He Maeke ke ‘Iloa e Atua’—Ko e Heigoa Mogonei?
“He iloa e mutolu e Atua.”—KALA. 4:9.
1. Ko e ha ne fakaaoga he pailote e laupepa ne tohi ai e tau mena ka fakakia e ia e vakalele?
KE HE tau magaaho takitaha kua amanaki e pailote ke fakaholo e vakalele, ne fakakia fakamatafeiga e ia e vakalele. Ne fakaaoga e ia e laupepa ne tohi ai e tau mena ke iloa tonu kua oti e tau mena he fakakia e ia. Ka nakai fakakia e ia e vakalele, to liga nakai mailoga e ia e lekua ka fakatupu ai ke pā. Pihia foki e tau pailote ne leva lahi e fakaholo vakalele kua lata ke fakakia e tau mena oti he laupepa ne tohi ai e tau mena.
2. Ko e heigoa ha tautolu kua lata ke fakakia?
2 Tuga e laupepa ne fakakia ki ai e pailote, ne ha ha i ai foki e laupepa ka fakakia e koe ke mailoga kua malolō tumau e tua haau he tau magaaho uka foki. He papatiso laia a tautolu po ke kua leva e nonofo a tautolu he kupu mooli kua lata ia tautolu ke fakatumau ke fakakia e tua ha tautolu. Ka manamanatu noa a tautolu kua malolō e tua ha tautolu, ko e kamatamata uka he moui ka taute a tautolu ke galo ha tautolu a fakafetuiaga mo Iehova. Hataki he Tohi Tapu a tautolu: “Ko ia kua manatu kua tu a ia, kia fakaeneene a ia neke veli.”—1 Kori. 10:12.
3. Ko e heigoa he tau Kerisiano i Kalatia ne lata ke taute?
3 Ko e lukutoto ha Iesu ne taute ai ma e tau Kerisiano ke iloa e Atua he puhala foou. Maeke ke fifili e tau tagata mogonei mo tau tama he Atua! Ka kua lata e tau Kerisiano i Kalatia ke fakakia tumau e tua ha lautolu. (Kala. 4:9) Ha ha i ai e falu he fakapotopotoaga ne talahau to tututonu ni e tau Kerisiano ka fakatumau a lautolu ke muitua ke he Fakatufono ha Mose. Ka e nakai liu e Atua ke fakaaoga e Fakatufono ia, ti ko e tau Tagata Motu Kehe he tau fakapotopotoaga ne nakai haia i lalo he Fakatufono! Ko e tau Iutaia mo e tau Tagata Motu Kehe he fakapotopotoaga ne lata ke holo ki mua he kupu mooli. Ne lata a lautolu ke maama kua nakai liu e Atua ke fakaatā e tau tagata ke muitua ke he Fakatufono.
TAU LAKAAGA NE TAUTE E TAUTOLU KE ILOA E ATUA
4, 5. Ko e heigoa e fakatonuaga ne foaki e Paulo ke he tau Kalatia? Ko e ha kua aoga e tohi haana ki a tautolu?
4 Ko e tohi ne tala age a Iehova ke he aposetolo ko Paulo ke tohia ke he tau Kalatia kua fakamanatu ke he tau Kerisiano oti ke nakai o kehe he kupu mooli he Tohi Tapu ne kua fakaako e lautolu. Nakai lata ia tautolu ke liliu ke he mena ne toka hifo e tautolu. Ko e tohi ke he tau Kalatia ka lagomatai a tautolu oti ke fakatumau ke mahani fakamooli.
5 Igatia a tautolu oti mo e lata ke manatu e magaaho ne fifili e tautolu ke fekafekau ki a Iehova. Manamanatu ke he tau hūhū ua nei: Manatu nakai e koe e tau lakaaga ne taute e koe ke lagomatai aki a koe ke mautauteute ma e papatisoaga? Manatu nakai e koe e puhala ne maeke a koe ke iloa e Atua mo e puhala ne logona hifo e koe he mogo ne iloa e ia a koe?
6. Ko e laupepa fe ka fakaako mai a tautolu i ai?
6 Hiva la e lakaaga kua taute e tautolu ke o mai ke he kupu mooli. (Kikite e puha “Tau Lakaaga kua Taute e Tautolu ke Iloa e Atua ka Lagomatai a Tautolu ke Fakatumau ke Holo ki Mua.”) Maeke ia tautolu ke manatu e tau lakaaga nei ko e laupepa he tau mena ka fakakia e tautolu ke fakatumau e tua ha tautolu ke malolō mo e fakamamao tumau a tautolu neke liliu ke he tau mena he lalolagi. Tuga ni e pailote ne fakakia tumau e laupepa haana ato fakaholo e vakalele, kua lata ia tautolu ke liu kitekite tumau e laupepa ha tautolu.
