Pulega Mogonei ke Fakalaulahi Haau a Gahua he Fonua
1. Ko e heigoa e taha mena aoga hagaao ke he magahala Fakamanatuaga, ti maeke fēfē ke mautauteute ki ai?
1 He magahala Fakamanatuaga takitaha ne foaki ki a tautolu e tau magaaho foou ke ‘fakaaue fakalahi kia Iehova.’ (Sala. 109:30) To fakalaulahi nakai e koe e gahua haau ia Mati ko e taha puhala ke fakakite e loto fakaaue ki a Ia ne foaki e lukutoto? Ko e magaaho anei ke kamata taute e tau pulega.—Fakatai 21:5.
2. Maeke fēfē a koe mo e falu ke tali ke he foakiaga he tuku hifo e tulā kua lata ma e paionia fakakū ia Aperila kua mole?
2 Gahua Paionia Fakakū: He tau kua mole ne fiafia e tau fakapotopotoaga he iloa e foakiaga ia Aperila ne tuku hifo e tula kua lata ke paionia fakakū. Taha e matakainaga taane ne tohi: “Ko au agaia he aoga tokoluga, ti nakai maeke ia au ke paionia tumau. Ka e amanaki au ke fakamau ma e 30 e tulā ti lali ke he 50 e tulā he mahina a Aperila.” Ko e matakainaga fifine ne gahua mau ne tohi: “Tolugofulu e tulā—mafiti lahi e mena ia ke moua!” He fakailoa e foakiaga nei, taha e paionia he mogo fakamua, ko ia mogonei he 80 tumā ne pehē: “Ko e magaaho anei ne fakatali au ki ai! Iloa e Iehova ko e gahua paionia ko e magaaho mitaki lahi mahaki he moui haaku!” Ko e falu ne nakai maeke ke paionia fakakū ne fakatoka e tau foliaga ke lahi e mena ka taute he gahua he fonua.
3. Ko e heigoa e tau kakano kua ha ha i ai ke manamanatu ke he gahua paionia fakakū ia Mati, Aperila, mo Me?
3 Ko e mahina a Mati kua mitaki lahi mahaki ke paionia fakakū ha kua liu foki a tautolu ke moua e fifiliaga he 30 po ke 50 e tulā. Lafi ki ai, kamata he Aho Faiumu ia Mati 17, to fai vala a tautolu ke he matagahua pauaki ke uiina e falu ke fakalataha mo tautolu ma e Fakamanatuaga ia Aperila 5. Tokologa ke fakaaoga fakalahi e magaaho ha lautolu ke he fonua ti manako lahi mahaki a lautolu ke paionia fakakū foki ia Aperila mo Me, ne kua 50 e tulā.
4. Maeke fēfē a tautolu ke fakalaulahi e gahua ha tautolu ke he fonua, ti ko e heigoa e fua?
4 He Tapuakiaga Magafaoa he afiafi ha mutolu i mua, he ha he fakatutala e puhala ka fakalaulahi he tau tagata takitaha he magafaoa e gahua haana ke he magahala Fakamanatuaga? (Fakatai 15:22) Ole ki a Iehova ke fakamonuina e tau laliaga haau. (1 Ioa. 3:22) He fakalaulahi e koe haau a gahua he fonua, nakai ni to lafi e koe e fakaheke haau ki a Iehova ka e to fakalahi foki haau a fiafia.—2 Kori. 9:6.