Tau Tuaga kua Fakalahi ke Fakaaue ki a Iehova
1. Ko e heigoa e fakaholoaga foou ka lagomatai a tautolu ke ‘fakaaue fakalahi kia Iehova’?
1 Ia Mati ne mole laia, ne taha e fakaholoaga foou ne kamata, ke maeke he tau tagata fakailoa ke paionia fakakū ke 30 e tulā ia Mati mo Aperila mo e he mahina ka ahiahi mai e leveki takaiaga. Ka putoia ke he ahiahi he leveki takaiaga e ua e mahina, ko e tau tagata fakailoa ne ole ke 30 e tulā kua maeke ke fifili taha mai he tau mahina ua ia ke paionia fakakū. Ko e tau paionia fakakū oti kua maeke ke o atu ke he fono katoa ka taute e ia mo e tau paionia tumau mo e pauaki. Kakano e mena nei kaeke nakai maeke a tautolu ke moua e 50 e tulā, maeke agaia ni ke ‘fakaaue fakalahi kia Iehova’ ko e tau paionia fakakū ke lagafā he taha e tau he gahua ke 30 e tulā!—Sala. 109:30; 119:171.
2. Ko e heigoa ka fiafia a lautolu ki ai kua paionia fakakū he magaaho ka ahiahi mai e leveki takaiaga?
2 Magahala Ahiahi he Leveki Takaiaga: He mogonei to tokologa ka maeke ke paionia fakakū ka ahiahi mai e leveki takaiaga mo e moua foki e fefakamafanaaki he gahua mo ia he fonua. (Roma 1:11, 12) Tokologa e paionia fakakū ne liga fakatokatoka ke fakaaoga e aho okioki he faahi tapu ia ke maeke ke gahua mo e leveki takaiaga. Ko lautolu ne gahua tupe he tau aho he faahi tapu kua maeke ke ole ke gahua mo ia he Aho Faiumu po ke Aho Tapu. Lafi ki ai, to atihake lahi ke he tau paionia fakakū ke o atu ke he fono paionia fakalataha mo e tau paionia tumau mo e tau paionia pauaki!
3. Ko e ha e magahala Fakamanatuaga ko e magaaho mitaki lahi ke paionia fakakū?
3 Magahala ia Mati mo Aperila: Ko lautolu ne fakalataha ke he fakaholoaga fakamua ke paionia fakakū ke he 30 e tulā he taha e mahina he magahala Fakamanatuaga kua maeke mogonei ke fakalahi ua e “poa fakaheke” ha lautolu! (Hepe. 13:15) Ko e tau mahina mitaki lahi a Mati mo Aperila ke fakalahi e gahua ha tautolu he fonua ko e tau paionia fakakū. He tau mahina ia he tau tau takitaha, kua taute a tautolu he matagahua ke uiina falu ke fakalataha mai ke he Fakamanatuaga. Lafi ki ai, ha kua tokologa ka fakalahi ha lautolu a gahua he fonua he magahala Fakamanatuaga, kua maeke ia tautolu ke gahua mo e tau tagata fakailoa kehekehe. He mole e Fakamanatuaga, to liu a tautolu ke fakakia a lautolu ne fiafia ke o mai mo e atihake e fiafia ia ma e lauga pauaki. To omoomoi nakai e loto haau ke fakaaoga fakamitaki e tau tuaga nei foki ke paionia fakakū?—Luka 6:45.