Fekafekauaga Paionia—Ma Hau Kia?
1 “Nakai kitia e au au he taute e taha mena kehe. Nakai kitia moli e au to ta mai he ha mena taha e olioli pihia.” Ko hai ne talahau e mena nei? Ko e taha he tau teau afe he Tau Fakamoli a Iehova ne kua eke e fekafekauaga mau mo feua olioli lahi he ha lautolu a tau momoui. Kua manamanatu nakai a koe ke he liogi ko e fekafekauaga paionia ma hau? He taute e tukuleleaga nakai fai kaupaaga ha tautolu ki a Iehova, kua lata moli a tautolu ke manamanatu kua liga lata nakai a tautolu ke fakalataha katoatoa he fakapuloa e tala mitaki he Kautu. He foliaga ia, fakamolemole manamanatu ke he falu huhu kua huhu he tokologa hagaao ke he fekafekauaga paionia.
HUHU 1: “Pehe falu nakai lata e paionia mo e tau tagata oti. Iloa fefe e au kua lata mo au?”
2 Falanaki e tali ke he tau tutuaga mo e tau matagahua faka-Tohiaga Tapu hau. Kua tokologa kua nakai malolo mitaki po ke he tuaga fou he moui kua nakai fakaata a lautolu ke moua e 90 e tula he mahina he fekafekauaga. Uta taha fakataiaga he tau matakainaga fifine tua fakamoli ko e tau hoana mo e tau mamatua fifine Kerisiano. Kua fakalataha a lautolu ke he fekafekauaga ne kua maeke he tuaga ha lautolu ke taute. Ha kua fakaata ai, kua paionia fakaku a lautolu ke he taha po ke loga e mahina he tau tau takitaha, ti helehele ai e tau olioli ne moua ai ha ko e fakalaulahiaga he fakalataha ke he fekafekauaga. (Kala. 6:9) Pete ni e nakai fakaata he tau tuaga ha lautolu a lautolu ke fekafekau ko e tau paionia mau he mogonei, kua fakatolomaki ai e agaga paionia mo e ko e tau fakamonuinaaga ke he fakapotopotoaga ko e tau tagata fakailoa makai ke he tala mitaki.
3 He taha fahi, tokologa e tau matakainaga kua tokanoa mai he tau matagahua kua fakaata ma e fekafekauaga paionia he hikihiki e tau fakatokatokaaga ha lautolu. Ka e kua a koe? Ko koe nakai e fuata ne kua oti mai he aoga? Ko koe nakai e hoana ne kua maeke e tane ke foaki lahi ma e magafaoa? Kua mau kia a koe ka e nakai fai fanau? Kua okioki mai kia a koe he feua gahua hau? Ke paionia po ke nakai paionia ko e fifiliaga ni he tagata kua lata ke taute ni e ia. Ko e huhu, Maeke nakai ia koe ke fakaata taha magaaho he moui hau ke paionia?
4 Kua fakaaoga e Satani e fakatokatokaaga he tau mena nei he lalolagi hana ke fakapuke e tau momoui ha tautolu aki e tau fakalavelave mo e ke hele a tautolu ke he puhala moui lotokai. Kaeke ke fifili a tautolu ke nakai fai vala he lalolagi, to lagomatai e Iehova a tautolu ke fakatumau ke tuku fakamua e Kautu mo e ke hokotia atu mo e tokiofa e tau matagahua he fekafekauaga fakateokarasi kua fakatoka mai ki a tautolu. Ka maeke ia koe ke hikihiki hau a tau tutuaga ke maeke ke paionia, ko e ha he nakai taute ai?
HUHU 2: “Iloa moli fefe e au to maeke ia au ke lagomatai fakatupe ka e taute e fekafekauaga mau?”
5 Kua moli ai ke he tau motu loga ko e tau tula he gahua tupe kua manako ke he tau fahitapu takitaha ke moua e mena ne kua maeke ke onoono ki ai ko e tau tuaga kua lata he moui kua tolomaki ki mua ke he tau tau loga. Pete ia, tokologa ne paionia ke he tau tau loga, ti fakatumau a Iehova ke lagomatai a lautolu. Ke kautu ko e paionia, ko e tua mo e agaga he poa hau ni kua lata. (Mata. 17:20) Ha ha ia tautolu e fakamoliaga he Salamo 34:10 ‘nakai nonofogati ai a lautolu ne kumi kia Iehova.’ Ko lautolu ne hu he fekafekauaga paionia kua lata ke taute pihia mo e mauokafua katoatoa to foaki e Iehova ma hana. Kua taute pihia ni e ia ke he tau paionia oti! (Sala. 37:25) Moli, he tatai mo e tau matapatu fakaakoaga he 2 Tesalonia 3:8, 10, mo e 1 Timoteo 5:8, nakai amanaki e tau paionia ke lagomatai a lautolu fakatupe.