LAUTOLU NE ILOA HE ATUA NE MATUTAKI KE MALOLŌ LAHI KE HE KUPU MOOLI
7. Ko e heigoa e puhala kua mumui e tautolu? Ko e ha kua lata ia tautolu ke fakakia e tata lahi he puhala kua mumui a tautolu ki ai?
7 Tuga ni e pailote ne fakakia e laupepa he tau mena he tau magaaho takitaha he fakaholo e ia e vakalele, maeke foki ia tautolu ke fakakia tumau e holo ki mua ha tautolu ke he kupu mooli. Ne tohi a Paulo ki a Timoteo: “Kia eke e koe mo fakafifitaki hau e tau kupu tonu, ne fanogonogo ai a koe kia au mo e tua mo e fakaalofa ha ia Keriso Iesu.” (2 Timo. 1:13) Ko e “tau kupu tonu” ne tutala a ia ki ai kua ha ha he Kupu he Atua. (1 Timo. 6:3) Ko e fakatino mukamuka ka foaki ki a tautolu e manatu ne tuga e mena ia. Pihia foki, kua lagomatai he puhala he “tau kupu tonu” a tautolu ke maama e manako ha Iehova ki a tautolu. To fakatutala a tautolu mogonei ke he tau lakaaga ne taute e tautolu ato papatiso a tautolu mo e fakakia ke kitia e mumui fakatata lahi ha tautolu ke he puhala he kupu mooli.
8, 9. (a) Ko e ha kua lata ke fakatumau a tautolu ke tupu ke he iloilo mo e tua? (e) Ko e ha kua aoga e holo ki mua ha tautolu ko e Kerisiano? Tatai fēfē ke he tupu he akau?
8 Ko e lakaaga fakamua ha tautolu ko e uta e iloilo, ne takitaki ke he tua ha tautolu. Ka kua lata ia tautolu ke uta e iloilo mo e fakamalolō tumau e tua ha tautolu. (2 Tesa. 1:3) He mole e papatisoaga ha tautolu, ko e ha tautolu a fakafetuiaga mo e Atua kua lata ke tumau ke tupu mo e malolō lahi.
Fakatumau e akau ke tupu. Kua lata foki e tau Kerisiano ke pihia foki
9 Tatai e mena nei ke he puhala ne tupu e akau. Kua ofoofogia ke kitia e loa lahi he akau ka tupu, mua atu ka maō e tau vaka. Ma e fakatai, falu he tau arasi fulufuluola a Lepanona ka loloa tuga e tau fale tokoluga ne 12 e foloa. Liga lahi mahaki ai ke maeke e toua 12 e mita he matoho ke loa ke viko he taha e akau. (Lo. a Solo. 5:15) Mafiti lahi e tupu he akau he mogo fakamua. He tupu muatua hifo e tau vaka mo e totolo kehe mai he akau, to lahi mo e loa e matapatu. Fakamui kua nakai mukamuka ke kitia e tupu he akau. Pihia foki e holo ki mua ha tautolu ko e tau Kerisiano. Liga taute e tautolu e tau hikiaga loga he kamata fakamua a tautolu ke fakaako e Tohi Tapu. Ti papatiso ai a tautolu. Mailoga he falu he fakapotopotoaga ha tautolu a holo ki mua he kupu mooli. Liga kamata a tautolu ke paionia po ke moua falu kotofaaga he fakapotopotoaga. He fai magaaho he mole, liga nakai mukamuka lahi ma e falu ke kitia e holo ki mua ha tautolu he kupu mooli. Ka e manako oti a tautolu ke tupu tumau ke he iloilo mo e tua ato eke a tautolu ke tuga e “tagata kua katoatoa ai e mahani mitaki” kakano, ke eke a tautolu mo Kerisiano kua motua. (Efeso 4:13) Ti ka holo ki mua a tautolu ko e Kerisiano, kua tuga e tega akau inanoa a tautolu ne tupu hake ko e akau maō.
10. Ko e ha kua lata e tau Kerisiano motua ke holo ki mua tumau he kupu mooli?
10 Ka ko e holo ki mua ha tautolu kua nakai lata ke oti he naia. Ko e ha tautolu a iloilo he Kupu he Atua mo e ha tautolu a tua kua tuga e tau vaka ne fakamalolō tumau a tautolu mo e nakai maueue. Lata e tau vaka ia ke fakatumau ke maō. (Fakatai 12:3) Tokologa e tau matakainaga ne matutaki ke holo ki mua pihia. Taha e matakainaga taane ne motua ke molea 30 e tau ne pehē kua holo ki mua agaia a ia. Pehē a ia kua mua atu e loto fakaaue haana mogonei ke he Tohi Tapu. Kua fakatumau a ia ke fakaako e tau puhala foou kua maeke he Tohi Tapu ke lagomatai e tagata ke taute e tau fifiliaga, ti fiafia lahi a ia he gahua ke he fonua.
