Ko Hai a Iesu?

Ko Iesu ko e taha he tau tagata talahaua he fakamauaga tala. Ka e tokologa e tagata ne nakai iloa lahi a ia, ti tokologa ne kehekehe e tau manatu hagaao ki a Iesu. Ko e heigoa ne talahau he Tohi Tapu hagaao ki a Iesu?

1. Ko hai a Iesu?

Ko Iesu ko e agelu malolō lahi ne haia he lagi. Tufugatia fakamua e Iehova ko e Atua a Iesu ato tufuga e tau mena oti kana. Ati fakahigoa a ia “ko e uluaki he tau mena oti kana kua eke.” (Kolose 1:15) Hagaao e Tohi Tapu ki a Iesu ko e “Tama fuataha” he Atua ha ko Iesu ni tokotaha ne tufuga e Iehova. (Ioane 3:16) Gahua tata a Iesu mo e haana Matua ko Iehova he lagomatai a Ia ke tufuga e tau mena oti kana ne toe. (Totou Tau Fakatai 8:30.) Matutaki a Iesu ke fiafia e fakafetuiaga tata mo Iehova. Fekafekau fakamooli a ia ko e gutuvagahau he Atua ko e “Loko” po ke, Kupu he fakailoa e tau poakiaga mo e tau fakatonuaga he Atua.​—Ioane 1:14.

2. Ko e ha ne hau a Iesu ke he lalolagi?

Kavi ke he 2,000 tau kua mole, fakaaoga e Iehova e agaaga tapu haana ke hiki e moui ha Iesu mai he lagi ke he nofoaga tama he tamāfine tote ko Maria. He puhala nei, fanau a Iesu ko e tagata. (Totou Luka 1:34, 35.) Hau a Iesu ke he lalolagi ko e Mesia, po ke Keriso ne mavehe, mo e ke fakahao e tau tagata.a Ko e tau perofetaaga oti ke he Mesia ne fakamooli ia Iesu ke maeke he tau tagata ke iloa a ia “ko e Keriso, ko e Tama he Atua moui.”​—Mataio 16:16.

3. Ko fe a Iesu mogonei?

He mole e mate ha Iesu, ne fakaliu tu mai a ia ko e agaaga ti liu hake ke he lagi. He lagi, “kua fakamatalahi ai he Atua a ia.” (Filipi 2:9) Mogonei, kua lahi e kotofaaga ha Iesu​—ko ia ke uaaki mai ia Iehova.

4. Nakai ko e Atua Malolō Ue Atu a Iesu

Fakaako he Tohi Tapu pete ko e agelu malolō lahi a Iesu he lagi, omaoma a ia ke he haana Atua mo e Matua ko Iehova. Ko e ha ne talahau pihia a tautolu? Tā e VITIŌ ke kitia e fakaakoaga he Tohi Tapu ke he tuaga ha Iesu mo e Atua malolō ue atu.

VITIŌ: Ko e Atua Kia a Iesu Keriso? (3:22)

Ko e tau kupu Tohi Tapu nā ka lagomatai a tautolu ke maama e fakafetuiaga ha Iehova mo Iesu. Totou oti e tau kupu Tohi Tapu, ti tutala ke he tau hūhū nā.

Totou Luka 1:30-32.

• Fakamaama fēfē he agelu e fakafetuiaga ha Iesu mo Iehova ko e Atua “Mua ue atu”?

Totou Mataio 3:16, 17.

• He mogo ne papatiso a Iesu, ko e heigoa ne talahau he leo mai he lagi?

• Ko e leo ha hai a ia he manatu e koe?

Totou Ioane 14:28.

• Ko hai ne fakamua ti ko hai ne lahi e pule? Ko e matua taane po ke tama taane?

• Ko e heigoa e kakano ne fakahigoa e Iesu a Iehova ko e Matua haana?

Totou Ioane 12:49.

• Manatu kia a Iesu kua tatai a ia mo e Matua haana? Fēfē e manatu haau?

5. Fakakite e Iesu ko ia ko e Mesia

VITIŌ: Fakamooli e Iesu e Perofetaaga (3:03)

Totou e tau perofetaaga nei he Tohi Tapu, ti tutala ke he tau hūhū nā:

Totou Mika 5:2 ke iloa e matakavi ne fanau e Mesia.b

• Fakamooli kia he fanauaga ha Iesu e perofetaaga nei?​—Mataio 2:1.

Totou Salamo 34:20 mo e Sakaria 12:10 ke kitia e tau vala tala matafeiga ne talahau tuai hagaao ke he mate he Mesia.

• Kua fakamooli kia e tau perofetaaga nei? ​—Ioane 19:33-37.

• Manatu kia a koe ko Iesu ni ne omoomoi ke fakamooli e tau perofetaaga nei?

• Ko e heigoa he mena nei kua fakakite ki a koe hagaao ki a Iesu?

MANATU KATOA

Ko Iesu ko e agelu malolō lahi. Ko ia ko e Tama he Atua mo e ko e Mesia.

Liu Fakamanatu

• Ko e ha kua fakahigoa a Iesu “ko e uluaki he tau mena oti kana kua eke”?

• Ato hau a Iesu ke he lalolagi, ko e heigoa haana ne taute?

• Iloa fēfē e tautolu ko Iesu ko e Mesia?

KUMI FOKI

Fakaako foki ke he matagahua ha Iesu ko e Mesia.

“Fakamooli Nakai he Tau Perofetaaga ko Iesu e Mesia?” (Vala tala he kupega hila)

Kumikumi ke he Tohi Tapu e fakamaamaaga ko e Atua e matua ha Iesu.

“Ko e Ha ne Fakahigoa a Iesu ko e Tama he Atua?” (Vala tala he kupega hila)

Fakaako ke he kakano ne nakai ko e fakaakoaga he Tohi Tapu e Tolu Taha Tapu.

“Ko e Atua Kia a Iesu?” (Vala tala he Kolo Toko)

Totou ke he puhala ne hiki e moui he fifine he mole e kumikumi ke he talahauaga he Tohi Tapu hagaao ki a Iesu.

“Fifine Iutaia ne Fakakite e Kakano ne Liu Onoono ke he Tua Haana” (Ala!, Me 2013)