Tumau ke Vagavagahau Atu Hagaao ke he Tau Gahua Homo Ue Atu ha Iehova

1. Ko e heigoa falu gahua homo ue atu ha Iehova ne loto fakaaue pauaki a koe ki ai?

¹ Nakai fai ke fakatatai mo e ha tautolu a Atua mua ue atu, ko Iehova! Ne tohia e Tavita: “Iehova na e, haku Atua, kua loga e tau mena kua eke e koe, ko e hau a tau gahua homo ue atu mo e hau a tau manatu kia mautolu, nakai maeke ke fakatatai mo koe.” (Sala. 40:5, NW) Ko e tau gahua homo ue atu ha Iehova kua putoia e tufugatia he lalolagi mo e lagi katoatoa, ko e Kautu faka-Mesia, tau gahua fakaalofa-totonu ke he hana tau tagata, mo e matagahua fakamatala he lalolagi katoa. (Sala. 17:7, 8; 139:14; Tani. 2:44; Mata. 24:14) Ko e fakaalofa ki a Iehova mo e loto fakaaue ke he tau mena oti ne taute e ia kua omoomoi a tautolu ke vagavagahau ke he falu hagaao ki a ia. (Sala. 145:5-7) Ke he magahala ia Mati, Aperila, mo Me, to moua e tautolu e magaaho ke taute katoatoa e mena nei.

2. Kua aoga fakatagata fefe ki a tautolu he paionia fakaku?

² He Paionia Fakaku: Maeke nakai ia koe ke fakatokatoka e setulu hau ke fakaaoga 50 e tula ke he fekafekauaga ke he taha po ke loga atu he tau mahina he gahua pauaki nei? To aoga moli ke he ha hikiaga ka taute e koe ke he hau a fakaholoaga mau. (Efeso 5:16) Tokologa ne mailoga kua lagomatai he paionia fakaku a lautolu ke fakatolomaki ki mua e kakano he ha lautolu a fekafekauaga. Kua fakatotoka lahi a lautolu he o atu ke he tau gutuhala mo e lahi atu e fakaaoga he Tohi Tapu. He lahi e tau magaaho ne fakaaoga ke he fekafekauaga kua fakamukamuka ai ke liu ahi atu ke he ha fiafia ne moua e lautolu, mo e falu ne nakaila taute ha fakaakoaga Tohi Tapu tali mai ne kua taha ne kamata he magaaho he paionia fakaku. Ha kua paionia fakaku a tautolu kua foaki e tautolu a tautolu ke lagomatai e falu, ko e gahua fiafia.​—Gahua 20:35.

3. Puhala fe ne kua maeke e falu ke paionia fakaku pete he paleko e tau tutuaga?

³ Kia nakai mafiti ke fakahiku kua nakai fakaata he tau tutuaga hau a koe ke fai vala i ai. Taha e motua ne paionia fakaku he tau kua mole ne ua e tama mo e gahua tumau. Taute fefe he matakainaga tane lavelave nei? Ha kua gahua a ia he vaha tapu, ne fakatokatoka e ia ke gahua loa he fonua he tau matahiku fahitapu, kamata he fakamatala he puhalatu he 7:00 a.m. he tau Aho Faiumu. Tokologa he fakapotopotoaga ne pihia e tau tutuaga ne paionia foki, ti felagomataiaki mo e fefakamaloloaki a lautolu ko e taha ke he taha. He taha fakapotopotoaga, ne fifili e matakainaga fifine 99 e tau ke paionia ia Me he mole e uiina he tama fifine hana ke fakalataha mo ia. Ne lagomatai foki he falu i loto he fakapotopotoaga e matakainaga fifine motua nei ke o he taha gutuhala ke he taha gutuhala mo e o ke he tau fakaakoaga Tohi Tapu he poka e nofoa fakataveli hana. Ne taute foki e ia e fakamatala he telefoni, fakamatala he puhalatu, mo e tohitohi. Ne fakamoli ki a ia kua maeke e mena nei, nakai he malolo ni hana, ka e maeke ni ha ko e lagomatai ha Iehova.​—Isaia 40:29-31.