FAKAMALOLŌ E KAPITIGA HAAU MO E ATUA
11. Maeke fēfē a tautolu ke matutaki ke fakamalolō e kapitiga ha tautolu mo Iehova?
11 Ka manako a tautolu ke holo ki mua tumau ko e Kerisiano, kua lata ia tautolu ke fakatumau ke fakatata lahi ki a Iehova. Ne manako a ia ki a tautolu ke logona e haohao mitaki mo e fakaalofa, tuga e tama ne logona ka haia mo e matua fakaalofa po ke logonaaga ha tautolu ka haia mo e tau kapitiga uho ha tautolu. Mooli, to fai magaaho mo e laliaga ke fakatata lahi ki a Iehova ke logona e haohao mitaki mo e fakaalofa. Mailoga kua fai magaaho a koe ke he tau aho takitaha ke totou e Tohi Tapu. Ti totou oti e tau mekasini, tohi, mo e porosua foou ne foaki e Iehova ki a tautolu. To lagomatai he mena nei a koe ke iloa mitaki e Atua mo e ke fakamalolō e kapitiga haau mo ia.
12. Ko e heigoa kua lata ke taute e tautolu kaeke ke manako a tautolu ke fakatumau e malolō he kapitiga ha tautolu mo e Atua?
12 Ko e ha tautolu a tau liogi mo e feoakiaga mitaki ka lagomatai foki a tautolu ke fakamalolō e kapitiga ha tautolu mo e Atua. (Totou Malaki 3:16.) Ka liogi e tau kapitiga he Atua ki a ia, kua fanogonogo a ia ke he “tau liogi ha lautolu.” (1 Pete. 3:12) Kua fanogonogo a Iehova ka tagi atu a tautolu ki a ia he liogi, ti kua lata ia tautolu ke fakatumau ke liogi. (Roma 12:12) Nakai maeke ia tautolu ke matutaki mo kapitiga he Atua ka nakai lagomatai mai a ia. Ka nakai liogi a tautolu ki a ia, nakai moua e tautolu e malolō kua lata. To fakalolelole he fakatokaaga kelea nei a tautolu po ke kamatamata ai ke taute e mena hepe. Ka e makai a ia ke foaki ki a tautolu oti e lagomatai kua lata mo tautolu kaeke kua ole ai e tautolu. Liogi nakai a koe ki a Iehova ke he puhala ka tutala a koe ke he kapitiga uho? Fai puhala nakai kua lata ia koe ke fakaholo ki mua e tau liogi haau?—Iere. 16:19.
13. Ko e ha kua lata ia tautolu ke ō tumau he tau feleveiaaga ka manako a tautolu ke fakamalolō tumau e kapitiga ha tautolu mo e Atua?
13 Kua lata ia tautolu ke fakatumau ke he fakapotopotoaga ke maeke ke fakalataha mo e falu ne ko e tau kapitiga ha Iehova. Ne fakaalofa a ia ki a lautolu ha kua fakatumau a lautolu ke “tua kia ia.” (Nahu. 1:7) Ha kua lahi e kelea he lalolagi, lata ia tautolu ke fakaaoga e tau magaaho mo e tau matakainaga ha tautolu. Maeke ia tautolu ke felagomataiaki ke malolō tumau, mo e to fakalagalaga ai a tautolu ke fakakite e fakaalofa ma e falu mo e ke taute e “tau gahua mitaki.” (Hepe. 10:24, 25) To nakai maeke ke muitua e fakatonuaga ha Paulo ato fakaaoga e tautolu e magaaho mo e fakapotopotoaga. Kia fano tumau a koe ke he tau feleveiaaga. Ti fai vala he tali he feleveiaaga.