6 Ko e ha tagata kua manamanatu ke he fekafekauaga paionia kua lata ke taute tuga ne talahau e Iesu: “Nofo fakamua a ia ki lalo ke totou e tau tupe.” (Luka 14:28) Ko e taute e mena nei kua fakakite ai e aoga he pulotu. Tutala ki a lautolu ne kautu e paionia ke he tau tau loga. Huhu ki a lautolu ke he puhala kua lagomatai e Iehova a lautolu. Ko e paionia iloa lahi e fekafekau leveki hau he takaiaga ka fiafia ke foaki e tau lagomataiaga ke he puhala ke kautu he fekafekauaga gahua mau.
7 Nakai iloa katoatoa he tagata e moliaga he maveheaga a Iesu ia Mataio 6:33 ato tuku e ia a ia ki a Iehova. Ne talahau he paionia fakamoli: “He magaaho ne hohoko au mo e hoa haku ke he kotofaaga fou ko e tau paionia, ne gahoa ni e tau laukou kai, ko e pata tote, mo e nakai fai tupe a maua. Ne oti e tau mena kai ha maua mo e pehe ai, ‘Mogonei kua nakai fai mena a taua ma pogi.’ Ne liogi a maua ki ai, mo e momohe ai. Ne uhu hea e Fakamoli he pogipogi hake he matakavi mo e talahau a ia, he pehe, ‘Liogi au ke fakafano mai e Iehova e tau paionia. Maeke ia au mogonei ke hoa a koe he aho katoa, ka e ha kua nofo mamao au, to kai e au e kai la haku mo koe, ti ta mai e au e kai nei ma tautolu oti.’ Ko e vala povi lahi mahaki mo e tau laukou kai.” Ko e mena ia ne fakamoli mai e Iesu ki a tautolu ke ‘aua neke fakaatukehe a tautolu ke he moui ha tautolu’! Ti lafi mogoia e ia: “Ko hai kia taha ia mutolu ke maeke ia ia he hana fakaatukehe ke fakaloa hana moui ke he kupita taha?”—Mata. 6:25, 27.
8 Kua holo ki mua e velevelemena he lalolagi takai ia tautolu. He tolomaki ki mua e pehiaaga ki luga ia tautolu ke lautatai. Pete ia, he loto fakaaue tokolalo ma e fekafekauaga mau kua taute a tautolu ke lata ai mo e nakai velevelekoloa. (1 Timo. 6:8) Ko e tau paionia kua fakamukamuka mo e maopoopo e tau puhala moui ha lautolu kua lahi mahaki e magaaho ma e fekafekauaga mo e moua lahi mahaki e olioli mo e malolo fakaagaga he fakaako e falu ke he kupu moli. Pete ni e nakai lali ke moui ke he puhala matematekelea, ko e puhala lagotatai ha lautolu ke he tuaga fakatupe kua fakamalolo a lautolu ke olioli ke he tau monuina he paionia.
9 Ka mailoga lahi e koe kua nonofo a tautolu ke he vaha fakahiku mo e kua tote lahi e magaaho ma e lalolagi kelea nei, to omoomoi fakaagaga a koe ke taute e tau poa kua lata ke fakamatala e tala mitaki ke he tau magaaho oti. He ono ke he taha fahi he tuaga tupe hau mo e tuku atu ai ki a Iehova, to mailoga e koe kua maeke ia koe ke fekafekau mau ki a ia. Pete ia ka eke kua manako a a koe ke he tau koloa pauaki ke maeke ke paionia, to olioli e koe e tau monuina loga a Iehova.—Sala. 145:16.
HUHU 3: “Ko e fuata mui, ko e ha kua lata ia au ke manamanatu ma e fekafekauaga paionia mo matafeua?”