4. Ko e heigoa e tau mena kua liga ke manamanatu a tautolu ki ai ka tauteute he setulu ke paionia fakaku?

⁴ Lali ke tohi e setulu ne felauaki mitaki mo e tau tutuaga hau. Ko e tau setulu fakataitai he fufuta nei ka liga lagomatai lahi. Gahua tumau nakai a koe po ke fano he aoga? Ko e setulu ne fakaaoga hokoia ni he tau matahiku fahitapu ka liga aoga lahi ki a koe. Kaeke moua a koe he tau lekua malolo tino ti nakai maeke ia koe ke leva e gahua he fekafekauaga, liga hagahaga mitaki e setulu ne fai magaaho tote tumau ke fano he fonua he tau aho takitaha. Tutala mo e falu hagaao ke he manako hau ke paionia fakaku. To liga eke ai e lautolu mo foliaga ha lautolu ke taute pihia foki.

5. Ko e heigoa e tau foliaga ne maeke e tau fuata ikiiki ke fakatoka ma Mati, Aperila, mo Me?

⁵ Tau Puhala kua Maeke e Tau Fuata Ikiiki ke Fakalataha: Kua fiafia a Iehova ka tutala e tau fuata ikiiki hagaao ke he tau gahua homo ue atu hana. (Sala. 71:17; Mata. 21:16) Kaeke ko e fuata tote mo e kua papatiso a koe, liga maeke ia koe ke paionia fakaku he mahina ne putoia e tuku aoga. Ka nakai maeke ia koe ke fekafekau ko e paionia fakaku, maeke nakai ia koe ke fakatoka e tau foliaga pauaki ke fakamalikiti hau a fakalataha mo e fakatolomaki e kakano he fekafekauaga hau ke he tau mahina nei? Ka hane fakalataha a koe mo e tau matua ke he fekafekauaga ka e nakaila eke ia mo tagata fakailoa nakaila papatiso, ko e magaaho mitaki anei ke lali ke hokotia ki ai. Nakai lata ia koe ke logona hifo kua lata ni ke makaka lahi he tali he tau huhu faka-Tohi Tapu po ke lata ia koe ke iloilo lahi ke tuga ni e tagata lahi kua papatiso. Maama nakai ia koe e tau matapatu fakaakoaga he Tohi Tapu? Kua tapiki mau nakai a koe ke he tau tutuaga he mahani mitaki he Tohi Tapu? Manako nakai a koe ke iloa ko e taha he Tau Fakamoli a Iehova? Ti tutala ke he tau matua hau hagaao ke he mena nei. To maeke ia laua ke fakatokatoka ke o mo koe ke he tau motua ke iloa kua hokotia nakai a koe ke he tau mena kua lata ai.​—Kikite e tohi Our Ministry, lau 98-9.

6. Maeke fefe ia tautolu ke lagomatai e tau tagata fakaako Tohi Tapu ke eke mo tau tagata fakailoa he tala mitaki?

⁶ Lagomatai e Falu ke Fakamatala: Ko e tau tagata fakaako Tohi Tapu ne hane holo ki mua kua liga hokotia ke fakalataha mo tautolu ko e tau tagata fakailoa ke he magahala he tau mahina gahua pauaki hane gutu mai. Kaeke hane holo ki mua e tagata fakaako Tohi Tapu hau, kumi e lagomatai he leveki fakaakoaga tohi hau po ke leveki fekafekau. Taha ia laua ka maeke ke nonofo mo koe he fakaakoaga ke fuafua e holo ki mua he tagata fakaako. Ka hokotia e tagata fakaako mo e kua manako ke eke mo tagata fakamatala, ko e leveki fakapotopotoaga ka fakatokatoka ke he ua e motua ke feleveia mo koe mo e tagata fakaako. (Kikite The Watchtower, Novema 15, 1988, lau 17.) Ka talia e tagata fakaako, ti kamata agataha ke fakaako a ia ke he fekafekauaga.

