To Liu Nakai a Tautolu ke Taute?—Ko e Manako ma e Tau Paionia Fakaku
1 To liu nakai a tautolu ke taute? To paionia fakaku nakai a tautolu he mahina Fakamanatu? Ko e uho he Our Kingdom Ministry ia Fepuari, 1997 ne fakataki ha tautolu a onoonoaga ke he mataulu puni lalahi: “Manako—2,000 he Tau Paionia Fakaku.” Ne mauokafua a mautolu to manamanatu fakahokulo a koe ke he manako ia. He magaaho ne taute ai e hokotaki he fekafekauaga ia Mati 1997, ne fiafia a mautolu ke iloa ko e 2,133 ne hokotia ke he gahua paionia fakaku! Ka lafi e tautolu e numera ia 676 he tau paionia tumau mo e 9 e tau paionia mau ne hokotaki ke he mahina ia, ne moua e mutolu ko e 20 e pasene he tau tagata fakailoa ne ha ha ke he fekafekauaga paionia. To liu nakai a tautolu ke taute foki he mahina Fakamanatu?
2 Ne nava mafanatia a mautolu ki a lautolu ne tuku fakalahi e laliaga ke fakatolomaki ha lautolu a gahua ke he fonua he vaha mateafu kua mole. Maaliali, kua omoomoi a mutolu oti ha ko e fakaalofa nakai fulukovi ma Iehova ko e Atua mo e katofia hau. (Luka 10:27; 2 Pete. 1:5-8) Ko e tau tagata fakailoa he tau tutuaga kehekehe he moui ne fakaata ma e paionia fakaku. He taha fakapotopotoaga, 51 e tagata fakailoa ne paionia auloa he mahina ia, fakalataha ai e tau motua tokologa, ko e matua fifine ko e 15 laia e mahina he mukemuke fifine, ko e matakainaga fifine ne fakaoti e gahua hana mo e moua e gahua vala magaaho ke maeke ia ia ke paionia, mo e matakainaga fifine fuakau ne nakai la paionia ia. Ne tohi he fekafekau leveki he takaiaga: “Hane fa e taute ai e gahua mua ue atu. . . . Nakai ni fakamalolo ke he fonua ka e fiafia lahi mo e lagalaga foki e tau fakapotopotoaga. Kua olioli e tau motua he iloa mitaki e falu ti pihia foki he kitia e tau fua mitaki he fekafekauaga.”
3 Ne putoia ai foki e tau fanau ikiiki he vaha mateafu kua mole. Ko e tagata fakailoa nakai papatiso ne 13 e tau he moui kua manamanatu tuai e magaaho ke fakamailoga e tukuleleaga hana ki a Iehova. He mole e papatiso ia Fepuari, ne tohi e ia hagaao ke he manako hana ke paionia fakaku ia Mati: “He nakai fai mena ke taofi mai au mogonei, ne tuku fakamafiti e au e tohi ole haku. . . . Ko e tau iloaaga homo ue atu ne olioli e mautolu kua nakai moli ane mai nakai fai uiina fakaalofa a mutolu ke paionia. Kua fiafia lahi au ki a Iehova ke moua e kotofaaga nei ke eke mo taha ia lautolu ne tali atu.” Kua fakatoka e ia e foliaga ke liu taute.
4 Liga ko koe taha he 2,133 ne fakalataha ke he gahua paionia fakaku ia Mati kua mole, po ke 1,243 ia Aperila, po ke 1,164 ia Me. To liu nakai a koe ke taute he tau nei? Ka nakai maeke ia koe ke paionia he vaha mateafu kua mole, maeke nakai ia koe ke taute he tau nei? Maeke nakai ia tautolu ke molea atu e numera 2,133 ia lautolu kua paionia fakaku ia Mati 1997? Ko e numera a ia kua mua atu e lahi he tau paionia fakaku ke he ha mahina he matakavi he la i Niu Silani.
