‘Kia Talahau Fakatonu Atu e Tala Mitaki’
1. Ko e heigoa e tala mitaki ne kua lata ke fakamatala e tautolu?
1 He lalolagi ne temotemoai e tala mitaki, kua ha ha ia tautolu e kotofaaga ke ‘talahau fakatonu atu e tala mitaki he fakaalofa noa he Atua.’ (Gahua 20:24) Putoia he mena nei e fakailoa ke he tau tagata ko e “tau aho fakamui” to nakai leva ti hukui he lalolagi foou tututonu ha Iehova ka “mole atu e tau mena fakamua.” (2 Timo. 3:1-5; Fakakite. 21:4) He magaaho ia to nakai liu fai gagao. (Isaia 33:24) Ko e tau fakahele ne mamate to omai ki fafo he tau tukuaga, po ke tau tuagamau fakamanatu, ke liu fakalataha mo e magafaoa mo e tau kapitiga. (Ioane 5:28, 29) To eke e lalolagi katoa mo parataiso fulufuluola. (Isaia 65:21-23) Ko e tau fakatai ni anei he tala mitaki kua lata ia tautolu ke fakamatala!
2. Ko e ha kua foaki he magahala he Fakamanatuaga e tau magaaho mitaki lahi ke talahau atu e tala mitaki?
2 Ko e tau mahina ha Mati, Aperila, mo Me to eke mo tau magaaho mitaki lahi ke fakapuloa e tala mitaki pihia. He tau mahina nei ko e matagi mo e tau tulā he tau aho loloa kua mitaki lahi ke he tau faahi loga he lalolagi ke fakaaoga fakalahi ke he fekafekauaga. Lafi ki ai, ko e Fakamanatuaga, ko e magahala aoga lahi he tau, ka taute ke he lalolagi katoa he mole e tōaga he laā he Aho Faiumu, Mati 22. Ko e magaaho anei ke kamata tauteute ke fakatolomaki hake e matagahua ha tautolu.
3. Ko e heigoa ka lagomatai a tautolu ke fakatolomaki hake e matagahua ha tautolu ko e tau magafaoa?
3 Paionia Fakakū: Maeke nakai a koe ke fakatokatoka e setulu haau ke paionia fakakū ke he taha, ua, po ke he tau mahina tolu oti? Fēfē mogoia ke toka taha magaaho he fakaako fakamagafaoa haau ke fakatutala ke he matakupu nei? He kauauloa, to liga taha po ke fai foki he magafaoa ka maeke ke paionia fakakū. (Fakatai 15:22) Kia liogi hagaao ke he mena nei, mo e mailoga to fakamonuina e Iehova e tau laliaga haau. (Fakatai 16:3) Pete kua nakai fai he magafaoa ne maeke ke paionia fakakū, kua maeke he tau tagata oti he magafaoa ke fakatoka e tau foliaga pauaki ke fakatolomaki hake e putoia ha lautolu ke he fekafekauaga he gahua auloa mo lautolu kua maeke ke paionia.
4. Setulu fēfē e tautolu e tau matagahua ha tautolu ke maeke ke paionia fakakū kaeke kua gahua tupe tumau a tautolu?
4 Kaeke kua gahua tupe tumau a koe, liga maeke a koe ke paionia fakakū he fakatokatoka fakamitaki e setulu. Liga maeke a koe ke fakaaoga taha vala he okioki kai laā haau ke fakamatala. Po ke maeke a koe ke fai matakavi fakatagata ne tata ke he kaina po ke fale gahua haau ti fano he fonua kavi ke he taha e tulā ato kamata po ke ka tuku e gahua haau. Liga maeke ia koe ke lafi taha magaaho ke he setulu haau he hiki e tau mena aoga tote ke he taha mahina foki mo e he fakaaoga katoatoa e tau aho he tau matahiku faahi tapu ke he fekafekauaga. Ko e falu kua maeke ke uta taha po ke ua e aho okioki mai he gahuaaga ke fakaaoga he gahua he fonua.
