Ko Koe Nakai Taha ne Paionia Tumau Fakamua?
1. Ko e heigoa e monuina kua olioli he tokologa, ka ko e heigoa kua taute he falu ha kua lata?
1 He tau tau kua mole, totou afe ne olioli e kotofaaga ke ‘fakaako atu mo e fakamatala e tala mitaki’ ko e tau tagata fakamatala tumau. (Gahua 5:42) Ka ko e falu, ha ko e tau kakano kehekehe kua fakaoti e paionia. Kaeke ko koe foki ne paionia tumau fakamua, kua kitekite nakai a koe ke he tuaga haau mogonei ke kitia liga maeke nakai a koe ke liu fakalataha ke he matagahua paionia?
2. Ko e ha kua lata ia lautolu ne paionia fakamua ke manamanatu ke he tau tutuaga ha lautolu he mogonei?
2 Hiki e Tau Tutuaga: Liga kua galo kehe e tuaga ne omoi a koe ke fakaoti haau a paionia. Ma e fakatai, ka fakaoti e paionia haau ha kua nakai maeke ke moua e 90 e tulā he mahina, maeke nakai a koe ke liu kamata mogonei ha kua fakatote hifo ke he 70? Kua fakatote hifo kia haau a gahua tupe po ke tau gahua fakamagafaoa tali mai he magaaho ne oti ai e gahua paionia haau? Taha e matakainaga fifine ne oti ha ko e tau kakano he malolō tino, ne maeke ke liu kamata he 89 e tau moui. Ne nakaila liu a ia ke he fale gagao ke he molea e tau, ti logona hifo kua liga fakaatā he malolō tino haana a ia ke liu paionia foki!
3. Kauauloa fēfē e magafaoa ke lagomatai taha he magafaoa ha lautolu ke paionia?
3 Liga nakai ko e paionia a koe he magaaho fakamua, ka e fai he magafaoa haau ne fakaoti e paionia ke leveki taha he magafaoa, tuga e matua motua. (1 Timo. 5:4, 8) Kaeke kua pihia, maeke nakai ia koe po ke falu he magafaoa ke gahua fakalahi ke lagomatai? Ko e ha he nakai fakatutala auloa ke he matakupu? (Fakatai 15:22) Ka kaufakalataha e magafaoa katoa ke maeke e taha ia lautolu ke paionia, kua liga maeke ke logona auloa kua fakalataha oti ki ai.
4. Ka e kua ka nakai maeke a koe ke liu matutaki mo e kau paionia he mogonei?
4 Ua lolelole kaeke kua nakai fakaatā he tau tutuaga haau a koe mogonei ke liu kamata paionia. Ko e loto fakamakai haau ke taute pihia kua fakafiafia a Iehova. (2 Kori. 8:12) Fakaaoga e tau lotomatala haau ne moua he paionia he fekafekauaga haau mogonei he fonua. Eke e manako haau mo matakupu liogi, ti mataala ke he tau magaaho ke hikihiki haau a tau tuaga. (1 Ioa. 5:14) Liga fai magaaho to hafagi e Iehova ki a koe e “pa gutuhala kua lahi mo e aoga lahi” ke liu foki a koe logona e fiafia he paionia tumau!—1 Kori. 16:9.