TAU HŪHŪ TOHI TAPU KUA TALI

Ko e ha ne fakahigoa a Iesu ko e Tama he Atua?

Ne nakai fai hoana mooli e Atua ke fanafanau e tau tama. Ko ia ko e Tufuga he tau mena momoui oti kana. Kua tufuga e tau tagata aki e lotomatala ke fifitaki e tau mahani he Atua. Ko e kakano haia ne tufuga he Atua e tagata fakamua, ko Atamu, ne fakahigoa ko e “tama a ia he Atua.” Pihia foki, ne fakahigoa a Iesu “ko e Tama he Atua” ha kua tufuga a ia aki e tau mahani tuga he Matua haana.​​—Totou Luka 3:38; Ioane 1:14, 49.

Magaaho fe ne tufuga a Iesu?

Ne tufuga mua he Atua a Iesu ato tufuga a Atamu. Tufuga he Atua a Iesu ti fakaaoga a ia ke taute e tau mena oti ne toe, pihia mo e tau agelu. Ko e mena ia ne fakahigoa he Tohi Tapu a Iesu “ko e uluaki he tau mena oti kana kua eke” he Atua.​​—Totou Kolose 1:15, 16.

Ato fanau a Iesu i Petelehema, ne moui a ia ko e mena fakaagaaga he lagi. Ne hoko mai e magaaho ti hiki he Atua e moui ha Iesu mai he lagi ke he nofoaga tama ha Maria ke maeke a ia ke fanau ko e tagata.​​—Totou Luka 1:30-32; Ioane 6:38; 8:23.

Ko e ha ne toka he Atua a Iesu ke fanau ke he lalolagi ko e tagata? Ko e heigoa e matagahua pauaki ne taute e Iesu? Maeke a koe ke moua e tau tali ke he tau hūhū ia he Tohi Tapu, mo e to fakatupu fakalahi ki mua e maamaaga mo e loto fakaaue haau ke he mena ne taute he Atua mo Iesu ma haau.