5. Liga lagomatai fēfē e koe a lautolu ne momotua po ke gagao ke paionia fakakū?
5 Kaeke ko koe kua motua e tino po ke gagao po kua lolelole, liga maeke a koe ke paionia fakakū he fakaaoga taha magaaho tote he tau aho takitaha ke he fekafekauaga. Ole ki a Iehova ke foaki ki a koe e ‘malolō kua lahi ue atu.’ (2 Kori. 4:7) Taha e matakainaga fifine ne maeke ke paionia fakakū he 106 e tau tau moui! He lagomatai he tau magafaoa Kerisiano haana mo e falu he fakapotopotoaga, ne fakamatala a ia he taha fale ke he taha fale, taute e tau liliu aahi atu, fano ke he tau fakaakoaga Tohi Tapu, mo e fakalataha ke he falu puhala foki he fekafekauaga. Ne lagomatai e ia hogofulu e tagata ke kamata e tau fakaakoaga Tohi Tapu. “He manamanatu au ke he kotofaaga homo ue atu ne moua e au ke fekafekau ko e paionia fakakū,” he talahau e ia, “ne puke e loto haaku he fakaalofa mo e loto fakaaue ma Iehova, haana Tama, mo e fakatokatokaaga fakaalofa Haana. Ne manako mooli au ke pehē ‘fakaaue ma Iehova!’”
6. Maeke fēfē he tau fuata kua papatiso ne ō agaia he aoga ke paionia fakakū?
6 Kaeke ko koe ko e fuata kua papatiso ne fano agaia he aoga, liga maeke foki a koe ke tohi hifo ko e paionia fakakū. Tuga a lautolu ne gahua tupe tumau, to liga fakaaoga fakalahi e koe e tau matahiku faahi tapu he setulu haau ma e fekafekauaga. Liga maeke foki a koe ke fano he fonua kavi ke he taha e tulā ka hili e aoga he falu aho. Fai aho tuku aoga nakai ka fakaaoga e koe ke fakalataha ke he fonua? Kaeke ke manako a koe ke paionia fakakū, tala ke he tau matua haau hagaao ki ai.
7. Ko e heigoa ka liga taute he tau motua ke atihake e fiafia ma e fekafekau he magahala he Fakamanatuaga?
7 Atihake e Aga Fiafia: Kua lahi e mena ka taute he tau motua ke atihake e fiafia he fakapotopotoaga ha ko e tau fakafifitakiaga ha lautolu. (1 Pete. 5:2, 3) Liga to manako a lautolu ke taute e tau setulu ma e gahua he fonua ma e tau matakainaga ka fakalataha ke he fekafekauaga he magaaho pogipogi, ka hili e aoga, po ke ka tuku e gahua. Lata mogoia he leveki fekafekau ke mailoga kua kotofa e tau tagata fakailoa ne latatonu ke takitaki ai mo e kua lahi e matakavi ke gahua ki ai pihia foki e tau mekasini mo e tau tohi ma e tau mahina nei he matagahua pauaki.
8. Ko e heigoa ne ako e tautolu mai he mena ne taute he taha fakapotopotoaga?
8 He taha fakapotopotoaga, ne kamata e tau motua ke fakamalolō tuai e gahua paionia fakakū he tau mahina fakamua. Ne fakailoa tumau e lautolu he tau faahi tapu takitaha ke he fakapotopotoaga e numera he tau tagata fakailoa ne talia e lautolu ke paionia fakakū. Ne fakamafanatia he mena ia a lautolu ne manako ke fakatolomaki hake e fekafekau ha lautolu ha kua tokologa ke gahua auloa. Ko e tau feleveiaaga lafi ki luga ma e gahua he fonua kua taute he magaaho pogipogi mo e magaaho afiafi. Ko e fua ne 53 e tagata fakailoa ne paionia fakakū ia Aperila, kua teitei ke hafa e fakapotopotoaga!
