“To Eke a Koe mo Paionia Mitaki!”
1. Fēfē e logonaaga he taha matakainaga fifine hagaao ke he gahua paionia haana?
1 “Nakai maeke au ke moua ha gahua foki ka tamai e olioli mooli po ke ka lahi e palepale fakaagaaga.” Talahau pihia e Kathe B. Palm. Ne loga lahi e tau tau ne eke a ia ko e paionia foaki noa ne fakamatala mai he taha faahi i Sile, Amerika Toga, ke hoko ke he taha faahi. He manamanatu ke he moui palepale mitaki ha lautolu he fekafekauaga mau, liga tala atu taha tagata ki a koe: “To eke a koe mo paionia mitaki!”
2. Fakamaama e kakano kua tamai he tau gahua fakaagaaga e fiafia lahi mahaki.
2 Ko e Puhala Fiafia Lahi he Moui: Ko e ha tautolu a Fakafifitaki ko Iesu, ne moua e okiokiaga mooli he taute e finagalo he Matua haana. (Ioane 4:34) Ko e mena ia, ne mahani fakamooli a Iesu he fakaako ke he tau tutaki haana e fiafia mooli ne fua mai he taute e tau gahua ne matutaki ke he tapuakiaga ha Iehova. Kua makona a tautolu ka fakapuke e tau momoui ha tautolu aki e tau gahua ne moua e taliaaga ha Iehova. Lafi ki ai, he foaki fakalahi e tautolu e magaaho, malolō, mo e tau koloa ke lagomatai falu, to fakaholo ki mua e tautolu e fiafia ha tautolu.—Gahua 20:31, 35.
3. Ko e heigoa e fiafia ka moua e tautolu he fakaaoga fakalahi e magaaho ke he gahua he fonua?
3 Ka fakaaoga fakalahi e tautolu e tau magaaho he gahua he fonua, to lahi e magaaho ha tautolu ke olioli ke he fiafia he kamata mo e taute e tau fakaako Tohi Tapu. Pihia foki ka tokologa e tau tagata he kaina ka fakateaga mai, liga to kitia e tautolu kua tupu lahi e fonua ha tautolu mai he mena ne manatu fakamua ki ai, he moua e tautolu e lotomatala lahi mo e makutu ke he gahua he fonua. Maeke he tau paionia ke fakaaoga e tau fakaakoaga loga ne moua e lautolu he Aoga Fekafekau Paionia he mole e kavi he taha e tau he paionia. (2 Timo. 2:15) He fakauka a tautolu, liga kua tō tuai e tautolu e tau tega he kupu mooli ka fakatupu e tau fua he magaaho fakamui.—Fakama. 11:6.
4. Ko e heigoa kua lata he tau fuata ke manamanatu ki ai ka teitei paase mai he aoga?
4 Tau Fuata: He oti mai a koe he aoga fa mahani, kua manamanatu fakamitaki nakai a koe ke he haau a vahā i mua? Ato hoko e mogonei, kua lahi e magaaho ne fakaaoga e koe ke he tau matagahua he aoga. To fakaaoga fēfē e koe e magaaho ia ka mole e paase mai he aoga? He nakai tutuli e gahua tupe, ko e ha he manamanatu mo e liogi hagaao ke he foliaga ke paionia tumau? To ako e koe e tau puhala lotomatala—he fakamatala ke he tau tagata he tau feakiaga kehekehe, kautū ke he tau fakalavelave fakatagata, moua e akonakiaga fakatagata, mo e feaki e makutu ke fakaako atu—ka aoga ki a koe he moui katoa haau.
5. Maeke fēfē he tau matua mo e fakapotopotoaga ke fakamalolō e gahua paionia?
5 Tau matua, kua taute nakai e vala ha mutolu ke takitaki e fanau ha mutolu ke he fekafekauaga mau? Ko e tau kupu mo e fakafifitakiaga mitaki ha mutolu ka lahi e lagomatai ki a lautolu ke tuku fakamua e tau mena he Kautu. (Mata. 6:33) Ko Ray, ne kamata ke paionia he oti mai he aoga tokoluga, ne manatu: “Ne mailoga tumau he mami haaku kua fua mai e puhala moui fiafia lahi ha ko e gahua paionia.” Maeke he tau matakainaga oti he fakapotopotoaga ke fakamalolō ke gahua paionia ha ko e tau kupu mo e lalagoaga ha lautolu. Ko Jose, mai i Sepania, ne talahau: “Ne mailoga he fakapotopotoaga haaku e gahua paionia ko e feua ne mua atu e mitaki ma e fanau fuata. Ko e tau talahauaga mo e loto fakaaue ha lautolu ma e gahua paionia fakalataha mo e lagomatai mitaki ha lautolu ne fakamukamuka ki a au ke kamata paionia.”
