Limagofulu e Tau he Fekafekau Mau, Tata ke he Arctic Circle

NE NONOFO a mautolu he faama i Northern Ostrobothnia i Finilani, ti toko hogofulu a mautolu e fanau. Ikiiki agaia a mautolu he Felakutaki II he Lalolagi. Pete he mamao ligo e kaina ha mautolu mai he matakavi ne laulahi e latau, ne iloa e mautolu kua matematekelea lahi mahaki e tau tagata. He taha pō, ne tō e pomu ke he tau taone ha Oulu mo Kalajoki, ti ata kula e lagi ha ko e tau afi. Ne fakaako he tau matua a mautolu ke fakamumuli fakaave ka kitia e mautolu e tau vakalele tau ne felele he lagi. Ko e mogo ne tala mai e Tauno, ko e uluaki he lafu tugaane ha mautolu, hagaao ke he lalolagi parataiso ka nakai matematekelea ha tagata, ne manako a mautolu ke iloa atu foki.

He 14 e tau moui ha Tauno ne iloa e ia e kupu mooli he Tohi Tapu he totou e tau tohi ne lolomi he Tau Tagata Fakaako Tohi Tapu. Magaaho ne kamata e Felakutaki II he Lalolagi, ne nakai talia e ia ke fano he kautau ha ko e tau mena ne fakaako e ia mai he Tohi Tapu. Ti tuku a ia he fale puipui, ne kelea lahi e tau levekiaga ki a ia. Ka kua taute he mena nei a ia ke au atu e manako ke fekafekau ki a Iehova. He mole e fakatoka mai a ia he fale puipui, ne lahi atu e magaaho haana he gahua ke he fonua. Ko e fakafifitakiaga mitaki he tugaane ha maua ke he tau kamatamata nei ne taute a maua ke manako ke o atu ke he tau feleveiaaga he Tau Fakamoli he maaga ne tata mai. Ne gahua a maua mo e fakaputu e tupe ke maeke ke o atu foki ke he tau fonoaga. Ne tuitui e maua e tau mena tui ma e tau katofia ha maua, tō aniani, mo e oko fua akau. Ha kua loga lahi e gahua ha maua ke taute he faama, ne fa nakai maeke ia maua ke ō tokoua he tau fonoaga.

Ko e tau mena ne fakaako e maua hagaao ki a Iehova mo e haana tau finagalo ne omoomoi a maua ke fakaalofa lahi ki a ia, ti papatiso tokoua a maua he 1947. (Ne 15 e tau ha Annikki mo e 17 ha Aili.) Ne papatiso e taokete ha maua ko Saimi he tau ia foki. Fakaako Tohi Tapu foki a maua mo e taokete ha maua ko Linnea. Ne eke a ia mo e magafaoa haana mo Tau Fakamoli a Iehova foki. He mole e papatiso ha maua, ne fifili a maua ke paionia fakakū he falu magaaho.

KAMATA E FEKAFEKAUAGA MAU HA MAUA

He 1955, ne hiki atu a maua ke he taone he faahi tokelau ko Kemi. Pete he gahua tupe tumau a maua, ne manako a maua ke eke mo tau paionia. Ka kua matakutaku a maua neke nakai lahi e tupe ke totogi aki e tau kaitalofa ka tote e gahua. Manatu a maua kua lata ke fakaputu mua taha tupe. Ko e matakainaga fifine paionia ne totoku i luga, ne lagomatai a maua he mogoia ke maama kua maeke a maua ke paionia. Ne lagomatai he mena ia a maua ke kitia ko e fekafekau tumau ki a Iehova kua nakai fakavē hokoia ni ke he tau koloa ha maua po ke lagomatai mai he magafaoa ha maua. Ke nakai falanaki ki a maua ni po ke magafaoa ha maua, ka kua latatonu ke falanaki to lagomatai e Iehova a maua ke moua e tau mena kua lata.

He mogoia, kua lahi tuai e tupe ha maua ne fakaputu ke paionia ke ua e mahina. Ti ia Me 1957, ne tuku e tohi ha maua ke paionia ke ua e mahina i Pello, Lapland. Ne tupetupe lahi a maua. Ka e ua e mahina he mole, ne mau oti agaia e tupe ha maua ne fakaputu, ti tuku e tohi ha maua ke paionia ke he ua foki e mahina. He mole e tau mahina ua ia, kua mau oti agaia e tupe ha maua. Mauokafua a maua mogonei to leveki e Iehova a maua. Kua 50 e tau he paionia a maua, ti toka agaia e tupe ia ha maua! Logona hifo e maua kua tuga na totō e Iehova e tau lima ha maua mo e pehē mai: ‘Ua matakutaku ko au ni kua lagomatai kia mua.’​​—Isaia 41:13.