7. Liga maeke fefe ke lagomatai e tau tagata fakailoa kua lolelole fakaagaga mo e nakai o mai tumau?

⁷ Ko e tau leveki fakaakoaga tohi ka manako ke kikite fakatonutonu pauaki ke he ha tagata kua lolelole fakaagaga po ke nakai hau tumau he tau matakau ha lautolu. Uiina fakatagata ki a lautolu ke gahua mo koe ke he fekafekauaga. Kaeke kua leva e lolelole fakaagaga ha lautolu, kua mitaki ke ua e motua ka tutala ki a lautolu ke fakakia kua hokotia nakai a lautolu. (Kikite e Novema 2000 Ha Tautolu a Fekafekauaga, Puha Huhu.) Ko e fakamakutu he fakapotopotoaga he tau mahina he gahua pauaki nei ka liga fakaohooho a lautolu ke liu foki ke taute e fekafekauaga mo taha mena taute tumau ke he tau momoui ha lautolu.

8, 9. Ko e heigoa he tau motua ka taute ke atihake e fakaohooho ma e gahua pauaki?

⁸ Tauteute Mogonei ma e Gahua Malikiti Lahi: Tau motua, kamata mogonei ke atihake e manako he fakapotopotoaga ma e paionia fakaku. Maeke ia koe ke lahi e mena ka taute ha ko e tau talahauaaga atihake mo e tau fakafifitakiaga mitaki. (1 Pete. 5:3) Ko e heigoa e tapunu he tau paionia fakaku he fakapotopotoaga he tau mogo kua mole? Maeke nakai ke molea hake he tau nei? Ko e tau leveki fakaakoaga tohi mo e tau tagata lagomatai ha lautolu kua lata ke kumi puhala ke fakamalolo ki a lautolu oti he matakau ke fakamalikiti ha lautolu a gahua. Ko e tau leveki fekafekau ka liga setulu e falu feleveiaaga lafi ki luga ma e fekafekauaga he fonua. Fakailoa tuai ke he fakapotopotoaga hagaao ke he tau fakatokatokaaga. Kikite fakalahi ke fai tagata fakailoa kua latatonu ka kotofa ke takitaki mo e kikite kua kamata mo e fakaoti e tau feleveiaaga ma e fekafekauaga he magaaho fafati. (Kikite e Sepetema 2001 Ha Tautolu a Fekafekauaga he Kautu, Puha Huhu.) Lata foki e leveki fekafekau ke fakatokatoka ke lahi e fonua, tau mekasini, mo e tau tohi.

⁹ Ko e tau motua he taha fakapotopotoaga he tau kua mole ne kamata fakaohooho tuai ke fakamalolo e paionia fakaku, ne tokologa ia lautolu ia ne tuku e tau tohi ole. Ne fakatokatoka e lautolu e tau feleveiaaga lafi ki luga ma e fekafekauaga he fonua​—taha he 5:30 a.m. ma e fakamatala he puhalatu, taha he 3:00 p.m. ma lautolu ka hili e aoga, mo e ke toluaki he 6:00 p.m. ma lautolu ka hili e gahua. Lafi ki ai, tolu e feleveiaaga ne fakatoka ma e fekafekauaga he Aho Faiumu. Ne tali he fakapotopotoaga he 66 ne huhu atu ko e tau paionia fakaku ia Aperila!

10. Maeke fefe e tau magafaoa ke tauteute ke fakamalikiti ha lautolu a gahua?

¹⁰ Ko e ha nakai fakatoka kehe ai taha magaaho he fakaakoaga fakamagafaoa ha mutolu ka hau ke taute e tau foliaga moli ma e tau mahina hane gutu mai? He mitaki e kauauloa mo e fakatokatoka, to liga maeke e falu po ke tau tagata oti he magafaoa ke paionia fakaku. Ka nakai maeke e mena ia, fakatoka e tau foliaga ke fakamalikiti e gahua hau he fakaloaloa atu e tau magaaho hau mai he mena fa mahani ki ai po ke fano he falu magaaho kua lafi ki luga. Kia eke mo taha mena ke liogi ki ai fakamagafaoa. Maeke ia koe ke mauokafua to fakamonuina e Iehova e tau laliaga hau.​—1 Ioa. 3:22.