5 Tokamata ki a Aperila mo Me: He tau nei, to hoko e Fakamanatuaga he Aho Faiumu, Aperila 11, kia taute a Aperila mo mahina mitaki lahi mahaki he fakatolomaki e gahua ke he fonua. (2 Kori. 5:14, 15) He tau aho 11 fakamua he mahina, to mataala a tautolu ke uiina e tokologa ia lautolu ne fiafia ke fakalataha ke he Fakamanatuaga. Ka fakatoka a koe ke paionia fakaku, fakamolemole ti tuku tuai e tohi ole hau he aho kua manako a koe ke kamata.—1 Kori. 14:40.
6 Ha kua lima e fahitapu katoa ia Me, ko e tau tagata fakailoa ne o atu he aoga po ke gahua tupe mau kua liga mukamuka lahi ke paionia fakaku he mahina ia. He setulu ke hogofulu e tula he fekafekauaga he fonua he tau matahiku takitaha he vahatapu lima, kua lata ia koe ke setulu hogofulu ni e tula ke lafi ki ai he mahina ke hokotia ke he 60 e tula.
7 Ia Aperila mo Me, to foaki e tautolu e tau lagaki takitaha he Ko e Kolo Toko mo e Awake! ko e tau tohi foaki. Kua maeke he mena nei ke fakamalolo fakalahi a tautolu ke hokotia atu ke he paionia. Ko e ha kua talahau pihia ai a tautolu? Kua mukamuka ke foaki e tau mekasini mo e kua olioli ke gahua ke he fekafekauaga. Ne foaki e lautolu a lautolu ke fakaaoga he tau puhala oti he fekafekauaga—he gahua he taha fale ke he taha fale mo e taha fale koloa ke he taha fale koloa, ti pihia foki ka feleveia a tautolu mo e tau tagata he puhala tu, he tau paaka motoka, tau paaka mo e falu fakatokaaga fakamatala nakai mautali. Mua atu e aoga, kua toto mau he Ko e Kolo Toko mo e Awake! e tau kupu moli he Kautu. Kua fakakite e lautolu e fakamoliaga ke he perofetaaga he Tohi Tapu ke fakamoli aki hane pule e Kautu he Atua. Kua amotia ai foki e tau momoui he tau tagata totou he maama e tau manako moli he tau tagata. Ka manamanatu a tautolu ke he puhala ne amotia he tau senolo uho nei e tau momoui ha tautolu, to omoomoi a tautolu ke foaki atu ai e tufatufaaga lahi kua maeke ia Aperila mo Me.
8 He tauteute ai ma e gahua mekasini lahi nei, to moua e koe e aoga he liu ai kikite e tau vala tala nei: “Ko e Kolo Toko mo e Awake!—Tau Senolo he Kupu Moli he Magaaho Tonu” (Ianuari 1, 1994, Kolo Toko), “Fakaaoga Fakamitaki e Tau Mekasini ha Tautolu” (Sepetema 1995 Our Kingdom Ministry), mo e “Mautauteute e Puhala Foaki Mekasini Hau Ni” (Oketopa 1996 Our Kingdom Ministry).
9 Takitaki he Tau Motua: Ke fakakatoatoa ai e tau tagata fakailoa tokologa ne paionia he vaha mateafu kua mole, ne taute he tau motua he taha fakapotopotoaga e taha Aho Faiumu he mahina ko e aho pauaki he gahua ma e fakapotopotoaga katoa. Kua taute e tau fakatokatokaaga ke feleveia he tau magaaho kehekehe he aho, he foaki ke he fakapotopotoaga e magaaho ke auloa ke he tau puhala kehekehe he fakamatala. Kua putoia e tau mena nei ke he tau gahua pisinisi, fakamatala he puhala tu, gahua he taha fale ke he taha fale, taute e tau liu ahi atu, tohitohi, mo e fakamatala he telefoni. Kua mua atu e tali, ha kua 117 he tau tagata fakailoa kua fakalataha ke he gahua he fonua he aho. Ne katoatoa 521 e tula ne fakaaoga ai ke he fekafekauaga mo e 617 e tau mekasini, tau porosua, mo e tau tohi ne toka! Kua hokotia atu e fiafia lahi he Aho Faiumu ia ke he Aho Tapu, mo e tokologa atu ne fakalataha ke he Feleveiaaga ma e Tau Tagata mo e Fakaakoaga he Ko e Kolo Toko.
