Ko e Magahala he Fakamanatuaga—Ko e Magaaho ke Fakatolomaki e Gahua!
1. Ko e heigoa e tau kakano kua lata ke onoono a tautolu ki ai ke fakatolomaki e tau gahua he mahina a Mati, Aperila, mo Me?
1 Maeke nakai a koe ke fakatolomaki haau a vala ke he fekafekauaga he magahala he Fakamanatuaga i mua? Loga e matakavi ka moua e matagi mitaki mo e loloa e tau aho. Falu matakainaga ka fai okiokiaga mai he tau gahua po ke tau aoga, ka maeke ke fakaaoga ke lata mo e fekafekauaga. Kamata ia Aperila 2, to fiafia a tautolu ke he matagahua pauaki ke uiina a lautolu kua fiafia ke fakalataha mai mo tautolu ke he Fakamanatuaga ia Aperila 17. Ka mui mai, to lali a tautolu ke feaki e fiafia ha lautolu kua fakalataha mai mo e uiina foki a lautolu ke he lauga pauaki ka taute he faahi tapu ia Aperila 25. Ko e mooli, loga e kakano ke kitekite mo e fakatolomaki haau a gahua ke he mahina a Mati, Aperila, mo Me.
2. Ko e heigoa taha puhala uho lahi ke fakalaulahi ha tautolu a fekafekauaga?
2 Paionia Fakakū: Taha e puhala ke fakalaulahi e gahua, ko e paionia fakakū. Ha kua lavelave a tautolu oti, kua lata ni ke fai fakatokaaga tuai mo e hikihiki ha tautolu a tau fakaholoaga. (Fakatai 21:5) Ka e kua ka fakaholo atu falu gahua nakai fai kakano lahi mai he haau a fakaholoaga fa mahani. (Filipi 1:9-11) Ko e ha ne nakai fakailoa ai haau a manako ke paionia ke he falu i loto he fakapotopotoaga ke kitia ko e maeke nakai a lautolu ke paionia fakakū mo koe?
3. Liga fakatokatoka fēfē he tau magafaoa a lautolu ke fakalaulahi atu e gahua?
3 Ko e mena mitaki lahi he Tapuakiaga Magafaoa ka hau, ke fakatutala e tau foliaga he magafaoa. (Fakatai 15:22) Ka kaufakalataha, to liga maeke falu he magafaoa ke paionia fakakū ke he taha po ke loga e mahina. Ka e kua ka iloa e koe to nakai maeke e mena nei? Maeke he magafaoa ke tauteute agaia ni ke fakatolomaki e fakalataha ke he gahua fekafekau he falu afiafi po ke fakaloaloa atu e gahua he tau matahiku faahi tapu.
4. Ko e heigoa e tau monuina ka fua mai ka fakatolomaki ha tautolu a fekafekauaga he magahala nei he Fakamanatuaga?
4 Mailoga e Iehova e tau mena oti ne taute e tautolu ke fekafekau ki a ia mo e fakaaue a ia ke he tau poa foaki ha tautolu. (Hepe. 6:10) Kua moua mai e fiafia ka foaki ki a Iehova mo e falu. (1 Nofo. 29:9; Gahua 20:35) Maeke nakai a koe ke fakatolomaki haau a tau gahua he magahala nei he Fakamanatuaga mo e helehele e fiafia lahi mo e tau monuina loga ka fua mai?