11. (a) Ko e heigoa e tau mena homo ue atu ne moua mai he poa he Keriso? (e) Ko e matahola fiha mo e matakavi fe ka taute e Fakamanatuaga ha tautolu?

¹¹ Tau Gahua Homo Ue Atu ne Mua he Atua: Ko e fakakiteaga lahi mahaki he fakaalofa ha Iehova ko e mena fakaalofa he hana Tama ko e lukutoto ke hukui aki a tautolu. (1 Ioa. 4:9, 10) Ko e poa lukutoto ko e fakaveaga matafakatufono ma e laveakiaga he tagata mai he agahala mo e mate. (Roma 3:23, 24) Ko e toto ha Iesu ne fakamaligi kua fakamoli aki e maveheaga fou, ati maeke e tau tagata nakai mitaki katoatoa ke hiki mo fanau tane he Atua mo e amaamanakiaga ke pule ke he Kautu he lagi. (Iere. 31:31-34; Mare. 14:24) Mua atu e uho, ko e moui omaoma mitaki katoatoa ha Iesu nukua fakaheke e higoa ha Iehova. (Teu. 32:4; Fakatai 27:11) He Aho Tapu, Aperila 4, ka mole e toaga la, to taute ai e Fakamanatuaga he mate he Keriso ke he lalolagi katoa.

12. Maeke fefe ia lautolu ne fiafia ke aoga he o mai ke he Kaiaga Afiafi he Iki?

¹² Ko e fakamanatu he Kaiaga Afiafi he Iki ka fakakite e tau gahua homo ue atu ha Iehova. Ko e lauga to ati e loto fakaaue ma e tau mena ne taute e Iehova he foaki e lukutoto. Ko e tau tagata fiafia ne fakalataha mai ka maeke ke kitia e falu gahua homo ue atu he Atua. To maeke ia lautolu ke kitia e kaufakalataha mo e fakaalofa mafanatia ne kua fakaako e Iehova ke he tau tagata hana ke fakatata. (Efeso 4:16, 22-24; Iako. 3:17, 18) Ko e o atu ke he magaaho uho lahi nei ka maeke ke fai peehiaga lahi ke he manamanatuaga he tagata, ti manako a tautolu ke tokologa ka fakalataha mai.​—2 Kori. 5:14, 15.

13, 14. Ko hai ha tautolu kua lata ke uiina ke he Fakamanatuaga, mo e taute fefe?

¹³ Uiina e Falu ke O Mai: Kia kamata tauteute tuai mogonei he tohi e tau higoa ha lautolu ka uiina. Kua lata he tau higoa hau ke putoia e tau magafaoa nakai talitonu, tau tuutakaina, tau kapitiga he gahuaaga po ke aoga, tau tagata fakaako Tohi he magaaho fakamua mo e mogonei, mo e tau liu ahi atu oti hau. Ko e tau leveki fakaakoaga tohi kua lata ke putoia ke he tau higoa ha lautolu e ha tagata fakailoa ne lolelole fakaagaga.

¹⁴ Fakaaoga e tau uiina Fakamanatuaga, mo e lomi po ke tohi fakamitaki i ai e tula mo e matakavi he Fakamanatuaga. Po ke liga manako a koe ke fakaaoga e uiina ne tu he kili i tua he Watchtower, Mati 15, 2004, po ke Awake! ia Mati 22, 2004. He tata mai fakahaga a Aperila 4, fakamanatu ki a lautolu ne tohi e koe e tau higoa, he hoko tino atu po ke hea he telefoni.