9. Ko e ha kua mitaki lahi e magahala he Fakamanatuaga ma lautolu kua latatonu, ke kamata fakamatala e tala mitaki?
9 Lagomatai Falu ke Fakamatala: Ka latatonu e tau tagata foou mo e tau fuata ke kamata ke fakamatala, liga to uiina a lautolu ke gahua auloa he gahua he fonua mo e tau tagata fakailoa kua iloilo lahi. To liga taute pihia he magahala he Fakamanatuaga ka tokologa he fakapotopotoaga ka fakatolomaki hake e tau matagahua ha lautolu. Kua fai tagata fakaako Tohi Tapu nakai a koe kua holo ki mua ti fakalautatai e moui haana ke he tau tutūaga tututonu a Iehova? Fai fanau nakai a koe kua mahani mitaki hane holo ki mua ka e nakaila eke mo tau tagata fakailoa? Kaeke ke fakakite e lautolu ia e manako ke eke mo tau tagata fakailoa ne nakaila papatiso mo e logona hifo e koe kua latatonu ni a lautolu ke pihia, ti fakailoa ke he taha he tau motua. To taute he leveki fakapotopotoaga e fakaholoaga ke tokoua e motua ke fakatutala e matakupu mo koe mo e tama haau po ke tagata fakaako.
10. Ko e heigoa ka taute he tau motua ke lagomatai a lautolu ne nakai hakahakau?
10 Ko e tau mahina i mua kua mitaki lahi foki ma lautolu nukua nakai hakahakau ke liliu kamata e matagahua ke he fakapotopotoaga. Ko e tau leveki he Fakaakoaga Tohi he Fakapotopotoaga mo e falu motua foki kua lata ke lali fakailoilo ke ahiahi a lautolu ia mo e foaki e uiina fakatagata mafanatia ke gahua auloa mo lautolu ke he fekafekauaga. Kaeke kua leva lahi e nakai hakahakau ha lautolu, lata ke tokoua e motua ke tala fakamua mo lautolu ke mailoga kua latatonu nakai ke liliu fakamatala.—km 11/00 lau 3.
11. Ko e heigoa e fakakiteaga mua ue atu he “fakaalofa noa he Atua?”
11 Tauteute ma e Fakamanatuaga: Ko e lukutoto ko e fakakiteaga mua ue atu he “fakaalofa noa he Atua.” (Gahua 20:24) To totou miliona e tau tagata loto fakaaue he lalolagi katoa ka fakapotopoto auloa he Aho Faiumu, Mati 22, he mole e tōaga laā, ke Fakamanatu e matulei he Keriso. Manako a tautolu ke uiina mo e lagomatai a lautolu oti ne loto fakamooli ke omai ke he magaaho aoga lahi nei ne talahau atu ke he fakaalofa noa ha Iehova ke he tau tagata.
12. Ko hai ka uiina e tautolu ke he Fakamanatuaga?
12 Tohi hifo a lautolu ne manako a koe ke uiina. Mooli lahi to tohi hifo foki e koe e tau magafaoa, tau katofia, tau kapitiga gahua po ke tau kapitiga aoga, mo e tau tagata fakaako Tohi Tapu fakamua mo e he mogonei, mo lautolu oti foki ne ahiahi tumau e koe. Kaeke ke fai hūhū a lautolu ne uiina e koe hagaao ke he Fakamanatuaga, liga to lagomatai ki a koe ke fakaaoga e vala tala he apenetiki hagaao ke he Kaiaga Afiafi he Iki he lau 206-8 he tohi Fakaako he Tohi Tapu. Liga to hafagi he mena nei e puhala ke kamata e fakaakoaga Tohi Tapu, ha kua foaki atu ki a koe e magaaho ke fakakite e tohi ne fakaaoga e tautolu ke taute e tau fakaakoaga Tohi Tapu.
13. Fakamonuina fēfē e Iehova e tau laliaga he tau tagata fakailoa ne uiina e falu ke he Fakamanatuaga?
13 Taha e matakainaga fifine ne tohi hifo toko 48 e magafaoa ke uiina. He uiina e ia a lautolu, ne tamate e ia e tau higoa ti tohi hifo e aho ne uiina ai. Kua fiafia ha ia haana he toko 26 e tagata ne uiina ne omai ke he Fakamanatuaga! Ko e matakainaga taane ne fai fale koloa ne uiina e tagata gahua haana ko e akoako fakamua. Ne finatu e tagata ti talahau fakamui: “Kua lahi e mena ne ako e au hagaao ke he Tohi Tapu he tulā taha mai he 30 e tau ne nofo au he Lotu Katolika.” He nakai leva e mole e Fakamanatuaga, ne talia a ia ke fakaako e tohi Fakaako he Tohi Tapu.
