To Paionia Fakakū Nakai a Koe?
1. Ko e ha kua mitaki e magahala he Fakamanatuaga ke fakalaulahi e fekafekauaga ha tautolu?
1 Ko e magahala he Fakamanatuaga ko e magaaho mitaki ke fakalaulahi ha tautolu a gahua he fonua. Ko e magaaho ke manamanatu a tautolu ke he fakaalofa lahi ha Iehova he foaki e haana Tama mo lukutoto. (Ioane 3:16) Kua fakalagalaga he mena nei e tau loto fakaaue ha tautolu, manako ha tautolu ke tutala ke he falu hagaao ki a Iehova mo e tau mena haana ne taute ma e tau tagata. (Isaia 12:4, 5; Luka 6:45) Ko e magaaho foki a ia ma tautolu ke fakalataha ke he matagahua pauaki ke uiina e tau kapitiga mahani mo e tau tagata he fonua ke fakalataha mai mo tautolu ke he Fakamanatuaga. Ka mole ia, ti lali fakalahi a tautolu ke feaki e fiafia ha lautolu ne fakalataha mai. To fakalaulahi nakai e koe e fekafekauaga haau he paionia fakakū ia Mati, Aperila, po ko Me?
2. Ko e ha kua eke a Mati mo mahina mitaki pauaki ke paionia fakakū?
2 Taute a Mati mo Mahina Uho Pauaki: Ko e mahina mitaki lahi pauaki a Mati ke paionia fakakū. Ko lautolu kua maeke kua lata ke fifili e tulā fafati ko e 30 e tulā po ke 50 e tulā. Ka ahiahi mai e leveki takaiaga ia Mati, kua maeke e tau paionia fakakū ke fakalataha atu ke he fono katoa ne taute e ia mo e tau paionia mau mo e tau paionia pauaki. Ko e matagahua ke ta atu e tau uiina ke lata mo e Fakamanatuaga he Aho Ua ia Mati 26, 2013, kua fakaloa atu mai he tau tau kua mole ke kamata ia Mati 1. Lafi ki ai, lima e matahiku faahi tapu katoa ia Mati. Ti ko e ha ne nakai manamanatu fakalahi, ko e maeke nakai ia koe ke putoia he matagahua nei ke taute ai mo mahina pauaki he tau?
3. Maeke fēfē ia tautolu ke taute e tau fakatokatokaaga ke fakalaulahi e gahua he fonua?
3 Fakatokatoka Mogonei: Ko e magaaho anei ke liu kitekite ke he fakaholoaga haau ke kitia ko e heigoa e tau hikihikiaga kua lata ke taute ke maeke ia koe ke paionia. Ko e kaufakalataha he magafaoa kua aoga lahi, ti fakaaoga taha magaaho he Tapuakiaga Magafaoa he afiafi ke fakatutala ke he tau foliaga he magafaoa ha mutolu ti taute e fakaholoaga. (Fakatai 15:22) Ka nakai maeke a koe ke paionia fakakū, aua neke fakalolelole. Maeke nakai a koe ke hikihiki e fakaholoaga haau ke gahua loa he tau aho ka fano a koe he fonua? Maeke nakai a koe ke fai aho foki he vahā tapu ke fano he fonua?
4. Ko e heigoa e tau fua mitaki ka fakalaulahi ha tautolu a gahua ia Mati, Aperila, mo Me?
4 He fakalaulahi e gahua ha tautolu ia Mati, Aperila, mo Me, to lahi foki e fiafia mo e makona ka moua mai e tautolu he fekafekau ki a Iehova mo e foaki atu ke he falu. (Ioane 4:34; Gahua 20:35) Mua atu ai, to tamai he tau gahua foaki noa ha tautolu e fiafia ki a Iehova.—Fakatai 27:11.