Fakamatala mo e Talahau Fakatonu Atu
1 Ha ko e “takitaki mo e pule,” ne fakaako e Iesu hana tau tutaki ma e gahua fakamatala lahi ne fakatoka mai i mua. (Isaia 55:4; Luka 10:1-12; Gahua 1:8) Ne fakamaama he aposetolo ko Peteru e poakiaga ha Iesu ke he tau kupu nai: “Kua poaki mai foki a ia kia mautolu ke fakamatala atu ke he tau tagata, mo e talahau fakatonu atu, ko ia ni kua kotofa he Atua ke eke mo fakafili ke he tau tagata momoui mo e tau tagata mamate.” (Gahua 10:42) Ko e heigoa kua putoia he fakamatala fakatonu atu?
2 Liga ako fakalahi mai a tautolu ka manamanatu ke he fakafifitakiaga he aposetolo ko Paulo. Magaaho ne feleveia atu ke he tau patu he fakapotopotoaga i Efeso, ne fakamanatu e ia a lautolu: “Ti nakai toka e au taha kupu aoga, neke nakai fakailoa atu kia mutolu, ti fakaako atu kia mutolu ki mua he tau tagata, katoa foki mo e taha fale mo e taha fale; kua talahau fakatonu e au ke he tau tagata Iutaia, katoa mo e tau tagata Heleni e tokihala ke he Atua, mo e tua ke he Iki ha tautolu ko Iesu Keriso.” Pete kua hane fakauka a ia ke he tau kamatamata, ne gahua fakamalolo a Paulo ke hokotia e tala mitaki ke he loga he tau tagata kua maeke ia ia. Ne nakai talia a ia ke tutala fakamahao ni ke he tau matapatu he kupu moli ke he hana tau tagata fanogonogo, ka e kumi a ia ke fakahoko age e “finagalo oti he Atua.” Ke taute pihia, ne makai a ia ke fakamakamaka mo e taute e tau foakiaga fakatagata. Ne matutaki a ia ke talahau: “Nakai manatu au ke he taha mena, ko e haku a moui foki nakai kuku e au, ka kia fakaoti e au haku a poitufi mo e fiafia, ko e feua ne moua e au mai he Iki ko Iesu, kia talahau fakatonu atu e au e tala mitaki he fakaalofa noa he Atua.”—Gahua 20:20, 21, 24, 27.
3 Maeke fefe a tautolu ke mumuitua ke he fakafifitakiaga ha Paulo he vaha nai? (1 Kori. 11:1) He kumi a lautolu kua lata ki ai pete kua hane fehagai a tautolu mo e tau kamatamata, he fakamakamaka ke hoko e tala mitaki ke he tau matakau fakamotu oti mo e tau vagahau kehekehe, mo e ukufakina ke feaki e tau tagata kua fakakite e fiafia. (Mata. 10:12, 13) Kua lata e mena nai mo e magaaho, malolo, mo e fakaalofa ke he tau tagata.
4 Maeke Nakai ia Koe ke Gahua Paionia Fakaku? Liga ko Mati mo Aperila ko e magaaho mitaki ma hau ke fakamatala fakatonu atu he paionia fakaku. Kua mafanatia ha ia he tau kua mole ke kitia e tokologa ne lali pauaki ke paionia fakaku!
5 Ko e matakainaga fifine ne 80 e tau tau he moui mo e loga e matematekelea malolo tino ne fakalagalaga ai ha ko e tau fakamafanaaga ne foaki he fakatokatokaaga ha Iehova. Ne tohi e ia: “Ne liu fakamata e manako ne leva e toka ke he loto haku, ti taute he mena ia au ke logona hifo kua lata pauaki au ke lagataha foki e gahua paionia fakaku ne toe.” Ne fifili a ia ke foli ma e mahina ha Mati. “Ko e mena fakamua ne taute e ia,” he talahau e ia, “ke nofo ki lalo ke fakatokatoka. Ne tutala au mo e tama fifine haku ha ko ia ka lagomatai au. Ne fakaofo e ia au he taha foki hana a laupepa ole paionia.” Ke he mahina ia, ne fakamole he matakainaga fifine motua 52 e tula ke he fekafekauaga. “Ne liogi lagaloga au ki a Iehova ke fakafou haku a malolo ka logona e au e mategugu. He matahiku he mahina, kua fiafia lahi au mo e makona, ti fakaaue lagaloga au ki a Iehova he lagomatai mai au. Fia manako au ke liu ke taute pihia foki.” Ko e hana a logonaaga fiafia ka liga fakamafana falu kua manako lahi ke paionia fakaku pete kua hagahagakelea e tau malolo tino.