6. Ko e heigoa ka taute e tautolu ka nakai fia loto a tautolu ke paionia mogonei?
6 Kautū ke he Tau Fakalavelave: Ka e kua ka pehē a koe, ‘Ai fia loto au ke paionia.’ Ka pihia e logonaaga haau he mogo fakamua, liogi ki a Iehova hagaao ke he puhala ne logona hifo e koe ti tala age ki a ia, ‘Ai iloa kua lata nakai e gahua paionia mo au, ka e manako au ke taute e tau mena ka fakafiafia a koe.’ (Sala. 62:8; Fakatai 23:26) Ti kumi e takitakiaga haana puhala he haana a Kupu mo e fakatokatokaaga. Tokologa e paionia tumau ne “kamata” fakamua e gahua paionia he paionia fakakū, ti omoomoi he fiafia ne moua e lautolu a lautolu ke tutuli e feua he fekafekauaga mau.—Sala. 34:8.
7. Liga kautū fēfē a tautolu ke he tau fakauaua to moua nakai e 70 tulā ne kotofa he tau mahina takitaha?
7 Ka e kua ka fakauaua a koe to moua nakai e 70 tulā ne kotofa ma e tau mahina takitaha? Ko e ha he nakai tutala ke he tau paionia ne tatai e tau tuaga mo e haau? (Fakatai 15:22) Ti tohi hifo e tau setulu kehekehe he tau mena ka taute. Liga mailoga e koe ka fakatau e magaaho ma e gahua he fonua mai he tau matagahua nakai aoga lahi, kua mukamuka ai ke he mena ne manatu fakamua e koe.—Efeso 5:15, 16.
8. Ko e ha kua lata ia tautolu ke fokifoki tumau e tau tuaga ha tautolu?
8 Liu Kitekite ki Ai: Na fa hikihiki e tau tuaga fakatagata. Kua mitaki ke liu fokifoki tumau e tuaga haau. Ma e fakatai, kua teitei litaea nakai a koe mai he gahua tupe? Ko Randy, ne litaea tuai, kua talahau: “Ne fakaatā he fifiliaga nei au ke kamata paionia tumau fakalataha mo e hoana haaku, ti foaki ki a maua e magaaho ke hiki mo e fekafekau ke he matakavi ne manako lagomatai lahi. Kua moua e au e tau monuina loga lahi mahaki ha ko e fifiliaga haaku, ka ko e monuina ne mua atu ko e loto manamanatu mitaki.”
9. Ko e heigoa kua lata he tau hoa mau ke manamanatu ki ai?
9 Ko e falu hoa mau ne mailoga he mole e kitekite fakamitaki e tau tuaga kua nakai lata a laua tokoua ke gahua tupe tumau. Mooli, liga kua taute he mena nei e magafaoa ke fakamukamuka e puhala moui ha lautolu, ka kua aoga lahi e taute pihia. Ko John, ne fakaoti laia he hoana haana e gahua tupe tumau ke maeke ke fakalaulahi e gahua he fonua, ne talahau: “Kua nakai fai logonaaga mitaki foki ke iloa kua taute he hoana haaku e tau mena fakaagaaga he tau aho takitaha.”
10. Ko e heigoa ne omoi e tau Kerisiano ke manamanatu ke paionia?
10 Ko e Fakatātāaga he Fakaalofa mo e Tua: Kua taute e Iehova e gahua fakamatala mo gahua aoga lahi mahaki kua maeke ia tautolu oti ke taute. Ko e fakatokaaga tuai nei ka nakai leva ti moumou, mo e ko lautolu hokoia ne ui ke he higoa a Iehova ka fakamomoui. (Roma 10:13) Ko e loto kua puke he fakaalofa ki a Iehova mo e loto fakaaue lahi ma e tau mena ne taute e ia ma tautolu ka omoomoi a tautolu ke omaoma e poaki he haana Tama ke fakamatala fakamakutu. (Mata. 28:19, 20; 1 Ioa. 5:3) Lafi ki ai, he tua kua momoui mooli a tautolu he tau aho fakahiku ka omoi a tautolu ke taute e tau mena oti kua maeke ia tautolu ke he gahua he fonua he fai magaaho agaia ne toe, ka e nakai fakaaoga fakalahi e lalolagi.—1 Kori. 7:29-31.
11. Lata ke fēfē e manatu ha tautolu ka talamai taha tagata to eke a tautolu mo paionia mitaki?
11 Ko e gahua paionia tumau kua nakai ko e talia hokoia he fakaholoaga he fakatokatokaaga; ka ko e fakakiteaga he fakamooli ha tautolu ke he Atua. Ka tala atu mogoia taha tagata ki a koe to eke a koe mo paionia mitaki, lata ke loto fakaaue ki ai. Ti manamanatu mo e liogi ke matutaki atu mo lautolu ne fakalataha ke he puhala fiafia nei he fekafekauaga.
[Blurb he lau 4]
Tau matua, kua taute nakai e vala ha mutolu ke takitaki e fanau ha mutolu ke he fekafekauaga mau?
[Blurb he lau 5]
Kua taute e Iehova e gahua fakamatala mo gahua aoga lahi mahaki kua maeke ia tautolu oti ke taute.