Fakapuloa e Mitaki Ue Atu ha Iehova
1. Ko e heigoa ne omoomoi a tautolu ke fakapuloa atu e mitaki ue atu ha Iehova?
1 “Iehova na e, ko e hau ni e mua ue atu mo e malolo, mo e fulufuluola, mo e lilifu, mo e fakahekeaga; ha ko e mena ha ha ia koe e tau mena oti ke he lagi, mo e lalolagi.” (1 Nofo. 29:11) Lauia fēfē e fakaalofa mo e loto fakaaue ha tautolu ma Iehova? Kua omoomoi a tautolu ke ‘kia fakakite [po ke fakapuloa] atu e tautolu e mitaki hana ne ui a tautolu ke o mai he pouli ke he hana maama ke ofo lahi ai.’ (1 Pete. 2:9) Kua nakai maeke a tautolu ke oti e tutala ke he falu hagaao ke he Atua ue atu ha tautolu! To fakapuloa atu e tautolu e mitaki ue atu ha Iehova he tau magaaho homo lahi he mahina a Mati, Aperila, mo Me.
2. Ko e heigoa e matagahua pauaki kua pulega ke fakatātā e Fakamanatuaga, ti ko hai ka liga fakalataha ki ai?
2 Matagahua Pauaki ke Fakatātā e Fakamanatuaga: He Aho Gofua, Aperila 2, to fakatokoluga e tautolu e mitaki ue atu ha Iehova he fakamanatu e Kaiaga Afiafi he Iki. Ko e uiina pauaki ke he magaaho aoga nei to tufa ke he lalolagi katoa ia Mati 17 ki a Aperila 2. Kua fakamalolō ke he tau tagata oti ke fakalataha katoatoa ki ai. Ko e magaaho mitaki lahi anei ma lautolu ne foou ke kamata ke fakapuloa e tala mitaki kaeke kua latatonu a lautolu. Kaeke fai tagata fakaako a koe po ke fai fanau ne kua latatonu ke fakamatala, kia fakamalolō ke tutala ke he tau motua.
3. Ko e heigoa ka talahau e tautolu ke uiina e tau tagata ke he Fakamanatuaga?
3 To tatai e matagahua nei ke he mena ne taute ma e tau Fonoaga he Faahimotu “Kua Tata Mai e Laveakiaga!” To loga e uiina ka fakafano ke he tau fakapotopotoaga ke maeke ke 50 e lagaki he taha e tagata fakailoa mo e 150 e lagaki he tau paionia takitaha. Kia fakakū e fakafeleveiaaga haau, liga he pehē: “Ko e uiina haau anei ke he magaaho ne fa fakamanatu lagataha he tau. To fakafeleveia mafanatia atu ki a koe. Ko e tau talahauaga oti kua ha ha he uiina.” Mooli, kaeke kua fai hūhū e tagata he fale, kia fai magaaho ke tali fakatekiteki ai. Ko e vala tala he apenetiki ke he Kaiaga Afiafi he Iki kua moua he tohi Fakaako he Tohi Tapu ne kamata he lau 206 ka lagomatai hagaao ke he mena nei. He tau matahiku faahitapu, to foaki e tautolu e tau mekasini foou fakalataha mo e uiina pauaki. Kia tohi hifo a lautolu ne fiafia, mo e fakatokatoka ke liu aahi ki ai.
4. To tufa fēfē e tau uiina pauaki he Fakamanatuaga?
4 Kua lata ke foaki e uiina pauaki nei ke he tau tagata takitaha he ha mena ni ne ha ha ai a lautolu. Ko e mena ia, kia fakamau hifo e tau kaina ne nakai fai tagata, ti fakatokatoka ke liu aahi foki he taha magaaho. Ko e tau fakapotopotoaga ne loga lahi e tau uiina ne toe ka lata ke toka ai he tau kaina nakai fai tagata he faahitapu ato hoko e Fakamanatuaga, ka e nakai to hoko e faahitapu ia. Kia mailoga kua moua foki he tau liliu aahi atu, tau tagata fakaako Tohi Tapu, tau faoa, tau kapitiga gahua, tau tuutakaina haau, mo e falu tagata iloa e uiina.
5. Ko e ha kua lata ia tautolu mogonei ke kamata ke taute e tau pulega ke paionia fakakū?
5 Paionia Fakakū: Maeke nakai a koe ke fakapuloa katoatoa e mitaki ue atu ha Iehova he paionia fakakū ia Mati, Aperila, mo Me? Ka maeke to liga lata ke fai hikiaga ke he setulu haau he tau aho takitaha. (Efeso 5:15-17) Lata ia koe ke mauokafua, he lali a koe ke lahi e mena ne taute he fekafekauaga ha Iehova to tamai ai e fiafia mo e fakamonuina Haana. (Fakatai 10:22) Ha kua teitei hoko mai e vahā he Fakamanatuaga, kua latatonu mogonei ke kamata ke taute e tau pulega.—Fakatai 21:5.