6 Ko e matakainaga tane ne fakaoti fakaofo e hana a gahua tupe ne fakaaoga e ia e magaaho ia ke paionia fakaku. Ke he mahina ia, ne hufia a ia he makai ke gahua fakamatala, ti he hoko ke he matahiku he mahina, kua kamata e ia taha e fakaako Tohi Tapu fou. He liu manamanatu ke he mena ne feleveia mo ia, ne pehe a ia: “Kua mitaki ha e mahina ia!” Kua fiafia lahi a ia ma e takitakiaga mo e lagomataiaga ha Iehova! E, ne lahi e fakamonuinaaga ne liligi age e Iehova ma hana ke lata mo e malolo lahi ne foaki e ia ma e gahua fekafekau, ti to taute pihia foki e ia ma hau.—Mala. 3:10.
7 Ke he tokologa, kua nakai mukamuka ke paionia fakaku. Moha ia, pete ha ko e tau gahua tupe mo e tau kotofaaga fakamagafaoa pihia foki e tau fakatauhele fakatagata, kua tokologa e tau matakainaga kua maeke ke paionia fakaku. Ke fakamatala fakatonu atu kua putoia e foakiaga he tau magaaho mo e malolo ha tautolu, ka e nakai tatai mo e tau fakamonuinaaga ka moua.—Fakatai 10:22.
8 Ko Mati mo Aperila ko e tau magaaho mitaki lahi ke paionia fakaku. Ha ha ai lima e matahiku fahi tapu he mahina ha Mati. He fakaaoga fakamitaki e tau magaaho ia mo e tau magaaho afiafi to liga maeke falu ne gahua tumau ke paionia fakaku. Ke lafi ki ai, liga maeke a koe ke fakaaoga fakamitaki e tau aho okioki he mahina a Aperila. Ko e falu to liga moua taha magaaho ka okioki fakaku mai he tau aoga po ke tau gahua, ti to maeke ke lagomatai a lautolu ke moua 50 e tula. Ke taute e setulu ma e 50 tula ke he gahua he fonua he mahina ha Mati po ko Aperila, liga maeke nakai ia koe ke fakaaoga e setulu paionia fakaku fakatai ne putoia he vala nai? Fakatutala e setulu hau mo e falu; to liga mafanatia falu ke fakatauo mo koe ke he fekafekauaga. Ka nakai maeke a koe ke paionia fakaku, kia fakatoka e foliaga pauaki ma e tau mahina ia, ti gahua auloa mo lautolu kua maeke ke paionia. Taute tuai e tau fakatokatokaaga hau he magaaho nai ke fakalahi e gahua hau ke he fonua he mahina ha Mati mo Aperila.
9 Fakakite e Fakaaue ma e Fakamanatuaga: He tau tau takitaha he magahala Fakamanatuaga, ko e loto fakaaue ma e lukutoto ne fakalagalaga e tokoafe ke ‘fakaaoga e tau aho he mouiaga nai’ ke paionia fakaku. (Efeso 5:15, 16) I Niu Silani he tau kua mole, ne 1,570 e paionia fakaku he mahina ha Mati mo e 690 ia Aperila. Ko e avelesi he tau mahina ua ia ko e 1,130. Fakatatai e avelesi ia mo e toko 225 ne paionia fakaku he tau mahina takitaha ato hoko ke he magahala ia he tau he fekafekauaga. Ko e magahala Fakamanatu he tau nai foki ko e taha magaaho mitaki lahi ke fakakite ha tautolu a fakaaue moli ke he poa lukutoto he Keriso he fakalahi atu e gahua ha tautolu ke he fekafekauaga he fonua.