He 1958, ne ole e leveki takaiaga ha maua kua maeke nakai ke hiki atu foki a maua ke he faahi tokelau i Sodankylä, Lapland ke eke mo tau paionia pauaki. He magahala ia, ne taha ni e matakainaga fifine ne nofo i ai. Na fuluola e puhala ne fakaako e ia e kupu mooli. Ne fano e tama taane haana mo e vahega ke ahiahi ki Helsinki, ko e maaga lahi ha Finilani. He o atu hui e vahega he taone, ne fakaolo age he matakainaga fifine motua e mekasini ko e Watchtower ke he tama taane ti ole ki a ia ke age ke he matua fifine haana. Mogo ne totou ai he matua fifine haana, ne mailoga agataha e ia kua fakaako ai e kupu mooli hagaao ke he Tohi Tapu.

He matakavi ia ne ha ha i ai e fale hele akau, ko e fale ia ne hele e tau akau ke he tau lapa. Ne nonofo a maua he poko i luga he fale hele akau ia mo e taute e tau feleveiaaga i ai. He mogo fakamua, ko lautolu ne fakalataha mai ko maua mo e matakainaga fifine mo e tama fifine haana. Ne totou e mautolu e vala tala ne fakatoka ma e feleveiaaga he tau faahi tapu takitaha. Fai magaaho, taha e tagata taane ne fakaako e Tohi Tapu mo e Tau Fakamoli a Iehova he mogo fakamua ne hau ke gahua he fale hele akau. Ne kamata a ia mo e magafaoa haana ke fakalataha mai ke he tau feleveiaaga mo mautolu, fai magaaho he mole ti papatiso a ia mo e hoana haana. Mogonei kua fai matakainaga taane ke takitaki e tau feleveiaaga ha mautolu. Falu tagata taane he fale hele akau ne kamata foki ke fakalataha ke he tau feleveiaaga ti o mai ke he kupu mooli. Nakai leva ti eke e matakau ha mautolu mo fakapotopotoaga.

UKA E FAKAMATALA HE FAAHI TOKELAU

Ne ō a maua fakamatala he tau matakavi mamao. He vahā mafana, ne ō hui a maua, heke he tau pasikala taholi, mo e fakaaoga foki e tau posi ke kumi e tau tagata he fonua ha maua. Ne aoga lahi e tau pasikala taholi ha maua. Ne heke ai e maua ke he tau fonoaga mo e ke he kaina he tau matua ha maua ne totou teau e kilomita he mamao. He vahā makalili, ne ō tuai a maua he pasi he mogo pogipogi ke he taha he tau maaga ti ō hui he taha fale ke he taha fale. Ka oti e tau fale he maaga he ahiahi e maua, ne ō hui a maua ke he taha maaga foki. Falu mogo ne lahi mahaki e sinō he puhalatū. Ka fai tagata ne fano he puhalatū ti mau agaia e pite he hala, ne mukamuka lahi a maua ke ō hui. Ka e ka liu foki ke sinō, to galo e hala. He kamataaga he vahā mafana, ne fa molū e sinō mo e pala, ti uka lahi ke o hui i ai.

Ne fakaako a maua ke tauteute mafana ka makalili mo e sinō. Ne tui e maua e tau tosini loloa mafana mo e ua po ke tolu e tosini, mo e tau puusi gutu loloa. Ka e fa hū e sinō he tau puusi ha maua ka ō. Ka hohoko a maua ke he tau sitepe he fale, ne akiaki e maua e tau puusi mo e lulu e sinō mai ki fafo. Ne pala foki e tau vē he tau peleue loloa ha maua ti kua maō he aisa ha kua toho he sinō. Taha e fifine he kaina ne pehē, ‘Kua lahi mahaki mooli e tua ha mua, ha kua ō a mua he makalili lahi pehēnei.’ Ne molea e 11 e kilomita he ō hui a maua ke he fale ia.

Ne fa nonofo a maua he pō mo e tau tagata he tau maaga. He mogo afiafi, ne kamata a maua ke ole ke he tau tagata kua maeke nakai ke nonofo he tau kaina ha lautolu. Nakai monuina e tau kaina, ka e aga kapitiga mo e totonu e tau tagata. Ne foaki mai e lautolu taha mena ke momohe a maua mo e ke kai. Ne lagaloga e momohe a maua i luga he tau kili manu. Ka ko e falu ne fai poko ma e tau tagata ahiahi ti maeke a maua ke fakaaoga. Ke fakatai, taha e fifine ne lahi e fale ti ta hake e ia a maua ke he fata i luga ke he poko ne mitaki e mohega mo e fulufuluola e tau kafu tea. Lagaloga ne tutala a maua ke he Tohi Tapu mo e magafaoa ti mule lahi ka pō. He taha kaina, ne momohe e hoa i ai he taha faahi he poko ka e momohe a maua he taha faahi foki. Ne loga e hūhū he taane mo e hoana, ti tutala a maua mo laua ke he Tohi Tapu ti hoko ke he tau tulā he pogipogi.

