Maeke Nakai a Koe ke Hū he ‘Gutuhala Lahi ne Takitaki Atu ke he Gahua’?
1. Ko e heigoa e ‘gutuhala lahi ne takitaki atu ke he gahua’ ne kua hafagi ki a tautolu?
1 Magaaho ne hafagi e ‘gutuhala lahi ne takitaki atu ke he gahua’ ke he aposetolo ko Paulo, ne fakaaoga fakamakai e ia e magaaho ia ke fakalaulahi e tau mena he Kautu pete kua tokologa ne totoko. (1 Kori. 16:9) He vahā nei, kavi ke he 642,000 e tagata fakailoa ke he Kautu he lalolagi katoa ne kua huhū atu ke he gutuhala lahi he gahua he eke mo tau paionia tumau.
2. Ko e ha kua mitaki ke filifilia tumau ke he tuaga ha tautolu?
2 Na Hikihiki e Tau Tutūaga: Pete kua liga fakakaupā e gahua ha tautolu mogonei ha ko e tau tutūaga fakatagata, na maeke ke hikihiki e tau tutūaga. Ko e mena ia, kua mitaki ma tautolu ke filifilia tumau ke he tuaga ni ha tautolu mo e nakai fakatali ke he tau magaaho hagahaga mitaki. (Fakama. 11:4) Ko koe nakai e fuata kua teitei paase mai he aoga tokoluga? Ko koe nakai e matua kua teitei ō e fanau he aoga? Ko koe nakai kua teitei oti e gahua tupe haau? Ko e tau hikiaga pihia ka liga fakaatā taha magaaho ti maeke ia koe ke hū atu ke he gahua paionia tumau. Ko e matakainaga fifine ne matematekelea e tino he magaaho fakamua ne fifili ke paionia he 89 e tau he moui. Ko e ha? Ha kua molea e tau he nakai la fano a ia ke he fale gagao, ne logona hifo e ia to liga fakaatā he malolō tino haana a ia ke paionia.
3. Taute fēfē he falu e tau hikiaga ke maeke ke paionia tumau?
3 He tuaga ha Paulo, ne amanaki a ia he magaaho fakamua ke aahi atu ke he tau matakainaga haana i Korinito. Ka e, ne hiki e ia e fakaholoaga haana ke lata mo e tala mitaki. Tokologa hane paionia tumau he vahā nei ne loga e hikiaga ha lautolu ne taute ke maeke ke paionia. Falu ne fakamukamuka e tau momoui ha lautolu ti hokotia ke lata ni he gahua vala magaaho ke leveki aki e tau mena fakatupe he tau momoui ha lautolu. Ne fiafia a lautolu he kotofaaga ha lautolu he fekafekauaga. (1 Timo. 6:6-8) Falu hoa mau ne kua taute e tau hikiaga ti maeke ke taha ni e tagata gahua tupe, ati hafagi ai e puhala ma e hoana ke paionia.
4. Ko e heigoa ha tautolu ka taute kaeke ke tehatehaua to moua nakai e tulā fafati?
4 Ua mafiti ke tiaki e manatu ke paionia he tupetupe neke nakai moua e koe e tau tulā fafati. Kua lata ke molea fakatote ni e ua e tula he aho. Ka tehatehaua ko e fahia nakai ia koe ke taute, lali ke paionia fakakū he taha po ke ua e mahina ka e foli fakatagata ke he 70 e tulā. To fakaatā he mena nei a koe ke logona e fiafia he gahua paionia. (Sala. 34:8) Tutala ki a lautolu hane paionia mogonei. Kua liga fitā a lautolu he kautū mai he tau paleko tuga haau. (Fakatai 15:22) Ole ki a Iehova ke fakamonuina e tau laliaga haau ke fakalaulahi e fekafekauaga haau.—1 Ioa. 5:14.
5. Ko e ha e paionia tumau ko e tutuliaga aoga lahi?
5 Ko e Tutuliaga Aoga: Kua loga e monuina ne moua he gahua paionia tumau. Maeke ia koe ke logona e fiafia lahi he foaki fakalahi atu. (Gahua 20:35) To fakamatila he gahua paionia e lotomatala haau ke fakatoka fakahako e Kupu he Atua. (2 Timo. 2:15) To loga e magaaho ka moua e koe ke kitia e lima ha Iehova hane gahuahua ma haau. (Gahua 11:21; Filipi 4:11-13) To lagomatai foki he gahua paionia a koe ke feaki e tau fua fakaagaaga, tuga e fakauka, mo e to maeke ia koe ke fakatata fakalahi ki a Iehova. (Iako. 4:8) Maeke nakai ia koe ke hū atu ke he gutuhala lahi nei he gahua mo e eke mo paionia tumau?