10 He gutu atu ki a Aperila 16, manamanatu fakahokulo ke he kakano he Fakamanatuaga ma hau. Manamanatu ke he tau mena ne tutupu he tata atu ke he mate he Keriso mo e tau manatu mamafa ke he hana a loto. Manamanatu foki, ke he fiafia ne fakatoka mai mua a Iesu mo e kakano ati lagomatai ai ke fakauka mai he ekefakakelea ki a ia. Manamanatu ke he hana tuaga mogonai ko e Ulu he fakapotopotoaga, he leveki katoatoa e gahua fakamatala mo e taute tutaki. (1 Kori. 11:3; Hepe. 12:2; Fakakite. 14:14-16) Ti fakakite e fakaaue hau ma e tau gahua oti ne taute he Keriso he fakalataha ke he gahua fakamatala ka maeke ia koe.
11 Fakamafana Falu ke Fakamatala Fakatonu: He paionia fakaku e tau motua mo e tau fekafekau lagomatai, kua moua e lautolu e tuaga mitaki ke fakamafana falu. Ka gahua mo e tau tagata fakailoa ke he gahua he fonua mo e ka o atu ke taute e tau ahiahi leveki, kua moua e lautolu e tau magaaho mitaki ke lagomatai fakatagata e falu ke fakalataha ke he gahua pauaki nai. Kia eke e tautolu oti e mena nai mo taha mena ke liogi ki ai, ti lafi e malolo ke he ha tautolu a tau laliaga kaufakalataha ke fakamatala fakatonu atu.
12 He kaufakalataha e tau motua mo e tau fekafekau lagomatai ke he tau fakatokaaga he fakapotopotoaga ma e gahua lahi nai he tau mahina ha Mati mo Aperila, ko e leveki aoga kua lata pauaki ke fakatoka fakamitaki e gahua evagelia. Kua lata ia ia ke fakatoka e matakavi ma e gahua he fonua, tau aho, mo e tula nukua felauaki mitaki mo e tokologa he tau matakainaga fakailoa mo e ke fakailoa tumau e tau fakailoaaga nai. Maeke ke fakatoka ke feleveia he tau tula kehekehe he aho ma e gahua he fonua, ke foaki ke he tau tagata fakailoa oti he fakapotopotoaga taha magaaho mitaki ke fakalataha ke he tau puhala kehekehe he fakamatala. Liga putoia he mena nai e gahua ke he tau matakavi pisinisi, fakamatala he puhala tu, mai he taha fale ke he taha fale, taute e tau liu ahi atu, mo e fakamatala he telefoni. Ke lafi ki ai, kua lata ia ia ke fakatoka ke loga e tau tohi, tau mekasini, mo e tau matakavi ke gahua ki ai he tau mahina ia.
13 Ko e tohi Iloilo ka foaki he mahina a Mati, mo e foliaga ke kamata e tau fakaako Tohi Tapu. Haia e tau puhala mitaki ke foaki aki e tohi Iloilo he uho he Ha Tautolu a Fekafekauaga he Kautu ia Ianuari 2002. Ko e tohi foaki ma Aperila ko e tau mekasini Kolo Toko mo e Awake! Lali ke fakaaoga e tau puhala ne fakakite mai he “Talahauaga Hagaao ke he Tau Mekasini.” Kia fakaaoga taha magaaho ke tauteute fakamitaki ke fakamatala fakatonu atu.
14 Ko e fiafia ha ia ha tautolu ke gahua i lalo hifo he takitakiaga he Ulu he fakapotopotoaga, ko Iesu Keriso, mo e moua e kotofaaga lilifu ke fakamatala e tala mitaki ke he falu! He gutu atu ke he tau mahina ha Mati mo Aperila, kia liu foki a tautolu eketaha ke taute ke mua hake e omaoma ha tautolu he tau mahina ia ke he poaki he Keriso ke fakamatala mo e talahau fakatonu atu.
[Puha he lau 4]
Tau Puhala Kehekehe ke Paionia Fakaku ia Mati mo Aperila 2003
Aho Tula
Aho Gofua 1 2 — — 2 —
Aho Ua 1 — 3 — — —
Aho Lotu 1 2 — 5 — —
Aho Tuloto 1 — 3 — — —
Aho Faraile 1 2 — — — —
Aho Faiumu 5 4 3 5 6 7
Aho Tapu 2 2 3 2 2 3
Mati 56 56 54 55 50 50
Aperila 50 50 51 53 — —
Liga gahua nakai e taha he tau setulu nai ki a koe?