14. Ko e ha kua lata tumau a tautolu ke mautali ke fakatokihala mo e taute e tau hikiaga ke he tau momoui ha tautolu?
14 Kua lata ia tautolu ke fakatokihala mo e oti e puhala agahala ha tautolu he moui he eke fakamua a tautolu mo Kerisiano. Ka kua lata tumau a tautolu ke mautali ke fakatokihala mo e taute e tau hikiaga he tau momoui ha tautolu. Ha kua nakai mitaki katoatoa a tautolu ti ha ha i ai e tau lolelole, kua mukamuka lahi a tautolu ke agahala. Ko e agahala kua tuga e gata kua mautali ke gagau a tautolu he ha mogo ka maeke. (Roma 3:9, 10; 6:12-14) Ti nakai lata ia tautolu ke fakatupua kua nakai fai lolelole a tautolu. Kua fakauka a Iehova ki a tautolu he totoko a tautolu ke he tau lolelole ha tautolu. (Filipi 2:12; 2 Pete. 3:9) Fakaaoga e magaaho mo e malolō haau he gahua ha Iehova ka e nakai ke he tau kakano lotokai. Taha e matakainaga fifine ne feaki he kupu mooli ne manatu kua lata a ia ke matakutaku lahi ki a Iehova ti logona hifo to nakai maeke a ia ke fakafiafia a Ia. Ne nakai logona e ia e tata ki a Ia mo e taute e tau hepehepe he moui haana. Pehē a ia, “Nakai kakano ko e ai fakaalofa au ki a Iehova ka ko e nakai iloa mooli e au a ia.” Ati liogi a ia ma e lagomatai he Atua ti kamata ke taute e falu hikiaga. Pehē a ia, “Na takitaki tumau e Iehova au tuga e tama, he lagomatai au ke he tau kamatamata takitaha, ne totonu lahi, he fakakite ki a au e mena kua lata ia au ke taute.”
15. Ko e heigoa ha Iesu mo Iehova kua mailoga mo e loto fakaaue?
15 Ko e agelu he Atua ne tala age ki a Peteru mo e falu aposetolo ke ‘talahau atu tumau’ e tala mitaki. (Gahua 5:19-21) Ko e ha tautolu a gahua he fonua he tau faahi tapu takitaha ko e taha he tau mena kua lata ia tautolu ke fakakia ke fakamalolō tumau e tua ha tautolu. Ko Iesu mo Iehova ne mailoga e lahi he tua ha tautolu mo e loto fakaaue ke he mena ne taute e tautolu he gahua ke he fonua. (Fakakite. 2:19) Ko e gahua he fonua kua lata ke lahi e vala ke he tau momoui ha tautolu.
16. Ko e ha kua lata ia tautolu ke manamanatu tumau ke he tukuleleaga ha tautolu?
16 Manamanatu tumau ke he tukuleleaga haau. Ko e fakafetuiaga ha tautolu mo Iehova ko e mena ne mua atu e uho kua moua e tautolu. Iloa e ia a lautolu oti kua haia mo ia. (Totou Isaia 44:5.) Fakakia e fakafetuiaga haau mo Iehova, ti liogi ma e lagomatai haana ke fakamalolō tumau ai. Manamanatu foki ke he papatisoaga haau, ti ua nimo e aho uho ia. Ne fakakite he papatisoaga haau ke he falu kua tukulele e koe a koe ki a Iehova. Ko e fifiliaga kua mua atu e uho anei kua taute e koe.
LATA IA TAUTOLU KE FAKAUKA KE FAKATATA TUMAU KI A IEHOVA
17. Ko e ha kua lata ia tautolu ke fakauka ka manako a tautolu ke fakatata tumau ki a Iehova?
17 Ne tala age a Paulo ke he tau Kalatia kua nakai lata a lautolu ke mahala. (Kala. 6:9) Kua lata foki a tautolu ke fakauka ha ko e mena to fai lekua a tautolu. Ka e to lagomatai e Iehova a tautolu. Fakatumau ke liogi ma e agaaga tapu he Atua, mo e to lagomatai e ia a koe ke moua e fiafia mo e mafola, pete he nakai galo e tau lekua. (Mata. 7:7-11) Manamanatu ke he mena nei: Kua leveki e Iehova e tau manu lele, ka e mua atu e fakaalofa haana ki a koe ke he fakaalofa haana ke he tau manu lele. Manako a ia ke leveki a koe ha kua fakaalofa a koe ki a ia mo e tukulele a koe ki a ia. (Mata. 10:29-31) Pete ne ha ha ia koe e tau lekua uka, ua mahala. Ua tiaki e kupu mooli ha ko e tau mena ne toka hifo e koe. Loga e tau monuina ha tautolu ha kua iloa e Iehova a tautolu.
18. Ko e heigoa kua lata he tau tagata oti ne iloa e Atua ke taute mogonei?
18 Ka papatiso foou po ke kua leva e papatiso haau, ko e heigoa kua lata ia koe ke taute mogonei? Fakatumau ke iloa mitaki a Iehova, mo e fakatumau ke holo ki mua he kupu mooli. Kua lata ia koe ke fakaeneene ke ua manamanatu kua iloa mitaki e koe e Atua ti nakai lata ia koe ke fakaholo ki mua e fakafetuiaga haau mo ia. Liu onoono ke he tau mena kua fakatutala e tautolu he vala tala nei ke maeke ia koe ke fakatata lahi ki a Iehova, ko e ha tautolu a Matua, Kapitiga, mo e Atua fakahele.—Totou 2 Korinito 13:5, 6.