Hafagi Kia e Gutuhala ma Hau Mogonei ke Paionia?
1 Kua fakamanatu mai he kupu he tau 1999 ki a tautolu ko tautolu agaia he ‘aho ke fakamomoui’ ha Iehova. (2 Kori. 6:2) Ka ko e aho he fakamouiaga hana to nakai leva ti fakaoti. Ti kamata agataha ai hana “aho fakafiliaga.” (2 Pete. 2:9) He fakatumau ni a Iehova ke fofola e magaaho ma e fakamouiaga ke he tau tagata, ko e fiafia ha ia ke kitia e tupu ki mua he numera kua talia!
2 Kua fehagai e tau tagata a Iehova ke he paleko he hokotia ki a lautolu kua talia ato tomui lahi. Ma e tokologa he tau tagata fakailoa he Kautu, ne kakano e mena nei ke huhu atu ke he fekafekau paionia. Hafagi kia e gutuhala ma hau mogonei ke paionia? Ko e ha kua huhu a tautolu?
3 Fakakite e Loto Fakaaue: He fita e fakailoa, kua fakatote hifo tuai e tau tula fafati ma e tau paionia tumau mo e fakaku. Ke hokotia ke he fafatiaga fou, kua lata he tau paionia tumau ke moua 70 e tula ke he feleveiaaga he tau mahina takitaha ke katoatoa 840 e tula he tau he fekafekauaga. Ko e 50 e tula ke gahua ki ai e tau paionia fakaku ke he fekafekauaga he tau mahina takitaha. Ko e gahoa ni anei mai he tau manatu fakaaue loga ne kua moua ha ko e fua he tau hikihikiaga nei:
“Ko e mena fakaalofa monuina anei mai he Matua ha tautolu he lagi!”
“Nakai fai kupu ke fakakite e tau logonaaga he olioli, fakaalofa mo e fakaaue ma e foakiaga nei!”
“To fakamukamuka lahi ke maeke e tau setulu feleveiaaga ha tautolu ke hokotia!”
“Ko e liogi ha tautolu to tokologa atu foki he magaaho nei ka fakalataha ke he fekafekauaga tumau mo e olioli e tau monuina kua hau he fekafekau fakalahi ki a Iehova.”
4 Hane hokotia atu a tautolu ke he tapunu he aho he fakamouiaga he Atua, kua moli ko e manako a Iehova ke he hana tau tagata ke tutui e kalaga malolo fakahiku he fakahekeaga. Ko e lahi mo e malolo he fekau nei kua tupu ki mua (1) ha ko e tupu mauokafua he numera he tau tagata fakapuloa he Kautu mo e (2) ha kua igatia e tagata mo e lali ke fakatolomaki e mena kua maeke ia ia ke taute he fakamatala he Kautu. Ko Iehova, ko ia “kua fakatutupu ai,” ne ta mai e kautuaga ke he tau puhala he fakamonuina e aga fakamakai ha lautolu ne talia e fakamouiaga.—1 Kori. 3:6, 7; Sala. 110:3.
5 Aua Neke Talia Teao: Hagaao ke he aho he fakamouiaga a Iehova ne tomatoma e Paulo ke he tau matakainaga Kerisiano: “Hanai foki, ko mautolu ko e tau ekegahua fakalataha mo ia [Iehova], kua ole atu a mautolu kia mutolu aua neke talia teao e mutolu e fakaalofa noa he Atua.” To “aua neke talia teao” e tautolu kaeke ke kitia e tautolu e mena nei ko e “vaha ke talia mitaki” ke gahua ma e fakamouiaga he falu ke he tau magaaho oti. (2 Kori. 6:1, 2) He vaha nei, ko e tau kupu a Paulo kua fakalago ai e fakamafiti lahi. Ko e tau Kerisiano kua fakakite e loto fakaalofa ma Iehova kua totou ai ko e monuina ke fakalataha katoatoa ke he fekafekauaga ne kua kotofa e ia a lautolu. Maeke nakai ia koe mogonei ke fakalataha katoatoa ke he fekafekauaga ko e paionia tumau?
6 Ko e Foliaga Kakano Moli: I Niu Silani, ko e foliaga ha tautolu ke kitia 850 e paionia tumau ka fakamau ia Sepetema 1. Kua talitonu a tautolu ko e foliaga kakano moli mo e moua anei. Ko e ha kua mauokafua a tautolu? Ia Mati 1997 ne kitia e tautolu ko e 2,133 e matakainaga ne paionia fakaku, mo e ia Aperila 1998 1,137 ne gahua foki. Laulahi ne hokotaki 60 e tula—10 ni e tula ne ku mai he tula fafati fou ke paionia tumau! Pete foki ka 120 ni a lautolu ne paionia fakaku kua fakamau ke paionia tumau to hoko e fakaotiaga he tau nei he fekafekauaga, maeke ia tautolu ke kamata fakalataha mo e toko 850 po ke tau paionia gahua mau ia Sepetema!
7 Kua Lata e Setulu: To muatua lahi agaia kia e 70 e tula he mahina he fekafekauaga he fonua ki a koe? To lagomatai ka liga manamanatu hagaao ke he 17 e tula he fahitapu. He fakaaoga e tau setulu fakatai he taha lau, lali ke taute e setulu paionia tumau kua lautonu mo e tau tuaga fakatagata hau. He fakatokatoka ai, tutala mo e tau paionia mahani lahi ke moua e manatu ha lautolu ke he puhala kua fakalagotatai e lautolu e fekafekauaga paionia mo e tau matagahua fakatagata mo e magafaoa. Huhu ke he leveki takaiaga hau ko e fakasetulu fefe he tau paionia he takaiaga ha lautolu a gahua he tau fahitapu takitaha. Ti ono atu ki a Iehova ke fakamonuina e tau pulega hau ke paionia.—Fakatai 16:3.
