Ko Iehova kua ‘Fua e Kavega ke he Taha Aho mo e Taha Aho ma Haaku’

Ne fanau au he 1956 mo e gagao spina bifida. Kakano ko e taha hokohoko he hokotua haaku kua nakai makati mitaki, he nakai gahuahua mitaki e hokohoko ne uka ia au ke fano ti fakatupu foki falu lekua malolō tino.

Fai magaaho to fanau au, ko e tau misionare he Tau Fakamoli a Iehova ne kamata ke fakaako e Tohi Tapu mo e tau matua haaku. He vahā tama haaku, gahoa ni e tagata fakailoa mamao ne nonofo he taone ne tupu hake au i Usakos, i Namipia. Ti taute e mautolu e tau vala tala ma e tau feleveiaaga he fakapotopotoaga ko e magafaoa. He fitu e tau, ne iihi au ke taute e hala fakapala (urostomy) mai he tino haaku. He 14 e tau, ne gagao fitikeleu (epilepsy) au. Ha ko e aoga tokoluga ne tata lahi mai kua mamao ti lata au ke moua e levekiaga pauaki mai he tau matua haaku, ne nakai oti e fakaakoaga haaku.

Ka e fifili au ke fakamalolō e tuaga fakaagaaga haaku. Loga e tau tohi faka-Kerisiano ha mautolu ne nakaila fai he vagahau faka-Aferika, ko e vagahau ne fakaaoga e au. Ti fakaako au ke totou Palagi ke maeke ke fakaako e falu tohi. Ne eke au mo tagata fakailoa he Kautu ti papatiso he 19 e tau. He fā e tau tau fakamui, ne lauia au ke he loga e lekua malolō tino mo e tau logonaaga uka lahi. He fetataaki lahi e maaga he taone haaku, ko e matakutaku tagata ne taofi au he gahua fakamakutu ke he fonua.

He atu tau 20 haaku, ne hiki a mautolu mai i Namipia ke he Faahi Toga i Aferika, mo e ke he magaaho fakamua, ne maeke au ke fakalataha mo e fakapotopotoaga. Homo ue atu e mena ia! Ka e liu au iihi mogonei ke taute e hala fakavao (colostomy).

Fai magaaho he mole, ne logona e au e leveki takaiaga ne tutala ke he matakupu he gahua paionia. Ne aamotia he talahauaga haana e loto haaku. Iloa e au kua nakai mitaki e malolō tino haaku, ka e kitia e au e puhala ne takitaki e Iehova au ke he loga he tau mogo uka. Ti ole au ke paionia tumau. Pete ia, ha ko e tau lekua malolō tino haaku, ne fakauaua e tau motua ke talia e ole haaku.

Ne fifili agaia au ke eketaha fakalahi ke fakamatala e Kautu. Mo e lagomatai he matua fifine haaku mo e falu, ne maeke au ke moua e tau tulā paionia ke he gahua he fonua he ono e mahina. Fakamooli he mena ia e fifiliaga haaku ke paionia mo e fakakite kua nakai kelea lahi e tau lekua malolō tino haaku. Ne liu au ole foki, ti talia e ole haaku mogonei. Ia Sepetema 1, 1988, ne eke au mo paionia tumau.

Ko e paionia, ne logona tumau e au e lalagoaga ha Iehova. Ko e fakaako e tau tagata foou ke he kupu mooli ka e nakai hagaaki ke he tuaga haaku ne puipui au, feaki au, ti lagomatai au ke tupu fakaagaaga. Ne moua e au e olioli lahi mai he lagomatai e tokologa he tau tagata ke he tukuleleaga mo e papatisoaga.

Tumau ni e malolō tino haaku ke nakai mitaki. Ka ko Iehova kua ‘fua e kavega ke he taha aho mo e taha aho ma haaku.’ (Sala. 68:19) Ne lahi atu foki e mena ne taute e ia ke fakamukamuka e moui haaku; kua taute foki e ia ma haaku ke fiafia he moui!