10 He tau Feleveiaaga Fekafekau ia Aperila mo Me, kua lata e fakapotopotoaga ke fakamanatu e magaaho mo e matakavi ka feleveia ma e gahua he fonua ke he tau fahi tapu ka hau, mua atu ka fai fakatokatokaaga lafi ki luga mai he setulu fa mahani. Kua fakamalolo ke he tau paionia tumau ti pihia foki e tau tagata fakailoa kua nakai paionia fakaku ke lagaki e tau fakatokatokaaga he tau matakau nei ka maeke ia lautolu.
11 To lata he leveki fekafekau ke feleveia mo e tau matakainaga tane kua fifili ke he tau matakavi ke taute e tau fakatokatokaaga ke gahua e tau matakavi ne nakai fa gahua tumau. Kia liga lahi e onoonoaga ke he tau kaina ne nakai fai tagata mo e fakamatala ke he tau puhala tu mo e he taha fale koloa ke he taha fale koloa. Ko e tau gahua fakamatala he magaaho afiafi kua lata ke peehi. Kua lata ke lahi e mekasini ka ota ma Aperila mo Me ke felauaki mo e lahi he gahua.
12 Tokologa e Tau Tagata Fakailoa kua Lata: Ko e laini fakamua he tohi ole ke paionia fakaku kua talahau: “Ha ko e fakaalofa haku ki a Iehova mo e manako haku ke lagomatai e falu ke ako hagaao ki a ia mo e hana tau finagalo fakaalofa, manako au ke fakatolomaki ki mua e gahua haku he gahua ke he fonua he hu ke paionia fakaku.” Ko e fakaalofa ki a Iehova mo e manako ke lagomatai e falu fakaagaga kua aoga ke he tukuleleaga ha tautolu. (1 Timo. 4:8, 10) Ke talia ke paionia fakaku, kua lata a ia ke papatiso, mitaki e tuaga he mahani, mo e ke he tuaga ke fakamoli e 60 e tula ke he fekafekauaga he mahina ia. He utauta oti e tautolu e tau tutuaga ha tautolu, maeke nakai he falu ia tautolu ne nakai la paionia ia ke taute he tau nei ia Aperila po ko Me?
13 Tokologa i loto he tau fakapotopotoaga kua mailoga kua maeke foki ia lautolu ke paionia ka kitia e lautolu falu ne hu atu ne kua tatai mo e tau tutuaga ha lautolu. Ko e tau tama o aoga, tau fuakau, tau tagata gahua tupe mau, fakalataha mo e tau motua mo e tau fekafekau lagomatai, mo e falu ne kautu he paionia fakaku. Ko e hoana he kaina mo e matua fifine he ua e tama kua gahua tupe mau ne hokotia e tau tula ke he 60, foaki ke 108 e tau mekasini, ti kamata 3 e fakaakoaga Tohi Tapu ke he taha e mahina he paionia fakaku. Taute fefe e ia? Ne fakaaoga e ia e tau magaaho kai la hana he gahuaaga ke fakamatala ke he matakavi tata mai, ne fakamatala a ia he tohitohi, ti fakalataha a ia ke he fakamatala he paaka motoka mo e puhala tu. Ne fakaaoga foki e ia e aho hana ne nakai gahua he tau fahitapu takitaha he fakalataha ke he gahua he fonua mo e fakapotopotoaga. Pete ni he manatu a ia fakamua ko e foliaga nakai hokotia e paionia fakaku, mo e fakamaloloaga mai he falu mo e setulu aoga, ne kautu mai he tau fakalavelaveaga.
14 Ne fakamafana e Iesu hana tau tutaki: “Ko e mena maeke vave haku a lakau hahamo he uta, ko e haku a kavega foki, ko e mena mama a ia.” (Mata. 11:30) Ko e mataulu a ia he vala tala fakamalolo he Ko e Kolo Toko, Sepetema 1, 1995. Ne talahau hagaao ke he matakainaga fifine ne mamafa e gahua tupe mau. Manamanatu kia a ia kua nakai maeke a ia ke paionia fakaku? Nakai. Ka e kua maeke ia ia ke paionia fakaku ke he tau mahina takitaha. Ko e ha? Ha kua logona e ia kua lagomatai moli he paionia ke tumau e lagotatai. He lagomatai e tau tagata ke ako e lautolu e kupu moli he Tohi Tapu mo e kitia a lautolu kua hiki e tau momoui ke moua e taliaaga he Atua ko e punaaga lahi mahaki he olioli he moui lavelave hana.—Fakatai 10:22.