6. Ko e heigoa ka ako e tautolu mai he mena ne taute he matakainaga fifine 90 e tau he moui ne paionia fakakū he tau kua mole?
6 Ne olioli he taha matakainaga fifine 90 e tau he moui e kotofaaga ke paionia fakakū he tau kua mole. Ne talahau e ia: “Pete he fiafia lahi au ke taute e katene mo e manako ke kamata ke tō e tau lakau, ne manatu hifo au kua lata ia au ke tuku mua e tau mena kua lata. He manako lahi ke tuku mua e tau mena he Kautu, ne fifili au ke paionia fakakū ia Mati.” Kua fakamonuina nakai a ia ma e tau laliaga haana? Ne pehē a ia, “Ne logona hifo e au e tata lahi haaku ke he fakapotopotoaga, ti fakatata lahi foki he mena nei au ki a Iehova.” Maeke nakai ia tautolu ke filifilia e tau mena kua mua ki a tautolu mo e taute e tau hikiaga pihia kaeke kua lata?
7. Kua uka kia ke fekafekau ko e paionia fakakū?
7 Ke moua e 50 tulā ne lata ke paionia fakakū na liga nakai uka tuga he manamanatu e koe. Kia liogi hagaao ke he tau matagahua haau he tau aho takitaha, taute e setulu, ti fakamau hifo he kalena fakateokarasi haau. Ko koe ni ne iloa mitaki e tau tutuaga fakatagata haau. Kaeke nakai tino malolō a koe po ke nakai hakahakau, liga maeke ia koe ke fakalataha ke he fekafekauaga ke ua e tulā he tau aho takitaha. Kaeke kua gahua tumau a koe po ke fano he aoga, liga maeke ia koe ke paionia fakakū he finatu ke he fekafekauaga he tau afiafi po ke he tau matahiku faahi tapu.
8. Ko e ha ati maeke he taha hoa mau ke paionia fakakū?
8 Kua tokologa ne maeke ke paionia fakakū auloa e magafaoa. He tau tau kua mole, ne tehatehaua taha hoa mau ke fakamau hifo ke paionia fakakū he manatu kua nakai maeke ha ko e tau tutuaga ha laua. Ko e heigoa mogoia ha laua ne taute? “Ne liogi a maua ki a Iehova ke lagomatai ke fakamooli e mena kua leva tigahau he manako a maua ke taute tokoua.” Mo e tau pulega mitaki ne maeke ia laua ke fakamooli e foliaga ha laua. Ne lafi e laua: “Ko e homo ha ia. Ne olioli tokoua e maua e tau monuina loga. Ko e lagomatai atu ha maua, kia taute ai. Kaeke ke taute e maua, liga maeke foki a koe ke taute.”
9. Ko e heigoa ka liga taute e koe he fakaakoaga fakamagafaoa haau he tapu ka hau ke pulega ma e tau matagahua pauaki he tau mahina i mua?
9 Ko e ha he toka kehe taha magaaho he fakaakoaga fakamagafaoa haau ke fakatutala ke he puhala ka fakatolomaki e tau gahua he magafaoa katoa he tau mahina i mua? Pete ka nakai maeke e magafaoa katoa ke paionia fakakū, liga taha he magafaoa kua maeke ke paionia ka e lagomatai mo e kaufakalataha mai e falu he magafaoa. Ka nakai pihia, liga maeke he magafaoa haau ke fakatoka e tau foliaga ke fakaaoga fakalahi e magaaho ke he fekafekauaga he tau mahina matagahua pauaki nei.
10. Ko e ha kua lata ke tutala a tautolu ke he falu hagaao ke he manako ha tautolu ke paionia fakakū he vahā he Fakamanatuaga nei?
10 Felagomataiaki: Kua pikitia e aga makutu. Kia tutala hagaao ke he manako haau ke paionia fakakū. Liga to fakamalolō ai falu ke ole ke paionia fakakū foki. Lafi ki ai, ko lautolu ne paionia fakamua kua liga maeke ke foaki atu e tau puhala kehekehe ke lagomatai aki a koe ke fakatokatoka e tau feua mo e setulu ke maeke ke moua e foliaga haau. (Fakatai 15:22) Ka maeke a koe ke paionia fakakū, ko e ha nakai uiina taha tagata fakailoa, liga ko ia ne tatai e tau tutuaga mo koe ke fakatauō ke he gahua olioli lahi nei?
