Magaaho Anei ke Fakamatala!
1. Ko e ha kua lata ke fakamatala he magaaho nei?
1 ‘Kia matakutaku ke he Atua mo e ta age kia ia e fakahekeaga.’ Ha ko e takitakiaga fakaagelu, kua fakapuloa e fekau nei ke he “tau motu kehe oti, mo e tau magafaoa, mo e tau vagahau kehekehe, mo e tau motu.” Ko e ha? “Ha kua hoko mai e magaaho he hana [Atua] fakafiliaga.” He vaha nei, kua nonofo a tautolu he ‘magaaho he fakafiliaga ia,’ ka hokotia ke he fakaotiaga he fakatokaaga nei. Kua aoga ai ma e tau tagata ke ‘hufeilo kia Ia ne eke e lagi, mo e lalolagi, mo e tahi, mo e tau vai.’ Kua nakai fai gahua foki ne kua aoga mo e mafiti lahi tuga e fakapuloa he “vagahau mitaki tukulagi.” E, ko e magaaho anei ke fakamatala!—Fakakite. 14:6, 7.
2. Fakatata fefe he tau fekafekau ha Iehova kua mailoga e lautolu e mafiti lahi he tau magaaho?
2 He hogofulu e tau kua mole, ne fakaaoga he tau fekafekau ha Iehova ke teitei 12 e piliona matahola ke he gahua fakamatala he Kautu mo e taute tutaki. Tokologa ne taute e tau hikihikiaga he tau momoui ha lautolu ke fakalataha fakalahi atu ke he helehele fakaagaga. (Mata. 9:37, 38) He tau kua mole, ke fakatai ki ai, ne avelesi ke molea 850,000 e tagata fakailoa he tau mahina takitaha ne fekafekau ko e tau paionia. Ma e tau paionia tumau, kua lata ai ke fakaaoga he avelesi ke 70 e tula he tau mahina takitaha ke he gahua fakamatala. Ma e tau paionia fakaku, kua lata ke 50 e matahola.
3. Ko e heigoa e tau hikihikiaga ne fa mahani e tau tagata fakailoa ke taute ke maeke ke paionia?
3 Puhala ke Paionia: He mailoga “kua gahoa e tau aho kua toe,” ne lali fakalahi e tau paionia ke fakatumau ke fakamukamuka e tau momoui ha lautolu. (1 Kori. 7:29, 31) Ne kumi e lautolu e tau puhala ke fakatote e tau mena totogi ke maeke ke tote e magaaho ha lautolu ka fakamole ke he gahua tupe. Ke fakatai ki ai, falu kua hiki ke he tau kaina ikiiki. Falu kua tiaki e tau koloa ne nakai aoga. (Mata. 6:19-21) Fa mahani mogoia a lautolu ke fakakaupa e tau manako fakatagata. Kua taute oti e tau mena nei ha ko e foliaga ke tuku fakalahi e tau magaaho mo e manamanatuaga ke he fekafekauaga. (Efeso 5:15, 16) Mo e fakauka, agaga foaki noa, liogi mo e falanaki ki a Iehova, kua tokologa e tau tagata fakailoa ne fakatoka e setulu lauia mitaki ke fakaata a lautolu ke paionia.
4. Ko e heigoa e tau lakaaga lauia mitaki ka lagomatai a koe ke gahua ke he foliaga he gahua paionia?
4 Maeke nakai a koe ke paionia? Ko e ha he huhu ke he tau paionia kua kautu e puhala ne maeke ia lautolu ke taute ai? Gahua mo lautolu he fekafekauaga ke he fonua, mo e mailoga e fiafia ha lautolu. Totou e tau vala tala ke he gahua paionia ne ha ha he tau tohi ha tautolu. Fakatoka e tau foliaga lauia mitaki ma hau ke eke mo lakaaga ke he gahua paionia. Kaeke fai fakaalaia ne nakai fakaata a koe mogonei ke fekafekau ko e paionia, liogi ki a Iehova hagaao ki ai, mo e ole ki a ia ke lagomatai a koe ke tului e tau mena ia.—Fakatai 16:3.
5. Maeke fefe he gahua paionia ke lagomatai a tautolu ke fakatolomaki e tau puhala ha tautolu ke he fekafekauaga?
5 Tau Monuina mo e Tau Fiafia: Kua fakamatila he gahua paionia e tau puhala ha tautolu he fakaaoga e Kupu he Atua, ti fakatolomaki foki e fiafia. “Ko e monuina lahi a ia he maeke ke fakaaoga fakamitaki e Kupu he Atua,” he talahau he taha matakainaga fifine paionia fuata. “Ka paionia a koe, ne fakaaoga tumau e koe e Tohi Tapu. Mogonei ka finatu au ke he taha fale mo e taha fale, kua maeke ia au ke manatu e tau kupu tohi ne latatonu mo e tau tagata takitokotaha.”—2 Timo. 2:15.
6. Ko e heigoa e fakaakoaga ne foaki he gahua paionia?
6 Maeke foki he gahua paionia ke fakaako e tau puhala aoga he moui. Kua maeke ke lagomatai e tau fuata ke ako ke fakaaoga fakapulotu e magaaho, ke fakaaoga fakamitaki e tupe, mo e ke fehagai fakamitaki mo e tau tagata. Tokologa kua feaki e onoonoaga lahi atu fakaagaga ke he moui ha ko e fua he gahua paionia. (Efeso 4:13) Mua atu, kua monuina e tau paionia ke kitia e lima ha Iehova hane gahuahua ki a lautolu.—Gahua 11:21; Filipi 4:11-13.
7. Maeke fefe he gahua paionia ke lagomatai a tautolu ke fakatata atu ki a Iehova?
7 Liga ko e taha he tau monuina ne mua ue atu he gahua paionia ko e lagomatai a tautolu ke fakatata atu ki a Iehova. Maeke ke lagomatai a tautolu ke kautu ke he tau kamatamata. Ne pehe e matakainaga fifine ne fakauka ke he matematekelea lahi: “Ko e fakafetuiaga tata ne ati e au mo Iehova puhala he gahua paionia ne lagomatai au ke fakauka ke he tau mena oti ia.” Ne lafi e ia: “Kua lahi haku a fiafia he fakaaoga e moui fuata haku ke fekafekau mau ki a Iehova. Kua lagomatai au ke foaki ne au a au ke he tau puhala ne nakai manatu kua maeke ia au.” (Gahua 20:35) Kia moua foki e tautolu e tau monuina loga pihia he eketaha a tautolu ke he gahua fakamatala nukua aoga lahi.—Fakatai 10:22.