakau ha kua fakamaulu mo e tokanoa a tautolu mai he nakai mitaki katoatoa. Kia fakalagalaga he ha tautolu a loto fakaaue ma Iehova mo e ha tautolu a tua ke he tau maveheaga haana a tautolu ke taute e tau mena kua lata ke hokotia ke he lalolagi foou. Ko e mafanatia ha ia ke iloa ko e tau mana ne taute e Iesu ko e tau fakataiaga he fakatotokaaga tukulagi ka nakai leva ti moua he tau tagata i lalo hifo he pule haana!