10 He fakahikuhiku e tau tau gahoa hau he aoga, kua pauaki ni ke manamanatu a koe ke he vaha anoiha. Manako a koe ke haohao, fiafia, mo e fakamoli. Kua liga lali e tau tagata fakatonutonu he aoga ke uta a koe ke he feua tokoluga ke lata ma e fakaakoaga univesiti he tau tau loga. Ko e manamanatuaga fakaako mitaki Kerisiano hau kua tala atu ki a koe kua lata ia koe ke mautauteute ke fekafekau ki a Iehova. (Fakama. 12:1) Kua manamanatu foki a koe hagaao ke he mau mo e fai magafaoa. Ko e heigoa hau ka taute?
11 Ko e tau fifiliaga hau kua taute e koe he magaaho nei he moui hau ka lauia ai e vaha katoa hau anoiha. Kaeke kua fita a koe he Fakamoli a Iehova ne tukulele he papatiso, kua foaki e koe e solu katoa hau ki a Iehova. (Hepe. 10:7) Ko e kotofaaga fakamua kua moua e koe, lali ke paionia fakaku ke taha po ke loga e tau mahina. To foaki he mena nei e kamata he tau olioli mo e tau matagahua kua hoko atu ke he paionia tumau, ti ko e onoonoaga hau ke he mena kua lata ia koe ke taute ma e moui hau kua kitia maali fakahaga. Ti, he manamanatu atu ke he gahua tupe tumau he oti mo e aoga, ko e ha he nakai kamata e paionia tumau? Ne fakatali falu ato leva ai na ke olioli e fekafekauaga paionia ne kua tokihala a lautolu he nakai kamata tuai.
12 Ko e tagata fuata, kia fakaaoga fakamitaki e tau magaaho hau he nofo tokotaha, mo e olioli e tau fua kua moua he gahua fakamatala mau. Kaeke ko e manako hau ke mau a taha aho, nakai fai fakaveaga mitaki ma e fakamauaga ka fakatoka mai he fekafekau fakamua ke he gahua paionia mau. He tupu motua ke he tino mo e fakaagaga, kia fifili e koe e paionia ke eke mo feua hau mo e hoa mau kua manamanatu pihia foki. Kua hohoko atu falu hoa mau tokoua ne paionia ke he gahua he takaiaga po ke gahua misionare. Ko e puhala makona moli he moui!
13 Pete ni e leva e fakatumau hau he paionia, to fakakatoatoa e koe hau a fakaakoaga mo e moua e fakamahaniaga mua ue atu ne kua nakai maeke he ha gahua he lalolagi ke foaki. Fakaako he paionia e akonakiaga, fakatokatokaaga fakatagata, puhala ke fehagai mo e tau tagata, falanaki ki a Iehova, mo e puhala ke feaki e fakauka mo e totonu—tau fua ke fakakatoatoa a koe ke hahamo e tau matagahua lalahi.
14 Kua lahi atu e nakai fai falanakiaga he moui ma e tau tagata. Gahoa lahi e tau mena kua tumau moli, kehe mai he tau mena ne mavehe e Iehova. Ha kua hafagi lahi e vaha anoiha hau ki a koe, fai magaaho foki nakai mogonei ka manamanatu fakahokulo ke he mena ka taute e koe aki e moui hau he tau tau ne hau? Fokifoki fakamitaki e kotofaaga he paionia. Nakai tokihala a koe ka fifili e fekafekauaga paionia mo feua hau.
HUHU 4: “Nakai kia ko e kavega tumau ke hokotia ke he tula kua lata? Ka e kua ka totua e tula haku?”
15 Ka fakapuke e koe e laupepa paionia tumau, kua lata ia koe ke tali e huhu: “Kua fakatokatoka nakai e koe e tau mena fakatagata ke maeke ia koe ke hokotia hagahaga mitaki ke he tau tula 1,000 he tau?” Ke hokotia ai, kua lata ia koe ke avelesi kavi ke 3 e tula he aho he fekafekauaga. Maaliali ai, kua lata e mena nei mo e fakaholoaga mitaki mo e akonaki fakatagata. Kua tokologa e tau paionia kua moua e fakaholoaga aoga, gahuahua ke he tau mahina gahoa ia.
16 Pete ia, kua talahau fakamoli mai he Fakamatalaaga 9:11, ‘Ko e vaha mo e tau mena ke tutupu ai kua hoko ia kia tautolu oti.’ Ko e tatalu lahi po ke tau tutuaga tupu fakaofo kua taute e paionia ke totua. Kaeke ko e mena vihi nakai leva mo e tupu ai he mataulu he tau he fekafekauaga, ko e fakaholoaga lafi ki luga kua lata ke moua aki e tula ne totua. Ka e kua kaeke ke tupu ni e mena vihi ke he mahina gahoa ne toe he tau he fekafekauaga ti nakai hokotia e paionia ki ai?
