Kaumahala a Kehasi he Lotokai

KUA fai magaaho nakai a koe ne loto lahi ke he taha koloa?​—a Ka pihia, kua tatai a koe mo e laulahi he tau tagata. Ka e lata kia a koe ke pikopiko ke moua aki e mena haau ne loto ki ai?​— Nakai, ai lata a koe. Ko e tagata ne taute e mena ia ko e tagata lotokai. O mai la ke kitia e puhala ne kaumahala a Kehasi he lotokai. Ko ia ko e fekafekau ha Elisaio ko e perofeta he Atua mooli ko Iehova.

Ne momoui a Elisaio mo Kehasi he vahā i tuai, liga ke he kavi taha e afe tau ato fanau mai e Tama he Atua, ko Iesu ke he lalolagi. Ne fakaaoga e Iehova a Elisaio ke taute e tau gahua ofoofogia​​—⁠ke taute e tau mana! Ma e fakatai, ne talahau he Tohi Tapu hagaao ke he tagata talahaua he kautau Suria ne moua he gagao kelea ko e lepela. Nakai fai tagata ne maeke ke fakamaulu a ia, ka e maeke a Elisaio.

Magaaho ne fakaaoga he Atua a Elisaio ke lagomatai e tau tagata ke malolō, ne nakai talia e ia e tau tupe. Iloa nakai e koe e kakano?— Ha kua iloa e Elisaio ko e tau mana ia kua mai ia Iehova​—nakai ia ia ni. Mogo ne maulu e gagao ha Naamanu, ne fiafia lahi a ia ti manako ke age ki a Elisaio e tau mena fakaalofa ko e tau auro, ario, mo e tau tapulu mitaki. Ne nakai mafai a Elisaio ke talia ha mena, ka e loto lahi a Kehasi ke he tau mena fakaalofa nei.

He fano kehe a Naamanu, ne tutuli atu e Kehasi a ia ka e nakai tala age ki a Elisaio. Magaaho ne hoko a ia ki a Naamanu, iloa nakai e koe e mena ne tala age e Kehasi ki a ia?— ‘Ne fakafano mai e Elisaio au ke tala atu ki a koe kua tokoua e tagata ne o mai. Ti kua manako a ia ke moua ua e tapulu ke age ma laua.’

Ka ko e pikopiko a ia! Ne fakatū e Kehasi e tala hagaao ke he tokoua e tagata ne kua o mai. Ne talahau ai e ia he loto a ia ke moua e tau tapulu ne lali a Naamanu ke age ki a Elisaio. Ka kua nakai iloa e Naamanu e mena nei. Ti fiafia a ia ke age e tau mena fakaalofa ki a Kehasi. Ne loga foki e mena ne age e Naamanu ki a Kehasi pete ne nakai ole ai e Kehasi. Iloa nakai e koe e mena tupu ka mui mai?—

Mogo ne hoko a Kehasi ki kaina, ne hūhū a Elisaio ki a ia: “Hau a koe i fe?”

‘Oi, ai fano au ke he ha mena,’ he tali e Kehasi. Ka kua fakaatā e Iehova a Elisaio ke iloa e mena kua taute e Kehasi. Ti pehē a Elisaio: ‘Nakai ko e magaaho anei ke talia e tau tupe mo e tau tapulu!’

Ne kua uta e Kehasi e tau tupe mo e tau tapulu ne nakai ko e haana. Ti fakatupu he Atua e lepela ha Naamanu ke pipiki ki a Kehasi. Ko e heigoa he manatu e koe kua maeke ia tautolu ke fakaako mai he mena nei?— Taha mena kua fakaako mai ai ki a tautolu kua nakai lata ia tautolu ke fakatū ti talahau e tau tala ne nakai mooli.

Ko e ha ne fakatū e Kehasi e tala pikopiko ia?— Kakano ha kua lotokai a Kehasi. Ne manako a ia ke moua e tau mena ne nakai ko e haana, ti lali a ia ke moua e tau mena nei he pikopiko. Ha ko e mena nei ne matematekelea a ia he gagao kelea lahi ke he moui katoa haana.

Ka kua matematekelea mooli a Kehasi he taha mena ne mua e kelea ke he lepela. Iloa nakai e koe e mena ia?— Ko e galo he taliaaga he Atua, ko e galo he fakaalofa haana. Kia nakai taute e tautolu ha mena ke galo ia tautolu e mena ia! Ka kia mahani totonu mo e mautali a tautolu ke tufatufa e tau mena ha tautolu ne moua.