8 Taute mo Matagahua he Magafaoa: Kua manamanatu nakai a koe ke taute e paionia mo matagahua he magafaoa? Liga kia nonofo auloa a mutolu ko e magafaoa mo e fakatutala e puhala—fakalataha mo e pulega fakamitaki mo e kaufakalatahaaga mitaki—ke taha po ke ua e tagata he magafaoa ka liga maeke ke paionia. Maama ai, to moua he falu ko e fokifokiaga fakamoli he tau tutuaga ha lautolu kua nakai fakaata ma e paionia tumau mogonei. Ka pihia, fakatoka e foliaga ke paionia he vaha i mua. Ka e kamata ke taute e pulega he gahua atu ke he mahina kua fakamau ke kamata e paionia. Liga ke lagaloga e paionia fakaku hau he tau ke hokotia atu ke he fekafekauaga paionia tumau.
9 Ko e tau paionia tumau mogonei i Niu Silani ne kehekehe e tau tutuaga. Nakai tino malolo mitaki oti, mo e tokologa kua fai fakalagoaga fakamagafaoa mo e fakatupe. Molea e 265 e paionia ne fita e 50 e tau tau he moui, mo e kavi ke 88 ia lautolu kua fita e 65 e tau tau he moui. Kavi ke 40 i lalo hifo he 20 e tau tau he moui po ke fuata mui. Fuafua ai ko e taha mai he tolu e tau paionia ne ko e tau matakainaga tane, tokologa ia lautolu kua fai magafaoa mo e lago matagahua he fakapotopotoaga. Ko lautolu oti nei kua ‘fakaaoga e tau aho’ ma e paionia, ti ko e tau magaaaho loga kua kakano ni ke nonofo fakamukamuka ka e fakalatalata e moui.—Kolo. 4:5.
10 Lata Nakai a Koe ke Fakamukamuka? Ko e fakamukamuka he moui hau ko e kei haia kua hafagi e gutuhala ma hau ke paionia. Kua tatai kia e moui hau ke he fale lahi kua ha ha ai e tau poko mo e tau koloa nakai fakaaoga, ti lata ke lahi e magaaho, tupe, mo e gahua ke leveki aki? Ka pihia, ko e hikihiki ke he tau tutuaga fakalatalata ka fakaata a koe ke paionia. Maeke nakai ia koe ke fakatote e tula he gahua tupe? Maeke nakai ia koe ke fakatote hifo e magaaho he tau gahua nakai aoga po ke fakakite e lagotataiaga mitaki ke he magaaho kua fakamole ke he fakafiafiaaga?
11 Ko e Tohi Tapu, he 1 Timoteo 6:8, kua fakamafana ki a tautolu: “Kua moua e tautolu e tau mena kai, mo e tau mena ke fakatapulu ai, to lata ia kia tautolu.” He makona mo e mena tote ko e mena aoga he fakamakutukutu a tautolu ke he fekafekauaga a Iehova mo e fakamukamuka ke tuku mua e tau mena fakaagaga. (Mata. 6:22, 33) He lau 104 he 1998 Yearbook ko e hokotaki a Sapani, kua foaki loga e tau lagomataiaga ke he kakano kua ha ha i ai e agaga paionia mitaki he motu ia. Manamanatu ke he taha: “Kua moli lahi ko e tau kaina Sapani kua lata ni, ti nakai lahi e magaaho ke leveki ai, mo e laulahi, kua nonofo nakai muhu mena.” Nakai kia ko e kakano a ia he 1 Timoteo 6:8?
12 He lalolagi katoa, kua fakamatala he tau fekafekau he Atua e tala mitaki mo e malolo tupu ki mua ato hoko mai e aho he fakamouiaga a Iehova ke he fakaotiaga. Nava ki ai, he tau kua mole kua avelesi ke teitei 700,000 ne fakalataha ke he falu puhala he fekafekauaga paionia he tau mahina takitaha. Maeke nakai ia koe ke hikihiki e moui hau ke fakalataha mo lautolu? Uiina atu e mautolu a koe ke fokifoki fakamitaki mo e liogi hau a tau tutuaga he tali e koe e huhu: “Hafagi kia e gutuhala ma hau mogonei ke paionia?”
[Blurb he lau 3]
FOLIAGA: 850 E PAIONIA TUMAU!
[Puha he lau 4]
Fakatai he Tau Setulu Paionia Tumau
Lata: 17 e tula he fahitapu
Taha e Aho he Fahitapu mo e Matahiku Vahatapu
Aho Tula
Aho Faraile 8
Aho Faiumu 6
Aho Tapu 3
Katoatoa Tula: 17
Ua e Aho he Fahitapu mo e Aho Faiumu
Aho Tula
Aho Ua 7
Aho Tuloto 7
Aho Faiumu 3
Katoatoa Tula: 17
Tolu e Aho he Fahitapu mo e Aho Tapu
Aho Tula
Aho Gofua 5
Aho Lotu 5
Aho Faraile 5
Aho Tapu 2
Katoatoa Tula: 17
Ua e Afiafi mo e Matahiku Vahatapu
Aho Tula
Aho Gofua 3
Aho Lotu 3
Aho Faiumu 8
Aho Tapu 3
Katoatoa Tula: 17
Fakatoka ne Koe Hau a Setulu Paionia Tumau
Aho Tula
Aho Gofua
Aho Ua
Aho Lotu
Aho Tuloto
Aho Faraile
Aho Faiumu
Aho Tapu
Katoatoa Tula: 17