17 Kaeke kua tatalu ku a koe ke he tau mahina gahoa po ke ka fai mena tupu fakaofo ne nakai maeke a koe ke hokotia ke he tula kua fafati, maeke ia koe ke fina atu ke he tagata he Komiti Fekafekau he Fakapotopotoaga mo e fakamaama e mena vihi. Ka manatu e tau motua nei ke lata ke fakaata a koe ke fakatumau ke he fekafekauaga paionia he nakai tupetupe ke fakakatoatoa e tula totua, ko lautolu ke taute e fifiliaga ia. To fakamailoga he laupepa he Fakamauaga he Tagata Fakailoa he Fakapotopotoaga ke fakakite kua nakai manako ki a koe ke fakaoti e tula ne totua. Nakai ko e fakaataaga anei ke toka, ka e, ko e tauteaga pauaki ha ko e tau tutuaga hau.—Kikite e uho he Our Kingdom Ministry, Aokuso 1986, paratafa 18.
18 Ko e tau paionia mahani kua fakaputu e tau tula he mataulu he tau he fekafekauaga. Kua tuku mua e fekafekauaga paionia ha lautolu, ti ko e falu magaaho kua kitia e lautolu ke fakatote e tau gahua nakai aoga lahi. Kaeke ke totua e paionia ha ko e kelea e fakaholoaga po ke nakai mitaki e akonaki fakatagata, kua lata ia ia ke logona ko e matagahua hana ke fakakatoa e tula totua mo e nakai amanaki ma e onoonoaga pauaki.
19 Ha i ai falu magaaho ne hokotia e paionia ke he tau tutuaga ne nakai maeke ke fai hikiaga. Liga kua moua e ia kua nakai hokotia a ia ke he tula kua fafati ke he vaha loa ha ko e matematekelea tumau he malolo tino, po ke tolomaki ki mua e matagahua magafaoa, mo e falu atu foki. He mena nei, ko e puhala he pulotu to mitaki ke liu atu ke he tuaga he tagata fakailoa mo e fakalataha ke he ha magaaho he fekafekauaga he paionia fakaku. Nakai fai foakiaga tumau ke fakaata taha ke nofo mau he tohiaga he paionia kaeke kua nakai fakaata he tau tutuaga a ia ke hokotia ke he tula kua fafati.
20 Amanaki a tautolu ko e foakiaga he foaki e onoonoaga pauaki ki a lautolu kua latatonu to fakamalolo e tokologa ke hu ke he fekafekauaga paionia mo e tote e tupetupe. Kua lata foki ke fakamalolo a lautolu kua fita ke he fekafekauaga tumau ke fakatumau ke paionia. Manako a tautolu ke he tau paionia ke kautu ke he ha lautolu a fekafekauga tumau.
HUHU 5: “Manako au ke fakakatoatoa taha mena mo e fiafia he taute ai. To fakamakona kia he fekafekauaga paionia au?”
21 Ko e fiafia moli kua fakalago lahi ni ke he fakafetuiaga tata fakatagata mo Iehova mo e fifiliaga kua fekafekau a tautolu ki a ia mo e fakamoli. Ne fakauka a Iesu ke he akau fakatautau “ha ko e fiafia kua toka ki mua hana.” (Hepe. 12:2) Ko e fiafia hana kua hau he taute e finagalo he Atua. (Sala. 40:8) He fakatokatokaaga he tau mena nei, kua olioli e tautolu e fiafia moli kaeke kua laulahi e tau gahua ha tautolu he tau momoui ha tautolu ke takai he tapuakiaga ha tautolu ki a Iehova. Ko e tau koloa fakaagaga kua foaki ki a tautolu e puhala he amaamanakiaga ha kua logona hifo e tautolu kua taute e tautolu e mena kua hako. Moua mai e fiafia he foaki, ti iloa e tautolu kua fai puhala mitaki foki ke foaki e tautolu a tautolu ke fakaako e falu ke he puhala ke moua e moui tukulagi ke he lalolagi fou he Atua.—Gahua 20:35.