15 Ko e tau foakiaga fakatagata mo e tau hikihikiaga ne lata ke taute he tagata ke maeke ke paionia kua lahi e taui he tau fakamonuinaaga ka olioli. Ne tohi he matakainaga fifine e mena ne tupu ki a ia he paionia fakaku: “Kua lagomatai ki a au ke uta kehe e loto mai he kumi ni maku mo e ke manamanatu he lagomatai e falu. . . . Kua tuku atu e au ma e falu ke taute e mena ia.”
16 Lata mo e Setulu Mitaki: He lau fakahiku he uho e, kua taute e mautolu e tau setulu fakatai kua kitia he Our Kingdom Ministry ia Fepuari 1997. Liga latatonu e taha he tau mena nei mo e tau tutuaga hau. He liu kitekite a koe ki ai, manamanatu ke he puhala mau hau he gahua he mahina. Ko e heigoa e tau gahua he kaina kua lata ke taute tuai mai he gahua paionia hau po ke tuku fakaku ke he mafoa ke he magaaho fakamui? Maeke nakai ke fakatote hifo e tau magaaho fakafiafia tino hau, fakafiafiaaga, po ke ko e falu puhala fakafiafia? He nakai ono ke he 60 e tula kua manako ki ai, ka kia fakatoka e setulu hau ke lata mo e aho po ke fakafahitapu. Na 2 ni e tula he aho po ke 15 e tula he fahi tapu kua manako ke paionia fakaku. Onoono ke he setulu fakatai, ti fakamailoga aki e pene e fakatokaaga kua maeke ia koe hagaao ke he puhala he setulu gahua fakatagata kua lata tonu mo koe mo e magafaoa hau.
17 Ko e tali mitaki mo e lagomatai fakalahi he fakapotopotoaga ne fakakite e fekafekauaga he vaha mateafu kua mole ne fakamalolo e makaukau he tohi he taha paionia tumau: “Fakaaue lahi mahaki ke he fakamaloloaga fakaalofa ha mutolu he lali fakalahi ke lagomatai e gahua paionia fakaku. . . . Ko e tau setulu lagomatai ha mutolu ne lagomatai e tokologa ne nakai la paionia ke kitia ko e mena maeke ia lautolu. . . . Kua fiafia lahi au ke fai vala he fakatokatokaaga a Iehova mo e ke muitua e takitakiaga fiafia fakaalofa he fekafekau loto matala mo e fakamoli.”
18 Kua fakamafana he Tau Fakatai 21:5 ki a tautolu: “Ko e tau manatu he tagata ne malolo ke gahua kua hiku ia ke he muhu mena.” Kua fakamalolo he Tau Fakatai 16:3 ki a tautolu: “Kia tuku atu a kia Iehova hāu a tau gahua; ti fakamau ai e ia e tau mena ne manamanatu ki ai a koe.” E, he liogi ke fakalataha a Iehova ke he fifiliaga ha tautolu mo e falanaki malolo ki a ia ke lagomatai a tautolu ke kautu, kua maeke ia tautolu ke mauokafua ke he tau pulega ha tautolu ke paionia fakaku. Liga he mole e kitia mitaki ha tautolu ke he setulu he tau gahua he taha po ke ua e mahina he paionia ku ai, to maeke ia tautolu ke hihika e puha he lautohi paionia fakaku kua totou: “Hihika e mena nei ka manako a koe ke fakatumau ke he gahua paionia fakaku ato fai fakailoaaga foki.” Ka pihia, amanaki lahi atu a tautolu ke liu paionia ia Aokuso, ka lima e matahiku vahatapu katoa. He hoko a tautolu ke he fakaotiaga he tau he fekafekauaga ia Aokuso, kua taute ai e laliaga auloa ma e tau tagata oti ke fakalataha katoatoa ke he fekafekauaga.