15. Maeke fefe ia tautolu ke fakakite e fiafia he po ia he Fakamanatuaga?

¹⁵ He Fakamanatuaga: Lali ke hoko tuai atu he po he Fakamanatuaga. Fakakite e fiafia he fakafeleveia mafanatia atu ki a lautolu ne fou mai. (Roma 12:13) Kua ha ha ia koe e matagahua pauaki ma e tau tagata ne uiina e koe. Taute a lautolu ke mafanatia, mo e fakafeleveia a lautolu ke he falu i loto he fakapotopotoaga. Liga maeke ia koe ke lagomatai a lautolu ke kumi e nofoa ne tata ki a koe. Mo e ka nakai fai Tohi Tapu po ke tohi lologo e falu, fakatokatoka ke fakaaoga mo koe he lologo hau po ke taha tagata foki. Ka oti e fakamanatu, kia nofo ke tali e tau huhu ka liga huhu e lautolu. Ka fai ne hau fakamua laia, huhu kua manako nakai a lautolu ke ako fakalahi atu hagaao ke he Kupu mo e finagalo he Atua. Foaki ke taute e fakaakoaga Tohi Tapu he kaina mo lautolu.

16. Ko e heigoa ka maeke ke taute ke lagomatai a lautolu ne o mai ke tupu fakaagaga?

¹⁶ Matutaki ke Lagomatai a Lautolu ne O Mai: Ke he tau fahitapu he mole e Fakamanatuaga, ko lautolu ne o mai ka liga lata ke fakalaulahi atu e lagomatai. Putoia ai a lautolu ne o mai tumau he tau feleveiaaga he taha vaha ka e mogonei kua tote e lafi ke he fakapotopotoaga. Ko e tau motua ka matakaki ki a lautolu nei neke nimo, he kumikumi ke iloa e kakano ne tunoa nakai fai lakaaga fakaagaga a lautolu. Peehi ki a lautolu e mafiti he tau magaaho. (1 Pete. 4:7) Lagomatai oti ke kitia e aoga he omaoma ke he tau tomatomaaga faka-Tohi Tapu ke fakapotopoto fakalataha tumau mo e tau tagata he Atua.​—Hepe. 10:24, 25.

17. Ko e ha kua lata ia tautolu ke fakatumau ke talahau atu e tau gahua homo ue atu ha Iehova?

¹⁷ Kua lahi mahaki e homo ue atu he tau gahua ha Iehova ke iloa katoatoa e tautolu pete foki ka moui tukulagi a tautolu. (Iopu 42:2, 3; Fakama. 3:11) Ko e mena ia, to nakai oti e tau kakano ha tautolu ke fakaheke a ia. Ko e magahala Fakamanatuaga nei kua maeke ia tautolu ke fakakite e loto fakaaue ha tautolu ma e tau gahua homo ue atu ha Iehova he lali pauaki ke fakalahi atu e fekafekauaga ha tautolu.

[Fakafonua he lau 5]

Maeke Nakai a Koe ke Paionia Fakaku he Fakaaoga Taha he Tau Setulu Nei?

Mati Aho Ta Aho Go* Aho Ua* Aho Lo* Aho Tu Aho Fa Aho Fai Mahina Katoa

Aho Takitaha 2 1 1 1 1 1 5 51

Ua e Aho 0 5 0 5 0 0 0 50

Matahiku Fahitapu 5 0 0 0 0 0 8 52

Aperila Aho Ta Aho Go* Aho Ua* Aho Lo* Aho Tu Aho Fa Aho Fai Mahina Katoa

Aho Takitaha 2 1 1 1 1 1 5 50

Ua e Aho 0 0 0 0 5 5 0 50

Matahiku Fahitapu 5 0 0 0 0 0 8 52

Me Aho Ta Aho Go* Aho Ua* Aho Lo* Aho Tu Aho Fa Aho Fai Mahina Katoa

Aho Takitaha 2 1 1 1 1 1 4 51

Ua e Aho 0 5 0 0 0 0 5 50

Matahiku Fahitapu 3 0 0 0 0 0 7 50

* Lima he mahina