14. Ko e heigoa e matagahua pauaki he lalolagi katoa ka kamata ia Mati 1?
14 Matagahua Pauaki: Kamata he Aho Faiumu, Mati 1, matutaki atu ki a Mati 22, to tufatufa e uiina pauaki ke he Fakamanatuaga he lalolagi katoa. To manako oti ni ke fakalataha katoatoa ke he matagahua aoga nei. Kua mitaki lahi ke age ne koe e uiina ke he tagata he fale ka e nakai toka taha he gutuhala. Pete ia, kaeke kua lahi mahaki e matakavi ha mutolu, to fifili he tau motua ke lata ke toka fakailoilo e tau uiina he tau kaina ne nakai fai tagata. He tau matahiku faahi tapu to foaki foki e tautolu e tau mekasini foou.
15. Foaki fēfē e tautolu e uiina he Fakamanatuaga?
15 Ha kua fakakaupā e magaaho ka tufatufa e tautolu e tau uiina, kua mitaki lahi ke fakakū e fakafeleveia atu. Kia fakakapitiga mo e aga fiafia. Liga talahau pehē a koe: “Manako a mautolu ke iloa mooli kua fai uiina a koe, tau tagata he magafaoa, mo e tau kapitiga haau ke he magaaho aoga lahi ka fakahoko ia Mati 22. Ha ē e uiina haau. Ko e tau vala tala haia i tua he uiina.” Liga to fai hūhū e tagata he fale. Po ke liga talia e ia e uiina mo e talahau foki to hau a ia. Fakamau hifo e fiafia ne fakakite ti liu atu.
16. Ko e heigoa e tau mena tutupu ne fakakite e uho he matagahua ke uiina e tau tagata he matakavi ke he Fakamanatuaga?
16 He tau kua mole ne moua he taha kautau e uiina ke he Fakamanatuaga he gutuhala haana. Ne manako a ia ke fano ka e lata ke fai fakaatāaga mai he sātini (sergeant) haana. He fakakite e ia e uiina ke he sātini, ne nakai gū e sātini ti talahau ko e Tau Fakamoli e tau matua haana mo e fa fano fakamua he tau feleveiaaga mo laua. Ne nakai ni fakaatā e ia e kautau ke fano ka e fakatauō e sātini mo ia ke he Fakamanatuaga!
17. Fakatātā fēfē e tautolu kua nakai talia teao e tautolu e fakaalofa noa he Atua?
17 Fakakite e Loto Fakaaue: Kua teitei hoko tuai e vahā Fakamanatuaga he 2008, kia igatia a tautolu ke fakaata e fakaalofa noa ha Iehova ma tautolu. Ne tohia he aposetolo ko Paulo: “Kua ole atu a mautolu kia mutolu aua neke talia teao e mutolu e fakaalofa noa he Atua.” (2 Kori. 6:1) Fakatātā fēfē e tautolu kua nakai talia teao e tautolu e fakaalofa noa he Atua? Ne tohia e Paulo: “Ka kua fakakite e mautolu a mautolu ke he tau mena oti ko e tau fekafekau he Atua.” (2 Kori. 6:4) Ko e mena ia ati fakatātā ai e tautolu e loto fakaaue ma e mena fakaalofa ha Iehova puhala he ha tautolu a mahani mitaki mo e fakamatala fakamakutu e tala mitaki. He magahala he Fakamanatuaga ia to moua e tautolu e magaaho mitaki ue atu ke fakatolomaki hake e matagahua ha tautolu, he talahau fakatonu atu e tala mitaki.
[Puha he lau 3]
Ko Hai ka Liga Putoia ia Lautolu ne Maeke ke Paionia Fakakū?
◼ Tau magafaoa
◼ Lautolu ne gahua tupe tumau
◼ Lautolu ne momotua mo e gagao
◼ Lautolu ne ō aoga
[Puha he lau 4]
Magaaho ka Tufatufa e Tau Uiina he Fakamanatuaga:
◼ Kia vagahau fakakū mo e aga fiafia
◼ Fakamau hifo e fiafia ti liu atu
◼ Foaki e tau mekasini he tau matahiku faahi tapu