NE FUA MITAKI E FEKAFEKAUAGA HA MAUA

Ko Lapland ko e matakavi fulufuluola. Ka ko e tau tagata ne fakaako hagaao ki a Iehova kua mua atu ai e fulufuluola ki a maua. Ko e falu tagata ne fakamatala a maua ki ai ko e tau tagata ne o mai ki Lapland ke hele akau. Falu magaaho ne huhū atu a maua ke he fale ne tokologa e tagata taane ne nonofo ai. Ne fiafia e tau tagata nei ke logona e fekau he Tohi Tapu mo e totou e tau tohi ha tautolu.

Ne loga e mena mitaki ne tutupu ki a maua. He taha aho, ne lima e minuti ne mafiti e tulā he tuaga pasi, ti tōmui a maua he pasi. Ne fifili a maua ke heke he taha pasi foki mo e ō ke he maaga kehe. Ne nakaila gahua a maua he matakavi ia, ka e he fale fakamua, ne feleveia a maua mo e fifine fuata ne pehē, ‘Ha ē a mua, tuga ne amanaki au ki ai.’ Ne fakaako Tohi Tapu a maua mo e taokete haana. Ne manako e fuata fifine nei ke ole e taokete haana ki a maua ke aahi atu ki a ia he aho ia. Ka kua nakai moua e maua e fekau ia. Ne kamata a maua ke fakaako e Tohi Tapu mo ia mo e tau magafaoa haana ne nonofo he fale ne tata mai. Nakai leva ti lafi e maua e tau fakaako nei ke he taha ni, ti hogofulumaua e tagata ne fakalataha mai. Tali mai he mogoia, kua tokologa he magafaoa nei ne eke mo Tau Fakamoli a Iehova.

He 1965, ne liu ole ki a maua ke hiki hifo ke he fakapotopotoaga i Kuusamo. He magahala ia, ne nakai tokologa e tagata fakailoa he fakapotopotoaga. He magaaho fakamua, ne uka ke fakamatala he matakavi nei. Ko e tau tagata aga fakalotu i ai ne nakai fiafia a lautolu ke he gahua ha maua. Ka e tokologa i ai ne fakalilifu e Tohi Tapu. Ne lali a maua ke iloa e tau tagata, ti kavi ua e tau he mole, ne mukamuka fakahaga ke kamata e tau fakaako Tohi Tapu.

MAKAUKAU AGAIA A MAUA HE FEKAFEKAUAGA

He mogonei, kua ō agaia a maua he fonua ke he laulahi he tau aho, ka kua nakai maeke ke gahua he aho katoa. Kua mukamuka fakahaga mogonei ke fakamatala he matakavi lahi ha maua ha kua iloa tuai a Aili ke fakaholo. Ne fakamafana he nefiu ha maua a ia ke fakaako ke fakaholo, ti moua e tohi fakaholo haana he 1987 he mogo ne 56 e tau moui haana. Kua nonofo foki a maua mogonei he fale ne fakapiki ke he Fale he Kautu ne foou.

Kua fiafia lahi a maua ha kua tokologa ne talia e kupu mooli he faahi tokelau ha Finilani. He kamata a maua ke paionia hinei, na gahoa ni e tagata fakailoa. Ka ko e mogonei kua ha ha i ai taha e takaiaga ne ha ha ai falu fakapotopotoaga. Fa mahani, ka ō a maua he toloaga po ke fonoaga, ne fai tagata ka fakafeleveia mai mo e fakamaama na fakaako Tohi Tapu a maua mo e magafaoa haana he mogo ne tote a ia. Ne fakamonuina mooli he Atua e gahua ha maua!​​—1 Kori. 3:6.

He 2008, ne katoa e 50 he tau tau ha maua he paionia pauaki. Ne fakaaue a maua ki a Iehova ha kua maeke ke fefakamafanaaki e maua a maua ke matutaki ke fekafekau ki a ia. Kua mukamuka e puhala moui ha maua ka e moua tumau e tau mena kua lata. (Sala. 23:1) Iloa e maua mogonei ne nakai lata a maua ke tupetupe he mogo ne kamata ke paionia! He tau tau oti nei, ne fakamalolō e Iehova a maua tuga ni he mavehe e ia: “Kua fakamalolo e au a koe; ko e moli, kua lagomatai au kia koe; ko e moli, kua taofi e au a koe ke he haku a lima matau ne ha i ai e mahani tututonu.”​​—Isaia 41:10.