22 Ne fatiaki ke he paionia he paratafa ne hafagi aki ne fakamaama ai ke he puhala nei: “Kua fai olioli foki nakai he kitia taha tagata ne kua fakaako mo tautolu kua eke mo tagata fakaheke malolo a Iehova? Kua fiafia lahi mo e ati hake e tua ke kitia e puhala he malolo e Kupu he Atua kua omoi e tau tagata ke taute e tau hikihikiaga he tau momoui ha lautolu ke maeke ke fakafiafia a Iehova.” (Kikite Watchtower, Oketopa 15, 1997, lau 18-23.) Ti, ko e heigoa ka ta mai e fiafia ki a koe? Ka e, he nakai ko e olioli ku ne foaki he lalolagi, kua uho ki a koe e tukulagi, tau matagahua aoga lahi, to foaki he paionia ki a koe e tau puhala homo ue atu he fakakatoatoaaga ka taute a koe ke fiafia moli.
HUHU 6: “Ka nakai ko e manako ma e moui tukulagi, nakai kia ko e fifiliaga haku ke paionia po ke nakai?”
23 Moli, ko e fifiliaga ke paionia ko e hau ni. Ko Iehova ni ke fakafili e tau tutuaga fakatagata hau he moui. (Roma 14:4) Kua amanaki lahi a ia ki a koe ke fekafekau ki a ia mo e loto, solu, manatu, mo e malolo katoa. (Mare. 12:30; Kala. 6:4, 5) Kua fiafia a ia ke he tagata foaki mo e fakamakai, ko ia kua fekafekau ki a ia mo e olioli, nakai he momoko po ke fakafi. (2 Kori. 9:7; Kolo. 3:23) Ko e kakano hau he fekafekauaga tumau kua lata ko e fakaalofa hau ki a Iehova mo e tau tagata he matakavi. (Mata. 9:36-38; Mare. 12:30, 31) Kaeke kua pehenei e logonaaga hau, to uho e fekafekauaga paionia ke he onoonoaga fakahokulo hau.
24 Amanaki a mautolu ko e fakatokaaga nei to lagomatai a koe ke fokifoki e tau amaamanakiaga hau ma e paionia. Maeke nakai a koe ke hikihiki e tau tutuaga hau ke paionia tumau? Kua tohi i lalo e kalena ne mataulu “Fakaholoaga Haku ma e Fekafekauaga Paionia Fakafahitapu.” Kikite ko e maeke nakai ia koe ke fakapuke e fakaholoaga aoga ma hau ke fakaata a koe ke evalesi kavi ke he 23 e tula he tau fahitapu takitaha he fekafekauaga. Ti, tuku e tua katoa mo e falanakiaga ki a Iehova. Mo e hana a lagomatai to kautu a koe! Kua mavehe mai a ia: “Kia . . . hafagi nakai e au e tau pa he lagi ma mutolu, mo e liligi atu e au e monuina ma mutolu, ato lahi ue atu ni haia.”—Mala. 3:10.
25 Ti huhu a tautolu, “Fekafekauga paionia—ma hau kia?” Ka pehe a koe “E,” fakatoka e aho ke kamata e paionia tumau fakamafiti mo e mafanatia to fakamonuina e Iehova a koe mo e moui olioli!
[Fakafonua he lau 6]
(Ma e puhala katoa ne tohi aki, kikite e tohi)
Fakaholoaga Haku ma e Fekafekauaga Paionia Fakafahitapu
AHO GOFUA: Pogipogi gahua he fonua
AHO UA: Pogipogi gahua he fonua
AHO LOTU: Pogipogi gahua he fonua
AHO TULOTO: Pogipogi gahua he fonua
AHO FARAILE: Pogipogi gahua he fonua
AHO FAIUMU: Pogipogi gahua he fonua
AHO GOFUA: Pale la gahua he fonua
AHO UA: Pale la gahua he fonua
AHO LOTU: Pale la gahua he fonua
AHO TULOTO: Pale la gahua he fonua
AHO FARAILE: Pale la gahua he fonua
AHO FAIUMU: Pale la gahua he fonua
AHO GOFUA: Afiafi gahua he fonua
AHO UA: Afiafi gahua he fonua
AHO LOTU: Afiafi gahua he fonua
AHO TULOTO: Afiafi gahua he fonua
AHO FARAILE: Afiafi gahua he fonua
AHO FAIUMU: Afiafi gahua he fonua
Fakaaoga e penetala ke fakamau aki e fakaholoaga hau he tau aho takitaha he fahitapu.
Setulu e katoatoa he kavi ke 23 e tula he fahitapu ke he gahua he fonua.
Katoatoa he tau tula he fakaholoaga he fahitapu ․․․․․․․․․․․․․․․․․․․․