19 Ne perofeta e Iesu: “Ko ia ne tua mai kia au, to eke e ia ni e tau gahua ne eke e au; to eke foki e ia e tau mena ke mua ke he tau mena nai.” (Ioane 14:12) Ko e kotofaaga olioli lahi ha tautolu ke fekafekau ko e tau ekegahua he Atua he magaaho ne fa e fakamoli mua ue atu e perofetaaga nei. Ko e magaaho anei ke fakamatala fakalahi atu e tala mitaki, he fakatau e tau magaaho ke taute e gahua nei. (1 Kori. 3:9; Kolo. 4:5) He fa fakalataha ai ke he gahua paionia fakaku ko e puhala mitaki lahi mahaki ke taute e vala ha tautolu ko e tau tagata fakapuloa he Kautu. Kua fakatali fakamakai a tautolu ke kitia e lahi he lologo he fakahekeaga ka hoko ke he mahina Fakamanatu nei mai he tau paionia fakaku. (Sala. 27:6) He manatu e tau fua he vaha mateafu kua mole, kua manamanatu a tautolu, ‘To liu nakai a tautolu ke taute?’ Kua mauokafua a tautolu to maeke ia tautolu!
[Puha he lau 3]
Maeke Nakai ia Koe ke Paionia Fakaku?
“Ko e heigoa ni e tau tutuaga fakatagata hau, kaeke ke papatiso a koe, ha ha i ai he tuaga mitaki, kua maeke ke hokotia ke he manako he foaki 60 e tula he mahina he fekafekauaga he fonua, ti talitonu to fekafekau a koe ke he taha mo e loga e tau mahina ko e paionia fakaku, to fiafia lahi e tau motua he fakapotopotoaga ke manamanatu ke he tohi ole hau ma e kotofaaga nei he fekafekauaga.”—Organized to Accomplish Our Ministry, lau 114.
[Puha he lau 6]
Tau Setulu Paionia Fakaku
Tau Puhala Fakatai ke Setulu e Tau Tula 15 he Fekafekauaga he Fonua he Tau Fahitapu Takitaha
Tau Pogipogi—Aho Gofua ke he Aho Faiumu
Hukui e Aho Tapu aki ha aho
Aho Magaaho Tula
Aho Gofua Pogipogi 2 1⁄2
Aho Ua Pogipogi 2 1⁄2
Aho Lotu Pogipogi 2 1⁄2
Aho Tuloto Pogipogi 2 1⁄2
Aho Faraile Pogipogi 2 1⁄2
Aho Faiumu Pogipogi 2 1⁄2
Katoatoa Tula: 15
Ua e Aho Katoa
Fifili ua e aho he fahitapu
Aho Magaaho Tula
Aho Lotu Aho Katoa 7 1⁄2
Aho Faiumu Aho Katoa 7 1⁄2
Katoatoa Tula: 15
Ua e Afiafi mo e Matahiku Vahatapu
Fifili ke ua e afiafi he fahitapu
Aho Magaaho Tula
Aho Gofua Afiafi 1 1⁄2
Aho Lotu Afiafi 1 1⁄2
Aho Faiumu Aho Katoa 8
Aho Tapu Hafa Aho 4
Katoatoa Tula: 15
Tau Pale La he Fahitapu mo e Aho Faiumu
Hukui e Aho Tapu aki ha aho
Aho Magaaho Tula
Aho Gofua Pale La 2
Aho Ua Pale La 2
Aho Lotu Pale La 2
Aho Tuloto Pale La 2
Aho Faraile Pale La 2
Aho Faiumu Aho Katoa 5
Katoatoa Tula: 15
Ko e Setulu Fakatagata Haku ma e Fekafekauaga
Fifili e numera he tau tula ma e tau magaaho takitaha
Aho Magaaho Tula
Aho Gofua
Aho Ua
Aho Lotu
Aho Tuloto
Aho Faraile
Aho Faiumu
Aho Tapu
Katoatoa Tula: 15