11. Maeke fēfē he tau motua ke atihake e makutu ke paionia fakakū he tau mahina i mua?
11 Kua tokologa e tau motua ne taute e tau fakaholoaga kua lata ke fakalataha ke he vahega fekafekauaga pauaki nei. (Hepe. 13:7) Kua fakamalolō mooli he mena nei e fakapotopotoaga! Ne atihake foki he tau motua e makutu ha ko e tau fakatutalaaga ha lautolu mo e falu. Ko e falu kupu atihake ke fakamalolō po ke falu lagomatai aoga ka liga latatonu ke omoi aki falu ke paionia fakakū. To liga fakatokatoka he leveki fekafekau e tau feleveiaaga lafi ki luga ma e gahua he fonua ke fakalataha oti ke fakamatala ko e matakau, pihia foki ka tuku e gahua po ke aoga. Kua lata ke fakailoa tumau e tau fakaholoaga nei. To taute e ia ke lahi e fonua mo e loga e tohi.
12. Ko e heigoa ka liga maeke ia koe ke taute ka nakai maeke a koe ke paionia fakakū?
12 Pete ka nakai fakaatā he tau tutuaga a koe ke paionia fakakū, maeke ia koe ke fakamalolō a lautolu ne fakamau hifo ke paionia, mo e maeke ia koe ke liogi ma lautolu ia. (Fakatai 25:11; Kolo. 4:12) Liga maeke ia koe ke taute e tau fakaholoaga ke fakalataha mo lautolu ke he fonua he falu aho he faahi tapu po ke gahua loa ke he tulā fa mahani ai a koe.
13. Ko e heigoa e foliaga ne kua fakatoka ma Niu Silani, mo e maeke fēfē he fakapotopotoaga haau ke lagomatai ke moua ai?
13 Foli ke 2,150 e Paionia Fakakū ia Aperila: Kua hokotia e tau paionia fakakū he la i Niu Silani ke he tapunuaga foou ne 2,133 ia Mati, 1997. Ti, ko e foliaga pauaki ma Aperila e i mua ko e 2,150 e paionia fakakū. Maeke ia tautolu ke hokotia ki ai kaeke ke 1 mai he 6 e tagata fakailoa he tau fakapotopotoaga takitaha ka fakalataha ke he gahua paionia fakakū. Mooli, he falu fakapotopotoaga to tokologa lahi e tagata fakailoa ka fakaatā he tau tutūaga ha lautolu a lautolu ke paionia fakakū. Ko e foliaga pihia he fakapotopotoaga kua mukamuka ke moua he laulahi he tau fakapotopotoaga. Manamanatu la ke he fiafia ka fakaohooho he mena nei ke he fakapotopotoaga haau mo e lauia mitaki ka ha ha he gahua fakamatala he matakavi haau!
14. Ko e ha kua mitaki lahi a Aperila ke paionia fakakū?
14 Ko e ha kua mitaki lahi e mahina a Aperila ke paionia fakakū? To hoko e Fakamanatuaga he mataulu he mahina, ti lahi e magaaho ke liliu a tautolu ke taute e tau aahi ki a lautolu ka o mai. To foaki e tautolu e tau mekasini, he foli ke foaki e tohi Fakaako he Tohi Tapu ke he tau liliu aahi atu mo e kamata e tau fakaakoaga Tohi Tapu. Ko e mena ia to foaki he paionia fakakū ia Aperila e tau magaaho loga ke kamata e tau fakaakoaga Tohi Tapu. He motu nei kua fa mahani ke milino e matagi. Lafi ki ai, kua lima e Aho Tapu mo e taha e aho okioki fakalalolagi ia Aperila, ati mukamuka ai ma lautolu ne gahua tupe mo lautolu ne ō aoga ke fakamau hifo ke paionia fakakū.
15. Ko e ha kua lata ia tautolu ke manamanatu fakamafiti he hoko mai e vahā he Fakamanatuaga nei?
15 He mole ki tua e tau vahā he Fakamanatuaga takitaha kua fakatata ai a tautolu ke taha e tau ki mua ke he fakaotiaga he fakatokaaga nei. Ti kua gahoa e tau aho kua toe ke talahau ke he falu hagaao ke he Atua ue atu ha tautolu. (1 Kori. 7:29) Ka mole atu e vahā he Fakamanatuaga nei, ko e tau magaaho uho ne foaki mai ki a tautolu ke fakaheke ha tautolu a Matua he lagi to nakai liu taute foki. Kia taute katoa e tautolu mogonei e tau pulega ke he tau mena kua fahia ki ai ia Mati, Aperila, mo Me ke fakapuloa fakalahi e mitaki ue atu ha Iehova!
[Puha he lau 4]
Maeke Nakai ia Tautolu ke Moua 2,150 e Paionia Fakakū ia Aperila?
◼ Filifilia e tau mena mua ha tautolu
◼ Fakatutala auloa e tau foliaga mo e magafaoa
◼ Tala ke he falu hagaao ke he tau pulega haau